Go Thabela Kholofelo ya Rena
Go Thabela Kholofelo ya Rena
“[Go na le kholofelo] ya bophelo bjo bo sa felego bjo Modimo yo a ka se kego a aketša a bo holofeditšego mehleng ya bogologolo.”—TITO 1:2.
E LE POELETŠO
․․․․․
Re tseba bjang gore go na le lethabo legodimong ge yo mongwe wa batlotšwa a botega go fihla lehung?
․․․․․
Go phethagatšwa ga kholofelo ya dinku tše dingwe go tswalana bjang le go phethagala ga kholofelo ya batlotšwa?
․․․․․
Gore re bone ge kholofelo ya rena e phethagala, ke ‘ditiro dife tše kgethwa tša boitshwaro’ le ‘mediro ya boineelo go Modimo’ tšeo re swanetšego go di bonagatša?
1. Kholofelo yeo Jehofa a re filego yona e ka re thuša bjang go kgotlelela?
JEHOFA ke “Modimo yo a neago kholofelo.” Mantšu ao a boletšwe ke moapostola Paulo, gomme a oketša ka gore Jehofa a ka ‘re tlatša ka lethabo le khutšo ka go mmota ga rena, e le gore re atelwe ke kholofelo ka matla a moya o mokgethwa.’ (Baroma 15:13) Ge e ba kholofelo ya rena e ata ka go rena, re tla kgona go kgotlelela boemo le ge e le bofe bjoo bo ka re welago, gomme dipelo tša rena di tla ba di tletše lethabo le khutšo. Go swana le Bakriste ba tloditšwego, kholofelo e bjalo e tla ba “bjalo ka tshetledi ya sekepe ya maphelo a rena, e kgonthišeditšwego le e tiilego” go Bakriste ba bangwe. (Baheb. 6:18, 19) Kholofelo ya rena ke selo seo re ka itshwarelelago ka sona nakong ya mathata a magolo a bophelo, e bile ke selo seo se tlago go re thuša gore re se gogolwe ke dipelaelo goba ra hlaelelwa ke tumelo.—Bala Baheberu 2:1; 6:11.
2. Ke dikholofelo dife tše pedi tšeo di hwetšwago gare ga Bakriste lehono, gomme ke ka baka la’ng “dinku tše dingwe” di kgahlišwa ke kholofelo yeo batlotšwa ba nago le yona?
2 Bakriste bao ba phelago mehleng yeno ya bofelo ba na le e nngwe ya dikholofelo tše pedi tšeo Modimo a re filego tšona. Ditho tše di šetšego tša “mohlatswana” wa Bakriste ba tloditšwego di na le kholofelo ya go phela bophelo bja go se hwe kua legodimong e le dikgoši le baperisita le Kriste Mmušong wa gagwe. (Luka 12:32; Kut. 5:9, 10) “Lešaba le legolo” la “dinku tše dingwe” leo palo ya lona e lego e kgolo kudu le na le kholofelo ya go phela ka mo go sa felego lefaseng la paradeise e le balata ba Mmušo wa Mesia. (Kut. 7:9, 10; Joh. 10:16) Dinku tše dingwe ga se tša swanela go lebala gore go phologa ga tšona go ithekgile ka go thekga ga tšona ka mafolofolo ‘bana babo’ Kriste ba tloditšwego bao ba sa lego mo lefaseng. (Mat. 25:34-40) Batlotšwa ba tla hwetša moputso wa bona, eupša kholofelo yeo dinku tše dingwe di nago le yona e tla phethagatšwa e le ka kgonthe. (Bala Baheberu 11:39, 40.) Sa pele, anke re hlahlobeng kholofelo yeo e beetšwego batlotšwa.
‘KHOLOFELO E PHELAGO’ YA BAKRISTE BA TLODITŠWEGO
3, 4. Bakriste ba tloditšwego ba ‘tswalwa bjang lefsa kholofelong e phelago,’ gomme kholofelo yeo ke efe?
