Na o Bonagatša Letago la Jehofa?

“Re bonagatša letago la Jehofa bjalo ka diipone.”—2 BAKOR. 3:18.

O BE O TLA ARABA BJANG?

Re ka tagafatša Jehofa bjang go sa šetšwe go ba ga rena le sebe?

Dithapelo tša rena le go ba gona ga rena dibokeng tša Bokriste di ka re thuša bjang go bonagatša letago la Modimo?

Ke’ng seo se ka re thušago go tšwela pele re tagafatša Jehofa?

1, 2. Ke ka baka la’ng e le mo go kwagalago go letela gore re ka kgona go ekiša dika tša Jehofa?

KA MOKA ga rena re swana le batswadi ba rena ka tsela e itšego. Ka baka leo, ga go makatše go kwa motho a botša ngwana wa mošemanyana gore: ‘Wa tla wa swana le tatago!’ Ngwana wa ngwanenyana a ka botšwa gore: ‘O nkgopotša mmago o a tseba.’ Le gona, bana gantši ba ekiša seo ba se bonago go batswadi ba bona. Eupša go thwe’ng ka rena? Na re ka ekiša Tatago rena wa legodimong, Jehofa? Gaešita le ge re se ra ka ra mmona, re ka kgona go bona dika tša gagwe tše di kgahlišago ka go ithuta Lentšu la gagwe, ka go lebelela dilo tšeo a di hlodilego le ka go naganišiša ka Mangwalo, kudukudu ka mantšu le ditiro tša Morwa wa Gagwe, Jesu Kriste. (Joh. 1:18; Baroma 1:20) Go a kgonega gore re bonagatše letago la Jehofa.

² Pele Modimo a bopa Adama le Efa, o be a kgodišegile gore batho ba be ba tla phethagatša thato ya gagwe, ba bonagatše dika tša gagwe le go mo tagafatša. (Bala Genesi 1:26, 27.) Ge e ba re nyaka go phela ka tsela ya boineelo go Modimo, re swanetše go bonagatša dika tša Yoo a re bopilego. Ge e ba re dira bjalo, re na le tokelo e kgahlišago ya go bonagatša letago la Modimo go sa šetšwe setšo sa rena, thuto ya rena goba setlogo sa rena. Ka baka la’ng? Ka gobane “Modimo ga a bebe sefahlego, eupša setšhabeng se sengwe le se sengwe motho yo a mmoifago gomme a dira se se lokilego o a amogelega go yena.”—Dit. 10:34, 35.

3. Bakriste ba ka ba le maikwelo afe ge ba dutše ba hlankela Jehofa?

³ Bakriste ba tloditšwego ba bonagatša letago la Jehofa. Moapostola yo a tloditšwego ka moya e lego Paulo o ngwadile gore: “Ka moka ga rena, ge ka difahlego tše di širolotšwego re bonagatša letago la Jehofa bjalo ka diipone, re fetošetšwa seswantšhong se se swanago go tšwa tekanyong e itšego ya letago go ya go e nngwe.” (2 Bakor. 3:18) Ge moporofeta Moshe a be a theoga Thabeng ya Sinai a swere diphaphathi tšeo di bego di na le Melao e  Lesome, sefahlego sa gagwe se be se phadima mahlasedi ka gobane Jehofa o be a boletše le yena. (Ek. 34:29, 30) Gaešita le ge Bakriste ba se ba ka ba ba le phihlelo e bjalo gomme difahlego tša bona di sa phadime mahlasedi, ba tlala lethabo ge ba dutše ba botša ba bangwe ka Jehofa, dika tša gagwe gotee le ka morero wa gagwe o kgahlišago ka batho. Go swana le diipone tša tšhipi tša bogologolo tšeo di phadimišitšwego, batlotšwa gotee le bagwera ba bona ba mo lefaseng ba bonagatša letago la Jehofa maphelong a bona le bodireding bja bona. (2 Bakor. 4:1) Na o bonagatša letago la Jehofa ka go itshwara ka tsela yeo a e amogelago le ka mediro ya gago o le mogoeledi wa ka mehla wa Mmušo?

