Ka ge go anega Max Lloyd

E be e le bošegong bjo bongwe bja 1955. Ke be ke na le moromiwagotee le nna kabelong ya rena kua Paraguay, Amerika Borwa, ge ntlo yeo re bego re le ka gare ga yona e be e dikaneditšwe ke bahlolampherefere bao ba bego ba galefile gomme ba goelela ba re: “Modimo wa rena ke modimo yo a nyoretšwego madi, e bile o nyaka madi a batšwantle.” Go tlile bjang gore batšwantle ba go swana le rena ba be moo?

DILO ka moka bophelong bja ka di thomile nywaga e mmalwa e fetilego kua Australia moo ke goletšego gona e bile e le moo Jehofa a ilego a thoma go nthuta go dira thato ya gagwe. Tate o ile a amogela puku e bitšwago Enemies go tšwa go Hlatse e nngwe ka 1938. Yena le Mma ba be ba šetše ba sa kgotsofatšwe ke moruti wa lefelong la gešo, yoo a bego a re dikarolo tše dingwe tša Beibele e be e le dinonwane. Mo e ka bago ngwaga ka morago, batswadi ba ka ba ile ba kolobetšwa go bontšha gore ba be ba ineetše go Jehofa. Go tloga ka nako yeo go ya pele, lapa la gešo le ile la etiša pele taba ya go dira thato ya Jehofa bophelong bja lona. Kgaetšedi ya ka, Lesley, yo a bego a mpheta ka nywaga e mehlano, o ile a kolobetšwa ka morago ga bona, gomme nna ke kolobeditšwe ka 1940 ge ke be ke na le nywaga e senyane.

Gateetee ka morago ga go phulega ga Ntwa ya II ya Lefase, modiro wa go gatiša le go abja ga dikgatišo tše di theilwego Beibeleng tša Dihlatse tša Jehofa o ile wa thibelwa Australia. Ka gona, ke ile ka ithuta ke sa le yo monyenyane go bontšha moo tumelo ya ka e bego e theilwe gona, ke diriša Beibele feela. Ke ile ka tlwaela go ya le Beibele ya ka sekolong e le gore ke bontšhe batho lebaka leo ke sa dumedišego folaga goba ke sa thekgego dintwa tša ditšhaba.—Ek. 20:4, 5; Mat. 4:10; Joh. 17:16; 1 Joh. 5:21.

Bana ba bantši sekolong ba be ba sa nyake go ba le nna ka gobane go be go thwe ke “tlhodi ya Majeremane.” Ka nako yeo, dikolong go be go bontšhwa difilimi. Pele ga ge filimi e ka thoma, yo mongwe le yo mongwe o be a swanetše go ema gomme go opelwe koša ya setšhaba. Ge ke be ke sa emelele, bašemanyana ba babedi goba ba bararo ba be ba tla leka go nkemiša ka kgang ka go ntshwara ka meriri. Mafelelong ke ile ka rakwa sekolong ka gobane ke be ke kgomaretše ditumelo tša ka tšeo di theilwego Beibeleng. Lega go le bjalo, ke ile ka kgona go tsena sekolo ke dutše ke le gae.

PAKANE YEO KE ILEGO KA FELELETŠA KE E FIHLELETŠE

Ke be ke ipeetše pakane ya go tsenela tirelo ya nako e tletšego ka go ba mmulamadibogo ge ke eba le nywaga e 14. Ka gona ke ile ka nyama kudu ge batswadi ba ka ba mpotša gore ke swanetše go thoma pele ka go nyaka mošomo. Ba ile ba mpotša gore ke lefelele phapoši yeo ke bego ke dula go yona ka gae gotee le dijo eupša ba nkholofetša gore ge ke eba le nywaga e 18, nka thoma go bula madibogo. Se se ile sa dira gore ke dule  ke ba botšiša ka tšhelete yeo ke bego ke e gola mošomong. Ke ile ka ba botša gore ke nyaka go e boloka gore e nthuše ge ke tlo thoma go bula madibogo, eupša bona ba be ba e tšea.