3 Moapostola Petro o ngwaletše Bakriste ba tloditšwego mangwalo a mabedi, bona bao a ilego a ba bitša “ba ba kgethilwego.” (1 Pet. 1:1) O neile tsebišo ka botlalo mabapi le kholofelo e kgahlišago yeo e beetšwego mohlatswana o monyenyane. Lengwalong la gagwe la pele, Petro o ngwadile gore: “A go tumišwe Modimo le Tatago Morena wa rena Jesu Kriste, gobane go ya ka kgaugelo ya gagwe e kgolo o re tswetše lefsa kholofelong e phelago ka go tsoga ga Jesu Kriste bahung, go ya bohweng bjo bo sa senyegego le bjo bo sa šilafalago le bjo bo sa hwelelego. Le bo boloketšwe magodimong, lena bao le šireleditšwego ke matla a Modimo ka tumelo bakeng sa phološo e loketšego go utollwa lebakeng la mafelelo. Le thabile kudu ka baka la se.”—1 Pet. 1:3-6.
4 Palo e lekanyeditšwego ya Bakriste bao Jehofa a ba kgethilego gore ba be le Kriste Mmušong wa legodimong e ‘tswalwa lefsa’ gore e be barwa ba Modimo bao ba tloditšwego ka moya. Ba tlotšwa ka moya o mokgethwa gore e be dikgoši le baperisita gotee le Kriste. (Kut. 20:6) Petro o bolela gore ‘go tswalwa lefsa mo’ go ba bulela sebaka sa go ba le ‘kholofelo e phelago,’ e lego yeo a e bitšago “[bohwa] bjo bo sa senyegego le bjo bo sa šilafalago le bjo bo sa hwelelego” bjo ba bo boloketšwego “magodimong.” Ga go makatše ge batlotšwa ba “thabile kudu” ka baka la kholofelo ya bona e phelago! Lega go le bjalo, taba ya gore ba tla bona kholofelo yeo e phethega e ithekgile ka go botega ga bona.
5, 6. Ke ka baka la’ng Bakriste ba tloditšwego ba swanetše go dira sohle seo se lego matleng a bona go kgonthišetša gore go biletšwa ga bona legodimong go a phethagala?
5 Lengwalong la gagwe la bobedi, Petro o kgothaleditše Bakriste ba tloditšwego gore ‘ba dire sohle se ba ka se kgonago gore ba kgonthišetše go bitšwa le go kgethwa ga bona.’ (2 Pet. 1:10) Ba swanetše go katanela go ba le dika tša Bokriste tše bjalo ka tumelo, boineelo go Modimo, borutho bja borwarre le lerato. Petro o boletše gore: “Ge dilo tše di le gona go lena di bile di falala, di tla le thibela gore le se ke la ba ba sa šomego goba ba sa enywego.”—Bala 2 Petro 1:5-8.
6 Molaetšeng wa gagwe o yago go bagolo ba tloditšwego ka moya ba phuthegong ya lekgolo la pele la nywaga ya Filadelefia kua Asia Minor, Kriste yo a tsošitšwego o itše: ‘Gobane le bolokile lentšu la mabapi le kgotlelelo ya ka, le nna ke tla le lota nakong ya moleko wo o tlelago lefase ka moka, go tlo leka bao ba dulago go lona. Ke tla ka pela. Dulang le kakatletše seo le nago le sona gore go se be le yo a tšeago mphapahlogo wa lena.’ (Kut. 3:10, 11) Ge Mokriste yo a tloditšwego a be a ka se botege, o be a ka se amogele “mphapahlogo wo o sa onalego wa letago” woo o holofeditšwego bakgethwa bao ba tlago go botega go fihla lehung.—1 Pet. 5:4; Kut. 2:10.
