Thušang Batho Gore ba “Phafoge Borokong”
Thušang Batho Gore ba “Phafoge Borokong”
“Le tseba gore nako ye e šetše e le iri ya gore le phafoge borokong.”—BAROMA 13:11.
NA O KA HLALOSA?
․․․․․
Ke ka baka la’ng e le gabohlokwa gore Bakriste ba dule ba phafogile moyeng?
․․․․․
Ke ka baka la’ng badiredi bao ba phafogilego ba swanetše go theetša le go ba šedi?
․․․․․
Go ba botho le go ba boleta go kgatha tema efe bodireding bja rena?
1, 2. Ke ka kgopolo efe batho ba bantši ba swanetšego go tsošwa borokong?
NGWAGA le ngwaga, batho ba dikete ba a hwa ka baka la go otsela goba go robala ge ba otlela koloi. Ba bangwe ba lahlegelwa ke mešomo ya bona ka baka la go se tsoge ka nako ge ba eya mošomong goba ka baka la go robala mošomong. Eupša go otsela moyeng go ka ba le ditlamorago tše šoro kudu. Ke ka baka leo ge Beibele e be e bolela ka taba ye e bohlokwa e itšego: “Go thaba yo a dulago a phafogile.”—Kut. 16:14-16.
2 Ge letšatši le legolo la Jehofa le dutše le batamela, batho ka kakaretšo ba robetše moyeng. Gaešita le ba bangwe ba baetapele ba Bojakane ba bolela gore mehlape ya bona ke ‘barobadi ba bagolo.’ Boroko bja moya ke’ng? Ke ka baka la’ng e le gabohlokwa gore Bakriste ba therešo ba dule ba phafogile? Re ka thuša bjang ba bangwe go tsoga borokong bjo bjalo?
BOROKO BJA MOYA KE ENG?
3. O ka hlalosa bjang motho yo a robetšego moyeng?
3 Gantši batho bao ba robetšego ka tsela ya kgonthe ga ba dire selo. Ka go fapana le seo, bao ba robetšego moyeng ba ka swarega kudu ka dilo tše dintši—eupša e sego ka dilo tša moya. Ba ka tshwenyega kudu ka mathata a letšatši le letšatši a bophelo goba ba phegelela boithabišo, botumo goba mahumo. Ka baka la dilo tše, ga ba itshwenye gakaalo ka dinyakwa tša bona tša moya. Lega go le bjalo, batho bao ba phafogilego moyeng ba lemoga gore re phela “mehleng ya bofelo,” ka baka leo ba dula ba le mafolofolo gore ba dire thato ya Modimo kamoo ba ka kgonago.—2 Pet. 3:3, 4; Luka 21:34-36.
4. Bohlokwa bja keletšo e rego: “Anke re se ke ra robala go etša ge ba bangwe ka moka ba robala” ke bofe?
4 Bala 1 Bathesalonika 5:4-8. Mo moapostola Paulo o eletša Bakriste gore ba se ke ba “robala go etša ge ba bangwe ka moka ba robala.” O be a e ra go re’ng? Tsela e nngwe yeo re ka ‘robalago ka yona’ ke ka go tshediša mahlo ditekanyetšo tša Jehofa tša boitshwaro. Tsela e nngwe yeo re ka ‘robalago ka yona’ ke ka go tshediša mahlo taba ya gore nako ya Jehofa ya go fediša batho bao ba mo nyatšago e batametše. Re swanetše go kgonthišetša gore batho ba bjalo ba nyatšago Modimo ga ba re tutueletše go amogela ditsela le mekgwa ya bona.
5. Ke mekgwa efe yeo e hlaolago bao ba robetšego moyeng?
5 Batho ba bangwe ba nagana gore ga go na Modimo yo a tlago go ba ahlolela ditiro tša bona. (Ps. 53:1) Ba bangwe ba nagana gore Modimo ga a na taba le rena batho, ka go re’alo ga go na lebaka la gore re kgahlegele go mo tseba. Ba bangwe bona ba nagana gore go ba setho sa kereke e itšego go ka ba dira bagwera ba Modimo. Batho ba ka moka ba robetše moyeng. Ba swanetše go tsošwa borokong. Re ka ba thuša bjang?
