Jehofa o Kgobokanya Lapa la Gagwe

‘Ke le lopa gore le boloke botee bja moya.’—BAEF. 4:1, 3.

O KA HLALOSA BJANG?

Morero wa Modimo wa go laola ga gagwe dilo ke ofe?

Re “boloka botee bja moya” bjang?

Ke’ng seo se tlago go re thuša gore re ‘bontšhane botho’?

1, 2. Ke eng seo Jehofa a se rerilego ka lefase le ka batho?

LAPA. Ke eng seo lentšu leo le se tlišago monaganong wa gago? Na le tliša bogwera? Na le tliša lethabo? Na le bolela go šoma ga lapa gotee gore le fihlelele pakane e itšego? Na le bolela go ba lefelong le šireletšegilego leo motho a golelago go lona, a ithutago le go abelana le ba bangwe dikgopolo? Go ka direga gore le go gopotša dilo tše ge e ba o le karolo ya lapa leo le nago le lerato. Jehofa ka boyena ke Mothomi wa lapa. (Baef. 3:14, 15) O rerile gore dibopiwa tša gagwe ka moka tšeo di lego legodimong le mo lefaseng di šireletšege, di botane gomme di be le botee bja kgonthe.

² Ka morago ga gore batho ba dire sebe, ba ile ba se sa hlwa ba eba karolo ya lapa la Modimo, eupša morero wa Jehofa ga se wa folotša. O tla kgonthišetša gore lefaseng la Paradeise go tla tlala ditlogolo tša Adama le Efa. (Gen. 1:28; Jes. 45:18) O ile a dira ditokišetšo ka moka gore a phethagatše morero wo. Re bontšhwa bontši bja ditokišetšo tše ka pukung ya Beibele ya Baefeso, yeo sehlogo sa yona e lego botee. Anke re eleng hloko tše dingwe tša ditemana go tšwa pukung yeo gomme re bone kamoo re ka dirišanago le morero wa Jehofa wa go kopanya tlholo ya gagwe gore e be boteeng.

TAOLO YA GAGWE YA DILO LE KAMOO E ŠOMAGO KA GONA

3. Go laola dilo ga Modimo moo go bolelwago ka gona go Baefeso 1:10 ke eng, le gona mogato wa pele o thomile neng?

³ Moshe o ile a botša Baisiraele gore: “Jehofa Modimo wa rena ke yena Jehofa a nnoši.” (Doit. 6:4) Ditiro tša Jehofa le morero wa gagwe di a dumelelana. Ka gona, “ge go phethegile ka botlalo dinako tše di beilwego,” Modimo o ile a thoma go ‘laola dilo,’ e lego tokišetšo yeo a e dirilego gore a kopanye batho ba gagwe ka moka. (Bala Baefeso 1:8-10.) Go laola ga gagwe dilo go tla phethega  ka megato e mebedi. Mogato wa pele ke wa go lokišeletša phuthego ya batlotšwa gore e phele legodimong ka tlase ga taolo ya Jesu Kriste e le Hlogo ya yona. Mogato wo o thomile ka Pentekoste ya 33 C.E. ge Jehofa a kgobokanya bao ba tlago go buša le Kriste kua legodimong. (Dit 2:1-4) Ka ge go ile gwa bolelwa ka batlotšwa gore ba lokile motheong wa sehlabelo sa topollo sa Kriste, ba ikemišeditše go dumela gore ba amogetšwe e le “bana ba Modimo.”—Baroma 3:23, 24; 5:1; 8:15-17.

4, 5. Mogato wa bobedi wa go laola ga Modimo dilo ke ofe?

