Ka ge go anega Elva Gjerde

Nywaga e 70 e fetilego, moeng yo a bego a etetše ka gae o ile a nea tate tšhišinyo yeo e ilego ya fetoša bophelo bja ka ka mo go feletšego. Go tloga ka lona letšatši leo le bohlokwa, go bile le batho ba mmalwa bao ba ilego ba kgoma bophelo bja ka. Nakong yeo ka moka, ke bile le tswalano e bohlokwa kudu yeo ke e tšeelago godimo go feta selo le ge e le sefe. Anke ke le anegele.

KE BELEGETŠWE Sydney, Australia, ka 1932, gomme batswadi ba ka ba be ba dumela go Modimo eupša ba sa tsene kereke. Mma o nthutile gore Modimo o be a dula a ntebeletše gomme a ikemišeditše go nkotla ge e ba ke seleka. Se se ile sa ntira gore ke tšhabe Modimo. Lega go le bjalo, ke be ke kgahlwa ke seo se bego se le ka Beibeleng. Ge mmangwane a be a re etela ka mafelobeke, o be a mpotša dikanegelo tše dintši tšeo di kgahlišago tša ka Beibeleng. Ke be ke dula ke fagahletše diketelo tša gagwe.

Ge ke be ke sa le mofsa, tate o be a bala bolumo ya dipuku tšeo mma a bego a di hweditše go kgaetšedi yo a tšofetšego yo e bego e le yo mongwe wa Dihlatse tša Jehofa. O be a kgahlwa kudu ke seo a bego a se bala ka dikgatišong tšeo tša Bokriste moo a ilego a dumela go ithuta Beibele le Dihlatse. Ge tate a be a swaretšwe thuto ya Beibele mantšiboeng a mangwe, o ile a mpona ke utswa ka tsebe seo a bego a ithuta sona. O be a le kgauswi le go nkiša phapošing ya ka ge moeng a mmotša gore: “Go re’ng o sa dumelele Elva gore a be le rena ge re ithuta?” Tšhišinyo yeo e ile ya ba mathomomayo a bophelo bjo bofsa le a tswalano ya ka le Modimo wa therešo—Jehofa.

Ka moragonyana ga moo, nna le tate re ile ra thoma go ba gona dibokeng tša Bokriste. Seo a ithutilego sona se ile sa mo tutueletša gore a dire diphetogo bophelong bja gagwe. O ile a ba a thoma go laola bogale bja gagwe. Se se ile sa tutueletša mma le kgaetšedi ya ka yo mogolo Frank, go thoma go ba gona dibokeng. * Ka moka ga rena re le ba bane re ile ra dira tšwelopele moyeng gomme mafelelong ra kolobetšwa go ba Dihlatse tša Jehofa. Go tloga ka nako yeo, batšofadi ba bantši ba ntutueditše ka tsela e botse nywageng e fapafapanego ya bophelo bja ka.

GE KE BE KE KGETHA MOŠOMO

Ge ke be ke sa le mofsa, ke be ke rata batšofadi ba phuthegong ya gešo. Yo mongwe wa bona e be e le Alice Place, e lego kgaetšedi yo a tšofetšego yo e lego motho wa pele wa go tliša molaetša wa Beibele lapeng lešo. O ile a ba bjalo ka makgolo wa ka. Alice o ile a ntlwaeletša modiro wa go bolela phatlalatša gomme a nkgothaletša gore ke ipeele pakane ya go kolobetšwa. Ge ke na le nywaga e 15, ke ile ka fihlelela pakane yeo.

