Ba Ile ba Ikgafa go tšwa Pelong—Kua Ecuador

BRUNO, e lego ngwanabo rena yo mofsa kua Italy o be a gateletšegile. O be a sa tšwa go aloga ka dinaletšana sekolong se phagamego, gomme ba leloko le barutiši ba be ba mo kgothaletša gore a phegelele thuto e phagamego. Lega go le bjalo, nywaga e sego kae e fetilego, o be a ile a ineela go Jehofa gomme a mo holofetša gore o tla etiša thato ya Gagwe pele bophelong bja gagwe. O ile a dira phetho efe? O hlalosa gore: “Ke ile ka botša Jehofa ka thapelo gore ke tla dira seo ke mo holofeditšego sona ka go etiša thato ya gagwe pele. Ke ile ka mmotša gape thapelong yeo gore ke be ke sa nyake go phela bophelo bjo bo lešago bodutu, eupša ke be ke nyaka bophelo bjo bo tletšego ka mediro e fapafapanego tirelong ya gagwe.”

 Nywaga e sego kae ka morago ga moo, Bruno o be a hlankela Ecuador, Amerika Borwa. O bolela gore: “Jehofa o arabile dithapelo tša ka go feta ka tsela yeo ke bego ke naganne ka yona.” Seo se ilego sa mo makatša ke gore ge a fihla Ecuador, o ile a kopana le bafsa ba bantši bao ba bego ba hudugetše moo gore ba hlankele Jehofa ka mo go oketšegilego.

BAFSA BAO BA ‘LEKAGO JEHOFA’

Go swana le bafsa ba diketekete go dikologa lefase, Bruno o ile a kwa taletšo ya Jehofa ya gore: “Hle, ntekeng . . . , le bone ge nka se le bulele mašoba a legodimo gomme ka le tšhollela tšhegofatšo ka boati.” (Mal. 3:10) Ka ge ba šušumetšwa ke go rata Modimo, ba ile ba kgetha go ‘leka Jehofa’ ka go ikgafa go tšwa pelong gore ba šomiše nako, matla le dilo tša bona go tšwetša pele dikgahlego tša gagwe dinageng tšeo go nyakegago bagoeledi ba oketšegilego ba Mmušo.

Ka moragonyana ge bašomi ba ba ikgafago ba fihla kabelong ya bona e mpsha, ba ile ba iponela ka noši gore “puno ke e kgolo eupša bašomi ke ba sego kae.” (Mat. 9:37) Ka mohlala, Jaqueline, yo a tšwago Germany, ka mafolofolo o ile a ngwalela lekala la Ecuador gore: “Ke na le nywaga ya ka godingwana ga e mebedi ke hlankela Ecuador, gomme ke šetše ke na le dithuto tša Beibele tše 13, e bile tše nne tša tšona di ba gona dibokeng ka mehla. Na seo ga se kgahliše?” Chantal, yo a tšwago Canada, o re: “Ka 2008, ke ile ka hudugela lefelong le lengwe leo le lego lebopong la Ecuador moo go bego go na le phuthego e tee feela. Ga bjale go na le diphuthego tše tharo le babulamadibogo ba fetago  ba 30. Ga go na selo seo se fetago go bona batho ba bantši ba sa tšwago go tla ka phuthegong ba dira tšwelopele!” O oketša ka gore: “Ke sa tšo hudugela motseng woo o lego bophagamong bja dimithara tše 2 743 ka godimo ga tekanyo ya lewatle kua Dithabeng tša Andes. Motse woo o na le badudi ba ka godimo ga 75 000 eupša o na le phuthego e tee feela. Go na le batho ba bantši ba thabelago! Ke tloga ke thabela tirelo ya ka.”

DITLHOHLO TŠEO DI LEGO GONA

Ke therešo gore go hlankela nageng e šele go na le ditlhohlo. Ge e le gabotse, bafsa ba bangwe ba ile ba lebeletšana le mapheko a itšego le pele ga ge ba ka huduga. Kayla, yo a tšwago United States, o bolela gore: “Go arabela ka tsela e sa thabišego ga bana bešo ba nago le maikemišetšo a mabotse kua gae go be go nnyemiša moko. Ba be ba sa kwešiše lebaka la ka la go nyaka go hudugela nageng e šele gore ke yo bula madibogo moo. Ka dinako tše dingwe, se se ile sa dira gore ke ipotšiše gore: ‘Na ke dira phetho e botse?’” Lega go le bjalo, Kayla o ile a huduga. O hlalosa gore: “Go rapela ga ka Jehofa ka makga a mantši le go boledišana ka nako e telele le bana bešo le dikgaetšedi ba godilego moyeng go nthušitše go bona gore Jehofa o šegofatša motho yo a ikgafago.”