⁴ Mogato wa bobedi ke wa gore Modimo a lokišetše bao ba tlago go phela Paradeiseng mo lefaseng ka tlase ga Mmušo wa Mesia, woo o akaretšago Kriste le batlotšwa kua legodimong. “Lešaba le legolo” le bopa karolo ya pele ya sehlopha se. (Kut. 7:9, 13-17; 21:1-5) Le tla tlatšwa ke dibilione tša bao ba tlago go tsošwa bahung nakong ya Pušo ya Nywaga e Sekete. (Kut. 20:12, 13) Akanya kamoo tsogo ya bahu e tlago go bontšha botee bja rena ka gona! Mafelelong a nywaga e sekete, “dilo tše di lego lefaseng” di tla ba ka tlase ga teko ya mafelelo. Bao ba ipontšhago ba botega ba tla amogelwa e le “bana ba Modimo” ba lefaseng.—Baroma 8:21; Kut. 20:7, 8.

⁵ Megato ye ka bobedi ya Modimo ya go laola dilo e sa tšwela pele lehono—legodimong le lefaseng. Eupša yo mongwe le yo mongwe wa rena gona bjale a ka dirišana bjang le tsela ya Modimo ya go laola dilo?

“GO BOLOKA BOTEE BJA MOYA”

6. Mangwalo a bontšha bjang gore Bakriste ba swanetše go bokana felo gotee?

⁶ Mangwalo a bontšha gore Bakriste ba swanetše go bokana felo gotee ka tsela ya kgonthe. (1 Bakor. 14:23; Baheb. 10:24, 25) Se ga se akaretše feela go fo bokana lefelong letee, go swana le batho bao ba yago mabenkeleng goba mapatlelong a dipapadi. Botee bja kgonthe bo akaretša se se fetago seo. Re fihlelela botee bjoo ge re diriša ditaelo tša Jehofa le go dumela go bopša ke moya o mokgethwa wa Modimo.

7. Go bolela’ng “go boloka botee bja moya”?

⁷ Gaešita le ge Jehofa a boletše gore batlotšwa ba lokile e bile ke barwa ba gagwe gomme dinku tše dingwe le tšona di lebelelwa di lokile motheong wa sehlabelo sa Kriste sa topollo e bile ke bagwera ba gagwe, diphapano di tla tšwela pele di rotoga ge feela yo mongwe le yo mongwe wa rena a sa phela mo lefaseng tshepedišong ye ya dilo. (Baroma 5:9; Jak. 2:23) Go sego bjalo go be go ka se nyakege keletšo e buduletšwego yeo e re kgothaletšago gore re tšwele pele re “kgotlelelana.” Botee bo ka fihlelelwa ka tsela efe magareng ga badumedigotee? Bo ka fihlelelwa ka gore re hlagolele “boikokobetšo bjo bo feletšego le boleta.” Go oketša moo, Paulo o re kgothaletša gore re leke ka matla “go boloka botee bja moya setlemong se se tlemaganyago sa khutšo.” (Bala Baefeso 4:1-3.) Go diriša keletšo ye go akaretša go ineela tutuetšong ya moya wa Modimo le go o dumelela gore o tšweletše dika tša wona ka go rena. Dika tšeo di tla lokiša diphapano magareng ga batho, e lego tšeo di fapanego le mediro ya nama, yeo ka mehla e aroganyago batho.

8. Mediro ya nama e baka dikarogano ka tsela efe?

⁸ Ela hloko kamoo “mediro ya nama” e bakago dikarogano ka gona. (Bala Bagalatia 5:19) Bootswa bo dira gore motho a arogane le Jehofa gotee le phuthego, le gona bohlotlolo bo ka kgaoganya batswadi le bana ka tsela e sehlogo le go aroganya balekane bao ba se nago molato le balekane ba bona ba lenyalo. Go se hlweke go kgoma botee bja motho le Modimo gotee le bao ba mo ratago. Motho yo a ilego a leka go kgomaganya dilo tše pedi gotee o a tseba gore go fihlelela seo o swanetše go hlwekiša moo a tlago go kgomaganya dilo tšeo pele ga ge di ka kgomarelana. Go  kopanela boitshwarong bja mereba go bontšha go hlokomologa ka mo go feletšego melao ya Modimo ya go loka. Mediro e mengwe ya nama le yona e aroganya batho seng sa bona e bile e ba aroganya le Modimo. Boitshwaro bjo bjalo ga bo dumelelane le semelo sa Jehofa ka mo go feletšego.

