O se ke wa Lebelela “Dilo tše di Lego ka Morago”

“Ga go motho yo a beilego seatla sa gagwe mogomeng gomme a lebelela dilo tše di lego ka morago, yo a swanelegelago Mmušo wa Modimo gabotse.”—LUKA 9:62.

O BE O TLA ARABA BJANG?

․․․․․

Ke ka baka la’ng re swanetše go ‘gopola mosadi wa Lota’?

․․․․․

Ke dilo dife tše tharo tšeo re swanetšego go phema go dula re nagana ka tšona?

․․․․․

Re ka sepedišana bjang le mokgatlo wa Jehofa?

1. Ke temošo efe yeo Jesu a ilego a e nea, gomme go rotoga potšišo efe?

“GOPOLANG mosadi wa Lota.” (Luka 17:32) Temošo ye yeo e neilwego ke Jesu Kriste mo e ka bago nywaga e 2 000 e fetilego ke e bohlokwa kudu lehono go feta le ge e le neng pele. Eupša ke’ng seo Jesu a bego a se bolela ka temošo ye e matla? Bajuda bao ba bego ba mo theeditše ba be ba kwešiša gabotse seo a bego a se bolela. Ba be ba tseba seo se diragaletšego mosadi wa Lota. Nakong ya ge mosadi yoo a be a tšhaba Sodoma le lapa la gagwe, o ile a lebelela morago ka baka la go se kwe ga gagwe ke moka a fetoga sehlwaseeme sa letswai.—Bala Genesi 19:17, 26.

2. Go ka direga gore mosadi wa Lota o ile a lebelela morago ka mabaka afe, gomme o ile a loba eng ka baka la go se kwe moo ga gagwe?

² Ke ka baka la’ng mosadi wa Lota a ile a lebelela morago? Na a ka ba a be a nyaka go bona seo se bego se direga? Na a ka ba a ile a lebelela morago e le ka gobane a be a sa dumele seo se bego se direga goba a be a se na tumelo? Goba na o ile a lebelela morago e le ka baka la ge a gopotše dilo ka moka tšeo a bego a di tlogetše morago kua Sodoma? (Luka 17:31) Go sa šetšwe gore lebaka la gagwe la go lebelela morago e be e le lefe, o ile a loba bophelo bja gagwe ka baka la go se kwe. Anke o fo nagana ka se! O hwile ka letšatši letee le badudi ba gobogilego ba Sodoma le Gomora. Ga go makatše ge Jesu a itše: “Gopolang mosadi wa Lota”!

3. Jesu o gateletše bjang gore ga se ra swanela go lebelela morago ka kgopolo ya seswantšhetšo?

³ Le rena re phela nakong yeo go lego bohlokwa gore re se lebelele morago ka kgopolo ya seswantšhetšo. Jesu o ile a gatelela ntlha ye ge a be a araba monna yo a bego a mo kgopetše go boela lapeng labo go yo le laela pele ga ge e ka ba morutiwa wa gagwe. Jesu o itše: “Ga go motho yo a beilego seatla sa gagwe mogomeng gomme a lebelela dilo tše di lego ka morago, yo a swanelegelago Mmušo wa Modimo gabotse.” (Luka 9:62) Na Jesu o be a fotlela monna yo  goba a bontšha go hloka tekatekano ge a mo araba ka tsela ye? Aowa, ka gobane o be a tseba gore monna yo o be a kgopela seo e le feela gore a tšhabele boikarabelo. Jesu o ile a bontšha gore go dikadika mo go bjalo go swana le go lebelela “dilo tše di lego ka morago.” Na go a tshwenya gore motho yo a lemago a gadime morago goba a bee mogoma fase gomme a retologe? Go sa šetšwe gore a ka dira sefe go tšeo tše pedi, taba ke gore o a šitišega modirong woo a swanetšego go ba a o dira, gomme go ka direga gore a bake tshenyo modirong wa gagwe.

4. Re swanetše go tsepamišetša mahlo a rena go eng?

⁴ Go e na le gore re naganišiše kudu ka dilo tša nakong e fetilego, re swanetše go dula re tsepamišeditše mahlo a rena go tšeo di sa lego kua pele. Ela hloko kamoo seo se hlalositšwego gabotse ka gona go Diema 4:25 e rego: “Mahlo a gago ona a lebelele pele gomme mahlo a gago ao a phadimago a tsepelele pele ga gago.”