Go ithuta leleme le lefsa ke lepheko go ba bantši. Siobhan, yo a tšwago Ireland o gopola ka gore: “Ke be ke ferekanywa ke go se tsebe leleme la moo. Go ile gwa nyaka gore ke se fele pelo, ke ithute leleme la moo ka kelohloko, gomme ke itshege ge ke dira diphošo.” Anna, yo a tšwago Estonia, o oketša go se ka gore: “Go ithuta leleme la Sepanishi go be go le thata kudu go feta go tlwaela phišo ya molatšatšing, lerole le lentši le go hlokagala ga dišawara tšeo di nago le meetse a fišago. Ka dinako tše dingwe ke be ke ikwa eka nka tlogela. Ke ile ka swanelwa ke go ithuta go hlokomela kudu tšwelopele ya ka go e na le go tshwenyega ka diphošo tša ka.”

Tlhohlo e nngwe yeo re sego ra swanela go e tshediša mahlo ke ya go hlologela gae. Jonathan, yo a tšwago United States, o dumela ka gore: “Ke ile ka fela matla ka moragonyana ga ge ke fihlile moo ka gobane ke be ke le kgole le bagwera le ba leloko. Eupša ke ile ka lebeletšana le se ka go fetša nako e ntši thutong ya ka ya motho ka noši ya Beibele le bodireding. Go se go ye kae, diphihlelo tše kgahlišago kudu tšeo ke bilego le tšona bodireding le bagwera ba bafsa bao ke ba dirilego ka phuthegong di nthušitše gore ke boelwe ke lethabo.”

Tlhohlo e nngwe ke maemo a bophelo. Gantši maemo  a nageng e šele a ka se swane le ao o a tlwaetšego. Beau, yo a tšwago Canada, o bolela gore: “Ge o le nageng ya geno, gantši o tšeela fase dinyakwa tša motheo tše bjalo ka mohlagase le meetse. Eupša ge o hudugetše nageng e šele, dilo tše di na le karolo e bohlokwa kudu.” Bodiidi, dinamelwa tša go tshwenya gotee le bothata bja go se kgone go bala le go ngwala ke dilo tše tlwaelegilego dinageng tše dintši tšeo di hlabologago. Ines, yo a tšwago Austria, o lebeletšana le maemo a ka go ela hloko dika tše dibotse tša batho ba lefelong leo. O re: “Ba amogela baeng, ke ba botho, ba na le thušo e bile ba ikokobeditše. Se segolo kudu ke gore ba rata go ithuta ka mo go oketšegilego ka Modimo.”

“TŠHEGOFATŠO KA BOATI”

Le ge bafsa ba bantši bao ba hlankelago Ecuador ba dirile boikgafo, ba ile ba ithuta gore Jehofa o nea “go feta kudu ka kua ga tšohle” tšeo ba bego ba di naganne. (Baef. 3:20) Ruri ba ikwa ba hweditše “tšhegofatšo ka boati.” (Mal. 3:10) Diphihlelo tše di latelago di bontšha kamoo ba ikwago ka gona ka bodiredi bja bona:

Bruno: “Ke thomile tirelo ya ka mo Ecuador tikologong e kgahlišago ya Amazon. Ka morago ga moo, ke ile ka thuša modirong wa go katološa ofisi ya lekala ya Ecuador. Ga bjale ke hlankela Bethele. Ge ke sa le gae kua Italy, ke ile ka dira phetho ya go etiša Jehofa pele bophelong bja ka, gomme ga bjale o kgotsofatša kganyogo ya ka ya go phela bophelo bjo bo thabišago, le gona ke dirile mediro e fapafapanego tirelong ya gagwe.”

