Hlankela Modimo wa Tokologo

“Se ke seo lerato la Modimo le se bolelago, gore re boloke ditaelo tša gagwe gomme ditaelo tša gagwe ga di boima.”—1 JOH. 5:3.

NA O KA ARABA?

Sathane o leka bjang go dira gore melao ya Modimo e bonagale e le boima?

Ke ka baka la’ng re swanetše go ba šedi kudu ka bagwera bao re ba kgethago?

Ke eng seo se tlago go re thuša go dula re botegela Modimo wa tokologo?

1. Jehofa o lebelela bjang tokologo, gomme o bontšhitše bjang seo ge a be a dirišana le Adama le Efa?

JEHOFA ke yena feela a nago le tokologo e feletšego. Eupša le ka mohla ga a e diriše gampe; le gona ga a leke go šireletša tokologo ya gagwe ka go šalašala bahlanka ba gagwe morago. Go e na le moo, o ba file tokologo ya go ikgethela, e lego yeo e ba dumelelago go kgotsofatša dikganyogo tša bona ka moka tše di swanetšego. Ka mohlala, Modimo o file Adama le Efa taelo e tee feela yeo e bego e le thibelo—gore ba se je tša “sehlare sa go tseba botse le bobe.” (Gen. 2:17) Ruri ba be ba na le tokologo e kgolo kudu ge ba dutše ba tlo phetha thato ya Mmopi wa bona!

2. Ke ka baka la’ng batswadi ba rena ba pele ba ile ba lahlegelwa ke tokologo yeo ba bego ba e neilwe ke Modimo?

² Ke ka baka la’ng Modimo a ile a nea batswadi ba rena ba pele tokologo e kaakaa? O ba bopile ka seswantšho sa gagwe gomme a ba nea letswalo, ke moka a letela ka mo go swanetšego gore lerato leo ba bego ba tla mo rata ka lona ka ge e le Mmopi wa bona le ba hlahle gore ba dire dilo ka tsela ya maleba. (Gen. 1:27; Baroma 2:15) Ka manyami, Adama le Efa ba ile ba palelwa ke go leboga Monei wa Bophelo gotee le tokologo yeo a bego a ba file yona. Go e na le moo, ba ile ba ema le Sathane ka gore ba nyake go itirela diphetho ka seo se lokilego le seo se fošagetšego. Eupša go e na le gore ba hwetše tokologo e oketšegilego, batswadi ba rena ba ile ba ithekiša le go rekišetša bana ba bona ba nakong e tlago bokgobeng bja sebe, gomme seo se ile sa feleletša ka ditlamorago tše šoro.—Baroma 5:12.

3, 4. Sathane o leka bjang go re fora ge e le mabapi le ditekanyetšo tša Jehofa?

³ Ge e ba Sathane a kgonne go goketša batho ba babedi ba phethagetšego—re se sa bolela ka tše dingwe tša dibopiwa tša moya—gore ba gane bogoši bja Modimo, gona le rena a ka re aroša. O sa dutše a diriša maano a swanago. O leka go re timetša gore re dumele gore go latela ditekanyetšo tša Modimo go boima e bile go re amoga lethabo le boipshino.  (1 Joh. 5:3) Tsela e bjalo ya go nagana e ka ba e matla kudu ge e ba re phela le batho bao ba naganago ka tsela ye. Kgaetšedi yo mongwe wa nywaga e 24 yo a kilego a phela bophelo bjo gobogilego bja tša botona le botshadi o re: “Ke ile ka kgongwa kudu ke go tlwaelana le batho ba babe, kudukudu ka gobane ke be ke tšhaba go nagana ka tsela e fapanego le ya dithaka tša ka.” Mohlomongwe o kile wa ba ka tlase ga kgatelelo e bjalo ya dithaka.

⁴ Ka manyami, ka dinako tše dingwe bagwera ba babe ba ka ba gona le ka phuthegong ya Bokriste. Mofsa yo mongwe wa Hlatse o itše: “Ke be ke tseba bafsa ba bangwe bao ba bego ba ratana le batho ba ka ntle ga phuthego. Eupša ka morago ke ile ka lemoga gore ge ke be ke fetša nako e ntši le bona, ke be ke thoma go swana kudu le bona. Ke ile ka thoma go fokola moyeng. Ke be ke se sa thabela dijo tša moya ge ke le dibokeng, e bile ke be ke eya tšhemong ka sewelo. Leo e ile ya ba leswao la gore ke kgaotše segwera sa ka le bona, gomme ke ile ka dira sona seo!” Na o lemoga tutuetšo yeo bagwera ba gago ba ka bago le yona bophelong bja gago? Ela hloko mohlala o latelago o tšwago ka Beibeleng woo o ka re thušago lehono.—Baroma 15:4.