5. Ke lebaka lefe leo re nago le lona la gore re se lebelele dilo tše di lego ka morago?

⁵ Re na le lebaka le le kwagalago la gore re se lebelele dilo tše di lego ka morago. Lebaka leo ke lefe? Ye ke ‘mehla ya bofelo.’ (2 Tim. 3:1) Ga bjale ga se ra lebeletšana le nako ya go tlo fedišwa ga metse e mebedi feela e kgopo, eupša re lebeletšane le go tlo fedišwa ga tshepedišo ka moka e kgopo ya dilo. Ke’ng seo se tlago go re thuša go phema go diragalelwa ke selo se se swanago le seo se diragaletšego mosadi wa Lota? Sa pele, re swanetše go tseba tše dingwe tša dilo tšeo re di tlogetšego morago tšeo re ka lekegago go di lebelela. (2 Bakor. 2:11) Ka gona, anke re hlahlobeng gore dilo tšeo ke dife gomme re boneng kamoo re ka phemago go dula re naganne ka tšona.

GO GOPOLA TŠA MEHLENG YA PELE

6. Ke ka baka la’ng e se gabohlale go ithekga ka mehla ka menagano ya rena?

⁶ E nngwe ya dikotsi tšeo re lebeletšanego le tšona ke go ba le kgopolo e fošagetšego ka mehla ya ge naga e sa letše. Ga se ka mehla e lego gabohlale go ithekga ka megopolo ya rena. Go ka direga gore ka go se lemoge re tšeele fase mathata ao re bego re na le ona nakong e fetilego mola ka lehlakoreng le lengwe re feteletša dilo tšeo re ilego ra di thabela, ra dira gore go bonale eka dilo di be di le kaone kudu go feta kamoo ge e le gabotse di bego di le ka gona. Tsela e bjalo e kgopamego ya go nagana e ka dira gore re gopole tša mehla ya pele. Eupša Beibele e re lemoša ka gore: “O se ke wa re: ‘Go re’ng mehla ya pele e be e phala ya bjale?’ Yo bohlale ga a botšiše tšeo.” (Mmo. 7:10) Ke ka baka la’ng go le kotsi go nagana ka tsela yeo?

7-9. (a) Baisiraele ba ile ba diragalelwa ke eng kua Egipita? (b) Baisiraele ba ile ba ba le mabaka afe a go thaba? (c) Baisiraele ba ile ba thoma go ngunanguna le go ngongorega ka eng?

⁷ Ela hloko seo se ilego sa diragalela Baisiraele mehleng ya Moshe. Gaešita le ge mathomong Baisiraele ba ile ba lebelelwa e le baeng nageng ya Egipita, ka morago ga mehla ya Josefa, Baegipita ba ile “ba beela [Baisiraele] balebeledi bao ba ba šomišago mošomo wa bokgoba gore ba ba gatelele boimeng bjo ba bo rwelego.” (Ek. 1:11) Mafelelong batho ba Modimo ba ile ba lebeletšana le polao yeo e bego e nyakile e le ya molokwanarite ge Farao a be a leka go fokotša palo ya bona. (Ek. 1:15, 16, 22) Ka baka leo, ga go makatše ge Jehofa a boditše Moshe gore: “Ruri ke bone mohlako wa batho ba ka bao ba lego Egipita, e bile ke kwele sello sa bona sa ge ba llišwa ke bao ba ba gapeletšago go šoma; gobane ke tseba mahloko a bona gabotse.”—Ek. 3:7.

 ⁸ Na o ka kgona go nagana ka lethabo la Baisiraele ge ba be ba etšwa nageng yeo ba bego ba le makgoba go yona gomme ba lokologile? Ba ile ba bona ka mahlo a bona matla a Jehofa ge a be a tliša Dikotlo tše Lesome godimo ga Farao wa moikgantšhi le setšhaba sa gagwe. (Bala Ekisodo 6:1, 6, 7.) Ge e le gabotse, mafelelong Baegipita ba ile ba se fo dumelela Baisiraele gore ba tloge eupša ba ile ba ba phegelela gore ba tloge, ba ba nea gauta e ntši le silifera moo go ka bolelwago gore batho ba Modimo ba ‘tšere mahumo a Baegipita.’ (Ek. 12:33-36) Go oketša moo, Baisiraele ba ile ba thaba ge ba bona Farao le madira a gagwe ba fedišetšwa ka Lewatleng le Lehwibidu. (Ek. 14:30, 31) Ruri go swanetše go ba go ile gwa matlafatša tumelo go bona ditiragalo tše bjalo tše kgahlišago!

