Kamoo go ba yo Botho go Fedišitšego Manyami

KGAETŠEDI yo mongwe yo a tšofetšego o ile a bonagala a šulafetše ge George le Manon, e lego Dihlatse tše pedi tše di tšwago Netherlands, di boledišana le yena ka ditaba tše dibotse tša Mmušo wa Modimo. Ka morago ba ile ba lemoga gore o be a hlokofaletšwe ke monna wa gagwe wa pele le wa bobedi gaešita le ke morwa wa gagwe, le gona o be a swerwe ke bolwetši bjo šoro bja marapo. Le ge a ile a lokologa ganyenyane-ganyenyane ge ba boledišana le yena, ga se a ka a ba le bogwera.

Ka baka leo, George o ile a kgopela Manon gore ba boele go mosadi yoo ba swere ngatana ya matšoba ka ge a be a bonagala a lewa ke bodutu e bile a nyamile. Ge ba boa le ona, mong wa ntlo e lego Rie, o ile a makala kudu. Lega go le bjalo, o be a swaregile gomme ba ile ba rulaganya go tla ka nako e nngwe. Ge George le Manon ba boa ka nako yeo, go be go se na motho. Le ge ba ile ba tla ka dinako tše di fapafapanego, ba be ba sa mo hwetše. Ba ile ba ba ba thoma go nagana gore o be a ba tšhabela.

Mafelelong, ka letšatši le lengwe George o ile a hwetša Rie ka gae. Rie o ile a kgopela tshwarelo ka ge a be a se gona nakong e fetilego gomme a hlalosa gore o be a le sepetlele. O ile a re: “Eupša le ka se kgolwe seo ke ilego ka se dira ka morago ga ge le sepetše. Ke ile ka thoma go bala Beibele!” Ba ile ba boledišana ka tsela e borutho, gomme thuto ya Beibele e ile ya thongwa.

Ge a be a ithuta Beibele, Rie o ile a tloga go beng motho yo a nyamilego go ya go beng motho yo a thabilego yo a nago le botho. Le ge a be a sa kgone go tšwa ka ntlong, o be a botša yo mongwe le yo mongwe yo a bego a mo etela ka tumelo e mpsha yeo a e hweditšego. Bolwetši bja gagwe bo be bo sa mo dumelele ka mehla go tla dibokeng tša phuthego, eupša o be a thaba ge a bona bana babo rena le dikgaetšedi ba mo etela. Ka letšatši leo a bilego le nywaga e 82, o ile a ba gona kopanong ya tikologo gomme a bontšha boineelo bja gagwe go Modimo ka kolobetšo.

Dikgwedi tše sego kae ka morago ga lehu la gagwe, go ile gwa hwetšwa sereto seo a bego a se ngwadile. Ka gare ga sona, o be a hlalositše manyami a go lewa ke bodutu nakong ya botšofadi gomme a gatelela bohlokwa bja go ba le botho. Manon o re: “Go bala sereto seo go nkgomile kudu, ke thabela gore Jehofa o ile a re thuša go mmontšha botho.”

Ruri mohlala woo Jehofa a re beetšego wona o re šušumeletša go bontšha lerato le bjalo gaešita le botho. (Baef. 5:1, 2) Bodiredi bja rena bo tla tšweletša dienywa ge “re ipolelela ka ditsela tšohle re le badiredi ba Modimo . . . ka botho.”—2 Bakor. 6:4, 6.