Dumelela Jehofa a go Lebiša Tokologong ya Kgonthe

“[Lebeledišišang] molaong o phethagetšego wo e lego wa tokologo.”—JAK. 1:25.

NA O KA HLALOSA?

Ke molao ofe wo o lebišago tokologong ya kgonthe, gomme ke bomang bao o ba holago?

Sephiri sa gore motho a be le tokologo ya kgonthe ke sefe?

Ke tokologo efe yeo e letetšego bohle bao ba dulago ba le tseleng ya bophelo?

1, 2. (a) Ke eng seo se diregago ka tokologo lefaseng, gomme ka baka la’ng? (b) Ke tokologo efe yeo e letšego ka pele bakeng sa bahlanka ba Jehofa?

RE PHELA mehleng yeo megabaru, go hlokega ga molao le bošoro di mpefalago. (2 Tim. 3:1-5) Bakeng sa go lwantšha seo, mebušo e hlama melao e oketšegilego, e oketša palo ya maphodisa gomme e tsenya dikhamera tša go thuša go thibela bosenyi. Dinageng tše dingwe, badudi ba gona ba leka go itšhireletša ka go tsenya dialamo ka magaeng a bona, ba oketša dikgonyu tša bona gaešita le go hloma magora a mohlagase. Ba bantši ba tšhaba go tšwela ka ntle bošego goba go dumelela bana ba bona ba bapala ka ntle go se motho yo a ba hlokometšego—e ka ba e le mosegare goba e le bošego. Go molaleng gore tokologo e a hwelela, gomme go bonagala se se tla dula se le bjalo.

² Morago kua tšhemong ya Edene, Sathane o ile a bolela gore tokologo ya kgonthe e ka tlišwa ke go phela ka ntle le thušo ya Jehofa. Ao ruri e bile maaka a šoro le a kgopo! Therešo ke gore ge batho ba tšwela pele ba hlokomologa mellwane ya boitshwaro le ya moya yeo Modimo a e beilego, ke gona ge batho ka kakaretšo ba tlaišegago le go feta. Boemo bjo bjo bo mpefalago bo kgoma le rena bahlanka ba Jehofa. Lega go le bjalo, re na le kholofelo ya go bona batho ba lokologa bohlankeng bja sebe le tshenyego gomme ba thabela seo Beibele e se bitšago “tokologo ya letago ya bana ba Modimo.” (Baroma 8:21) Ge e le gabotse, Jehofa o šetše a thomile go lokišeletša bahlanka ba gagwe gore ba tlo thabela tokologo yeo. Ka tsela efe?

3. Jehofa o neile balatedi ba Kriste molao ofe, gomme re tlo ahlaahla dipotšišo dife?

³ Karabo ya seo e hwetšwa go seo mongwadi wa Beibele e lego Jakobo a se biditšego ‘molao o phethagetšego wo e lego wa tokologo.’ (Bala Jakobo 1:25.) Diphetolelo tše dingwe tša Beibele di fetolela polelwana ye ka gore “molao woo o re lokollago” (The New English Bible) le gore  “molao o phethagetšego wa tokologo” (The New American Bible). Go ba gona, batho ka tlwaelo ba tswalanya molao le dithibelo, e sego le tokologo. Ka gona, ‘molao o phethagetšego wo e lego wa tokologo’ ke eng? Le gona molao woo o re lokolla bjang?

MOLAO WOO O RE LOKOLLAGO

4. ‘Molao o phethagetšego wo e lego wa tokologo’ ke eng, gomme o hola bomang?

⁴ ‘Molao o phethagetšego wo e lego wa tokologo’ ga se Molao wa Moshe, gobane molao woo o ile wa bonagatša dikarogo gomme Kriste o ile a o phethagatša. (Mat. 5:17; Bagal. 3:19) Ka gona, Jakobo o be a bolela ka molao ofe? O be a bolela ka “molao wa Kriste,” woo gape o bitšwago “molao wa tumelo” le “molao wa batho ba ba lokologilego.” (Bagal. 6:2; Baroma 3:27; Jak. 2:12) Ka gona, ‘molao o phethagetšego’ o akaretša dilo ka moka tšeo Jehofa a di nyakago go rena. Bakriste ba tloditšwego gotee le “dinku tše dingwe” ba holwa ke molao wo.—Joh. 10:16.

