Nathane—Moemedi yo a Botegago wa Borapedi bjo bo Sekilego

Ga go bonolo go kgodiša monna yo a nago le matla a bolaodi gore ditsela tša gagwe di kgopame e bile di nyaka gore a di lokiše. Na o be o ka botša motho yo bjalo phošo ya gagwe ge nkabe o be o tseba gore o bolaile motho e le gore a ka timeletša mohlala?

Kgoši Dafida wa Isiraele ya bogologolo o ile a dira bootswa le Batseba gomme a ima. E le go uta sebe sa bona, Dafida o ile a dira gore monna wa gagwe a bolawe gomme a tšea Batseba gore e be mosadi wa gagwe. Dafida o ile a fetša dikgwedi a phela maphelo a mabedi, le gona ga go pelaelo gore o ile a tšwela pele ka mešomo ya gagwe ya bogoši. Eupša Jehofa ga se a ka a fo tlogela dibe tša kgoši ye di sa lemogwe. O ile a romela moporofeta wa gagwe Nathane gore a yo botša Dafida phošo ya gagwe.

Wo e be e le modiro o thata. Ipee boemong bja Nathane. Ga go pelaelo gore go botegela Jehofa le go dumelelana le ditekanyetšo tša gagwe go ile gwa tutueletša Nathane gore a gopotše Dafida ka dibe tša gagwe. Moporofeta yo o be a ka dira bjang se gomme a kgodiše Kgoši Dafida gore o be a swanetše go itshola?

MORUTIŠI YO A LEGO ŠEDI

Go re’ng o sa iphe metsotso e sego kae gore o bale 2 Samuele 12:1-25? Inagane o le boemong bja Nathane ge a be a botša Dafida kanegelo ye: “Go be go na le banna ba babedi bao ba dulago motseng o tee, yo mongwe e le mohumi yo mongwe e le modiidi. Monna wa mohumi o be a na le dinku le dikgomo tše dintši kudu; monna wa modiidi yena o be a se na selo ge e se kwana e tee ya tshadi e nyenyane yeo a bego a e rekile. O be a e hlokomela gomme e be e gola e dula le yena le barwa ba gagwe. E be e eja lerathana la gagwe, e nwela senwelong sa gagwe e bile e robala sehubeng sa gagwe, ya ba bjalo ka morwedi wa gagwe. Ka morago  moeng a etela monna wa mohumi, eupša monna yo a babalela dinku le dikgomo tša gagwe a se tšee le ge e le efe ya tšona gore a hlabele mosepedi yo a tlilego go yena gore a je. A tšea kwana ya tshadi ya monna wa modiidi a e hlabela monna yo a tlilego go yena gore a je.”—2 Sam. 12:1-4.

Dafida—yo ka boyena a kilego a ba modiši—go bonagala a ile a dumela gore ye e be e le taba ya kgonthe. Mohlalosi yo mongwe o šišinya gore: “Mohlomongwe Nathane o be a tlwaetše go tla go yena bakeng sa go tlo kgopelela batho thušo gomme Dafida o ile a nagana gore boemo bjo e be le bjo bongwe bja maemo a bjalo.” Le ge e ba boemo e be e le bjona bjoo, go ile gwa nyaka gore Nathane a botegele Modimo gomme a be le sebete e le gore a tle a boledišane le kgoši go etša ge a dirile. Kanegelo ya Nathane e ile ya galefiša Dafida. O ile a goeletša ka gore: “Ke ikana ka Jehofa yo a phelago gore monna yo a dirago seo o swanetše go hwa!” Ke moka Nathane o ile a mmotša serokaphatla gore: “Monna yoo ke wena!”—2 Sam. 12:5-7.

Ela hloko lebaka leo Nathane a ilego a swaragana le bothata bjo go etša ge a dirile. Ga go bonolo gore motho yo maikwelo a gagwe a kgomegilego ka baka la yo mongwe a lebelele boemo bja gagwe ka monagano o bulegilego. Ka moka ga rena re tlwaetše go ikemelela ka maikemišetšo a go itokafatša ge e ba ditiro tša rena di belaetša. Eupša papišo ya Nathane e ile ya dira gore Dafida a ahlole ditiro tša gagwe a sa lemoge. Kgoši e ile ya bona gabotse gore boitshwaro bjo Nathane a boletšego ka bjona bo be bo šišimiša. Lega go le bjalo, ke ka morago ga gore Dafida a sole boitshwaro bjoo moo Nathane a ilego a utolla gore papišo yeo e be e bolela ka kgoši ye. Ke moka Dafida o ile a bona bogolo bja sebe sa gagwe. Se se ile sa mmea boemong bjo bo swanetšego bja kgopolo gore a amogele kgalemelo. O ile a lemoga gore o “nyaditše” Jehofa ka boitshwaro bja gagwe le Batseba, gomme o ile a amogela kgalemelo yeo e bego e mo swanetše.—2 Sam. 12:9-14; Ps. 51, mantšu a ketapele.

