Dipotšišo tše Tšwago go Babadi
Dipotšišo tše Tšwago go Babadi
Mmušo wa Lefase wa Maisemane le Maamerika o bile neng mmušo wa lefase wa bošupa wa boporofeta bja Beibele?
▪ Seswantšho se segolo kudu seo se bonwego ke Kgoši Nebukadinetsara ga se emele mebušo ka moka ya lefase. (Dan. 2:31-45) Se emela feela mebušo e mehlano yeo e bušitšego go tloga mehleng ya Daniele go ya pele yeo e kgomilego batho ba Modimo ka tsela e kgolo.
Tlhaloso ya Daniele ya seswantšho se segolo e tšweletša kgopolo ya gore Mmušo wa Lefase wa Maisemane le Maamerika o be o tla tšwa go Roma, e sego gore o be o tla fenya Roma. Seswantšhong seo, Daniele o bona tšhipi yeo e lego maotong e theoga go fihla dinaong le menwaneng. (Mo dinaong le menwaneng, tšhipi yeo e tswakane le letsopa.) * Tlhaloso yeo e bontšha gore Mmušo wa Lefase wa Maisemane le Maamerika o be o tla tšwelela maotong a tšhipi. Histori e hlatsela gore seo se ile sa direga. Brithania, e lego naga yeo e kilego ya ba karolo ya Mmušo wa Roma, e ile ya thoma go ba le matla go ya bofelong bja nywaga ya bo-1700. Ka morago ga moo, United States of America e ile ya thoma go ba setšhaba se matla. Lega go le bjalo, mmušo wa bošupa wa lefase wa boporofeta bja Beibele o be o se wa tšwa o hlongwa. Ka baka la’ng? Brithania le United States di be di se tša hlwa di thoma go gata megato ka tsela e kgolo di le ngatana e tee. Seo se ile sa direga Ntweng ya I ya Lefase.
Ka nako yeo, “barwa ba Mmušo” ba be ba šetše ba le gona ka bontši kua United States, gomme ntlokgolo ya bona ya lefase ka bophara e le Brooklyn, New York. (Mat. 13:36-43) Ditho tša sehlopha sa batlotšwa di be di bolela ka mafolofolo dinageng tšeo di bego di bušwa ke Mmušo wa Brithania. Ntweng ya I ya Lefase, go ile gwa ba le segwera sa moswananoši magareng ga mmušo wa Brithania le wa Amerika go lwantšheng manaba a bona a dipolitiki. Le gona, ka baka la botšhaba bjo bo bego bo gola bjo bo bakilwego ke ntwa, mebušo yeo e ile ya hloya bao e bego e le karolo ya peu ya “mosadi” wa Modimo, ya thibela dikgatišo tša bona gomme ya golega bao ba bego ba etelela pele modirong wa boboledi.—Kut. 12:17.
Ka gona, go ya ka boporofeta bja Beibele, mmušo wa lefase wa bošupa ga se wa hlongwa go ya bofelong bja nywaga ya bo-1700 ge Brithania e be e thoma go ba le matla. Go e na le moo, o hlomilwe mathomong a letšatši la Morena. *
[Mengwalo ya tlase]
^ ser. 4 Letsopa leo le tswakanego le tšhipi le emela batho le mekgatlo yeo e hwetšwago Mmušong wa Lefase wa Maisemane le Maamerika woo o swanago le tšhipi. Go theoša le nywaga, letsopa leo le ile la dira gore mmušo woo o thatafalelwe ke go ba o matla ka tsela yeo o bego o nyaka go ba ka yona.
^ ser. 6 Tlhaloso ye e tšeela legato tsebišo yeo e ahlaahlilwego go letlakala 57, serapa 24, pukung ya Boporofeta bja Daniele gotee le ditšhate tšeo di lego go matlakala 56 le 139.
[Seswantšho go letlakala 19]
Bana babo rena ba seswai go tšwa ntlongkgolo ya Watchtower ba ile ba lahlelwa kgolegong ka June 1918