⁹ Lega go le bjalo, se se makatšago ke gore nakwana feela ka morago ga go lokollwa ka mohlolo, bona batho ba ba ile ba thoma go ngunanguna le go ngongorega. Ba ile ba ngongorega ka eng? Ka dijo! Ba ile ba se kgotsofalele seo Jehofa a bego a ba nea sona gomme ba belaela ka gore: “Re gopola hlapi yeo re bego re eja kua Egipita re fo e hwetša feela, le diphara, magapu, diliki, dieie le konofolo. Bjale meoya ya rena e a fokola. Mahlo a rena ga a bone selo ge e se manna feela.” (Num. 11:5, 6) Ee, pono ya bona e be e kgopame—e kgopame moo e lego gore ba be ba nyaka le go boela nageng yeo ba bego ba le makgoba go yona! (Num. 14:2-4) Baisiraele ba ile ba lebelela dilo tše di lego ka morago gomme ba se sa amogelwa ke Jehofa.—Num. 11:10.

10. Mohlala wa Baisiraele o re ruta thuto efe?

¹⁰ Re ithuta’ng tabeng ye lehono? Ge re lebeletšane le ditlhohlo le mathata, anke re se naganeng kudu ka dilo tšeo di ka bonagalago eka di be di le kaone—mohlomongwe tše dingwe tša tšona e le tšeo di diregilego pele ga ge re ka tseba therešo. Le ge e se phošo go naganišiša ka dithuto tšeo re ithutilego tšona ditiragalong tše di fetilego goba go tšeela godimo dilo tše dibotse tšeo re gopolago re kile ra di thabela, re swanetše go ba le pono e lekalekanego le ya kgonthe ka dilo tša mehleng ya pele. Go sego bjalo, re ka thoma go se sa kgotsofalela maemo ao re lego go ona ga bjale gomme ra lekega go boela tseleng ya rena ya pele ya bophelo.—Bala 2 Petro 2:20-22.

DILO TŠEO RE DI GAFILEGO

11. Ba bangwe ba lebelela bjang dilo tšeo ba di gafilego mehleng e fetilego?

¹¹ Ka manyami, ba bangwe ba lebelela morago go dilo tšeo ba di gafilego nakong e fetilego gomme ba di bona e le dibaka tšeo nkabego ba di dirišitše gabotse. Mohlomongwe o bile le dibaka tša go phegelela thuto e phagamego, go hwetša botumo goba tšhireletšego ya tša ditšhelete, eupša o ile wa kgetha go se di phegelele. Bana babo rena ba bantši le dikgaetšedi ba tlogetše mešomo yeo e lefago tšhelete e ntši go tša kgwebo, tša boithabišo, thuto goba tša dipapadi. Ga bjale go šetše go fetile nako, gomme bofelo ga se bja tšwa bo fihla. Na o lora ka seo nkabego se ile sa direga ge nkabe o ile wa se gafe dilo tše bjalo?

12. Paulo o ile a ikwa bjang ka dilo tšeo a di tlogetšego kua morago?

¹² Moapostola Paulo o ile a gafa dilo tše dintši gore e be molatedi wa Kriste. (Bafil. 3:4-6) O ile a ikwa bjang ka dilo tšeo a di tlogetšego kua morago? O re botša gore: “Dilo le ge e le dife tšeo e bego e le maruo go nna, ke di tšere e le go loba ka baka la Kriste.” Ke ka baka la’ng a re’alo? O tšwela pele ka gore: “Ee, ruri ke sa dutše ke tšea dilo tšohle e le go loba ka baka la mohola o phalago tšohle wa tsebo ka Kriste Jesu Morena wa ka. Ka baka la gagwe ke amogetše go loba dilo tšohle gomme  ke di tšea e le maudi e le gore ke rue Kriste.” * (Bafil. 3:7, 8) Go swana le ge motho yo a lahlago ditšhila, goba ditlakala, a sa buše ka morago a llela gore o lahlegetšwe, Paulo ga se a ka a itsholela dibaka le ge e le dife tšeo a ka bego a di dirišitše tšeo a di tlogetšego kua morago. O be a di bona di se sa na le mohola.