Ke ile ka gwerana le banyalani bao ba tšofetšego bao maina a bona e lego Percy le Madge [Margaret] Dunham. Go tlwaelana ga ka le bona go kgomile bokamoso bja ka ka tsela e kgolo kudu. Ke be ke rata thuto ya dipalo, gomme ke be ke phethile ka gore ke tla ruta dipalo. Percy le Madge ba be ba hlanketše e le baromiwa kua Latvia ka bo-1930. Ge Ntwa ya II ya Lefase e thoma kua  Yuropa, ba ile ba laletšwa go hlankela Bethele ya Australia yeo e bego e le ka gare ga motse wa Sydney. Percy le Madge ba be ba nthata kudu. Ba ile ba anega diphihlelo tše dintši tše di kgahlišago tšeo ba di thabetšego ge e be e le baromiwa. Ke be ke kgona go bona gabotse gore go ruta Beibele go be go tla nkgotsofatša kudu go feta go ruta dipalo. Ka go re’alo, ke ile ka phetha ka gore ke be moromiwa.

Ba gaDunham ba ile ba nkgothaletša gore ke itokišeletše tirelo ya boromiwa ka gore ke be mmulamadibogo. Ka baka leo, ka 1948, ge ke be ke na le nywaga e 16, ke ile ka ba karolo ya bafsa ba bangwe ba lesome bao ba bego ba thabela go bula madibogo phuthegong ya gae kua Hurstville, Sydney.

Nywaga e mene e latetšego, ke ile ka ba mmulamadibogo ditoropong tše dingwe tše nne—ka moka ga tšona di le New South Wales le Queensland. Yo mongwe wa batho ba pele bao e bilego barutwana ba ka ba Beibele e be e le Betty Law (ga bjale ke wa gaRemnant). Betty e be e le ngwanenyana yo a nago le lerato, a mpheta ka nywaga e mebedi. Ka morago re ile ra bula madibogo gotee toropong ya Cowra, yeo e bego e le dikhilomithara tšeo e ka bago tše 230 ka bodikela bja Sydney. Gaešita le ge ke ile ka šoma le Betty ka nako e kopana re le babulamadibogo, re sa dutše re le bagwera go fihla le lehono.

Ka morago ga go hwetša kabelo ya go ba mmulamadibogo yo a kgethegilego, ke ile ka hudugela Narrandera—toropo yeo e lego dikhilomithara tše 220 ka borwabodikela bja Cowra. Ke ile ka bula madibogo le Joy Lennox (ga bjale ke wa gaHunter), mmulamadibogo yo a fišegago yo le yena a bego a mpheta ka nywaga e mebedi. Ke rena feela re bego re le Dihlatse motseng woo. Nna le Joy re be re dula le Ray le Esther Irons, e lego banyalani bao ba bego ba re amogetše ka borutho. Bona gotee le morwa wa bona le barwedi ba bona ba bararo ba be ba kgahlegela go tseba therešo. Mo gare ga beke Ray le morwa wa gagwe ba be ba šoma polaseng ya dinku le korong yeo e bego e le ka ntle ga toropo, mola Esther le barwedi ba gagwe ba be ba na le kgwebo ya go hiriša diphapoši lefelong leo. Sontaga se sengwe le se sengwe, nna le Joy re be re apeela lapa le legolo la Morena Irons dijo tša mantšiboa gotee le bahiri ba ka bago ba 12—ka moka ga bona e le banna bao ba bego ba šoma ditimeleng. Mošomo wo wa go apea o be o lefelela karolo ya rente ya rena. Ka morago ga go hlwekiša, re be re nea lapa la Morena Irons dijo tše dibose tša moya—thuto ya beke le beke ya Morokami. Ray, Esther, le bana ba bona ba bane ba ile ba amogela therešo gomme ya ba bona ba thomago Phuthego ya Narrandera.

Ka 1951, ke ile ka ya kopanong ya Dihlatse tša Jehofa kua Sydney. Ge ke le moo, ke ile ka ya sebokeng se se kgethegilego sa babulamadibogo bao ba bego ba kgahlegela modiro wa boromiwa. Batho ba fetago 300 ba be ba le gona sebokeng seo se bego se swaretšwe ka tenteng e kgolo. Nathan Knorr yo a tšwago Bethele ya Brooklyn o ile a boledišana le sehlopha seo gomme a gatelela gore go akgofile kudu gore ditaba tše dibotse di bolelwe dikarolong ka moka tša lefase. Re ile ra kgomarela lentšu le lengwe le le lengwe leo a le boletšego. Ka morago ga moo, babulamadibogo ba bantši bao ba bego ba le moo ba ile ba thoma modiro wa Mmušo kua Borwa bja Pacific gotee le mafelong a mangwe. Ke be ke thabetše go ba yo mongwe wa Maaustralia a 17 ao a bego a laleditšwe sehlopheng sa bo-19 sa Sekolo sa Gilead ka 1952. Ge ke na le nywaga e 20 feela, toro ya ka ya go ba moromiwa e be e phethega!