9. Re ka itlhahloba bjang go bona ge e ba re “leka ka matla go boloka botee bja moya”?

⁹ Ka gona, yo mongwe le yo mongwe wa rena o swanetše go ipotšiša gore: ‘Na ke leka ka matla “go boloka botee bja moya setlemong se se tlemaganyago sa khutšo”? Ke arabela bjang ge go rotoga mathata? Na ke belaela ka mathata ao pele ga batho ba bantši ke holofetše gore ke tla hwetša thekgo ya ba bangwe ba bagwera ba ka? Na ke letetše gore bagolo ba rarolle ditaba tša ka go e na le gore ke dire maiteko a kgonthe a go dira khutšo? Ge batho ba bangwe ba na le selo se itšego kgahlanong le nna, na ke dira sohle seo nka se kgonago go phema gore ba boledišane le nna?’ Na ditiro tše bjalo di tla ba di bontšha gore re dira dilo ka go dumelelana le morero wa Jehofa wa go kgobokanya gotee dilo tšohle go Kriste?

10, 11. (a) Go ba le khutšo le bana babo rena go bohlokwa gakaaka’ng? (b) Ke ditiro dife tšeo di tla tšweletšago khutšo le katlego ya moya?

¹⁰ Jesu o itše: “Ka gona, ge o tliša mpho ya gago aletareng gomme ge o le moo wa gopola gore ngwaneno o na le se sengwe ka wena, tlogela mpho ya gago moo pele ga aletare, o tloge. Thoma ka go dira khutšo le ngwaneno, ke moka ge o boile, o iše mpho ya gago. Lokiša ditaba ka go akgofa.” (Mat. 5:23-25) Jakobo o ngwadile gore “peu ya seenywa sa toko e bjalwa maemong a khutšo gare ga bao ba dirago khutšo.” (Jak. 3:17, 18) Ka go re’alo, re ka se kgone go tšwela pele re dira se lokilego ge e ba re se na khutšo.

¹¹ Ka mohlala, go lekanyetšwa gore dinageng tše dingwe tšeo di sentšwego ke ntwa, 35 lekgolong ya mmu wa dinaga tšeo o be o ka lengwa ge nkabe badudi ba tšona ba be ba sa tshwenyege ka dithuthupi tše di epetšwego moo. Ge sethuthupi se ka thuthupa, mašemo a tlogelwa ke balemi, badudi ba hloka seo ba ka iphedišago ka sona gomme batho ba thatafalelwa ke go hwetša dijo. Ka tsela e swanago, go gola ga rena moyeng go a šitišega ge e ba re na le semelo seo se ka šitišago khutšo le bana babo rena. Eupša ka go akgofela go lebalela le ka go šomela katlego ya ba bangwe, re tšweletša maemo ao a feleletšago ka katlego ya kgonthe.

12. Bagolo ba ka re thuša bjang gore re be batee?

¹² Go feta moo, “dimpho tšeo e lego banna” di ka ba tutuetšo ya kgonthe ya botee. Re neilwe tšona gore di re thuše go “fihlelela botee bja tumelo.” (Baef. 4:8, 13) Ge bagolo ba šoma gotee le rena tirelong e kgethwa le go re nea keletšo e theilwego Lentšung la  Modimo, ba re thuša go dira tšwelopele e le gore re apare semelo se sefsa. (Baef. 4:22-24) Na keletšong yeo ba e neago o bona boiteko bja Jehofa bja go go lokišeletša bophelo lefaseng le lefsa ka tlase ga pušo ya Morwa wa gagwe? Bagolo, na le leka go thuša ba bangwe le naganne ka pakane ye?—Bagal. 6:1.