13, 14. Re ka latela bjang mohlala wa Paulo?

¹³ Ke eng seo se tlago go re thuša ge e ba re ikhwetša re thoma go phopholetša seo nkabego se ile sa direga ge e ba re ile ra phegelela dibaka tšeo re ipotšago gore di be di re bulegetše? Latela mohlala woo o beilwego ke Paulo. Bjang? Naganišiša ka bohlokwa bja seo o nago le sona ga bjale. O na le tswalano e bohlokwahlokwa le Jehofa e bile yena o na le pego ya gago ya gore o mmotegetše. (Baheb. 6:10) Ke mehola efe ya dilo tša nama yeo lefase le le ka re neago yona yeo e ka fetago ditšhegofatšo tša moya tšeo re di thabelago ga bjale le tšeo re tlago go di thabela nakong e tlago?—Bala Mareka 10:28-30.

¹⁴ Ke moka Paulo o bolela selo se sengwe seo se tlago go re thuša go tšwela pele re sepela ka go botega. O bolela gore o be a “lebala dilo tša morago gomme [a] obelela dilo tša pele.” (Bafil. 3:13) Ela hloko gore Paulo o gatelela megato e mebedi yeo ka moka ga yona e lego bohlokwa. Sa pele, re swanetše go lebala dilo tšeo re di tlogetšego kua morago, re se senye matla a rena le nako ya rena e bohlokwa re tshwenyegile kudu ka tšona. Sa bobedi, go swana le ramabelo yoo a batametšego mothalading wa mafelelo, re swanetše go obelela pele, re tsepamiše megopolo go seo se lego pele ga rena.

15. Re holega bjang ge e ba re naganišiša ka mehlala ya bahlanka ba Modimo ba botegago?

¹⁵ Ge re naganišiša ka mehlala ya bahlanka ba Modimo ba botegago—e ka ba e le ba gona bjale goba ba bogologolo—re ka oketša boikemišetšo bja rena bja go dula re eya pele go e na le go lebelela dilo tše di lego ka morago. Ka mohlala, ge nkabe Aborahama le Sara ba ile ba dula ba gopola Uri, “ba ka be ba bile le sebaka sa go boela morago.” (Baheb. 11:13-15) Eupša ga se ba ka ba boela moo. Mathomong Moshe o tlogetše dilo tše dintši kudu kua Egipita go feta Moisiraele le ge e le ofe yoo a ilego a di tlogela ka morago. Lega go le bjalo, ga go na moo re balago gona gore o ile a gopola dilo tšeo. Go e na le moo, pego ya Beibele e re botša gore “o ile a tšea kgobošo ya Kriste e le mahumo a fetago matlotlo a Egipita; gobane o be a tsepeletše go amogeleng moputso.”—Baheb. 11:26.

DIPHIHLELO TŠE DI KWEŠAGO BOHLOKO TŠA NAKONG E FETILEGO

16. Re ka kgongwa bjang ke diphihlelo tša nakong e fetilego?

¹⁶ Lega go le bjalo, ga se diphihlelo ka moka tša nakong e fetilego tšeo di ka bonagalago di kgahliša. Mohlomongwe re imelwa ke go nagana ka dibe goba diphošo tšeo re di dirilego nakong e fetilego. (Ps. 51:3) Mohlomongwe re sa gopola keletšo e matla yeo re ilego ra e newa. (Baheb. 12:11) Go hlokega ga toka—e ka ba e le ga kgonthe goba ga boikgopolelo—go ka duma ka menaganong ya rena. (Ps. 55:2) Re ka dira eng go kgonthišetša gore ga re dumelele diphihlelo tše bjalo di re dira gore re tsepamišetše megopolo ya rena dilong tša morago? Ela hloko mehlala e meraro e latelago.

17. (a) Ke ka baka la’ng Paulo a ile a itlhalosa e le “motho yo a fetwago le ke yo monyenyane wa bakgethwa bohle”? (b) Ke’ng seo se thušitšego Paulo gore a se imelwe ke dikgopolo tše di fošagetšego?