RE KGANYOGA GO BONAGATŠA LETAGO LA JEHOFA

4, 5. (a) Go fo swana le Paulo, re lebeletšane le bothata bofe? (b) Sebe se re kgomile ka ditsela dife?

⁴ Ka ge re le bahlanka ba Jehofa, ruri re nyaka go tumiša le go tagafatša Mmopi wa rena dilong ka moka tšeo re di dirago. Lega go le bjalo, gantši re dira seo re sa kganyogego go se dira. Paulo le yena o be a lebeletšane le bothata bjo bo swanago. (Bala Baroma 7:21-25.) Ge a hlalosa lebaka leo re nago le bothata bjo, Paulo o ngwadile gore: “Bohle ba dirile sebe gomme ba hlaelelwa ke letago la Modimo.” (Baroma 3:23) Ee, ka baka la ge batho ba abetše sebe go Adama, ba bile ka tlase ga bolaodi bjo sehlogo bja ‘Kgoši Sebe.’—Baroma 5:12; 6:12.

⁵ Sebe ke’ng? Ke selo le ge e le sefe seo se ganetšanago le botho bja Jehofa, ditsela tša gagwe, melao ya gagwe ya motheo gotee le thato ya gagwe. Sebe se senya tswalano ya motho le Modimo. Sebe se dira gore re foše leswao, go fo swana le ge mmetši wa mosebe a ka foša pakane ya gagwe. Re ka dira sebe ka boomo goba ka phošo. (Num. 15:27-31) Sebe se tsemile medu ka gare ga batho gomme se aga legora magareng ga bona le Mmopi wa bona. (Ps. 51:5; Jes. 59:2; Bakol. 1:21) Ka go re’alo, batho ka kakaretšo ga ba sepedišane ka mo go feletšego le Jehofa gomme ga ba fihlelele sebaka se se kgahlišago kudu sa go bonagatša letago la Modimo. Ga go pelaelo gore sebe ke bogole bjo šoro kudu bjoo bo hlasetšego batho.

6. Re ka tagafatša Modimo bjang go sa šetšwe go ba ga rena le sebe?

⁶ Go sa šetšwe boemo bja rena bja go ba le sebe, Jehofa o itlhatsetše e le “Modimo yo a neago kholofelo.” (Baroma 15:13) O dirile gore go be le tsela ya go fediša sebe—sehlabelo sa topollo sa Jesu Kriste. Ka go ba le tumelo sehlabelong seo, ga re sa le “bahlanka ba sebe,” eupša re boemong bja go bonagatša letago la Jehofa. (Baroma 5:19; 6:6; Joh. 3:16) Go dula re na le tswalano e amogelegago le Modimo go re kgonthišetša tšhegofatšo ya Jehofa gona bjale gotee le mehola ya nakong e tlago ya go ba ba phethagetšego le ya go phela ka mo go sa felego. Gaešita le ge re le batho ba nago le sebe, ruri ke tšhegofatšo go lebelelwa ke Modimo re le batho bao ba ka bonagatšago letago la gagwe!

GO BONAGATŠA LETAGO LA MODIMO

7. Re swanetše go amogela boemo bofe ka rena e le gore re bonagatše letago la Modimo?

⁷ E le gore re be boemong bjo bobotse bja go bonagatša letago la Modimo, re swanetše go lemoga gore re na le sebe. (2 Dikor. 6:36) Re swanetše go amogela mafokodi a rena ao a bontšhago gore re na le sebe gomme re šomele go a laola e le gore re ka dira tšwelopele go fihla bokgoleng bja go tagafatša Modimo e le ka kgonthe. Ka mohlala, ge e ba re wetše sebeng se se gobogilego sa go lebelela diswantšho tšeo di kgothaletšago bootswa, re swanetše go lebeletšana le therešo ya gore re nyaka thušo ya moya—gomme re tšee kgato ya go e hwetša. (Jak. 5:14, 15) Ye e tla ba kgato ya pele ya go šomela go hwetša bophelo bjoo bo tlogago bo tumiša Modimo. Ka ge re le barapedi ba Jehofa, re swanetše go tšwela pele re itlhahloba go bona ge e ba re sa dutše re phela ka go dumelelana le ditekanyetšo tša gagwe tša go loka. (Die. 28:18; 1 Bakor. 10:12) Go sa šetšwe mohuta wa bofokodi bjoo re  nago le bjona bja sebe, re swanetše go dula re bo lwantšha e le gore re ka bonagatša letago la Modimo.