GO TSENA MMUŠONG
7. Ke kholofelo efe e kgahlišago yeo Juda a boletšego ka yona lengwalong la gagwe?
7 Mo e ka bago ka ngwaga wa 65 C.E., Juda yo e lego ngwanabo Jesu ka motswadi o tee o ile a ngwalela Bakristegotee le yena ba tloditšwego lengwalo, gomme a bolela ka bona e le “bao ba biditšwego.” (Juda 1; bapiša le Baheberu 3:1.) Morero wa gagwe e be e le go ba ngwalela lengwalo leo le bolelago ka kholofelo e kgahlišago ya phologo yeo Bakriste bao ba bileditšwego Mmušong wa Modimo wa legodimong ba “nago le yona ka mo go swanago.” (Juda 3) Gaešita le ge go be go na le ditaba tše dingwe tšeo di bego di akgofile tšeo a bego a nyaka go bolela ka tšona, mafelelong a lengwalo la gagwe le lekopana o ile a bolela ka kholofelo e kgahlišago yeo Bakriste ba tloditšwego ba bego ba na le yona, gomme a ngwala gore: “Bjale go yo a kgonago go le diša gore le se kgopše le go le emiša le hloka sekodi ponong ya letago la gagwe ka lethabo le legolo, go Modimo a nnoši Mophološi wa rena ka Jesu Kriste Morena wa rena, e be letago, bogolo, matla le bolaodi lebakeng la bosafelego bjohle bjo bo fetilego le bjale le go iša bosafelego ka moka.”—Juda 24, 25.
8. Ka go dumelelana le Juda 24, ke’ng seo se bontšhago gore go ba le lethabo legodimong ge yo mongwe wa batlotšwa a botega go fihla lehung?
8 Ruri yo mongwe le yo mongwe wa Bakriste ba botegago ba tloditšwego o swanetše go itšhireletša gore a se wele tshenyegong. Kholofelo yeo ba nago le yona yeo e theilwego Beibeleng ke ya gore Jesu Kriste o tla ba tsoša bahung, a dira gore ba tšwelele pele ga Modimo ba thabile kudu e le ba phethagetšego moyeng. Ge yo mongwe wa batlotšwa a ehwa a botega, o hwa a na le kgodišego ya go “tsošwa e le mmele wa moya,” a tsošwa “e le [wa mmele] o sa senyegego . . . , e le wa letago.” (1 Bakor. 15:42-44) Ge e ba go na le “lethabo le legolo legodimong ka baka la modiradibe o tee yo a itsholago,” nagana gore go ba le lethabo le lekaakang malapeng a legodimong ge yo mongwe wa bana babo Kriste yo a tloditšwego ka moya a fetša tsela ya gagwe ya bophelo a botega. (Luka 15:7) Jehofa le dibopiwa tše di botegago tša moya ba tla thaba gotee le motlotšwa yoo a tlago go ba a amogela moputso wa gagwe ka “lethabo le legolo.”—Bala 1 Johane 3:2.
9. Batlotšwa ba botegago ba ‘abelwa bjang ka mo go humilego’ go tsena Mmušong, gomme kholofelo ye e kgoma bjang batlotšwa bao ba sa lego mo lefaseng?
9 Mabapi le yona taba ye, Petro o ngwaletše Bakriste ba tloditšwego gore ge e ba ba kgonthišetša gore go biletšwa ga bona legodimong go a phethagala ka gore ba botege, “[ba] tla abelwa ka mo go humilego go tsena mmušong o sa felego wa Morena le Mophološi wa [bona] Jesu Kriste.” (2 Pet. 1:10, 11) Go tsena ga bona gore ba hwetše moputso wa bona wa legodimong go tla “[abja] ka mo go humilego,” ke gore, dika tša bona tša Bokriste di tla ba di phadima. Taba ya gore ba tla o “abelwa ka mo go humilego” e ka ba e bolela le gore bona ba bao ba ilego ba ikgafa lebelong la bophelo ba tla šegofatšwa ka tsela e sa bapišwego le selo. Ba ka lebelela morago ka dipelo tše di thabilego le tšeo di tletšego tebogo tseleng yeo ba e phetšego ka potego. Ga go pelaelo gore tebelelo ye e nea Bakriste ba tloditšwego bao ba lego mo lefaseng matla a go ‘hlamela menagano ya bona go tšwela pele ba dira modiro.’—1 Pet. 1:13.
‘MOTHEO WA KHOLOFELO’ YA DINKU TŠE DINGWE
10, 11. (a) Ke kholofelo efe yeo e beetšwego dinku tše dingwe? (b) Go phethagala ga kholofelo ya mo lefaseng go tswalana bjang le Kriste le “go utollwa ga barwa ba Modimo”?