 ¹⁷ Diphošo tšeo re di dirilego nakong e fetilego. Moapostola Paulo o ile a itlhalosa e le “motho yo a fetwago le ke yo monyenyane wa bakgethwa bohle.” (Baef. 3:8) Ke ka baka la’ng a ile a ikwa ka tsela yeo? O re: “Gobane ke ile ka hlomara phuthego ya Modimo.” (1 Bakor. 15:9) Na o ka kgona go nagana kamoo Paulo a swanetšego go ba a ile a ikwa ka gona ge a be a kopana le ba bangwe bao a kilego a ba tlaiša? Lega go le bjalo, go e na le go dumelela gore dikgopolo tše bjalo tše fošagetšego di mo imele, Paulo o ile a tsepamišetša mogopolo wa gagwe go botho bjo bogolo bjoo a bego a bo bontšhitšwe. (1 Tim. 1:12-16) Tebogo yeo a ilego a ba le yona ka baka la seo e ile ya mo thuša gore a tšwele pele bodireding bja gagwe. Boitshwaro bja gagwe bjo bobe bja nakong e fetilego bo be bo le gare ga dilo tšeo Paulo a bego a ikemišeditše go di lebala. Ge e ba le rena re tsepamišetša megopolo ya rena go kgaugelo yeo Jehofa a re bontšhitšego yona, re tla phema go fetšwa matla ke kgateletšego e sa nyakegego ya go gateletšwa ke dilo tša nakong e fetilego tšeo re se nago matla a go di fetoša. Re ka dirišetša matla a rena go phetha mošomo wo re swanetšego go o dira gona bjale.

18. (a) Go ka direga’ng ge e ba re lebelela morago gomme ra belaela keletšo yeo re e neilwego? (b) Re ka latela mantšu a Solomone bjang tabeng ya go amogela tayo?

¹⁸ Keletšo e Bohloko. Go thwe’ng ge e ba re lekega go boloka sekgopi ka gore re lebelele morago keletšong yeo re kilego ra e newa? Seo se ka se be feela bohloko eupša se tla re nola le moko—sa dira gore re ‘felelwe ke matla.’ (Baheb. 12:5) Go sa šetšwe gore re “nyenyefatša” keletšo yeo ka gobane re e gana goba re “felelwa ke matla” ka gobane re e amogela gomme re nolega moko, mafelelo e ba a swanago—ga re dumelele ka botlalo gore keletšo yeo e re thuše le go re hlatswa. Ruri go kaone go ela hloko mantšu a Solomone a rego: “Swarelela tayong; o se ke wa e tlogela. E lote ka gobane ke bophelo bja gago.” (Die. 4:13) Go swana le mootledi yoo a latelago melao ya tsela, anke re amogeleng keletšo, re e diriše gomme re gatele pele.—Die. 4:26, 27; bala Baheberu 12:12, 13.

19. Re ka ekiša bjang tumelo ya Habakuku le Jeremia?

¹⁹ Go swarwa ka go hloka toka—e ka ba e le ka tsela ya kgonthe goba ya boikgopolelo. Ka dinako tše dingwe re ka ikwa go swana le moporofeta Habakuku yoo a ilego a llela toka go Jehofa, a sa kwešiše lebaka leo Jehofa a dumeletšego gore dilo tše itšego tša go se ye ka toka di direge. (Habak. 1:2, 3) Ruri e tloga e le gabohlokwa go rena gore re ekiše tumelo ya moporofeta yoo yo a itšego: “Fela ge e le nna ke tla hlalalela Jehofa; ke tla thabela Modimo yo a mphološago.” (Habak. 3:18) Ka go swana le Jeremia wa bogologolo, ge e ba re dula re ‘letile’ re na le tumelo e feletšego go Jehofa, yena Modimo wa toka, re ka ba le kgodišego ya gore dilo ka moka di tla lokišwa ka nako ya maleba.—Dillo 3:19-24.

20. Re ka bontšha bjang gore re ‘gopola mosadi wa Lota’?

²⁰ Re phela dinakong tše di kgahlišago. Go direga dilo tše di kgahlišago gona bjale gomme tše dingwe tše dintši di tla direga kgauswinyane. Anke yo mongwe le yo mongwe wa rena a sepedišane le mokgatlo wa Jehofa. Anke re lateleng keletšo ya Mangwalo ya gore re lebelele pele gomme re se ke ra lebelela dilo tše di lego kua morago. Ka go re’alo re tla ba re bontšha gore re ‘gopola mosadi wa Lota’!

[Mongwalo wa tlase]

[Dipotšišo tša Thuto]