Ge go be go fihla nako ya gore ke thome go bula madibogo, batswadi ba ka ba ile ba dula fase le nna gomme ba mpotša gore tšhelete yeo ke ba filego yona ba e bolokile pankeng. Ke moka ba ile ba mpušetša yona ka moka gore ke reke diaparo le dilo tše dingwe tšeo ke bego ke di nyaka modirong wa bobulamadibogo. Ba be ba nthuta gore ke kgone go itlhokomela le gore ke se letele gore ba bangwe ba ntirele seo. Ge ke nagana ka seo, ruri tlwaetšo yeo e be e le ya bohlokwa kudu.

Ge nna le Lesley re be re sa gola, babulamadibogo ba be ba gorogela lapeng la gešo gantši, gomme re be re thabela go ya le bona bodireding. Mafelobeke e be e le nako ya go dira bodiredi bja ntlo le ntlo, go nea bohlatse setarateng le go swara dithuto tša Beibele. Pakane ya mogoeledi wa phuthego nywageng yeo e be e le go fetša diiri tše 60 ka kgwedi tšhemong. Mo e ka bago ka mehla mma o be a fihlelela pakane yeo, e lego seo se ilego sa beela nna le Lesley mohlala o mobotse.

GO BULA MADIBOGO KUA TASMANIA

Kabelo ya ka ya pele ke le mmulamadibogo e bile sehlakahlakeng sa Australia seo se bitšwago Tasmania, e lego moo ke ilego ka šoma le kgaetšedi ya ka le monna wa gagwe. Lega go le bjalo, ba ile ba tloga nakwana ka morago ga moo gore ba yo ba klaseng ya bo-15 ya Sekolo sa Gilead. Ke be ke le motho wa dihlong kudu e bile ke be ke thoma go ba kgole le gae. Ba bangwe ba ile ba ba ba bolela gore ke tlo palelwa ke go dula moo dikgwedi tša go feta tše tharo. Eupša, ka ngwaga feela, ka 1950, ke ile ka kgethwa go ba mohlanka wa khamphani, yoo ga bjale a bitšwago molomaganyi wa sehlopha sa bagolo. Ka moragonyana, ke ile ka kgethelwa go ba mmulamadibogo yo a kgethegilego, gomme ngwanabo rena yo mongwe yo mofsa o ile a šoma le nna.

Kabelo ya rena e be e le ya go šoma toropong yeo e lego lekatana ya moepo wa koporo moo go bego go se na Dihlatse. Re fihlile moo ka pese pele le dikela. Re ile ra robala hoteleng ya kgale bošegong bja pele. Letšatšing le le latelago, ge re dutše re nea bohlatse ka ntlo le ntlo, re ile ra botšiša beng ba dintlo ge e ba go na le moo ba bego ba tseba go hirišwa madulo. Thapameng ya letšatši leo, motho yo mongwe o ile a bolela gore ntlo ya moruti yo mongwe kgauswi le kereke ya Presbyterian e be e se na motho gomme a re botša gore re bolele le motiakone. Motiakone yoo o be a le botho gomme a re dumelela go dula ka moo. Go be go makatša gore re be re etšwa ka ntlong ya moruti letšatši le lengwe le le lengwe gomme re eya tšhemong.

Tšhemo yeo e be e tšweletša dienywa. Re be re hwetša batho ba thabelago gomme re ile ra thoma dithuto tše dintši tša Beibele. Ge balaodi ba kereke motsengmošate ba tseba ka taba ye e bile ba ekwa gore Dihlatse tša Jehofa di be di dula ka ntlong ya moruti, ba ile ba laela motiakone gore a re ntšhe ka moo gateetee. Re ile ra ikhwetša re se na madulo gape!

Ka morago ga gore re ye tšhemong go fihlela mosegare letšatšing le le latelago, re ile ra thoma go nyaka moo re ka latšago hlogo. Re ile ra se hwetše madulo felo ge e se ditulong tša lepatlelo la dipapadi. Re ile ra uta disutukheise tša rena moo gomme ra boela tšhemong. Leswiswi le be le thoma go swara, eupša re ile ra phetha ka go tsena dintlong tše dingwe tše mmalwa e le gore re fetše setarata seo. Ge re fihla ntlong e nngwe monna  wa moo o ile a re nea madulo diphapošing tše pedi tše nyenyane tšeo di bego di le ka morago ga ntlo ya gagwe!

