Ka ge go anega Lois Didur

O boletše gakae bophelong bja gago mantšu a swanago le a: ‘Ke duma ge nkabe ke se ka dira phetho yeo ke e dirilego’? Ge e le gabotse, ka morago ga go fetša nywaga e 50 ke le tirelong ya nako e tletšego, ga ke kgone go nagana ka selo le ge e le sefe seo se sego bose ka mo go sa felego seo se ka tlišwago ke go ba ka seatleng sa le letona la Jehofa. E re ke go botše lebaka.

KE BELEGWE ka 1939 gomme ka golela motsemagaeng wa Saskatchewan, Canada, gotee le bana bešo ba bane le kgaetšedi. Bophelo melaleng ya polaseng bo be bo thabiša. Ka letšatši le lengwe, Dihlatse tša Jehofa di ile tša tla ka gešo gomme tša boledišana le tate, gomme ke ile ka di botšiša ge e ba Modimo a na le leina. Di ile tša re bontšha leina Jehofa go Psalme 83:18. Seo se ile sa ntira gore ke nyake go tseba mo go oketšegilego ka Modimo le Lentšu la gagwe.

Nywageng yeo, bana ba dipolaseng ba be ba eya dikolong tša magaeng tšeo di nago le phapoši e tee go ba go fihla mphatong wa seswai. Ba be ba eya sekolong ka dipere goba ba sepela dikhilomithara tše dintši ka maoto. Morutiši o be a hlokomelwa ke malapa a seleteng seo. Ngwageng o mongwe, e ile ya ba sebaka sa gore morutiši yo mofsa John Didur, a amogelwe ke batswadi ba ka.

Ke be ke sa tsebe gore lesogana le le lona le rata Lentšu la Modimo. Nakong e nngwe ke ile ka reta bokomanisi le bosošalise tšeo tate a bego a di rata ka nako yeo. John o ile a re ka boleta go nna: “Ga go na motho yo a nago le tshwanelo ya go buša batho ba bangwe. Ke Modimo feela yo a nago le tshwanelo yeo.” Seo se ile sa lebiša dipoledišanong tše dintši tše di kgahlišago.

Ka ge a belegwe ka 1931, John o ile a kwa ka mathata a ntwa. Ge go be go thoma Ntwa ya Korea ka 1950, o ile a botšiša banna ba bantši bao ba tsenago dikereke lebaka leo ba tšeago karolo dintweng. Ka moka ga bona ba ile ba re Bakriste ba dumeletšwe go lwa. Ka morago o ile a botšiša Dihlatse tša Jehofa potšišo e swanago. Di ile tša mmontšha go tšwa Mangwalong gore boemo bja Bakriste ba lekgolong la pele la nywaga e be e le bofe ditabeng tša ntwa. John o ile a kolobetšwa ka 1955. Nna  ke ile ka kolobetšwa ngwageng o latetšego. Bobedi bja rena re be re tseba gore re nyaka go hlankela Jehofa maphelong a rena le ka matla a rena. (Ps. 37:3, 4) Ka July 1957, nna le John re ile ra nyalana.

Dikopano tše dintši di be di wela letšatšing la segopotšo sa rena sa lenyalo. Re be re thabela go ba gare ga batho ba bangwe ba diketekete bao ba bego ba hlompha lenyalo. Kopano ya rena ya pele ya ditšhabatšhaba e bile ka 1958. Re ile ra tloga Saskatchewan ra ya New York City ka koloi re le ba bahlano. Re sepetše beke ka moka, re otlela mosegare eupša bošego re robala ka tenteng. Nagana ka lethabo leo re ilego ra ba le lona ge ngwanabo rena yo re kopanego le yena kua Bethlehem, Pennsylvania, a re laletša go tlo robala lapeng la gagwe bošegong bjoo! Go bontšha ga gagwe botho go ile gwa dira gore re goroge New York City re hlwekile e bile re bogega. Kopano yeo e kgolo e ile ya gatelela go rena lethabo leo le sa lekanywego le selo la go hlankela Jehofa! Go bile feela ka ge mopsalme a ngwadile gore: “Ka seatleng sa gago sa le letona go bose ka mo go sa felego.”—Ps. 16:11.

GO BULA MADIBOGO

Ngwaga ka morago ga moo, ka 1959, re be re bula madibogo re dula ka kharabaneng mmotong wa melala ya Saskatchewan. O be o ka kgona go bona bokgole bja dikhilomithara tše dintši, gomme bokgole bjoo e be e le tšhemo ya rena.