8. Re swanetše go dira’ng gaešita le ge re sa phethagala?

⁸ Jesu ke yena feela motho yo a kilego a phela le go hwa a se a ka a palelwa ke go thabiša Modimo le go bonagatša letago la Gagwe. Gaešita le ge Jesu a be a phethagetše eupša rena re sa phethagala, re ka kgona go katanela go latela mohlala wa gagwe e bile re swanetše go dira bjalo. (1 Pet. 2:21) Jehofa o bona maiteko a rena gotee le tšwelopele yeo re e dirago, gomme o šegofatša maiteko a rena ao a tšwago pelong a go mo tagafatša.

9. Beibele e kgatha tema efe maphelong a Bakriste bao ba kganyogago go phela ka go dumelelana le dinyakwa tša Modimo?

⁹ Lentšu leo le ngwadilwego la Jehofa le ka re bonegela tseleng ya rena ya go dira tšwelopele. Go bohlokwa kudu go ithuta Mangwalo ka mo go tseneletšego le go naganišiša ka seo re se balago Beibeleng. (Ps. 1:1-3) Go bala Mangwalo ka mehla go tla re thuša gore re dire tšwelopele. (Bala Jakobo 1:22-25.) Tsebo yeo e tšwago ka Beibeleng ke motheo wa tumelo ya rena le tsela ya go matlafatša maikemišetšo a rena a go phema sebe se segolo gomme re thabiše Jehofa.—Ps. 119:11, 47, 48.

10. Thapelo e ka re thuša bjang go hlankela Jehofa ka mo go feletšego?

¹⁰ E le gore re bonagatše letago la Modimo, re swanetše go ‘phegelela thapelong.’ (Baroma 12:12) Re ka kgona go rapela Jehofa gore a re thuše go mo hlankela ka tsela e amogelegago e bile re swanetše go dira bjalo. Gore re fihlelele seo, re tla ba re dira gabotse ge re mo kgopela gore a re nee moya o mokgethwa, tumelo e oketšegilego, matla a go ganetša diteko le bokgoni bja go “[swara] lentšu la therešo ka tshwanelo.” (2 Tim. 2:15; Mat. 6:13; Luka 11:13; 17:5) Go swana le ge ngwana a ithekga ka tatagwe, le rena re swanetše go ithekga ka Tatago rena wa legodimong, Jehofa. Ge e ba re mo kgopela gore a re thuše go mo hlankela ka mo go feletšego, re ka ba le kgodišego ya gore o tla dira bjalo. Anke le ka mohla re se ikwe eka re morwalo go yena! Go e na le moo, anke re mo tumiše ka thapelo, re mo leboge, re tsome tlhahlo ya gagwe kudukudu ge re lebeletšane le teko, gomme re mo kgopele gore a re thuše go mo hlankela ka ditsela tšeo di tagafatšago leina la gagwe le lekgethwa.—Ps. 86:12; Jak. 1:5-7.

11. Diboka tša phuthego di re thuša ka ditsela dife go bonagatša letago la Modimo?

¹¹ Modimo o dirile gore dinku tša gagwe tše bohlokwa di hlokomelwe ke “mohlanka yo a botegago le wa temogo.” (Mat. 24:45-47; Ps. 100:3) Sehlopa sa mohlanka se tloga se kgahlegela kudu tsela yeo badumedigotee le sona ba bonagatšago letago la Jehofa. Ponagalo ya rena re le badiredi ba Bakriste e beakanywa gabotse ge re le dibokeng, go swana le ge re ka kgopela moroki wa diaparo gore a beakanye diaparo tša rena e le gore re bogege. (Baheb. 10:24, 25) Ka go re’alo, anke re swareng nako ya diboka, ka gobane ge e ba re tlwaetše go fihla ka morago ga nako re lahlegelwa ke tše dingwe tša ditokišetšo tša moya tšeo di nyakegago e le gore re ka kaonefatša ponagalo ya rena re le bahlanka ba Jehofa.