Re ka ithuta’ng go tšwa go se? Maikemišetšo a morutiši wa Beibele ke go thuša batheetši ba gagwe gore ba fihlelele phetho e nepagetšego. Nathane o be a hlompha Dafida gomme ka baka leo o ile a boledišana le yena a le šedi. Nathane o be a tseba gore ka pelong Dafida o be a rata toko le toka. Ka papišo ya gagwe, moporofeta yo o ile a dira gore Dafida a bontšhe dika tše tša Modimo. Le rena re ka thuša batho ba dipelo tše di botegago go kwešiša pono ya Jehofa ka ditaba. Re ka dira seo bjang? Ka go leka go tšweletša seo bona ba tsebago gore se lokile, re dira seo ka ntle le go itira eka boitshwaro bja rena bo kaone goba bomoya bja rena bo ba phagametše. Re laolwa ke Beibele mabapi le se se nepagetšego le seo se fošagetšego, e sego pono ya rena ka noši.

Go feta selo le ge e le sefe, go botegela Modimo ga Nathane go mo thušitše go sola kgoši ye e matla. (2 Sam. 12:1) Potego e swanago e tla re nea sebete sa go emela melao ya motheo e lokilego ya Jehofa ka go tia.

MOKGOTHALETŠI WA BORAPEDI BJO BO SEKILEGO

Go bonagala Nathane le Dafida e be e le bagwera ba pelobohloko, ka gobane Dafida o ile a reela yo mongwe wa barwa ba gagwe leina la Nathane. (1 Dikor. 3:1, 5) Lekga la pele leo Nathane a tšwelelago ka lona pegong ya Beibele, o tšwelela a na le Dafida. Ba be ba rata Jehofa bobedi bja bona. Go molaleng gore kgoši e ile ya bota kahlolo ya Nathane ka ge e ile ya utollela moporofeta yo kganyogo ya yona ya go agela Jehofa tempele. Dafida o itše: “Šefa nna ke dula ka ntlong ya metsedara, mola areka ya Modimo wa therešo yona e le ka tenteng.” Ge a re’alo Nathane a re go kgoši: “Dira se sengwe le se sengwe seo se lego pelong ya gago, gobane Jehofa o na le wena.”—2 Sam. 7:2, 3.

Ka ge e le morapedi yo a botegago wa Jehofa, Nathane ka mafolofolo o ile a dumelelana le leano la Dafida la go aga lefelo la mathomo la borapedi bjo bo sekilego mo lefaseng. Lega go le bjalo, lebakeng leo, go bonagala Nathane a ile a ntšha maikwelo a gagwe go e na le go bolela seo Jehofa a mo laetšego sona. Bošegong bjoo, Modimo o ile a laela moporofeta yoo wa gagwe go iša molaetša o fapanego go kgoši wa gore: Dafida o be a ka se age tempele ya Jehofa. Motho yo a bego a tla e aga e be e tla ba yo mongwe wa barwa ba Dafida. Eupša Nathane o ile a tsebatša gore Modimo o be a dira kgwerano le Dafida ya gore sedulo sa gagwe sa bogoši se be se tla “dula se le gona go iša mehleng ya neng le neng.”—2 Sam. 7:4-16.

Thato ya Modimo e be e sa dumelelane le pono ya Nathane mabapi le go agwa ga tempele. Lega go le bjalo, ka ntle le go ngongorega, moporofeta yo yo a ikokobeditšego o ile a amogela morero wa Jehofa gomme a dira dilo ka go dumelelana le wona. Ruri wo ke mohlala o mobotse woo re ka o latelago ge e ba Modimo  a re phošolla ka tsela le ge e le efe! Ditiro tša Nathane tšeo di ilego tša latela e le moporofeta di bontšha gore o ile a dula a amogelwa ke Modimo. Ge e le gabotse, go bonagala Jehofa a ile a tutueletša Nathane gotee le Gada wa mmoni go hlahla Dafida gore a rulaganye diopedi tše 4 000 tirelong ya tempele.—1 Dikor. 23:1-5; 2 Dikor. 29:25.

