O Nea Bjang Keletšo?

Na o kile wa kgopelwa go nea batho ba bangwe keletšo? Ka mohlala, na o kile wa botšišwa dipotšišo tše bjalo ka tše: ‘Ke dire eng? Ke ye pokanong ye? Ke šome mošomo wo? Ke ratane le semangmang?’

Batho ba bangwe bao ba nago le maikemišetšo a mabotse ba ka go kgopela thušo ge ba nyaka go dira diphetho—diphetho tšeo di ka kgomago tswalano ya bona le bagwera ba bona, malapa a bona gaešita le Jehofa. O tla thea karabo ya gago go eng? O tlwaetše go diriša mokgwa ofe ge o nea batho ba bangwe keletšo? Go sa šetšwe gore taba e bonagala e le e nyenyane goba e le e kgolo, Diema 15:28 e re: “Pelo ya moloki e a naganišiša gore e kgone go araba.” Ela hloko kamoo melao ya motheo e latelago e mehlano ya Beibele e ka re thušago ka gona ge re nea ba bangwe keletšo.

1 Tseba Boemo bja Kgonthe bja Taba.

“Ge motho a fetola taba pele a ka ekwa, o bontšha bošilo gomme o a inyatšiša.”—DIE. 18:13.

E le gore re nee keletšo e botse, re swanetše go kwešiša maemo le pono ya motho yo a nyakago thušo. Ka mohlala: Ge e ba motho a ka go leletša mogala gomme a go botšiša gore tsela e kaone ya go fihla legaeng la gago ke efe, ke eng seo go tla nyakegago gore o se tsebe e le gore o mo thuše? Na o be o ka kgona go mo nea tsela e kaone yeo a ka sepelago ka yona ntle le go tseba pele moo a lego gona? O be o ka se kgone! Ka mo go swanago, go nea motho yo mongwe tlhahlo ya maleba go nyaka gore re tsebe pele “moo a lego gona,” e lego maemo le pono ya motho yo a nyakago tlhahlo. Na go ka ba go na le mabaka a mangwe ao a ka kgomago karabo ya gago? Ge e ba re sa tsebe gabotse gore boemo bjo a lego go bjona ke bofe, re ka nea motho keletšo yeo e dirago gore a šale a gakanegile le go feta.—Luka 6:39.

Tseba Gore Motho o Dirile Nyakišišo go Fihla Kae. Le gona e ka ba mo go holago go botšiša motho yo a nyakago keletšo dipotšišo tše bjalo ka tše: “Ke melao efe ya motheo ya Beibele yeo o naganago gore e a šoma tabeng ye?” “Ke mehola efe goba dikotsi dife tšeo o šetšego o di bona tabeng ye?” “O šetše o dirile nyakišišo efe?” “O šetše o hweditše thušo efe go tšwa go ba bangwe ba bjalo ka bagolo ba phuthego, batswadi ba gago goba motho yo a go swarelago thuto ya Beibele?”

Dikarabo tša gagwe dipotšišong tšeo di ka re thuša go bona gore motho yoo o šetše a dirile boiteko bjo bokaakang gore a hwetše karabo. Le gona, re tla naganela le seo ba bangwe ba šetšego ba mmoditše sona ge re mo nea keletšo. Re ka ba ra lemoga ge e ba motho yoo a fo inyakela moeletši yo a tlago go ‘kweša ditsebe tša gagwe bose’ ka keletšo yeo a nyakago go ekwa.—2 Tim. 4:3.

  2 Phema go Akgofela go Araba.

“Motho yo mongwe le yo mongwe a akgofele go kwa, a diege go bolela.”—JAK. 1:19.

Le ge re na le maikemišetšo a mabotse, re ka akgofela go nea motho karabo. Eupša na seo ke se bohlale, kudukudu ge re boledišana le motho ka taba yeo re sa dirago nyakišišo ka yona ka botlalo? Diema 29:20 e re: “Na o kile wa bona motho yo a akgofelago go bolela? Go na le kholofelo kudu ka setlaela go feta ka yena.”