ANKE RE EKIŠENG MODIMO

12. Re ka ekiša Modimo bjang?

¹² Ge e ba re tla bonagatša letago la Jehofa, re swanetše go “[ba] baekiši ba Modimo.” (Baef. 5:1) Tsela e nngwe yeo re ka ekišago Jehofa ka yona ke ka go ba le pono ya gagwe ka ditaba. Go katanela go phela ka tsela le ge e le efe e nngwe ke go mo hlompholla le go ikgobatša. Ka ge lefase leo re phelago go lona le le ka tlase ga tutuetšo ya yo kgopo, Sathane Diabolo, re swanetše go šoma ka matla go hloya seo Jehofa a se hloilego le go hlagolela lerato le matla la seo a se ratago. (Ps. 97:10; 1 Joh. 5:19) Re swanetše go kgodišega go tšwa pelong gore tsela feela e nepagetšego ya go hlankela Modimo ke ka go dira dilo tšohle gore re mo tagafatše.—Bala 1 Bakorinthe 10:31.

13. Ke ka baka la’ng re swanetše go hloya sebe, gomme se se tla re tutueletša go dira’ng?

¹³ Jehofa o hloile sebe, le rena re swanetše  go se hloya. Ee, re swanetše go emela kgole kamoo re ka kgonago ka gona le sebe gomme ga se ra swanela go leka go se batamela ka maikemišetšo a go bona gore re ka se dira go fihla bokgoleng bofe ntle le gore se re fenye. Ka mohlala, re swanetše go hlokomela gore re se latele tsela ya bohlanogi, e lego sebe seo se tla re dirago gore re se swanelegele go tagafatša Modimo. (Doit. 13:6-9) Ka baka leo, anke re se kgome selo le ge e le sefe seo se sepedišanago le bahlanogi goba motho le ge e le ofe yo a ipolelago gore ke ngwanabo rena eupša a hlompholla Modimo. Go swanetše go ba bjalo gaešita le ge motho yoo e le setho sa lapa la gabo rena. (1 Bakor. 5:11) Re ka se holwe ke selo ka go leka go ngangišana le bahlanogi goba bao ba swayago mokgatlo wa Jehofa diphošo. Ge e le gabotse, go ka re gobatša moyeng e bile ke mo go fošagetšego go hlahloba tsebišo ya bona go sa šetšwe gore e hwetšagala ka pukung goba Inthaneteng.—Bala Jesaya 5:20; Mateo 7:6.

14. Ge re katanela go bonagatša letago la Modimo, ke seka sefe seo se swanetšego go bonagala kudu, gona ka baka la’ng?

¹⁴ Go bonagatša lerato ke tsela e botse kudu ya go ekiša Tatago rena wa legodimong. Ee, ka go swana le yena re swanetše go rata ba bangwe. (1 Joh. 4:16-19) Ge e le gabotse, go ratana ga rena go re hlaola re le barutiwa ba Jesu le bahlanka ba Jehofa. (Joh. 13:34, 35) Gaešita le ge ka dinako tše dingwe go ba ga rena le sebe go re šitiša, re swanetše go go kgaphela ka thoko gomme re bonagatše lerato ka dinako ka moka. Go hlagolela lerato le dika tše dingwe tša Modimo go tla re thuša go phema go dira ditiro tša go hloka botho le dilo tše dingwe tše mpe.—2 Pet. 1:5-7.

15. Lerato le kgoma bjang tswalano ya rena le ba bangwe?

¹⁵ Lerato le re dira gore re nyake go direla batho ba bangwe dilo tše dibotse. (Baroma 13:8-10) Ka mohlala, go rata molekane wa rena wa lenyalo go tla boloka malao a lenyalo a sa šilafala. Go rata bagolo gotee le go hlompha mošomo woo ba o dirago, go tla re thuša go kwa le go ikokobeletša tlhahlo ya bona. Bana bao ba ratago batswadi ba bona ba a ba kwa le go ba hlompha gomme ga ba ba bolele gampe. Ge e ba re rata batho ba bangwe, re ka se ba lebelele e le ba ba nyatšegago goba ra bolela le bona ka lenyatšo. (Jak. 3:9) Le gona bagolo bao ba ratago dinku tša Modimo ba tla di swara ka bonolo.—Dit. 20:28, 29.