MOŠIRELETŠI WA BOGOŠI

Nathane o be a tseba gore Solomone e be e tla ba kgoši yeo e hlatlamago Dafida yo a tšofetšego. Ka gona, Nathane o ile a dira dilo ka bohlale ge Adonija a be a leka go ba mohlatlami mmušong nakong ya ge Dafida a le kgauswi le go hwa. Bohlale le potego gape di ile tša bonagala ditirong tša Nathane. Sa pele o ile a eletša Batseba gore a gopotše Dafida ka keno ya gagwe ya go dira Solomone morwa wa bona kgoši. Ke moka Nathane ka boyena o ile a ema pele ga kgoši gomme a botšiša ge e ba Dafida a dumeletše Adonija gore e be mohlatlami wa gagwe. Ge a lemoga gore taba ye e be e le e kgolo, kgoši yeo e tšofetšego e ile ya laela Nathane le bahlanka ba bangwe ba botegago gore ba tlotše Solomone gomme ba tsebatše gore ke kgoši. Leano la Adonija le ile la folotša.—1 Dikg. 1:5-53.

RADIHISTORI YO A SA IKGANTŠHEGO

Ka kakaretšo, go bolelwa gore Nathane le Gada ke bona ba ngwadilego puku ya pele ya Samuele dikgaolo 25 go ya go 31 gotee le puku ka moka ya bobedi ya Samuele. Mabapi le dipego tše di buduletšwego tšeo di begilwego ka dipukung tšeo, go boletšwe gore: “Ge e le ditaba tša kgoši Dafida, tša mathomo le tša mafelelo, tšona di ngwadilwe mantšung a Samuele wa mmoni, mantšung a moporofeta Nathane le mantšung a Gada wa mmoni.” (1 Dikor. 29:29) Le gona go bolelwa gore Nathane o ile a hlama pego mabapi le “ditaba . . . tša Solomone.” (2 Dikor. 9: 29) Se se ka bolela gore Nathane o ile a tšwela pele a tšea karolo ka mafolofolo ditabeng tša ka bogošing gaešita le ka morago ga lehu la Dafida.

Dilo tše dintši tšeo re di tsebago ka Nathane go ka direga gore di ile tša ngwalwa ke moporofeta yo ka boyena. Lega go le bjalo, ditaba tše dingwe tšeo a sa bolelego selo ka tšona di re botša mo gontši ka yena. Go molaleng gore Nathane e be e le radihistori yo a bego a sa ikgantšhe. O be a sa rate maemo, a se na kganyogo ya go itirela leina. Go ya ka pukuntšu e nngwe ya Beibele, o tšwelela pegong e buduletšwego “go sa bolelwe selo ka setlogo sa gagwe goba lešika la gagwe.” Ga re tsebe selo ka borakgolokhukhu ba Nathane goba ka bophelo bja gagwe.

O TUTUEDITŠWE KE GO BOTEGELA JEHOFA

Go tšwa go dilo tše sego kae tšeo re ithutilego tšona ka Mangwalong mabapi le Nathane, go molaleng gore o be a ikokobeditše eupša a katanela go lwela dithulaganyo tša Modimo. Jehofa Modimo o be a mo neile boikarabelo bjo boima. Naganišiša ka dika tša Nathane tše bjalo ka go botegela Modimo le go tšeela ga gagwe godimo dinyakwa tša Modimo. Katanela go ekiša dika tše bjalo.

Go ka fo se nyakege gore o kgalemele dikgoši tšeo di dirilego bootswa goba go folodiša maano a go menola mmušo. Lega go le bjalo, ka thušo ya Modimo o ka botegela Modimo e bile o ka latela ditekanyetšo tša gagwe tša go loka. O ka buša wa ba morutiši wa therešo yo a nago le sebete eupša a le šedi, wa ba mokgothaletši wa borapedi bjo bo sekilego

[Seswantšho go letlakala 25]

E le mošireletši wa bogoši, Nathane o ile a boledišana le Batseba ka šedi