O BE A UTSWA DIPELO TŠA BONA

5, 6. Abesalomo o ile a fora bjang batho ba bangwe, gomme na maano a gagwe a ile a atlega?

⁵ Beibele e na le mehlala e mentši ya batho bao ba ilego ba tutuetša batho ba bangwe gampe. Wo mongwe wa mehlala e bjalo ke Abesalomo morwa wa Kgoši Dafida. Abesalomo e be e le monna wa go bogega. Lega go le bjalo, ka go swana le Sathane, ge nako e dutše e feta o ile a dumelela moya wa gagwe wa go rata maemo o tlala ka pelong ya gagwe, ka gobane o ile a thoma go duma sedulo sa tatagwe sa bogoši, mola se be se sa mo swanela. * Ge a be a leka ka boradia gore a tšee bogoši, Abesalomo o ile a itira eka o tshwenyegile ka Baisiraele mola ka mahlajana a be a bolela gore kgoro ya mošate ga e na taba le bona. Ee, feela bjalo ka ge Diabolo a dirile serapeng sa Edene, Abesalomo o ile a itira eka o thuša batho, mola ka lehlakoreng le lengwe a be a senya tatagwe leina.—2 Sam. 15:1-5.

⁶ Na maanomabe a Abesalomo a ile a atlega? A ka ba ile a atlega go fihla bokgoleng bjo itšego, ka gobane pego ya Beibele e re: “Abesalomo a utswa dipelo tša bana ba Isiraele.” (2 Sam. 15:6) Lega go le bjalo, mafelelong Abesalomo o ile a wišwa ke boikgantšho bja gagwe. Se bohloko le go feta ke gore bo ile bja lebiša lehung la gagwe le la batho ba bangwe ba dikete bao a bego a ba forile.—2 Sam. 18:7, 14-17.

7. Re ithuta dithuto dife go tšwa pegong ya mabapi le Abesalomo ? (Bona seswantšho go letlakala 14.)

⁷ Ke ka baka la’ng Baisiraele bao ba ile ba arošwa gabonolo ka tsela ye? Mohlomongwe ba be ba rata dilo tšeo Abesalomo a bego a ba holofeditše tšona. Goba mohlomongwe ba ile ba gogwa ke ponagalo ya gagwe. Go sa šetšwe gore lebaka e ka ba e bile lefe, re ka kgodišega ka se: Ba be ba sa botegele Jehofa le kgoši yeo a bego a e kgethile. Lehono, Sathane o tšwela pele a leka go utswa dipelo tša bahlanka ba Jehofa ka go diriša bao ba swanago le Abesalomo. Ba ka bolela gore: ‘Ditekanyetšo tša Jehofa di a gatelela. Le gona lebelela batho ba bangwe ka moka bao ba sa hlankelego Jehofa. Ba a ipshina!’ Na o tla kgona go lemoga maaka a bjalo a matala gomme wa dula o botegela Modimo? Na o tla lemoga gore ke feela ‘molao o phethagetšego’ wa Jehofa, e lego molao wa Kriste, woo o ka go lebišago tokologong ya kgonthe? (Jak. 1:25) Ge e ba go le bjalo, tšeela molao woo godimo, gomme le ka mohla o se ke wa lekega go diriša tokologo ya gago ya Bokriste gampe.—Bala 1 Petro 2:16.