Ka letšatši le lengwe, re ile ra amogela lengwalo le le kgahlišago leo le tšwago ofising ya lekala. Ke ile ka kitima ka leba moo John a bego a šoma ka terekere gona. Lengwalo leo le be le re laletša go yo hlankela re le babulamadibogo ba kgethegilego kua Red Lake, Ontario. Ka ge re be re sa tsebe moo lefelo leo le bego le le gona, ka go akgofa re ile ra tšea mebapa gomme ra le nyaka.

Ruri lefelo le le be le fapane kgole le la melaleng! Ga bjale re be re kgona go bona dithokgwa tše di boifišago le ditorotswana tšeo di bego di agilwe kgauswi le meepo ya gauta. Ge re be re tsoma lefelo la bodulo ka letšatši la pele, ngwanenyana yo mongwe o ile a kwa seo re bego re se bolela le moagišani wa gabo. O ile a kitimela go mmagwe yoo a ilego a re nea marobalo bošegong bjoo. Malao a be a le ka phapošing ya ditšhila yeo e bego e le ka lebatong la ka tlase. Letšatšing la go latela, re ile ra hwetša madulo ntlong yeo e agilwego ka mapolanka ya diphapoši tše pedi yeo e bego e se na meetse e bile e se na phahlo eupša e fo ba le mpaola feela. Re ile ra reka dilo tše mmalwa lebenkeleng la go rekiša dilo tšeo di šomišitšwego gomme go se go ye kae ra ikwa re kgotsofetše.

Go be go se na phuthego monabo wa dikhilomithara tše 209 go tloga moo re bego re le gona. Bašomi ba bantši ba meepong ya gauta ba be ba etšwa Yuropa, gomme ba re kgopela gore re ba tlele le Dibeibele ka maleme a gabo bona. Go se go ye kae, re ile ra ba le dithuto tše di tšwelago pele tša Beibele tše 30. Go ile gwa hlongwa phuthego e nyenyane ka dikgwedi tše tshelelago.

Monna wa mosadi yoo re bego re ithuta le yena o ile a leletša moruti wa gagwe mogala gore a tlo botša mosadi wa gagwe lebaka leo seo re bego re mo ruta sona se bego se fošagetše. Poledišanong yeo, moruti yoo o ile a re re swanetše go ruta thuto ya Borarobotee gare ga dithuto tša rena. Mosadi yoo o ile a tla le Beibele ya bona ya Khatolika gomme a kgopela moruti gore a tiišetše dilo tšeo a bego a di bolela. Moruti yoo o ile a lahlela Beibele yeo tafoleng, a bolela gore go be go sa nyakege gore a tiišetše selo le ge e ka ba sefe. Ge a be a etšwa, o ile a bolela ka Seukraine gore ba swanetše go re raka e bile ba se sa tsoga ba re amogetše. O be a sa tsebe gore John o tseba Seukraine!

Nakwana ka morago ga moo, re ile ra tloga Red Lake ka gobane John o be a swanetše go tlwaeletšwa modiro wa tikologo. Lega go le bjalo, ka morago ga ngwaga ge John a be a nea polelo ya kolobetšo kopanong ya selete, monna wa mosadi yola o be a le gare ga bao ba yago kolobetšong! Tiragalo yela ya moruti e ile ya mo dira gore a thome go inyakela dikarabo ka Beibeleng.

 GO SWAREGA MODIRONG WA BOSEPEDI

Modirong wa bosepedi, re bile le lethabo la moswananoši la go dula le malapa a fapafapanego. Re ile ra gwerana kgauswi le bao ba bego ba re amogela malapeng a bona. Nakong e nngwe re ile ra amogelwa lapeng le lengwe moo phapoši ya gona ya lebatong la ka godimo e bego e sa ruthele marega. Mesong, re be re ekwa kgaetšedi yo a tšofetšego a tsena ka phapošing ya rena gomme a gotša mollo ka setofong se senyenyane. Ka morago, o be a boa a swere sekotlelo le meetse a go fiša e le gore re ka itokišetša letšatši leo. Ke ile ka ithuta go gontši ditirong tša gagwe tša botho.

Modiro wa bosepedi o nthušitše go batamela kgauswi le Jehofa. Tikologo e nngwe kua Alberta e be e akaretša toropo ya meepong ka Leboa la Kgole, moo go bego go dula kgaetšedi yo tee. Mokgatlo wa Jehofa o be o lebelela bjang kgaetšedi yo yo a lego lekatana? Dikgweding tše dingwe le tše dingwe tše tshela re be re eya moo ka sefofane gomme re fetša beke re na le yena tirelong gaešita le go swara diboka gotee le yena go fo swana le ge re dira phuthegong e kgolo ya toropong. E be e le kgopotšo e lerato ya kamoo Jehofa a hlokomelago batho bao ba swanago le dinku.