GE GO BE GO NYAKEGA KAONEFATŠO

Tlhahlo le tswalano e botse yeo ke e hweditšego Sekolong sa Gilead ga se tša oketša feela tsebo ya ka ya Beibele le go matlafatša tumelo ya ka eupša di ile tša kgoma le semelo sa ka ka tsela e kgolo kudu. Ke be ke sa le mofsa e bile ke sa lebelele dilo ka tsela ya kgonthe gomme ke lebeletše gore ke swanetše go dira dilo ka tsela e phethagetšego e bile ke letetše phethego go batho ba bangwe. Tše dingwe tša dipono tša ka di be di ka dira gore batho ba bangwe ba ikwe ba gatelelwa. Ka mohlala, ge ke be ke bona Ngwanabo rena Knorr a bapala papadi ya bogwera ya kgwele ya maoto le sehlopha sa bafsa bao ba dulago Bethele, ke ile ka makala kudu.

Bahlahli ba Sekolo sa Gilead—ka moka ga bona e le  banna ba lego šedi bao ba nago le nywaga e mentši tirelong ya Modimo—ba swanetše go ba ba ile ba lemoga gore ke be ke goga ka kgara. Ba ile ba tshwenyega ka nna gomme ba nthuša go beakanya pono ya ka. Ganyenyane-ganyenyane, ke ile ka thoma go bona Jehofa e le Modimo yo lerato le yoo a lebogago, e sego yo thata le yo a nyakago dilo ka šiši. Ba bangwe ba barutwanagotee le nna ba ile ba nthuša. Ke gopola yo mongwe wa bona a mpotša gore: “Elva, ga se gore Jehofa o swere sefepi kua legodimong. O se ke wa ipeela melao e thata!” Mantšu a gagwe ao a lebanyago a ile a kgoma pelo ya ka.

Ka morago ga sekolo sa Gilead, nna le barutwanagotee le nna ba bane re ile ra abelwa go ya Namibia, Afrika. Go se go ye kae, re be re na le dithuto tša Beibele tše 80. Ke be ke rata naga ya Namibia le go ba moromiwa, eupša ke be ke ratana le morutwanagotee le nna yo a bego a abetšwe go ya Switzerland. Ka morago ga go fetša ngwaga feela ke le Namibia, ke ile ka ya go lesogana leo le bego le mpeeleditše kua Switzerland. Ka morago ga lenyalo la rena, ke ile ka ba le monna wa ka modirong wa gagwe wa bosepedi.

GO LEBELETŠANA LE MATHATA

Ka morago ga go thabela nywaga e mehlano re le modirong wa bosepedi, re ile ra laletšwa go hlankela Bethele ya Switzerland. Ge re be re le lapeng la Bethele, ke ile ka thabela kudu go dikologwa ke bontši bja bana babo rena le dikgaetšedi bao ba godilego moyeng.

Go se go ye kae ka moragonyana ga moo, ke ile ka šulafalelwa ke bophelo. Ke ile ka hwetša gore monna wa ka o be a sa mpotegele e bile a sa botegele Jehofa. Ke moka o ile a ntlogela. Ke be ke nyamile o šoro! Ga ke tsebe gore ke be ke tla lebeletšana bjang le boemo bjo ka ntle le lerato le thekgo yeo ke e hweditšego go bagwera ba ka bao ba godilego lapeng la Bethele. Ba ile ba ntheetša ge ke be ke nyaka go ntšha sa mafahleng a ka gomme ba ntumelela gore ke khutše ge ke be ke nyaka go khutša. Mantšu a bona a homotšago gotee le ditiro tša bona tše botho di ile tša nthekga nakong ye e nyamišago kudu bophelong bja ka gomme tša nthuša go batamelana kgauswi le Jehofa go feta le ge e le neng pele.