8. Ke diphihlelo dife tša kgonthe tšeo di bontšhago gore lethabo ga le tlišwe ke go hlokomologa ditekanyetšo tša Jehofa?

⁸ Pakane e kgolo ya Sathane ke gore a wiše bafsa. Ngwanabo rena yo mongwe yo a lego nywageng ya bo-30 o boletše ka nywaga ya gagwe ya mahlalagading gore: “Ke be ke  lebelela ditekanyetšo tša Jehofa tša boitshwaro di nthibela go ipshina, e sego e le tšeo di ntšhireletšago.” Ka baka leo, o ile a itshwara gampe ka tša botona le botshadi. Eupša seo ga se sa mo tlišetša lethabo le gatee. O itše: “Ke ile ka dula ke ikwa ke na le molato e bile ke itshola ka nywaga e mentši.” Kgaetšedi yo mongwe yena ge a nagana ka nywaga ya gagwe ya mahlalagading o ngwadile gore: “Ka morago ga gore o itshware ka tsela e gobogilego, o ikwa o šulafetše e bile o se selo. Gaešita le gona bjale ka morago ga nywaga e 19, dilo tšeo tše mpe di fela di boa monaganong wa ka.” Kgaetšedi yo mongwe o boletše gore: “Taba ya gore boitshwaro bja ka bo ile bja kweša batho bao ke ba ratago kudu bohloko e ile ya nkgobatša monaganong, moyeng gotee le maikwelong. Go bohloko kudu go phela ka ntle le go amogelwa ke Jehofa.” Sathane ga a nyake gore o nagane ka ditlamorago tše bjalo tša sebe.

9. (a) Ke dipotšišo dife tšeo di re thušago go lemoga pono ya rena ka Jehofa, melao ya gagwe le melao ya motheo? (b) Ke ka baka la’ng go le bohlokwa gore re tsebe Modimo gabotse?

⁹ Go tloga go kweša bohloko gore bontši bja bafsa bao ba lego therešong—go akaretša le batho ba bangwe ba bagolo—ba ile ba ithuta ka lebadi gore boipshino bja sebe bo feleletša ka manyami! (Bagal. 6:7, 8) Ka gona ipotšiše gore: ‘Na ke lemoga seo maano a Sathane e tlogago e le wona—gore ke boradia bjo bo kwešago bohloko? Na ke lebelela Jehofa e le Mogwera wa ka yo mogolo, e le yoo ka mehla a bolelago therešo gomme a nyaka go mpona ke atlega? Na ke kgodišegile ka mo go feletšego gore le ka mohla a ka se tsoge a ntimile selo seo e tlogago e le se sebotse le seo se tla dirago gore ke thabe e le ruri?’ (Bala Jesaya 48:17, 18.) E le gore o arabe dipotšišo tšeo ka ee e kwagalago gabotse, o swanetše go tseba Jehofa ka  mo go tseneletšego. O swanetše go mo tseba gabotse gomme o lemoge gore melao ya Beibele le melao ya yona ya motheo e bonagatša lerato leo a go ratago ka lona, e sego gore o nyaka go go amoga tokologo.—Ps. 25:14.

RAPELELA GO BA LE PELO E BOHLALE LE E KWAGO

10. Ke ka baka la’ng re swanetše go katanela go ekiša Kgoši Solomone yo mofsa?

¹⁰ Ge Solomone e be e sa le lesogana, o ile a rapela a ikokobeditše gore: “Ke fo ba mošemanyana. Ga ke tsebe go tšwa le go tsena.” Ke moka o ile a rapelela go ba le pelo e bohlale le e kwago. (1 Dikg. 3:7-9, 12) Jehofa o ile a araba kgopelo yeo ya gagwe e tšwago pelong, gomme le wena o tla go direla se se swanago, go sa šetšwe gore o yo mogolo goba yo monyenyane. Go ba gona, Jehofa a ka se go nee temogo le bohlale ka mohlolo. Eupša o tla go nea bohlale ge e ba o ithuta Lentšu la gagwe ka phišego, o rapelela gore a go nee moya o mokgethwa gomme o diriša ka botlalo ditokišetšo tša moya tšeo a re neago tšona ka phuthego ya Bokriste. (Jak. 1:5) Ka ditokišetšo tše ka moka, ruri Jehofa o dira gore gaešita le bahlanka ba gagwe ba banyenyane ba hlalefe go feta bohle bao ba hlokomologago tayo ya gagwe, go akaretša le bao go thwego ke “ba bohlale le ba tlhaologanyo” ba lefase le.—Luka 10:21; bala Psalme 119:98-100.

11-13. (a) Ke dithuto dife tše bohlokwa tšeo re ka ithutago tšona go Psalme 26:4, Diema 13:20 le 1 Bakorinthe 15:33? (b) O tla diriša bjang melao ye ya motheo ya Mangwalo?