RENA KA NOŠI RE SWANETŠE GO DULA RE PHAFOGILE
6. Ke ka baka la’ng Bakriste ba swanetše go katanela go dula ba phafogile moyeng?
6 Gore re be boemong bja go tsoša ba bangwe, rena ka noši re swanetše go phafoga. Seo se akaretša eng? Lentšu la Modimo le tswalanya boroko bja seswantšhetšo le “mediro ya leswiswi,” e lego menyanya ya mašata le botagwa, bootswa, boitshwaro bjo bo hlephilego, tshele le lehufa. (Bala Baroma 13:11-14.) Go phema boitshwaro bjo bjalo e ka ba tlhohlo. Go bohlokwa kudu go dula re phafogile. Mootledi wa koloi yo a tšeelago fase kotsi ya go swarwa ke boroko ge a otlela a ka ba kotsing ya go lahlegelwa ke bophelo bja gagwe. Ruri ke gabohlokwa gore Mokriste a lemoge gore go otsela moyeng go ka ba kotsi kudu!
7. Go ba ga rena le pono e fošagetšego ka batho go ka re kgoma bjang?
7 Ka mohlala, Mokriste a ka nagana gore batho ka moka tšhemong ya gabo ba ka se tsoge ba amogetše ditaba tše dibotse. (Die. 6:10, 11) A ka bolela gore: ‘Ge e ba go se na motho yo a tlago go amogela molaetša, ke ka baka la’ng re swanetše go ba mafolofolo re leka go fihlelela batho goba go ba thuša?’ Lega go le bjalo, go ka direga gore batho ba bantši ga bjale ba robetše moyeng, eupša maemo le mekgwa ya bona di ka fetoga. Ba bangwe ba a phafoga gomme ba amogela molaetša. Ka gona, re ka ba thuša ge e ba rena ka noši re dula re phafogile, mohlomongwe ka gore re leke ditsela tše difsa tša go bolela molaetša wa Mmušo ka tsela yeo e gogelago. Karolo ya go dula re phafogile e akaretša go ikgopotša lebaka leo bodiredi bja rena e lego bjo bohlokwa ka gona.
KE ENG SEO SE DIRAGO GORE BODIREDI BJA RENA E BE BJO BOHLOKWA?
8. Ke ka baka la’ng modiro wa rena wa boboledi e le wa bohlokwa kudu?
8 Gopola gore go sa šetšwe tsela le ge e le efe yeo batho ba arabelago ka yona gona bjale, modiro wa rena wa boboledi o tumiša Jehofa gomme o kgatha tema go phethagatšeng morero wa gagwe. Go se go ye kae, bao ba sa nyakego ditaba tše dibotse ba tla ahlolwa gabohloko. Batho ba tla ahlolwa go ya ka tsela yeo ba arabelago ka yona modirong wa rena wa boboledi. (2 Bathes. 1:8, 9) Go feta moo, e be e tla ba phošo gore Mokriste a nagane gore ga go nyakege go dira boboledi ka phišego ka gobane “go tla ba le tsogo ya ba lokilego gotee le ba sa lokago.” (Dit. 24:15) Re kwešiša go tšwa Lentšung la Modimo gore bao ba ahlolwago e le “dipudi” ba tla “fedišetšwa sa ruri.” Modiro wa rena wa boboledi o bonagatša kgaugelo ya Modimo, o nea batho sebaka sa go fetoga le go hwetša ‘bophelo bjo bo sa felego.’ (Mat. 25:32, 41, 46; Baroma 10:13-15) Ge e ba re sa dire boboledi, batho ba tla hwetša kae sebaka sa go kwa molaetša woo o ka ba neago bophelo?
9. Go tšea karolo go boleleng ditaba tše dibotse go hotše bjang wena le ba bangwe?
9 Le gona, go bolela ditaba tše dibotse go a re hola. (Bala 1 Timotheo 4:16.) Na ga se wa lemoga gore go bolela ka Jehofa le kholofelo ya Mmušo go matlafatša tumelo ya gago le go tiiša lerato la gago ka Modimo? Na ga se gwa go thuša go hlagolela dika tša Bokriste? Na go bontšha boineelo bja gago go Modimo ka go tšea karolo bodireding ga go go tlišetše lethabo? Ba bantši bao ba bilego le tokelo ya go ruta ba bangwe therešo ba thabetše go bona moya wa Modimo o thuša ba bjalo go kaonefatša tsela ya bona ya bophelo.
EBANG ŠEDI
10, 11. (a) Jesu le Paulo ba ipontšhitše bjang ba le šedi? (b) Bontšha kamoo go ba šedi go ka kaonefatšago bodiredi bja rena.