Iphe nako ya go kgonthišetša gore tsela yeo o arabago ka yona e dumelelana ka botlalo le bohlale bja Modimo. Ipotšiše gore: ‘Na “moya wa lefase” le tsela ya lona ya go nagana di tutueditše mokgwa woo ke naganago ka wona?’ (1 Bakor. 2:12, 13) Gopola gore ga se gwa lekana go fo ba le maikemišetšo a mabotse. Ka morago ga gore moapostola Petro a kwe ka kabelo e boima ya Jesu, o ile a eletša Jesu gore: “Ikwele bohloko Morena; o ka se feleletše ka tsela ye le gatee.” Re ka ithuta eng tseleng yeo Petro a ilego a arabela ka yona? Re ithuta gore ge e ba re sa šetše, gaešita le motho yo a nago le maikemišetšo a mabotse a ka godiša “dikgopolo tša batho, e sego tša Modimo.” (Mat. 16:21-23) Ruri ke gabohlokwa gore re nagane pele ga ge re bolela! Ge e le gabotse, na phihlelo ya rena ga se ya lekanyetšwa o šoro ge e bapetšwa le bohlale bja Modimo?—Jobo 38:1-4; Die. 11:2.

3 Diriša ka Boikokobetšo Lentšu la Modimo.

“Ga ke dire selo ka la ka; eupša ke bolela dilo tše go etša ge Tate a nthutile.”—JOH. 8:28.

Na o tla re: “Ge nkabe ke be ke le wena, nna ke be ke tla . . . ”? Gaešita le ge karabo ya taba yeo e ka bonagala e le molaleng, o tla dira gabotse go ithuta mohlaleng wa boikokobetšo le boipoetšo woo Jesu a re tlogeletšego wona. O be a na le bohlale bjo bogologolo le phihlelo go feta motho le ge e le ofe; eupša o itše: “Ga se ka bolela ka la ka, eupša Tate . . . o nneile taelo mabapi le seo ge e le gabotse ke swanetšego go se bolela le go se ruta.” (Joh. 12:49, 50) Dithuto tša Jesu le keletšo ya gagwe ka mehla di be di ithekgile ka thato ya Tatagwe.

Ka mohlala, re bala go Luka 22:49 gore barutiwa ba Jesu ba ile ba mmotšiša ge e ba ba be ba swanetše go lwa nakong ya ge a be a le kgauswi le go golegwa. Yo mongwe wa barutiwa ba gagwe o ile a diriša tšhoša. Ela hloko seo se begilwego ka tiragalo e swanago go Mateo 26:52-54 gore gaešita le ka tlase ga maemo ao, Jesu o ile a ipha nako ya go bontšha yo mongwe wa barutiwa ba gagwe thato ya Jehofa tabeng yeo. Ka ge Jesu a be a tseba melao ya motheo yeo e hwetšwago go Genesi 9:6 le boporofeteng bja Psalme 22 le Jesaya 53, o ile a kgona go nea keletšo e bohlale yeo go sego pelaelo gore e ile ya phološa maphelo gomme ya thabiša Jehofa.

  4 Diriša Bokgobapuku bja Gago bja Pušo ya Modimo.

“Ke mang yo ruri e lego mohlanka yo a botegago le wa temogo, yo Mong wa gagwe a mmeilego gore a hlokomele ba ntlo ya gagwe, gore a ba nee dijo tša bona ka nako e swanetšego?”—MAT. 24:45.

Jesu o kgethile sehlopha sa mohlanka seo a se botago gore se abe dijo tše bohlokwa tša moya. Ge o nea keletšo le tlhahlo ditabeng tše bohlokwa, na o ipha nako ya go dira nyakišišo e tseneletšego ka dikgatišong tšeo di theilwego Beibeleng?

Watch Tower Publications Index le Watchtower Library * di na le tsebišo e ntši le e kwagalago yeo re ka e hwetšago gabonolo. Ruri re tla ba re dira phošo e kgolo ge re ka hlokomologa tsebišo yeo e holago! Di na le dihlogo tše dintši tšeo di ka thušago motho yo a nyakago keletšo. Na o kgona go thuša ba bangwe go nyakišiša melao ya motheo ya Beibele gore ba fe mabaka ba diriša Lentšu la Modimo? Go etša ge mmapa o ka thuša motho go tseba moo a lego gona gomme wa mo lebiša moo a nyakago go ya gona, ditlabakelo tša go dira nyakišišo di ka mo thuša gore a bone tsela yeo a lego go yona gomme a tsebe kamoo a ka dulago a le tseleng e išago bophelong.