Ke ile ka gopola mantšu ao a boletšwego nywaga e mmalwa e fetilego ke batšofadi ba bohlale bao ba ilego ba lebeletšana le diteko. Mantšu ao a akaretša ao a boletšwego ke Madge Dunham. O kile a mpotša gore: “Elva, ge o dutše o hlankela Jehofa, o tla lebeletšana le diteko tše dintši, eupša diteko tše thata ka go fetišiša di ka tšwa go bao o ba ratago kudu. Ge diteko tšeo di tšwelela, o batamele Jehofa. Gopola gore o hlankela yena, e sego batho ba sa phethagalago!” Keletšo ya Madge e ile ya mmatlafaletša go lebeletšana le dinako tše dintši tše thata kudu. Ke be ke ikemišeditše gore nka se tsoge ke dumeletše gore diphošo tša monna wa ka di nkaroganye le Jehofa.

Ge nako e dutše e eya, ke ile ka phetha ka go boela Australia gore ke bule madibogo kgauswi le lapa lešo. Ka sekepeng seo se lebilego gae, ke ile ka thabela dipoledišano tša Beibele tšeo di bego di e ba gona ka mehla le sehlopha sa banamedigotee le nna. Gare ga sehlopha seo go be go na le monna yo a ikhomoletšego wa go tšwa Norway yo leina la gagwe e lego Arne Gjerde. O be a rata seo a bego a se kwa. Ka morago ga moo Arne o ile a etela nna le ba lapa lešo kua Sydney. Kapejana o ile a dira tšwelopele ya moya gomme a amogela therešo. Ka 1963, nna le Arne re ile ra nyalana, gomme nywaga e mebedi ka morago ke ile ka belega morwa wa rena, Gary.

GO LEBELETŠANA LE TAHLEGELO E NNGWE GAPE

Nna, Arne le Gary re be re kgotsofaletše bophelo bjo bo thabilego bja lapa. Go se go ye kae Arne o ile a godiša ntlo ya rena gore re tle re dule le batswadi ba ka bao ba tšofetšego. Lega go le bjalo, ka morago ga nywaga e tshelelago re nyalane, re ile ra lebeletšana le teko e fapanego kudu. Go ile gwa hwetšwa gore Arne o na le kankere ya bjoko. Ke be ke mo etela letšatši le lengwe le le lengwe ge a be a le sepetlele, a le ka tlase ga kalafo yeo e bego e tšea nako e telele ya go fišeletšwa ga kankere.  O ile a kaonefala go se nene; ke moka boemo bja gagwe bo ile bja mpefala kudu moo a ilego a hwa lehlakore. Ke ile ka botšwa gore o be a šaletšwe ke dibeke tše mmalwa feela gore a phele. Lega go le bjalo, Arne o ile a phela go feta moo. Mafelelong o ile a boa gae, moo ke ilego ka mo hlokomela ganyenyane-ganyenyane go fihlela a kaonefala. Ge nako e dutše e eya, o be a kgona go sepela gape gomme a buša a ba mogolo ka phuthegong. Go dula e le motho yo a thabilego le wa metlae go bile le karolo e kgolo kudu go mo thuša go kaonefala gomme gwa dira gore go be bonolo go nna go dula ke mo hlokomela.

Nywaga ka morago ga moo, ka 1986, boemo bja Arne bo ile bja mpefala kudu. Ka nako yeo batswadi ba ka ba be ba šetše ba hlokofetše, ka go re’alo re ile ra hudugela lefelong le lebotse la Blue Mountains ka ntle ga Sydney, moo re ilego ra ba kgauswi le bagwera ba rena. Ka morago, Gary o ile a nyala kgaetšedi wa moya yo a rategago, Karin, gomme ba šišinya gore ka moka ga rena re le ba bane re dule ntlong e tee. Ka dikgwedi tše sego kae feela, ka moka ga rena re ile ra hudugela ntlong yeo e bego e le bokgole bja ditarata tše mmalwa go tloga moo nna le Arne re bego re dula gona.