10 Moapostola Paulo o ngwadile ka kholofelo e kgahlišago ya “barwa ba Modimo” bao ba tloditšwego ka moya, bao e lego “bajabohwagotee” le Kriste. Ke moka o ile a bolela ka kholofelo e kgahlišago yeo Jehofa a e swaretšego palo e sa balegego ya dinku tše dingwe, a re: “Tlholo [yeo e lego batho] e letetše ka go fagahla go utollwa ga barwa ba Modimo [e lego batlotšwa]. Gobane tlholo e ile ya dirwa gore e ikokobeletše lefeela, e sego ka thato ya yona eupša ka yo a e kokobeditšego motheong wa kholofelo ya gore tlholo ka boyona le yona e lokollwe bokgobeng bja tshenyego gomme e be le tokologo ya letago ya bana ba Modimo.”—Baroma 8:14-21.
11 ‘Motheo wa kholofelo’ ya batho o theilwe ke Jehofa ge a be a holofetša go ba phološa go “noga ya kgale,” e lego Sathane Diabolo, ka gore a diriše “peu” e holofeditšwego. (Kut. 12:9; Gen. 3:15) Karolo ya motheo ya “peu” yeo e be e le Jesu Kriste. (Bagal. 3:16) Ka lehu la gagwe le go tsošwa ga gagwe, Jesu o theile motheo o tiilego wa gore batho ba tle ba lokollwe bokgobeng bja sebe le lehu. Go phethagala ga kholofelo ye go tswalana le “go utollwa ga barwa ba Modimo.” Batlotšwa ba tagafaditšwego ke karolo ya bobedi ya “peu” yeo. Ba tla “utollwa” ge ba tlo tšea karolo le Kriste go fedišeng tshepedišo e kgopo ya dilo ya Sathane. (Kut. 2:26, 27) Seo se tla dira gore go tle go phološwe dinku tše dingwe, e lego tšeo di phologago masetlapelo a magolo.—Kut. 7:9, 10, 14.
12. Go utollwa ga batlotšwa go tla hola bjang batho ka tsela e kgahlišago?
12 A kimologo e kgolo gakaakang yeo e tlago go thabelwa ke “tlholo” yeo e lego batho nakong ya Pušo ya Kriste ya Nywaga e Sekete! Ka nako yeo, “barwa ba Modimo” ba tagafaditšwego ba tla “utollwa” ka mo go oketšegilego ge ba šoma e le baperisita le Kriste, ba diriša mehola ya sehlabelo sa Jesu gore batho ba holege. Ka ge “tlholo” yeo e lego batho e tla ba balata ba Mmušo wa legodimong, e tla thoma go thabela go lokollwa ditlamoragong tša sebe le lehu. Batho ba kwago ba tla ‘lokollwa bokgobeng bja tshenyego’ ganyenyane-ganyenyane. Ge e ba ba tšwela pele ba botegela Jehofa nakong ya Nywaga e Sekete le nakong ya teko ya mafelelo yeo e tlago go latela mafelelong a nywaga yeo, gona maina a bona a tla ngwalelwa sa ruri “[lengwalong] la go phuthwa la bophelo.” Ba tla tsena “[tokologong] ya letago ya bana ba Modimo.” (Kut. 20:7, 8, 11, 12) Yeo e tloga e le kholofelo e kgahlišago!
GO BOLOKA KHOLOFELO YA RENA E PHELA
13. Kholofelo ya rena e theilwe godimo ga eng, gomme Kriste o tla utollwa neng?
13 Mangwalo a mabedi a buduletšwego a Petro a na le tsebišo e ntši yeo e holago batlotšwa le ba dinku tše dingwe gore ba boloke kholofelo ya bona e phela. O bontšhitše gore kholofelo ya bona ga se ya ithekga ka mediro ya bona, eupša e ithekgile ka botho bjo bogolo bja Jehofa. O ngwadile gore: “Dulang le hlaphogetšwe monaganong ka mo go feletšego; holofelang botho bjo bogolo bja Modimo bjo le tlago go bo bontšhwa nakong ya go utollwa ga Jesu Kriste.” (1 Pet. 1:13) Kriste o tla utollwa ge a etla go tlo putsa balatedi ba gagwe ba botegago le go tlo phethagatša dikahlolo tša Jehofa godimo ga bao ba sa boifego Modimo.—Bala 2 Bathesalonika 1:6-10.