MODIRO WA TIKOLOGO LE GILEAD

Mo e ka bago dikgwedi tše seswai ka morago ga kabelo ya ka ya boboledi, ke ile ka amogela taletšo e tšwago ofising ya lekala ya Australia gore ke be molebeledi wa tikologo. Seo se ile sa mmakatša, ka gobane ke be ke na le nywaga e 20 feela. Ka morago ga gore ke tlwaeletšwe modiro woo ka dibeke tše sego kae, ke ile ka thoma go etela diphuthego ka mehla gore ke di kgothatše. Bao ba bego ba mpheta ka bogolo, e lego moo e ka bago batho ka moka ka phuthegong, ga se ba ka ba nyatša bofsa bja ka, eupša ba ile ba hlompha modiro woo ke bego ke o dira.

Ruri maemo a be a fapane kudu ge ke be ke etela diphuthego ka go fapafapana ga tšona! Beke e nngwe ke be ke sepela ka pese, e nngwe ke sepela ka senamelwa seo se bitšwago terempe, e nngwe ke sepela ka koloi goba ke tšewa kgopu ka sethuthuthu ke dutše ke swareletše sutukheise le mokotla wa go ya tšhemong. Go be go tloga go thabiša go dula le Dihlatse tše dingwe. Mohlanka yo mongwe wa khamphani o be a tloga a nyaka gore ke dule ga gagwe gaešita le ge ntlo ya gagwe e be e sa fetšwa go agwa. Bekeng yeo ke be ke robala ka pafong ya go hlapela, eupša beke yeo e ile ya ba e agago moyeng e le ruri!

Selo se sengwe seo se ilego sa nthabiša kudu se tlile ka 1953 ge ke be ke kgopelwa go tlatša fomo ya gore ke be klaseng ya bo-22 ya Sekolo sa Gilead. Eupša lethabo la ka le be le širwa ke dipelaelo. Taba ke gore ka morago ga ge kgaetšedi ya ka le monna wa gagwe ba alogile Gilead ka July 30, 1950, ba ile ba abelwa go hlankela Pakistan. Le pele ga ge ngwaga o ka fela, Lesley o ile a babja gomme a hwela moo. Ke ile ka ipotšiša gore batswadi ba ka ba be ba tla ikwa bjang ka gore ke išwe nageng e nngwe mola seo se sa tšwa go direga. Eupša ba ile ba re: “Eya o hlankele Jehofa kae le kae moo a go nyakago gona.” Ga se ka hlwa ke sa bona Tate gape. O hlokofetše ka 1957.

Go se go ye kae, ke be ke le ka sekepeng le Maaustralia a mangwe a mahlano re le leetong la dibeke tše tshela la go ya New York City. Ge re be re le tseleng, re be re bala Beibele, re ithuta e bile re nea bohlatse go banamedi ba bangwe. Pele ga ge re ka ya moo sekolo se swarelwago gona kua South Lansing, New York, re ile ra ya kopanong ya ditšhabatšhaba kua Yankee Stadium ka July 1953. Kopanong yeo go be go tlile batho ba 165 829!

Barutwana ba 120 bao ba bego ba le klaseng ya rena ya Gilead ba be ba etšwa dikhutlong tše nne tša lefase. Re be re botšwa ka letšatši la rena la go aloga gore re abetšwe go hlankela kae. Gateetee ka morago ga moo, re be re kitimela bokgobapukung bja Gilead gore re ithute ka dinaga tšeo re bego re abetšwe go tšona. Ke ile ka tseba gore naga yeo ke bego ke abetšwe go hlankela go yona ya Paraguay e be e na le histori ya bopolitiki ya go tsogelwa ga mebušo. Nakwana ka morago ga go fihla moo, ke ile ka botšiša baromiwa ba bangwe mesong e mengwe gore mogoo woo o bego o kwala bošegong bja go feta e be le wa go ketekwa ga eng. Ba ile ba myemyela gomme ba re go nna: “O sa tšwa go kwa ka lekga la pele ge mmušo o tsogelwa. Lebelela ka kua ntle ka mojako wa ka pele.” Ke ile ka bona mašole a tletše gohle!