Dikgweding tše 18 tša mafelelo tša bophelo bja gagwe, Arne o be a sa kgone go tloga malaong gomme go be go nyakega gore a dule a hlokometšwe. Ka ge ka dinako tše dintši ke be ke dula ke le gona ka gae, ke be ke diriša diiri tše pedi letšatši le lengwe le le lengwe ke ithuta Beibele le dikgatišo tšeo di theilwego Beibeleng. Dinakong tšeo tša go ithuta, ke ile ka hwetša dikeletšo tše dintši kudu tše bohlale tša kamoo nka lebeletšanago le boemo bja ka. Ke ile ka ba ka hwetša diketelo tše lerato go tšwa go batšofadi ba phuthegong ya gabo rena—bao ba bangwe ba bona ba ilego ba kgotlelela diteko tša go swana le tša ka. Diketelo tša bona di ile tša lapološa moya wa ka e le ruri! Arne o ile a hwa ka April 2003, a na le kholofelo e tiilego ya tsogo.

MOTHEKGI WA KA YO MOGOLO

Ge ke be ke sa le mofsa, ke be ke sa lebelele dilo ka tsela ya kgonthe. Eupša ke ile ka hwetša gore gantši bophelo ga bo be ka tsela yeo re letetšego gore bo be ka yona. Ke thabetše ditšhegofatšo tše dintšintši gomme ke kgotleletše diteko tše pedi tšeo di nyamišago kudu—go lahlegelwa ke molekane yo mongwe ka baka la go se botege ga gagwe gomme yo mongwe ka baka la lehu. Bophelong bja ka, ke hweditše tlhahlo le kgothatšo methopong e sa swanego. Mothekgi wa ka yo mogolo e sa dutše e le “Motala wa Mabaka”—Jehofa Modimo. (Dan. 7:9) Keletšo ya gagwe e kaonefaditše semelo sa ka, ya dira gore ke be le diphihlelo tšeo di putsago modirong wa boromiwa. Ge go be go tsoga mathata, ‘botho bja Jehofa bo ile bja nthekga gomme dikhomotšo tša gagwe tša okobatša moya wa ka.’ (Ps. 94:18, 19) Le gona ke thabetše lerato le thekgo ya lapa lešo gotee le ya ‘bagwera ba kgonthe bao motho a ka ithekgago ka bona mohlang wa tlalelo.’ (Die. 17:17) Bontši bja bona e be e le batšofadi ba bohlale.

Mopatriareka Jobo o botšišitše gore: “A bohlale ga bo hwetšwe gare ga batšofadi, le gona a kwešišo ga e hwetšwe ka go ata ga matšatši?” (Jobo 12:12) Ge ke lebelela morago bophelong bja ka, nka araba ka gore ee. Keletšo ya batšofadi bao e nthušitše kudu, kgothatšo ya bona e ile ya nthekga, gomme go gwerana ga ka le bona go humišitše bophelo bja ka. Ruri ke leboga gore ke ile ka ba rata.

Ga bjale ke na le nywaga e 80, le nna ke motšofadi. Diphihlelo tša ka di ntirile gore ke naganele kudu dinyakwa tša batšofadi ba bangwe. Ke sa dutše ke rata go ba etela le go ba thuša. Eupša gape ke thabela go ba gare ga bafsa. Matla a bona a a kgothatša, gomme phišego ya bona e a fetela. Ge ke lemoga gore bafsa ba tla go nna bakeng sa tlhahlo goba thekgo, ke hwetša e le mo go putsago go ba thuša.

[Mongwalo wa ka tlase]

[Seswantšho go letlakala 14]

Ge ke be ke bula madibogo le Joy Lennox kua Narrandera

[Seswantšho go letlakala 15]

Elva le ditho tša lapa la Bethele Switzerland ka 1960

[Seswantšho go letlakala 16]

Ge ke be ke hlokometše Arne ge a be a babja