14, 15. (a) Re swanetše go tsepamiša megopolo ya rena go eng e le gore re boloke kholofelo ya rena e phela? (b) Petro o neile keletšo efe?
14 Gore re boloke kholofelo ya rena e phela, re swanetše go tsepamiša megopolo ya rena le go dira dilo maphelong a rena re naganne ka go tla ga “letšatši la Jehofa.” Letšatšing leo go tla fedišwa “magodimo” ao a lego gona lehono, goba yona pušo ya motho, gwa fedišwa le “lefase,” e lego lekoko le kgopo la batho gotee le “dikarolo” tša lona. Petro o ngwadile gore: “Le hlokomeleng mohuta wa batho bao le swanetšego go ba bona . . . , ge le dutše le letile e bile le dula le nagana ka go ba gona ga letšatši la Jehofa, leo ka lona magodimo a tlago go fedišwa ka mollo gomme dikarolo tša ona tša tologa ka baka la go fiša kudu!”—2 Pet. 3:10-12.
15 “Magodimo” a gona bjale le “lefase” di tla tšeelwa sebaka ke “magodimo a mafsa [pušo ya Mmušo wa Kriste] le lefase le lefsa [lekoko le lefsa la lefase].” (2 Pet. 3:13) Ke moka motheong wa therešo ya gore re ‘letile,’ goba gore re bolokile kholofelo ya rena e phela, e le gore re bone ge go etla lefase le lefsa leo re le holofeditšwego, Petro o ile a nea keletšo e lebanyago ya gore: “Ka gona baratiwa, ka ge le letetše dilo tše, dirang sohle se le ka se kgonago gore mafelelong a le hwetše le se na sepatso le bile le hloka sekodi gomme le le khutšong.”—2 Pet. 3:14.
GO SEPELA KA GO DUMELELANA LE KHOLOFELO YA RENA
16, 17. (a) Ke ‘ditiro dife tše kgethwa tša boitshwaro’ le ‘mediro ya boineelo go Modimo’ tšeo re swanetšego go di bonagatša? (b) Kholofelo ya rena e tla phethagatšwa bjang?
16 Ga se ra swanelwa feela ke go boloka kholofelo ya rena e phela, eupša re bile re swanetše go phela ka go dumelelana le kholofelo yeo re nago le yona. Re swanetše go hlokomela mohuta wa batho bao re swanetšego go ba bona moyeng. “[Ditiro] tše kgethwa tša boitshwaro” di akaretša ‘go dula ga rena re itshwere gabotse gare ga ditšhaba.’ (2 Pet. 3:11; 1 Pet. 2:12) Re swanetše go “ratana.” Seo se akaretša go dira sohle seo re ka se kgonago go boloka botee bja rena bja borwarre bja lefase ka bophara go akaretša le gare ga bao ba lego diphuthegong tša gabo rena. (Joh. 13:35) “[Mediro] ya boineelo go Modimo” ke mediro yeo e bontšhago gore re na le tswalano ya kgauswi le Jehofa. Seo se akaretša tsela yeo re rapelago ka yona, gaešita le go bala ga rena Beibele letšatši le letšatši, go ithuta ka mo go tseneletšego re le noši, borapedi bja lapa le go tšea karolo ka mafolofolo go boleleng ‘ditaba tše dibotse tša Mmušo.’—Mat. 24:14.
17 Yo mongwe le yo mongwe wa rena o nyaka go ba mohuta wa motho yoo Jehofa a mo amogelago le yoo a tlago go mo phološa nakong ya ge tshepedišo ye ya gona bjale e kgopo ya dilo e “fedišwa.” Ka go re’alo re tla bona go phethagatšwa ga kholofelo ya rena, “[kholofelo] ya bophelo bjo bo sa felego bjo Modimo yo a ka se kego a aketša a bo holofeditšego mehleng ya bogologolo.”—Tito 1:2.
[Dipotšišo tša Thuto]
[Seswantšho go letlakala 22]
Bakriste ba tloditšwego ba ‘tswalwa lefsa kholofelong e phelago’
[Seswantšho go letlakala 24]
Boloka kholofelo e phela ka lapeng la gago