10 Kgahlego ya motho ka ditaba tše dibotse e ka tsošwa ka ditsela tše fapafapanego. Ka go re’alo badiredi ba Bakriste ba swanetše go dula ba le šedi. Jesu ke mohlala wa rena tabeng ye. Ka ge a be a phethagetše, o be a ka lemoga kgalefo yeo e bego e le ka pelong ya Mofarisei, boitsholo bja kgonthe bja mosadi wa modiradibe gotee le boikgafo bja mohlologadi. (Luka 7:37-50; 21:1-4) Jesu o be a kgona go thuša motho yo mongwe le yo mongwe moyeng. Lega go le bjalo, ga go nyakege gore mohlanka wa Modimo e be yo a phethagetšego e le gore a be šedi. Moapostola Paulo o ile a bontšha seo. O ile a beakanya dithero tša gagwe gore di ipiletše go batho ba fapafapanego le ba mekgwa e sa swanego.—Dit. 17:22, 23, 34; 1 Bakor. 9:19-23.
11 Ka go katanela ga rena go ba šedi go swana le Jesu le Paulo, re ka lemoga tsela e kaone ya gore bao re kopanago le bona ba kgahlwe ke molaetša wa rena. Ka mohlala, ge o dutše o batamela batho gore o bolele le bona, lebelela maswao ao a bontšhago ditšo tša bona, seo ba se kgahlegelago goba boemo bja malapa a bona. Mohlomongwe o ka bona seo ba se dirago ka nako yeo gomme wa ba reta ge o dutše o leka go thoma poledišano.
12. Ge re tšea karolo bodireding, ke ka baka la’ng re swanetše go ba šedi ka dipoledišano tša rena?
12 Motho yo a lego šedi o leka go phema ditšhitišo. Ge o le bodireding, poledišano ya gago le motho yo o sepelago le yena e ka ba e agago. Le gona, re swanetše go gopola gore morero wa rena wa go tšea karolo bodireding bja tšhemo ke go botša ba bangwe ditaba tše dibotse. (Mmo. 3:1, 7) Ka gona, re swanetše go ba šedi gore poledišano ya rena ge re tloga ntlong e nngwe re eya go e nngwe ga e šitiše morero wa bodiredi bja rena. Go bolela ka dintlha tšeo re ka ratago go boledišana ka tšona le bao ba nago le kgahlego ke tsela e botse ya go boloka menagano ya rena e tsepame modirong wa rena. Le gona, gaešita le ge ka dinako tše dingwe mogalathekeng o re thuša bodireding bja rena, re swanetše go gata megato ya go kgonthišetša gore go lla ga wona ga go šitiše poledišano ya rena le mong wa ntlo.
BONTŠHANG GORE LE KGAHLEGELA BATHO BA BANGWE
13, 14. (a) Re ka lemoga bjang seo se kgahlago motho? (b) Ke’ng seo se ka dirago gore batho ba kgahlegele dilo tša moya?
13 Badiredi bao ba phafogilego le go ba šedi ba theetša ka kelohloko bao ba kopanago le bona. O ka rotoša potšišo efe yeo e ka dirago gore motho yo a lego tšhemong ya geno a ntšhe maikwelo a gagwe? Na motho yoo o tshwenyegile ka bontši bja madumedi a lego gona, bošoro bjo bo lego gona lefelong la gabo goba go palelwa ga mebušo ya batho? Na o ka dira gore a kgahlegele dilo tša moya ka go reta tsela e makatšago yeo dilo tše di phelago di dirilwego ka yona goba ka go bolela ka tsela yeo keletšo ya Beibele e šomago ka yona? Moo e ka bago batho ba ditšo ka moka, go akaretša le bailaModimo, ba kgahlwa ke taba ya thapelo. Ba bantši ba ipotšiša ge e ba go na le motho yo a kwago dithapelo. Ba bangwe ba ka kgahlwa ke dipotšišo tše rego: Na Modimo o kwa dithapelo ka moka? Ge e ba go se bjalo, re swanetše go dira’ng gore Modimo a di kwe?
14 Re ka ithuta mo gontši ka bokgoni bja go thoma dipoledišano ka go lebelela tsela yeo bagoeledi bao ba nago le phihlelo ba dirago seo ka yona. Ela hloko tsela yeo ba phemago go bonagala eka ba sekiša batho goba go tsenatsena ditabeng tša bona. Segalo sa bona sa lentšu le ponagalo ya bona ya sefahlego di bontšha bjang gore ba nyaka go kwešiša dipono tša mong wa ntlo?—Die. 15:13.