¹¹ Go bontšha bohlokwa bja go ithuta Beibele le go naganišiša ka seo re se balago e le gore re tsebe Jehofa gakaone, ela hloko mangwalo a latelago. Le lengwe le le lengwe la ona le na le molao o bohlokwa wa motheo tabeng ya go kgetha bagwera: “Ga se ka dula le batho ba maaka; ga ke tsene mo go nago le bao ba utago seo ba lego sona.” (Ps. 26:4) “Yo a sepelago le ba bohlale o tla hlalefa, eupša yo a gweranago le ditlaela o tla tshereana.” (Die. 13:20) “Ditlwaelano tše mpe di senya mekgwa e holago.”—1 Bakor. 15:33.

¹² Re ithuta dithuto dife tše bohlokwa ditemaneng tše? (1) Jehofa o nyaka gore re kgethe bagwera ba rena ka bohlale. O nyaka go re šireletša boitshwarong le moyeng. (2) Batho bao re gweranago le bona ba re tutuetša gabotse goba gampe; yeo ke therešo e sa fetogego ya bophelo. Tsela yeo ditemana tše di beilwego ka yona e bontšha gore Jehofa o leka go kgoma dipelo tša rena. Ka tsela efe? Ela hloko gore ga go le e tee ya ditemana tšeo yeo e lego ka mokgwa wa taelo, e bjalo ka gore “o se ke wa . . . ” Go e na le moo, di beilwe e le ditherešo tše di lego molaleng. Ge e le gabotse, Jehofa o re botša gore: ‘Therešo ya taba še. Ke eng seo o tlago go se dira? Ke eng seo se lego ka pelong ya gago?’

¹³ Sa mafelelo, ka ge ditemana tše tše tharo di beilwe e le ditherešo tše di lego molaleng, ga di felelwe ke nako gomme di ka šoma maemong a mantši. Ka mohlala, ipotšiše dipotšišo tše bjalo ka tše: Nka phema bjang go gwerana le batho “bao ba utago seo ba lego sona”? Ke maemong afe moo nka bago le batho ba bjalo? (Die. 3:32; 6:12) Ke batho bafe “ba bohlale” bao Jehofa a nyakago ke gwerana le bona? Ke batho bafe bao e lego “ditlaela” bao ke swanetšego go ba phema? (Ps. 111:10; 112:1; Die. 1:7) Ke ‘mekgwa efe e holago’ yeo ke tlago go e senya ka go kgetha bagwera ba babe? Na ke lefaseng feela mo ke tlago go kopana le bagwera ba babe? (2 Pet. 2:1-3) O tla araba bjang dipotšišo tše?

14. Le ka humiša bjang mantšiboa a Borapedi bja Lapa la lena?

¹⁴ Ka morago ga go ahlaahla Mangwalo a, go re’ng o sa hlahlobe ditemana tše dingwe tša Beibele tšeo di utollago tsela yeo Modimo a naganago ka yona ditabeng tšeo di kgomago wena le lapa la gago? * Lena batswadi, naganelang go ahlaahla ditaba tše bjalo mantšiboeng a Borapedi bja Lapa. Ge le dutše le di ahlaahla, dulang le gopola gore pakane ya  lena ke go thuša setho se sengwe le se sengwe sa lapa gore se tšeele godimo le go feta lerato leo Modimo a re ratago ka lona go etša ge le tšweletšwa ke melao ya gagwe le melao ya motheo. (Ps. 119:72) Ruri thuto e bjalo e swanetše go dira gore bohle ka lapeng ba batamele kgauswi kudu le Jehofa e bile ba batamelane.

15. O ka tseba bjang gore o ba le pelo e bohlale le e kwago?

¹⁵ O ka tseba bjang gore o ba le pelo e bohlale le e kwago? Tsela e nngwe ke ka go bapetša tsela ya gago ya go nagana le ya babotegi ba bogologolo, ba bjalo ka Kgoši Dafida, yo a ngwadilego gore: “Wena Modimo wa ka, ke kgahlwa ke go dira thato ya gago, molao wa gago o ka garegare ga ka.” (Ps. 40:8) Ka mo go swanago, mongwadi wa Psalme 119 o itše: “Molao wa gago ke o rata gakaakang! Ke nagana ka wona letšatši ka moka.” (Ps. 119:97) Lerato le bjalo ga le itlele feela. Go e na le moo, le tlišwa ke ge motho a ithuta ka mo go tseneletšego, a rapela, a naganišiša gomme a eba le phihlelo—a bona go tšwa bophelong bja gagwe ka noši ditšhegofatšo tše dintšintši tšeo di tlišwago ke go kgomarela ditekanyetšo tša Modimo.—Ps. 34:8.