Re be re ikgokaganya le batho ba bantši bao ba bego ba re amogela malapeng a bona. Seo se be se nkgopotša e nngwe ya dimpho tša pele tšeo John a nneilego tšona—lepokisi la mebalabala leo le bego le tletše ka matlakala a go ngwalela. Re be re thabela ka mo go tletšego go ikgokaganya le bagwera ba rena ka go ba ngwalela mangwalo re diriša matlakala ao. Ke sa dutše ke tšeela godimo lepokisi leo.

Ge re be re le tikologong e nngwe kua Toronto, ngwanabo rena yo a tšwago Bethele ya Canada o ile a re leletša mogala a re botšiša ge e ba re ka thabela go tla Bethele. Na o a tseba gore o be a nyaka karabo neng? O ile a re: “Letšatšing le le latelago ge e ba go kgonega!” Re ile ra mo araba letšatšing la go latela.

TIRELO YA BETHELE

Phetogo e nngwe le e nngwe ya kabelo e re bontšhitše dibopego tše bose tšeo di tšwago seatleng sa Jehofa. Go bile bjalo le ge re eya Bethele ka 1977. Go ba ga rena le ba bangwe ba batlotšwa go ile gwa re dira gore re se bone feela dimelo tša bona eupša re bone gape le go tšeela ga bona godimo Lentšu la Modimo.

Bophelo bjo bofsa bjo re bego re bo phela Bethele bo be bo le bose. Ka mohlala, diaparo tša rena di be di dula ka otoropong go e na le go dula ka gare ga sutukheise e bile re be re le phuthegong e tee. Ka ntle le go šoma kabelong ya ka, go sepediša batho bao ba tlilego go boga meago ya Bethele go be go nthabiša. Ke be ke hlalosetša bana babo rena mošomo wo o bego o dirwa Bethele, ke ekwa seo ba se bolelago gomme ke araba dipotšišo tša bona.

Nywaga e ile ya feta kapejana gomme ka 1997, John a laletšwa go ba gona Sekolong sa Ditho tša Komiti ya Lekala kua Patterson, New York. Ka morago ga moo, re ile ra botšišwa ge eba re ka thabela go ya Ukraine. Re ile ra kgothaletšwa go naganišiša ka taba yeo ka kelohloko le ka thapelo. Mantšiboeng a letšatši leo re be re šetše re tseba gore karabo ya rena e tla ba ee.

PHETOGO E NNGWE—UKRAINE

Re ile ra ba gona kopanong e kgolo ya ditšhabatšhaba kua St. Petersburg, Russia ka 1992 gomme ra ba go ye nngwe kua Kiev, Ukraine ka 1993. Dikopano tšeo di ile tša dira gore re rate bana babo rena ba Bohlabela bja Yuropa. Madulo a rena a mafsa a ile a ba lebatong la bobedi la ntlo ya kgale kua Lviv, Ukraine. Mafasetere a yona a be a lebane le jarata yeo e bego e na le serapana, mogogonope o mogolo o mohwibidu le dikgogo tša dithole. Go be go nyakile go swana le go ba polaseng ya Saskatchewan. Re be re dula lapeng leo re le ba lesomepedi. Re be re swanetše go feta toropo e kgolo letšatši le lengwe le le lengwe go yo šoma Bethele.

Na o a tseba gore re ile ra ikwa bjang ka go ba Ukraine? Re ile ra ithuta go ba le boikokobetšo ge re be re dutše gare ga batho ba bantši bao ba ilego ba ba ka tlase ga diteko, dithibelo le go golegwa. Lega go le bjalo, ba  ile ba dula ba tiile tumelong. Ge re be re ba reta ba be ba fo re: “Re be re dira se bakeng sa Jehofa.” Le ka mohla ba be ba sa ikwe ba lahlegile. Le gona bjale, ge o leboga yo mongwe wa bona bakeng sa tiro e botho yeo a e dirilego, o tla kwa a re: “Leboga Jehofa,” ka go re’alo a lemoga gore Jehofa ke Mothopo wa dilo tšohle tše dibotse.

Kua Ukraine, batho ba bantši ba sepela ka maoto go ya dibokeng, ka gona ba ba le nako ya go boledišana le go kgothatšana. Ba ka sepela lebaka la iri goba go feta moo. Go na le diphuthego tša ka godimo ga tše 50 kua Lviv, tšeo tše 21 tša tšona di dirišago moago o mogolo wo o nago le Diholo tše mmalwa tša Mmušo. Ka Disontaga, ka kgonthe ke selo se kgahlišago go bona bana babo rena ba etla dibokeng ka bontši.