“BONTŠHANANG BOTHO”

13. Mafelelo e tla ba afe ge e ba re sa kwe keletšo yeo e lego go Baefeso 4:25-32?

¹³ Baefeso 4:25-29 e bolela ka boitshwaro bjoo re swanetšego go bo phema ka go lebanya? Se se akaretša go bolela maaka, go galefa goba go tšwafa le go diriša polelo e bodilego go e na le go bolela seo se lokilego le seo se agago. Ge e ba motho a be a ka palelwa ke go kwa keletšo ye, o be a tla nyamiša moya wa Modimo, ka ge moya o mokgethwa e le matla ao a kgothaletšago botee. (Baef. 4:30) Le gona go diriša se latelago seo Paulo a se ngwadilego go bohlokwa bakeng sa khutšo le botee, ge a re: “Tlošang go lena mohuta o mongwe le o mongwe wa go boloka sekgopi, bogale, pefelo, mašata le polelo e gobošago gotee le selo se sengwe le se sengwe se se gobatšago. Eupša bontšhanang botho, le šokelane ka bonolo, le lebalelane ka bolokologi go etša ge Modimo le yena a le lebaletše ka bolokologi ka Kriste.”—Baef. 4:31, 32.

14. (a) Mantšu a rego “bontšhanang botho” a šišinya eng? (b) Ke eng seo se tla re thušago go ba ba botho?

¹⁴ Mantšu a rego “bontšhanang botho” a šišinya gore go fihlela tekanyong e itšego re ka no se be botho gomme go ka nyakega gore re kaonefatše seo. Ke mo gobotse gakaakaang gore re itlwaetše go etiša pele dikgahlego tša ba bangwe go e na le go etiša tša rena pele! (Bafil. 2:4) Re ka ba re nagana go bolela selo se itšego seo se ka dirago gore ba bangwe ba sege goba go bonagale eka re bohlale, eupša na seo se tla bontšha gore re botho? Go naganišiša ka seo e sa le pele go tla re thuša gore re ‘bontšhe botho.’

GO ITHUTA GO BONTŠHA LERATO LE TLHOMPHO KA LAPENG

15. Mantšu a Paulo a lego go Baefeso 5:28 a bolela ka sebopego sefe sa go dirišana ga Kriste le phuthego?

¹⁵ Beibele e swantšha tswalano yeo Kriste a nago le yona le phuthego le yeo monna a nago le yona le mosadi wa gagwe. Se se swanetše go re bontšha di sa tloga fase tlhahlo, lerato le tlhokomelo tšeo monna a swanetšego go di bontšha mosadi wa gagwe gotee le boikokobetšo bjoo mosadi a swanetšego go bo bontšha lenyalong. (Baef. 5:22-33) Ge Paulo a be a ngwala mantšu a rego: “Ka tsela ye banna ba swanetše go rata basadi ba bona bjalo ka mebele ya bona,” na o be a bolela ka “tsela” efe? (Baef. 5:28) Mantšu ao a a boletšego pejana a bontšha tsela yeo ‘Kriste le yena a ratilego phuthego gomme a ikgafa ka baka la yona, a e hlatswa ka meetse a lentšu la Modimo.’ Ruri, ka go šoma ka go dumelelana le morero wa Jehofa wa go kgobokanya gotee gape dilo tšohle go Kriste, monna o swanetše go dula a fepa lapa la gagwe moyeng.