LWELA TOKOLOGO YA GAGO YA BOKRISTE!

16. Ke eng seo re swanetšego go se gopola ge e ba re tla fenya ntwa ya rena ya go lwela tokologo ya kgonthe?

¹⁶ Go theoša le histori, ditšhaba di ile tša ikemišetša go lwa dintwa tše šoro e le gore di hwetše tokologo. Gona e tloga e le mo go kwagalago gore le wena o ikemišetše go lwela tokologo ya gago ya Bokriste! O gopole gore manaba a gago ga se feela Sathane, lefase le moya wa lona o mobe. O sa dutše o swanelwa ke go lwantšha go se phethagale ga gago, go akaretša le pelo e boradia. (Jer. 17:9; Baef. 2:3) Lega go le bjalo, Jehofa a ka go thuša gore o fenye ntwa ye. Go oketša moo, ge o fenya teko le ge e le efe—e ka ba e le e nyenyane goba e kgolo—o tla ba o fihleletše dilo tše pedi tše dibotse. Sa pele, o tla thabiša pelo ya Jehofa. (Die. 27:11) Sa bobedi, ge o dutše o latswa matla a lokollago a ‘molao o phethagetšego wa Modimo wo e lego wa tokologo,’ o tla ba le boikemišetšo bjo bo oketšegilego bja go dula o le ‘tseleng e tshesane’ e išago bophelong bjo bo sa felego. Mafelelong, o tla tla o thabela tokologo e kgolokgolo yeo e letetšego bohle bao ba botegelago Jehofa.—Jak. 1:25; Mat. 7:13, 14.

17. Ke ka baka la’ng re sa swanela go nyamišwa ke go se phethagale ga rena, gomme Jehofa o re thuša bjang?

¹⁷ Therešo ke gore ka moka ga rena ka dinako tše dingwe re dira diphošo. (Mmo. 7:20) Ge e ba seo se direga, o se ke wa ikwa o se na mohola goba wa nyama kudu. Ge e ba o ka kgopša, gona tsoga gomme o lebe pele—gaešita le ge seo se ka bolela gore o kgopele thušo go bagolo ba phuthego ya geno. Jakobo o ngwadile gore “thapelo [ya bona] ya tumelo e tla fodiša yo a babjago gomme Jehofa o tla mo tsoša. Le gona ge e ba a dirile dibe, o tla lebalelwa.” (Jak. 5:15) Ee, le ka mohla o se ke wa lebala gore Modimo o gaugela e le ka kgonthe le gore o go gogetše ka phuthegong gobane a bone gore o ka mo hlankela. (Bala Psalme 103:8, 9.) Ge feela o sa dutše o hlankela Jehofa ka pelo e feletšego, le ka mohla a ka se go hlape diatla.—1 Dikor. 28:9.

18. Re ka dira bjang dilo ka go dumelelana le thapelo ya Jesu yeo e begilwego go Johane 17:15?

¹⁸ Nakong ya ge Jesu a be a rapela le baapostola ba gagwe ba botegago ba 11 bošegong bja gagwe bja mafelelo, o ile a bolela mantšu a latelago a sa lebalegego ka bona ge a re: “O ba šireletše ka baka la yo kgopo.” (Joh. 17:15) Jesu o be a sa tshwenyega feela ka baapostola ba gagwe, eupša o be a tshwenyegile le ka balatedi ba gagwe ka moka. Ka gona, re ka kgodišega gore Jehofa o tla araba thapelo ya Jesu ka gore a re šireletše dinakong tše tšeo di hlobaetšago. “[Jehofa] ke kotse ya bao ba sepelago ka potego . . . O tla diša tsela ya babotegi ba gagwe.” (Die. 2:7, 8) Ee, go sepela tseleng ya go botega go na le ditlhohlo, eupša ke yona feela tsela yeo e re išago bophelong bjo bo sa felego le tokologong ya kgonthe. (Baroma 8:21) O se dumelele motho le ge e le ofe gore a go aroše go yona!

[Mengwalo ya tlase]

[Dipotšišo tša Thuto]

[Diswantšho go letlakala 14]

Lehono re ka tseba bjang batho bao ba swanago le Abesalomo gomme ra itšhireletša go bona?