5. Ke ka baka la’ng molao wa tokologo o se boima?

⁵ Go fapana le melao ya dinaga tše dintši, ‘molao o phethagetšego’ ga se wa raragana e bile ga o boima, eupša o na le ditaelo tše bonolo le melao e sego kae ya motheo. (1 Joh. 5:3) Jesu o itše: “Joko ya ka e botho, morwalo wa ka o bohwefo.” (Mat. 11:29, 30) Go oketša moo, ga go nyakege gore ‘molao o phethagetšego’ o be le lelokelelo le letelele la dithibelo, goba dikotlo, ka gobane motheo wa wona ke lerato gomme o ngwadilwe menaganong le dipelong, e sego diphaphathing tša leswika.—Bala Baheberu 8:6, 10.

KAMOO ‘MOLAO O PHETHAGETŠEGO’ O RE LOKOLLAGO KA GONA

6, 7. Ditekanyetšo tša Jehofa di re hola bjang, gomme ke ka baka la’ng molao wa tokologo o re lokolla?

⁶ Mellwane yeo Jehofa a e beetšego batho e a ba hola le go ba šireletša. Tšea ka mohlala melao ya tlhago yeo e laolago go ba gona ga matla le dilo tše di lego gona. O ka se kwe batho ba belaela ka gore melao ye e a ba gatelela. Go e na le moo, ba e tšeela godimo, ba lemoga gore melao yeo ya tlhago e bohlokwa gore ba phele. Ka mo go swanago, ditekanyetšo tša Jehofa tša boitshwaro le tša moya, tšeo di bonagatšwago “molaong o phethagetšego” wa Kriste, di reretšwe go hola batho.

⁷ Go oketša tabeng ya gore o reretšwe go re šireletša, molao wa tokologo o re dumelela gore re kgotsofatše dikganyogo tša rena ka moka tše swanetšego ka ntle le gore re ikgobatše goba re šwahlele ditshwanelong tša ba bangwe le tokologong ya bona. Ka gona, sephiri sa gore re be ba lokologilego e le ka kgonthe—re kgone go dira seo re kganyogago go se dira—ke gore re hlagolele dikganyogo tša maleba, e lego tšeo di dumelelanago le semelo sa Jehofa le ditekanyetšo tša gagwe. Ka mantšu a mangwe, re swanetše go ithuta go rata seo Jehofa a se ratago gomme re hloye seo a se hloilego, e lego seo molao wa tokologo o re thušago go se dira.—Amose 5:15.

8, 9. Bao ba kgomarelago molao wa tokologo ba holega bjang? Nea mohlala.

⁸ Ka ge re le batho ba sa phethagalago, re thatafalelwa ke go fenya dikganyogo tše di fošagetšego. Lega go le bjalo, ge re dutše re katanela ka matla go kgomarela ka potego molao wa tokologo, re thabela matla a wona a go re lokolla gaešita le gona bjale. Ka mohlala: Morutwana yo mofsa wa Beibele yo a bitšwago Jay o be a lemaletše motšoko. Ge a be a ithuta gore go kgoga go be go sa kgahliše Modimo, o ile a swanelwa ke go dira phetho. Na o be a tla ineela dikganyogong tša nama ya gagwe goba na o be a tla ikokobeletša Jehofa? O ile a dira phetho e bohlale ya go hlankela Modimo, gaešita le ge mmele wa gagwe o be o duma motšoko. O ile a ikwa bjang ka morago ga gore a lahle motšoko? O boletše ka morago gore: “Ke ile ka ikwa ke lokologile ka tsela e makatšago e bile ke thabile kudu.”

⁹ Jay o ithutile go tšwa phihlelong ya gagwe gore seo lefase le se bitšago tokologo, e lego seo se dumelelago batho go “bea monagano go tša nama,” ge e le gabotse se ba dira makgoba, mola e le gore tokologo ya Jehofa, e lego yeo e bolelago “go bea monagano go tša moya,” e a  lokolla e bile e lebiša ‘bophelong le khutšong.’ (Baroma 8:5, 6) Jay o ile a hwetša kae matla a gore a fenye mokgwa wo o dirago gore motho e be lekgoba? Ga se a kgona ka boyena; Modimo ke yena a mo neilego wona. O re: “Ke be ke ithuta Beibele ka mehla, ke rapelela moya o mokgethwa gomme ke nyaka thušo e lerato yeo ke bego ke e newa ke phuthego ya Bokriste.” Ditokišetšo tše ka moka di ka thuša yo mongwe le yo mongwe wa rena gore a hwetše tokologo ya kgonthe. Anke re boneng kamoo seo se kgonegago ka gona.