16. Mafelelo e tla ba afe ge batswadi ba phetha boikarabelo bja bona bja Mangwalo ka lapeng?

¹⁶ Batswadi ba dira gabotse ge ba gopola gore ba phetha boikarabelo bjo bo tšwago go Jehofa. Lehono go a nyamiša gore batho ba bantši lefaseng ga ‘ba na lerato la tlhago.’ (2 Tim. 3:1, 3) Botate ba bantši ba tšhabela boikarabelo bja bona, e lego seo se nyamišago le go gobatša bana ba bona. Eupša Paulo o eleditše botate ba Bakriste gore: “Le se ke la befediša bana ba lena, eupša tšwelang pele le ba godiša ka tayo le temošo ya Jehofa.” (Baef. 6:4) Ke kae moo bana ba thomago go ithuta go bontšha lerato le go hlompha taolo ge e se ka lapeng? Batswadi bao ba ilego ba ruta bana ba bona dithuto tšeo ka katlego, ba dirile ka go dumelelana le morero wa Jehofa  wa go laola ga gagwe dilo. Ka go dira gore magae a rena e be lefelo leo le se nago bogale, pefelo le polelo e gobošago, re ruta bana ba rena dithuto tše bohlokwa tša kamoo ba ka bontšhago lerato le go hlompha bolaodi. Se se tla ba lokišeletša go phela lefaseng le lefsa la Modimo.

17. Go nyakega eng e le gore re lwantšhe Diabolo?

¹⁷ Re swanetše go lemoga gore Diabolo, e lego yoo mathomong a ilego a šitiša khutšo legohleng, o tla ganetša ka matla maiteko a rena a go dira thato ya Modimo. Ga go pelaelo gore Sathane o a thaba ge batho ba bantši ba hlalana, ge ba kgetha go dula gotee go e na le gore ba nyalane, le ge ba amogela manyalo a bosodoma. Ga re ekiše boitshwaro goba mekgwa ya batho ba mehleng yeno. Kriste ke mohlala wa rena. (Baef. 4:17-21) Ka go re’alo, re kgothaletšwa gore re ‘apare ditlhamo tše di feletšego tše di tšwago go Modimo’ e le gore re lwantšhe Diabolo le batemona ba gagwe ka katlego.—Bala Baefeso 6:10-13.

“LE TŠWELE PELE LE SEPELA LERATONG”

18. Senotlelo sa botee bja rena bja Bokriste ke sefe?

¹⁸ Lerato ke senotlelo sa kgonthe sa botee bja rena bja Bokriste. Ge dipelo tša rena di tletše ka lerato la go rata ‘Morena wa rena o tee,’ ‘Modimo wa rena o tee’ le la go ratana seng sa rena, re bontšha gore re ikemišeditše “go boloka botee bja moya setlemong se se tlemaganyago sa khutšo.” (Baef. 4:3-6) Jesu o ile a rapelela lerato le bjalo ka gore: “Ga ke kgopelele ba feela, eupša ke kgopelela le bao ba dumelago go nna ka lentšu la bona; e le gore ka moka e be batee, go etša ge wena Tate o le boteeng le nna gomme nna ke le boteeng le wena, gore le bona ba be boteeng le rena . . . Le gona, ke ba tsebišitše leina la gago e bile ke tla le tsebatša, e le gore lerato leo o nthatilego ka lona le be go bona gomme nna ke be boteeng le bona.”—Joh. 17:20, 21, 26.

19. O ikemišeditše go dira eng?

¹⁹ Ge e ba go na le selo se itšego semelong sa rena seo go lego thata gore re se fetoše ka baka la go se phethagale ga rena, eka lerato le ka re tutuetša go rapela go etša ge mopsalme a dirile ge a re: “Ntire gore ke boife leina la gago ka pelo ka moka.” (Ps 86:11) Anke re ikemišetšeng go lwantšha maiteko a Diabolo a go re katološetša kgole le Tatago rena yo lerato le bao a ba amogelago. Šomang ka thata gore le be “baekiši ba Modimo, le le bana ba ba rategago, le tšwele pele le sepela leratong”—ka lapeng, bodireding bja rena le ka phuthegong.—Baef. 5:1, 2.

[Dipotšišo tša Thuto]

[Seswantšho go letlakala 29]

O tlogela mpho ya gagwe aletareng gomme o ya go dira khutšo le ngwanabo

[Seswantšho go letlakala 31]

Batswadi, rutang bana ba lena go bontšha tlhompho