16. Go rata batho ba bangwe go tla re thuša bjang ge re le bodireding?

¹⁶ Seka se sa lerato se swanetše go bonagala le ge re le bodireding bja rena. Ka baka la go rata ga rena Jehofa ka mo go tseneletšego, re ka se itumelele go laolwa ke kganetšo ya beng ba dintlo goba go se arabele gabotse ga ba bangwe ba bona. Go e na le moo, re tla dula re bolela ditaba tše dibotse. Lerato le tla re tutueletša go lokišetša gabotse le go katanela go ba mafolofolo bodireding. Ge e ba ruri re tloga re rata Modimo le baagišani ba rena, re ka se lebelele modiro wa rena wa go bolela ka Mmušo e le morwalo goba e le modiro wa kgapeletšo. Go e na le moo, re tla o lebelela e le tokelo e kgolo kudu gomme ra o phetha ka lethabo.—Mat. 10:7.

TŠWELANG PELE LE TAGAFATŠA JEHOFA

17. Go amogela gore re hlaelelwa ke letago la Modimo go ka re hola bjang?

¹⁷ Lefase ka kakaretšo ga le lemoge gore sebe se kotsi, eupša ga go bjalo ka rena. Se se re dira gore re lemoge bohlokwa bja go lwantšha mafokodi a rena a go dira sebe. Go amogela boemo bja rena bja go ba le sebe go re dumelela go tlwaetša matswalo a rena gore a re tutueletše go dira se se nepagetšego ge sebe se thoma go tšwelela ka menaganong le ka dipelong tša rena. (Baroma 7:22, 23) Ke therešo gore re ka ba re fokola, eupša Modimo a ka re matlafaletša go dira se se nepagetšego maemong le ge e le afe.—2 Bakor. 12:10.

18, 19. (a) Ke’ng seo se dirago gore re kgone go atlega ge re lwantšha madira a kgopo a moya? (b) Re swanetše go ikemišetša go dira’ng?

¹⁸ Ge e ba re nyaka go tagafatša Jehofa, re swanetše go lwantšhana le madira a kgopo  a moya. Ditlhamo tša rena tšeo di feletšego tša moya tšeo re di neilwego ke Modimo di re thuša go dira seo ka katlego. (Baef. 6:11-13) Sathane ga a kgaotše go leka go tšeela Jehofa letago leo le swanelago Yena a nnoši. Le gona, Diabolo o tšwela pele a dira maiteko le ge e le afe a go senya tswalano ya rena le Jehofa. Ruri go nyamiša Sathane gakaakaang ge e ba rena gotee le banna, basadi le bana ba dimilione bao ba sa phethagalago re dula re botega gomme re tagafatša Modimo! Ka go re’alo, anke re tšwele pele re tumiša Jehofa, go swana le dibopiwa tša legodimong tšeo di goeletšago ka gore: “Wena Jehofa Modimo wa rena o swanelwa ke go amogela letago, kgodišo le matla, gobane o bopile dilo ka moka gomme di bile gona le go bopša ka baka la thato ya gago.”—Kut. 4:11.

¹⁹ Eka re ka ikemišetša go dula re tagafatša Jehofa, go sa šetšwe seo se diregago. O tloga a thabišwa ke gore batho ba bantši ka tsela ye bao ba botegago ba dira sohle seo ba ka se kgonago go mo ekiša le go bonagatša letago la gagwe. (Die. 27:11) Eka re ka ikwa go swana le Dafida yo a opetšego ka gore: “Wena Jehofa Modimo wa ka, ke go reta ka pelo ya ka ka moka, ke tla tagafatša leina la gago go iša mehleng ya neng le neng.” (Ps. 86:12) Ruri re tloga re fagahletše letšatši leo re tlago go bonagatša letago la Jehofa ka mo go phethagetšego le go mo tumiša ka mo go sa felego! Se e tla ba selo seo batho bao ba kwago ba tlago go se thabela. Na o bonagatša letago la Jehofa Modimo gona bjale, ka maikemišetšo a go dira bjalo ka mo go sa felego?

[Dipotšišo tša Thuto]

[Diswantšho go letlakala 27]

Na o bonagatša letago la Jehofa ka ditsela tše?