BOTHO LE BOKGONI
15. Ke ka baka la’ng maiteko a rena a go bolela ditaba tše dibotse a swanetše go dirwa ka botho?
15 Na o rata go phafošwa ge o ile ka boroko? Ba bantši ga ba rate go phafošwa ka lepotlapotla. Gantši batho ba rata go phafošwa ka tsela e botho. Re swanetše go dira se se swanago ge re katanela go phafoša batho borokong bja moya. Ka mohlala, ge e ba motho a galefišwa ke ketelo ya gago, gantši tsela e kaone ya go arabela boemong bjo ke efe? Ka botho kwešiša maikwelo a gagwe, mo leboge ka ge a ile a ntšha sa mafahleng a gagwe gomme o itshepelele ka setu. (Die. 15:1; 17:14; 2 Tim. 2:24) Mokgwa wo o bontšhitšego botho ka wona o ka tutueletša motho yo bjalo go arabela gabotse nakong e tlago ge Dihlatse di mo etela.
16, 17. Re ka diriša bjang temogo ge re le bodireding bja rena?
16 Mabakeng a mangwe, o ka kgona go lebeletšana le batho bao ba sa arabelego gabotse. Yo mongwe a ka re: “Aowa ke a leboga. Ke na le bodumedi bja ka” goba: “Ga ke na kgahlego” e le feela ka gobane go bonagala e le tsela e bonolo ya go kgaotša poledišano. Lega go le bjalo, ge o diriša bokgoni gomme o phegelela ka botho, o ka kgona go rotoša potšišo yeo e ka dirago gore mong wa ntlo a kgahlegele dilo tša moya.—Bala Bakolose 4:6.
17 Ka dinako tše dingwe ge re kopana le batho bao ba bonago gore ba swaregile kudu go ka re theetša, ke gabotse go kwešiša maemo a bona gomme re sepele. Lega go le bjalo, ka nako e nngwe o ka lemoga gore o ka bolela ka boripana selo se itšego seo se kwagalago. Ba bangwe ba bana babo rena ba kgona go bula Beibele le go bala lengwalo leo le tsošago kgahlego gomme ba tlogela mong wa ntlo ka potšišo—tše ka moka ba di dira ka nako ya ka tlase ga motsotso. Ka dinako tše dingwe thero ya bona e kopana e tsošitše kgahlego go fihla bokgoleng bja gore mong wa ntlo a bone gore ga se a swarega kudu go ka ba le poledišano e kopana. Go re’ng o sa leke go dira bjalo ge maemo a go dumelela?
18. Ke’ng seo re ka se dirago gore re atlege kutšwanyana ge re nea bohlatse bjo bo sa rulaganyetšwago?
18 Ge re kopana le batho medirong ya rena ya letšatši le letšatši, gantši re ka dira gore ba kgahlegele dilo tša moya ge e ba re itokišeditše go nea bohlatse bjo bo sa rulaganyetšwago. Ba bantši ba bana babo rena le dikgaetšedi ba swara dikgatišo ka dipotleng goba ka mekotlaneng ya bona. Le gona, ba ka ba ba naganne ka lengwalo le itšego la Beibele leo ba ka boledišanago le ba bangwe ka lona ge go bulega sebaka. O ka boledišana le molebeledi wa tirelo goba babulamadibogo bao ba lego phuthegong ya geno ka tsela yeo o ka itokišeletšago go dira seo ka yona.
GO PHAFOŠA BA LELOKO KA BOLETA
19. Ke ka baka la’ng re se ra swanela go tlogela go leka go thuša ba leloko?
19 Ke ga tlhago gore re nyake go thuša ba leloko go amogela ditaba tše dibotse. (Josh. 2:13; Dit. 10:24, 48; 16:31, 32) Ge e ba maiteko a rena a pele a folotša, seo se ka re nyamiša gomme ra se sa leka gape. Re ka nagana gore ga go na seo re ka se dirago goba go se bolela seo se tlago go fetoša boemo bja bona bja kgopolo. Lega go le bjalo, maemo a ka fetoša bophelo goba pono ya ditho tša leloko la geno. Goba o ka ba o kaonefaditše bokgoni bja gago bja go hlalosa therešo moo e lego gore ga bjale o ka ba le mafelelo a mabotse.