LEBELEDIŠIŠA LENTŠUNG LA MODIMO

10. Go ‘lebeledišiša’ ka molaong wa Modimo go bolela’ng?

¹⁰ Karolo e nngwe ya Jakobo 1:25 e balega ka gore: “Yo a lebeledišišago molaong o phethagetšego wo e lego wa tokologo gomme a o phegelela, . . . o tla thabišwa ke go o dira.” Lentšu la mathomong la Segerika leo le fetoletšwego e le “lebeledišišago” le bolela “go ukamela selo se itšego,” e lego seo se bolelago gore motho o dira boiteko bjo bogolo. Ee, ge e ba re nyaka gore molao wa tokologo o kgome menagano ya rena le dipelo tša rena, re swanetše go phetha karolo ya rena ka gore re ithute Beibele ka mafolofolo gomme re rapele le go naganišiša ka seo re se balago.—1 Tim. 4:15.

11, 12. (a) Jesu o ile a gatelela bjang bohlokwa bja gore re dire therešo tsela ya rena ya bophelo? (b) Go etša ge go bontšhitšwe ka mo godimo, ke kotsi efe yeo bafsa ka mo go kgethegilego ba swanetšego go e phema?

¹¹ Ka nako e swanago, re swanetše go “phegelela,” goba re se fele matla, ge re diriša seo Lentšu la Modimo le se bolelago, ka go re’alo re dire gore therešo e be tsela ya rena ya bophelo. Jesu o ile a bolela taba ya go swana le ye ge a be a botša ba bangwe bao ba bego ba  dumela go yena gore: “Ge e ba le dula lentšung la ka, gona le barutiwa ba ka e le ka kgonthe, le tla tseba therešo gomme therešo e tla le lokolla.” (Joh. 8:31, 32) Go ya ka puku e nngwe ya ditšhupetšo, lentšu “tseba” mo le bolela gape le go tšeela selo godimo ka gobane “selo seo se ‘tsebjago’ se na le mohola goba se bohlokwa go yoo a se tsebago.” Ka gona, re “tseba” therešo ka botlalo ge e ba re e dira tsela ya rena ya bophelo. Ke moka re tla ba re nepile ge re bolela gore “lentšu la Modimo” le a ‘šoma’ ka go rena, le bopa semelo sa rena ka tsela yeo re kgonago go bonagatša letago la Tatago rena wa legodimong gakaone kudu.—1 Bathes. 2:13.

¹² Ipotšiše gore: ‘Na ruri ke tseba therešo? Na ke e dirile tsela ya ka ya bophelo? Goba na ke sa dutše ke kganyoga tše dingwe tša dilo tšeo lefase le di bitšago tokologo?’ Ge kgaetšedi yo mongwe yo a godišitšwego ke batswadi ba Bakriste a lebelela morago nakong ya bofsa bja gagwe o ngwadile gore: “Ge o golela therešong, go ba bjalo ka ge eka Jehofa o dula a na le wena. Eupša ge e le nna, ga se ka ka ka mo tseba e le ka kgonthe. Ga se ka ka ka ithuta go hloya seo a se hloilego. Le ka mohla ke be ke sa dumele gore seo ke se dirago se a mo tshwenya. Le gona ga se ka ka ka ithuta go mo rapela ge ke le mathateng. Ke be ke ithekga ka tlhaologanyo ya ka, e lego selo seo ga bjale ke tsebago gore e be e le bošilo ka ge ke be ke sa tsebe selo.” Se se thabišago ke gore kgaetšedi yo ka morago o ile a lemoga gore tsela yeo a bego a nagana ka yona e be e fošagetše, gomme o ile a dira diphetogo tše dikgolo. O ile a ba a thoma go hlankela e le mmulamadibogo wa ka mehla.