Go se go ye kae re ile ra ikwa re lokologile ge re na le bana babo rena le dikgaetšedi bao ba nago le mekgwa e mebotse le bao ba ratago go hlokomela batho ba bangwe. Ge ke eba le bothata bja go kwešiša leleme, e lego bothata bjoo ke sa dutšego ke na le bjona, ga ba mphelele pelo. Gantši ponagalo ya bona ya mahlo e bontšha gabotse seo ba se bolelago.

Mohlala wa go botana e le ka kgonthe magareng ga bana ba babo rena o ile wa bonagala gabotse kopanong ya ditšhabatšhaba ka 2003 kua Kiev. Re be re sa tšwa go theogela polatefomong ya leemaema ya setimela yeo e bego e le ka tlase ga mmu, ge ngwanenyana yo mongwe a be a etla go rena gomme ka boleta a re: “Ke timetše. Ga ke bone makgolo.” Ngwanenyana yo o be a bone dipetšhe tša rena gomme a tseba gore re be re le Dihlatse. O be a na le sebete e bile a sa lle. Mosadi wa molebeledi wa tikologo yo a bego a na le rena, ka botho o ile a tšea ngwanenyana yoo a mo iša Lefapheng la Tšeo di Thwetšwego lepatlelong la kopano. Go se go ye kae, ngwanenyana yoo o ile a kopanywa le makgolo’agwe. Ke ile ka kgongwa ke tsela yeo ngwanenyana yo a bego a tloga a re bota ka yona, gaešita le ka gare ga diketekete tša mašaba a batho.

Bana babo rena ba go tšwa dinageng tše dintši ba ile ba tla Ukraine ka May 2001 ge go be go kgakolwa meago ya rena e mefsa ya lekala. Ka morago ga polelo e kgethegilego lepatlelong mesong ya Sontaga, bana babo rena ba bantšintši ba ile ba rotoga ka maoto go tlo boga Bethele e mpsha. Ruri seo ga se lebalege! Ke be ke kgomegile kudu go bona bana ba babo rena bao ba bego ba ikhomoletše e bile ba laolega. Seo se ile sa nweletša go leboga ga ka bose bjo bo tlišwago ke go hlankela Modimo.

PHETOGO E KGOLO

Ka manyami, ka 2004 go ile gwa hwetšwa gore John o na le kankere. Re ile ra ya Canada gore a yo alafša moo. Karolo ya pele ya kalafo ya gagwe ya go dirišwa ga dikhemikhale (chemotherapy) e be e le e matla go feta kamoo mmele wa gagwe o bego o ka kgotlelela ka gona, e bile o ile a fetša dibeke a le ka phaphošing ya balwetši bao ba nyakago tlhokomelo e kgolo. Ke leboga gore o ile a hlaphogelwa. Le ge a be a sa kgone go bolela gabotse, ka mehla mahlo a gagwe a be a bontšha gore o leboga bao ba bego ba tlo mo hlola.

Eupša o ile a palelwa ke go kaonefala gomme a hwa lehlabuleng leo. Ke ile ka kwa okare karolo ya ka e kgolo e be e lahlegile. Nna le John re thabetše kudu go hlankela Jehofa re le gotee. Na ke be ke tla dira’ng? Ke ile ka kgetha go boela Ukraine. Ke lebogile kudu lerato le borutho la lapa la Bethele gotee le la phuthego ya moo.

Ga go le ka mohla bophelong bja rena re kilego ra itsholela diphetho tšeo re di dirilego. E bile bophelo bjo bo bose le bjo bokaonekaone bja go phela le bagwera ba kgonthe. Ke a tseba gore ke sa dutše ke tla ithuta mo gontši ka go loka ga Jehofa gomme ke holofela go tšwela pele ke le tirelong ya gagwe ka mo go sa felego ka gobane ka kgonthe ke kwele ‘bose seatleng sa le letona sa Jehofa.’

[Ntlhakgolo go letlakala 6]

Ga go le ka mohla bophelong bja rena re kilego ra itsholela diphetho tšeo re di dirilego”

[Seswantšho go letlakala 3]

Ge ke be ke nyalana le John

[Seswantšho go letlakala 4]

Ge ke be ke le mmulamadibogo yo a kgethegilego kua Red Lake, Ontario

[Seswantšho go letlakala 5]

Ke na le John kua Ukraine, ka 2002