20. Ke ka baka la’ng e le gabohlokwa go ba šedi ge o boledišana le ba leloko?
20 Re swanetše go phema go se naganele maikwelo a ba leloko. (Baroma 2:4) Na ga se ra swanela go boledišana le bona ka botho go etša ge re boledišana le bao re kopanago le bona modirong wa boboledi? Bolela le bona ka boleta le ka tlhompho. Ka ntle le go ba rerela, ba bontšhe kamoo therešo e go thušitšego ka gona. (Baef. 4:23, 24) Dira gore ba bone kamoo Jehofa a kaonefaditšego bophelo bja gago ka gona, kamoo a go “rutago gore [o] holege.” (Jes. 48:17) Anke ditho tša leloko la gago di bone gore o mohlala o mobotse wa go phela ka tsela ya Bokriste.
21, 22. Anega phihlelo yeo e bontšhago bohlokwa bja go phegelela ge re leka go thuša ba leloko moyeng.
21 Moragonyana bjale, kgaetšedi yo mongwe o ngwadile gore: “Ka mehla ke be ke leka go nea bohlatse go bana bešo le dikgaetšedi ba 13 ka go bolela le bona le ka boitshwaro bja ka. Ke be ke sa fetiše ngwaga ke sa ba ngwalele ka moka ga bona. Lega go le bjalo, ke bile Hlatse ke nnoši ka lapeng lešo ka nywaga e 30.”
22 Kgaetšedi yoo o tšwetše pele ka gore: “Ka letšatši le lengwe, ke ile ka leletša yo mongwe wa bana bešo yo a bego a dula bokgole bja dikhilomithara tše makgolokgolo. O ile a mpotša gore o kgopetše moruti wa gagwe gore a ithute le yena Beibele, eupša ga se a ka a dira bjalo. Ge ke be ke mmotša gore nka thabela go mo thuša, o ile a re: ‘Go lokile, eupša ke go botša e sa le gona bjale gore: Nka se tsoge ke bile yo mongwe wa Dihlatse tša Jehofa.’ Ka morago ga go mo romela ka poso puku ya Ke Eng Seo ge e le Gabotse Beibele e se Rutago?, ke be ke mo leletša ka morago ga matšatši a mmalwa. Eupša o be a se a ka a bula puku ya gagwe. Mafelelong, ke ile ka mo kgopela gore a tle le puku ya gagwe, gomme ka metsotso e ka bago e 15 yeo re e feditšego re le mogaleng, re ile ra bala le go ahlaahla a mangwe a mangwalo ao a tsopotšwego moo. Ka morago ga ge ke ithutile le yena ka makga a mmalwa re le mogaleng, o ile a nyaka go ithuta ka nako e fetago metsotso e 15. Ka gona o ile a thoma go nteletša mogala gore re ithute, ka dinako tše dingwe o be a letša le pele ke tsoga gomme ka dinako tše dingwe gabedi ka letšatši. Ngwageng o latetšego o ile a kolobetšwa, gomme ngwaga ka morago ga moo o ile a thoma go bula madibogo.”
23. Ke ka baka la’ng re se ra swanela go lapa ge re leka go tsoša batho borokong bja moya?
23 Go thuša batho go tsoga borokong bja moya ke selo seo se nyakago bokgoni le go phegelela. Lega go le bjalo, batho ba boleta ba sa dutše ba arabela gabotse maitekong a rena a go ba phafoša moyeng. Ka kakaretšo, moo e ka bago batho ba ka godimo ga 20 000 ba kolobetšwa kgwedi le kgwedi gore e be Dihlatse tša Jehofa. Ka gona anke re tšeeleng godimo keletšo ya Paulo yeo a e boditšego ngwanabo rena Aragipa wa lekgolong la pele la nywaga gore: “Dula o hlokometše gore o phethagatša bodiredi bjo o bo amogetšego Moreneng.” (Bakol. 4:17) Sehlogo se se latelago se tla re thuša go tšeela godimo seo se bolelwago ke go bolela ditaba tše dibotse re na le maikwelo a go akgofa ga nako.
[Dipotšišo tša Thuto]
[Lepokisi go letlakala 13]
KAMOO O KA DULAGO O PHAFOGILE
▪ Dula o swaregile ka go dira thato ya Modimo
▪ Phema mediro ya leswiswi
▪ Ela hloko kotsi ya go otsela moyeng
▪ Dula o na le pono e nepagetšego ka batho bao ba lego tšhemong ya geno
▪ Leka ditsela tše difsa tša go nea ba bangwe bohlatse
▪ Gopola bohlokwa bja bodiredi bja gago