MOYA O MOKGETHWA O KA GO THUŠA GORE O LOKOLOGE

13. Moya o mokgethwa wa Modimo o re thuša bjang gore re lokologe?

¹³ Re bala go 2 Bakorinthe 3:17 gore: “Moo moya wa Jehofa o lego gona, go na le tokologo.” Moya o mokgethwa o re thuša bjang gore re lokologe? Gare ga dilo tše dingwe, o tšweletša ka go rena dika tše bohlokwa tšeo di nyakegago gore re lokologe, e lego “lerato, lethabo, khutšo, go se fele pelo, botho, toko, tumelo, boleta le boitshwaro.” (Bagal. 5:22, 23) Ge e ba re se na dika tšeo, kudukudu lerato, ga go batho bao ba ka lokologago e le ka kgonthe—e lego therešo yeo e lego molaleng lefaseng lehono. Se se kgahlišago ke gore ka morago ga gore moapostola Paulo a bolele ka dika tšeo di enywago ke moya, o okeditše ka gore: “Ga go na molao o ganetšanago le dilo tše bjalo.” O be a e ra go re’ng? Dika tšeo di enywago ke moya wa Modimo ga di lekanyetšwe ke molao le ge e le ofe woo o ka dirago gore di se gole. (Bagal. 5:18) Ge e le gabotse, molao o bjalo o be o tla hola ka eng? Thato ya Jehofa ke gore re hlagolele dika tše di swanago le tša Kriste ka mo go sa felego gomme re di bonagatše ntle le go lekanyetšwa ke selo le ge e le sefe.

14. Moya wa lefase o dira batho makgoba ka ditsela dife?

¹⁴ Bao ba laolwago ke moya wa lefase le bao ba phelelago go kgotsofatša dikganyogo tša bona tša nama ba ka ba ba nagana gore ba lokologile. (Bala 2 Petro 2:18, 19.) Lega go le bjalo, therešo ke gore ga se ba lokologa le gatee. Go gapeletšega gore go be le melao e mentšintši e le gore go laolwe dikganyogo tša bona tše di gobatšago gotee le boitshwaro bja bona. Paulo o re: “Molao ga wa direlwa moloki, eupša o diretšwe batho ba go hloka molao le bao ba rabelago.” (1 Tim. 1:9, 10) Le gona ke makgoba a sebe, ba dula ba dira “dilo tšeo di kganyogwago ke nama,” e bile sebe seo se ba laola ka tsela e sehlogo. (Baef. 2:1-3) Ka tsela e itšego, batho ba bjalo ba swana le dikhunkhwane tšeo di kitimelago ka sebjaneng seo se tletšego todi ya dinose. Ka ge ba laolwa ke dikganyogo tša bona, go se go ye kae ba ikhwetša ba tantšwe.—Jak. 1:14, 15.

GO LOKOLOGA KA PHUTHEGONG YA BOKRISTE

15, 16. Go bohlokwa gakaaka’ng gore re kopanele le phuthego, gomme ke tokologo efe yeo re e thabelago?

¹⁵ Ge o be o thoma go kopanela le phuthego ya Bokriste, o be o sa fetoge karolo ya lekgotla le itšego la go dira segwera. Go e na le moo, o tlile ka phuthegong gobane Jehofa a go gogile. (Joh. 6:44) Ke eng seo se mo dirilego gore a  go goge? Na Modimo o be a bone motho yo a lokilego le yo a mmoifago? Mohlomongwe o tla araba ka gore: “Nna ke be ke se bjalo.” Ge e ba go le bjalo, gona ke eng seo Modimo a se bonego? O ile a bona pelo yeo e bego e tla amogela molao wa gagwe woo o lokollago, a bona pelo yeo e bego e tla amogela thuto ya gagwe e lerato. Ka phuthegong, Jehofa o ile a hlokomela pelo ya gago ka go go fepa moyeng, a go lokolla dithutong tša maaka tša bodumedi le ditumelakhweleng, le gona o ile a go ruta kamoo o ka hlagolelago semelo sa go swana le sa Kriste. (Bala Baefeso 4:22-24.) Ka baka la seo, o na le tokelo ya go ba gare ga batho ba nnoši lefaseng ka moka bao go ka bolelwago gabotse ka bona gore ke “batho ba ba lokologilego.”—Jak. 2:12.