Bagolo ba bantši ba tlwaeditše bagoeledi go nyaka dihlogo ba diriša Index goba Watchtower Library, ka go re’alo ba thušitše bana babo bona le dikgaetšedi gore ba fe mabaka ba diriša Mangwalo. Thušo e bjalo ga e hole feela bagoeledi gore ba hwetše thušo ya kapejana eupša e ba thuša gore ba itlwaetše go dira nyakišišo le go ithekga ka ditokišetšo tša Jehofa tša moya. Ka tsela ye, ba “[tlwaetša] matla a bona a go hlatha ka go a diriša, e le gore ba kgethologanye se se nepagetšego le se se fošagetšego.”—Baheb. 5:14.

5 Phema go Leka go Direla ba Bangwe Diphetho.

“Yo mongwe le yo mongwe o tla rwala morwalo wa gagwe.”—BAGAL. 6:5.

Mafelelong, motho yo mongwe le yo mongwe o swanetše go ikgethela gore o tla latela tayo le keletšo efe. Jehofa o dumelela yo mongwe le yo mongwe wa rena gore a be le tokologo ya go ikgethela ge e ba o tla laolwa ke melao ya gagwe ya motheo goba go se bjalo. (Doit. 30:19, 20) Maemo a mangwe a akaretša melao e mmalwa ya motheo ya Beibele, gomme motho yo a nyakago keletšo ke yena yoo mafelelong a swanetšego go itirela phetho. Go ithekgile ka taba yeo motho a nyakago keletšo ka yona goba nywaga ya gagwe ya bophelo, go ka ba gwa nyakega gore re ipotšiše gore: ‘Na ruri ke neilwe matla a go hlahloba taba ye le yena?’ Go kaone ge ditaba tše dingwe di išwa go bagolo ba phuthego, goba ge e ba motho yo a nyakago keletšo e sa le mofsa, a di iše go batswadi ba gagwe.

[Mongwalo wa tlase]

[Lepokisi/​Seswantšho go letlakala 8]

Tsela ya go Dira Nyakišišo Borapeding bja Lapa

Nakong ya borapedi bja lapa, go ka ba bjang ge le ka dira nyakišišo ka dipotšišo tšeo le di botšišitšwego morago bjale? Ke dihlogo dife le melao efe ya motheo ya Beibele tšeo o ka di dirišago go thuša motho yo a botšišitšego dipotšišo tše bjalo? Ka mohlala, a re re ngwanabo rena goba kgaetšedi o go botšiša ge e ba a ka beana mabaka le motho yo a itšego ka morero wa gore a feleletše a nyalane le yena. Ge o diriša Index goba Watchtower Library, nyaka pele dihlogo tšeo di bolelago ka go lebanya ka taba yeo. Ka mohlala, ka go Index o ka nyaka lentšu “Dating” goba “Marriage.” Ke moka gaša mahlo go bona ge e ba o ka hwetša dihlogo tšeo di sepedišanago le taba yeo. Ge o lebeletše sehlogo se segolo, bona ge e ba go na le dihlogwana le ge e le dife tšeo di ngwadilego gore “See also,” e lego tšeo di ka go lebišago dihlogong tšeo di bolelago ka go lebanya ka taba yeo o e nyakišišago.

[Lepokisi go letlakala 9]

Ka thušo ya ditokišetšo tša Jehofa tšeo a di dirilego ka mokgatlo wa gagwe, re ka kgona go nea keletšo e botse ra ba ra e amogela. Mmoledi 12:11 e re: “Mantšu a ba bohlale a swana le mapara a dintlhana a go gapa dikgomo gomme bao ba ikgafetšego go kgoboketša mantšu a bohlale ba etša dipikiri tšeo di kokotetšwego; ba tšwa go modiši o tee.” Go swana le “mapara a dintlhana a go gapa dikgomo,” keletšo e lerato le e kwagalago e ka lebiša batho ba botegago tseleng ya maleba. “Dipikiri tšeo di kokotetšwego” di dira gore meago e se šišinyege. Ka mo go swanago, go nea motho keletšo e botse go ka tšweletša mafelelo a tsepamego wa go se šišinyege. Ba bohlale ba a ‘ikgafa,’ goba ba thabela kudu go “kgoboketša mantšu” ao a bontšhago bohlale bja “modiši [wa bona] o tee,” Jehofa.

Ekiša Modiši yo Mogolo ge o nea keletšo. Ruri ke tokelo e kgolo go theetša ba bangwe le go ba nea keletšo e holago neng le neng ge go nyakega! Ge keletšo e tloga e theilwe melaong ya motheo ya Beibele, gona e tla kwagala e bile e ka thuša ka lebaka le letelele motho yo o mo neago yona.