Beau: “Ke batametše Jehofa kudu ka ge mo Ecuador ke kgona go šomiša nako ya ka ka moka medirong ya moya. Ka nako e swanago, e nngwe ya ditšhegofatšo tšeo ke e thabelago ke ya go etela mafelong a kgahlišago—sona selo seo e lego kgale ke se nyaka.”

Anna: “Ke be ke sa nagane gore kgaetšedi yo a sa nyalwago go swana le nna a ka phela bophelo bja go swana le bja moromiwa. Eupša ga bjale ke lemogile gore go a kgonega. Ka baka la tšhegofatšo ya Jehofa, ke thabela go dira barutiwa, go aga Diholo tša Mmušo le go ba le bagwera ba bafsa.”

Elke: “Ge ke sa le gae kua Austria, gantši ke be ke rapela Jehofa gore ke be le thuto e tee ya Beibele. Eupša mo Ecuador, ke na le dithuto tša Beibele tše 15! Ke kgotsofala e le ruri ge ke bona barutwana ba Beibele ba thabile e bile ba dira tšwelopele.”

Joel: “Go hudugela nageng yeo o sa e tsebego gore o yo hlankela Jehofa ruri ke phihlelo e sa lebalegego. O ithuta go ithekga ka yena ka mo go oketšegilego, gomme go a thabiša go bona ge a šegofatša maiteko a gago! Ge ke fihla mo ka ngwaga wa ka wa mathomo go tšwa United States, sehlopha seo ke hlankelago go sona se ile sa gola go tloga go bagoeledi ba 6 go ya go ba 21. Re bile ba 110 Segopotšong.”

GO THWE’NG KA WENA?

Lena bana babo rena le dikgaetšedi bao le sa lego ba bafsa, na maemo a lena a le dumelela go hlankela nageng yeo go nyakegago bagoeledi ba oketšegilego ba Mmušo? Ke therešo gore go dira phetho e bjalo e kgolo ke selo seo se nyakago gore motho a dire dithulaganyo ka kelohloko. Se segolo le go feta, go rata ga rena Jehofa le moagišani ka mo go tseneletšego go bohlokwa e le gore re kgone go dira se. Ge e ba o na le lerato le bjalo e bile o swanelega, rapela Jehofa go tšwa pelong ka taba ye ya go hlankela nageng e nngwe. Go tlaleletša go se, boledišana le batswadi ba gago ba Bakriste le bagolo ba phuthego ka kganyogo ya gago. Mohlomongwe le wena o ka fihlelela phetho ya go tsenela mohuta wo o mongwe wa tirelo e kgethwa wo o thabišago le o kgotsofatšago.

[Ntlhakgolo go letlakala 3]

“Go rapela ga ka Jehofa ka makga a mantši le go boledišana ka nako e telele le bana bešo le dikgaetšedi ba godilego moyeng go nthušitše go bona gore Jehofa o šegofatša motho yo a ikgafago.”—Kayla yo a tšwago United States

[Lepokisi/Seswantšho go letlakala 6]

Kamoo o ka itokišeletšago go hlankela nageng e šele

• Hlagolela mekgwa e mebotse ya thuto ya motho ka noši

• Ahlaahla Tirelo ya Rena ya Mmušo ya August 2011, matlakala 4-6

• Boledišana le ba bangwe bao ba kilego ba hlankela nageng e šele

• Dira nyakišišo ka setšo le histori ya naga yeo

• Ithute leleme leo le bolelwago moo

[Lepokisi/Seswantšho go letlakala 6]

Ba bangwe bao ba hlankelago dinageng tše šele ba itlhokomela ka go . . .

• šoma dikgwedi tše sego kae ngwaga o mongwe le o mongwe dinageng tša gabo bona

• hiriša ntlo ya bona, folete goba kgwebo

• šoma ba diriša Inthanete

[Diswantšho go matlakala 4, 5]

1 Jaqueline yo a tšwago Germany

2 Bruno yo a tšwago Italy

3 Beau yo a tšwago Canada

4 Siobhan yo a tšwago Ireland

5 Joel yo a tšwago United States

6 Jonathan yo a tšwago United States

7 Anna yo a tšwago Estonia

8 Elke yo a tšwago Austria

9 Chantal yo a tšwago Canada

10 Ines yo a tšwago Austria