PHIHLELO E BOIFIŠAGO

Lebakeng le lengwe, ke ile ka sepela le molebeledi wa tikologo go yo etela phuthego e lego lekatana ke  moka re e bontšhe filimi ya The New World Society in Action. Re ile ra sepela diiri tše seswai goba tše senyane, ra thoma pele ka go tšea setimela, ke moka ra namela dipere le karikana, gomme ra feleletša ka koloyana ya dipholo. Re be re rwele motšhene wa go fehla mohlagase le wa go bapala difilimi. Ka morago ga gore re goroge moo re yago gona, re ile ra fetša letšatši le le latelago ka moka re etela dipolasa gomme re laletša batho ka moka go tlo bona filimi bošegong bjoo. Go ile gwa tla batho ba 15.

Ka morago ga gore filimi e bapale ka metsotso e ka bago e 20, re ile ra laelwa gore re tšhabele ka ntlong. Re ile ra rwala motšhene wa difilimi gateetee. Ke ka yona nako yeo moo banna ba ilego ba thoma go goelela, ba thuntšha dithunya gomme ba opela ba re: “Modimo wa rena ke modimo yo a nyoretšwego madi, e bile o nyaka madi a batšwantle.” Batšwantle e be e le ba babedi feela ka moo, gomme ke be ke le yo mongwe wa bona! Bao ba bego ba tlile go bogela filimi ba ile ba thibela bahlolampherefere bao ge ba be ba leka go šwahlela ka ntlong. Eupša baganetši bao ba ile ba boa mo e ka bago ka iri ya boraro ka masa, ba thuntšha dithunya tša bona gomme ba bolela gore ba tlo re lalela tseleng ge re boela gae ge go esa.

Bana babo rena ba ile ba ikgokaganya le lephodisa la moo, gomme le ile la tla thapama ka dipere tše pedi gore le sepele le rena go ya toropong. Ge re be re le tseleng ya go boela morago, neng le neng ge re be re batamela sethokgwanyana, le be le ntšha sethunya sa lona gomme le re eta pele gore le bone ge e ba go se kotsi yeo e ka re welago. Ke ile ka lemoga gore pere e be e le senamelwa se bohlokwa, ka gona ke ile ka ba le yona.

BAROMIWA BA OKETŠEGILEGO BA A GOROGA

Modiro wa boboledi o ile wa tšwela pele o atlega kudu go sa šetšwe kganetšo e sa kgaotšego ya baruti. Ka 1955, go ile gwa fihla baromiwa ba bangwe ba bahlano, go akaretša le kgaetšedi yo mofsa wa go tšwa Canada yoo leina la gagwe e bego e le Elsie Swanson, sealoga sa klase ya bo-25 ya Gilead. Re ile ra hlankela bohle ofising ya lekala pele ga ge a ka abelwa go ya toropong e nngwe. O be a neetše bophelo bja gagwe tirelong ya Jehofa le ge a be a sa thušwe ke batswadi ba gagwe, ka gobane ba se ba ka ba amogela therešo. Ka December 31, 1957, nna le Elsie re ile ra nyalana, gomme re ile ra dula ngwakong wa baromiwa karolong ya ka borwa bja Paraguay.

Ngwako wa rena o be o se na pompi ya meetse; go e na le moo, re be re na le sedibana ka jarateng kua moragonyana. Ka gona go be go se na šawara goba ntlwana ya boithomelo ka ntlong, go se na motšhene wa go hlatswa, gaešita le setšidifatši. Re be re reka dijo tšeo re bego re swanetše go di fetša ka lona letšatši leo. Eupša ka ge bophelo bo be bo le bonolo e bile re be re gwerane ka borutho le bana babo rena le dikgaetšedi ka phuthegong, nako yeo e ile ya ba e thabišago kudu ya bophelo bja rena bja lenyalo.