¹⁶ Nagana ka taba ye: Na o ikwa o tšhogile ge o le gare ga batho bao ba ratago Jehofa ka dipelo tša bona ka moka? Na o ikhwetša o sa dudišege? Ge o sepelasepela ka Holong ya Mmušo gomme o boledišana le ba bangwe, na o kakatlela dilo tša gago ka go tšhoga gore di tla utswiwa? Le gatee! O ikwa o dudišegile e bile o lokologile. Na o ka ikwa ka tsela yeo moo go kgobokanego batho ba lefase? Le gatee! Go oketša moo, tokologo yeo o e thabelago gona bjale gare ga batho ba Modimo e fo ba e le mathomomayo a tokologo yeo e letšego kua pele.

“TOKOLOGO YA LETAGO YA BANA BA MODIMO”

17. Go lokologa ga batho go tswalana bjang le “go utollwa ga barwa ba Modimo”?

¹⁷ Ge a be a bolela ka tokologo yeo Jehofa a e lokišeditšego bahlanka ba gagwe ba lefaseng, Paulo o ngwadile gore: “Tlholo e letetše ka go fagahla go utollwa ga barwa ba Modimo.” Ke moka o okeditše ka gore: “Tlholo ka boyona le yona e [tla lokollwa] bokgobeng bja tshenyego gomme e be le tokologo ya letago ya bana ba Modimo.” (Baroma 8:19-21) “Tlholo” ye go bolelwago ka yona mo e šupa go batho bao ba nago le kholofelo ya go phela mo lefaseng, e lego bao ba tlago go holwa ke ‘go lokollwa’ ga barwa ba Modimo bao ba tloditšwego ka moya. Go utollwa moo go tla thoma ge “barwa” ba ba tsošetšwa legodimong, ba šoma le Kriste go tloša bobe lefaseng gomme ba thuša “lešaba le legolo” gore le tsene tshepedišong e mpsha ya dilo.—Kut. 7:9, 14.

18. Batho ba tla hwetša tokologo bjang ganyenyane-ganyenyane, gomme ke tokologo efe yeo ba tlago go e thabela mafelelong?

¹⁸ Batho bao ba rekolotšwego ba tla thabela tokologo e mpsha ka mo go feletšego—go lokologa tutuetšong ya Sathane le ya batemona. (Kut. 20:1-3) Yeo ruri e tla ba kimologo ya kgonthe! Ka morago ga moo, ba 144 000 bao e tlago go ba dikgoši le baperisita gotee le Kriste ba tla tšwela pele go lokolla batho ka go dula ba diriša mehola ya sehlabelo sa topollo go fihlela ge sebe sa Adama le go se phethagale di tlošitšwe ka mo go feletšego. (Kut. 5:9, 10) Ka ge batho ba tla botega nakong ya ge ba lekwa, ba tla fihlelela tokologo e phethagetšego yeo Jehofa a bego a ba reretše gore ba be le yona—“tokologo ya letago ya bana ba Modimo.” E fo nagana ka seo! Le ka mohla o ka se thatafalelwe ke go dira se nepagetšego mahlong a Modimo, ka gobane o tla ba o phethagetše ka mo go feletšego gomme semelo sa gago se tla ba se fetotšwe ka botlalo gore o be ka seswantšho sa Modimo.

19. Ke eng seo re swanetšego go tšwela pela re se dira e le gore re dule re le tseleng yeo e yago tokologong ya kgonthe?

¹⁹ Na o fagahletše go bona “tokologo ya letago ya bana ba Modimo”? Ge e ba go le bjalo, dumelela monagano wa gago le pelo ya gago gore di tšwele pele di tutuetšwa ke ‘molao o phethagetšego wo e lego wa tokologo.’ Ee, ithute Mangwalo ka mafolofolo. Phelela therešo, e dire gore e be ya gago. Rapelela moya o mokgethwa. Diriša ka botlalo ditokišetšo tša phuthego ya Bokriste le dijo tša moya tšeo Jehofa a re neago tšona. O se ke wa dumelela Sathane a go radia go etša ge a radiile Efa, a dira gore o nagane gore ditsela tša Modimo di a re gatelela. Hlokomela gore Diabolo o bohlale kudu. Eupša go etša ge re tla bona sehlogong se se latelago, ga se ra swanela go “radiiwa ke Sathane gobane re tseba maano a gagwe.”—2 Bakor. 2:11.

[Dipotšišo tša Thuto]

[Diswantšho go letlakala 9]

Na ke sa dutše ke kganyoga kudu tše dingwe tša dilo tšeo lefase le di bitšago tokologo?

[Diswantšho go letlakala 9]

Na ke dirile therešo gore e be tsela ya ka ya bophelo?