 Ka 1963, nakwana ka morago ga gore re fihle Australia go tlo etela mma, o ile a hlaselwa ke bolwetši bja pelo, mohlomongwe ka gobane a be a thabišitšwe ke go bona nna morwa wa gagwe ka morago ga nywaga e lesome. Ge nako ya gore re boele kabelong ya rena Paraguay e batamela, re ile ra swanelwa ke go dira e nngwe ya diphetho tše boima kudu bophelong bja rena. Re be re sa tsebe ge e ba re swanetše go tlogela mma sepetlele ka kholofelo ya gore go tla ba le motho yo a mo hlokomelago gomme rena re boele kabelong ya rena yeo re bego re e rata kua Paraguay. Ka morago ga go rapela ka taba ye ka nako e telele, nna le Elsie re ile ra phetha ka go dula gae gore re hlokomele Mma. Re ile ra kgona go dira seo re dutše re tšwela pele ka tirelo ya nako e tletšego go ba go fihlela mma a hlokofala ka 1966.

E bile tokelo e kgolo go dirišwa modirong wa tikologo le wa selete kua Australia ka nywaga e mmalwa gotee le go ruta Sekolong sa Bodiredi sa Mmušo sa bagolo. Ke moka go ile gwa tla phetogo e nngwe gape bophelong bja rena. Ke ile ka abelwa go hlankela ke le setho sa Komiti ya pele ya Lekala la Australia. Ke moka ge re be re tlo aga ofisi e mpsha ya lekala, ke ile ka kgethelwa go ba modulasetulo wa komiti ya tša kago. Ka thušo ya bašomi ba bantši ba nago le phihlelo le tirišano, re ile ra aga lekala le lebotse.

Ka morago ga moo ke ile ka abelwa go šoma Lefapheng la Tirelo, e lego leo le hlokometšego modiro wa boboledi nageng ka moka. Ke ile ka ba ka amogela tokelo ya go ba molebeledi yo a etelago makala a mangwe go dikologa lefase e le gore ke a thuše le go a kgothatša. E bile selo se se matlafatšago tumelo ka mo go kgethegilego go nna go etela dinageng tše dingwe gomme ke bone bao ba ilego ba fetša nywaga e mentši—gaešita le nywagasome—ba le dikgolegong le dikampeng tša tlaišo ka baka la go botegela ga bona Jehofa.

KABELO YA RENA GA BJALE

Ka morago ga leeto leo le lapišago la go etela makala ka 2001, ke ile ka hwetša lengwalo leo le ntaletšago Brooklyn, New York, go tlo hlankela ke le karolo ya Komiti ya Lekala la United States leo le sa tšwago go hlongwa. Nna le Elsie re ile ra naganišiša ka taletšo ye gomme ra rapela, ke moka re ile ra feleletša re amogetše kabelo yeo. Ka morago ga nywaga ya ka godimo ga e 11, re sa dutše re le Brooklyn.

Ke thabela kudu gore ke na le mosadi yoo a ratago go dira selo le ge e le sefe seo Jehofa a kgopelago gore re se dire. Ga bjale nna le Elsie re sa tšwa go feta nywaga e 80 ya bophelo gomme ga re batho ba go phela ka malwetši. Re fagahletše go tlo ipshina ka dithuto tša Jehofa ka mo go sa felego gotee le go thabela ditšhegofatšo ka moka tše di humilego tšeo di tlago go tlela bao ba tšwelago pele ba dira thato ya gagwe.

[Ntlhakgolo go letlakala 19]

Beke e nngwe ke be ke sepela ka pese, e nngwe ka terempe, e nngwe ka koloi goba ke tšewa kgopu ka sethuthuthu ke dutše ke swareletše sutukheise le mokotla wa go ya tšhemong

[Ntlhakgolo go letlakala 21]

Re fagahletše go tlo ipshina ka dithuto tša Jehofa ka mo go sa felego

[Diswantšho go letlakala 18]

Ka go le letshadi: Modirong wa tikologo kua Australia

Ka go le letona: Ke na le batswadi ba ka

[Seswantšho go letlakala 20]

Letšatšing la rena la lenyalo ka December 31, 1957