“Ke Fihleletše Seo ke Bego ke se Kganyoga”

Nywaga e 15 e fetilego, Emilia e be e le mmulamadibogo wa ka mehla. Eupša o ile a swanelwa ke go tlogela tirelo ya nako e tletšego. Nywageng e sa tšwago go feta, gantši o be a fela a gopola nako yeo e thabišago kudu ya bophelo bja gagwe, e bile a nyaka go oketša gape tema yeo a e kgathago bodireding.

Lega go le bjalo, mošomo wa Emilia wa boiphedišo o be o nyaka nako e ntši, gomme lepheko le le be le mo amoga lethabo. Ka nako e nngwe ge a be a na le bašomigotee le yena, o ile a belaela ka gore: “Ke duma ge nkabe diiri tša ka di ka fokotšwa!” Mong wa gagwe o ile a kwa ka se gomme a mmotšiša ge e ba seo e be e le therešo. Emilia o ile a mmotša gore go bjalo. Lega go le bjalo, gore seo se direge go be go nyaka tumelelo ya molaodi ka ge molao wa khampani o be o nyaka gore mošomi yo mongwe le yo mongwe a šome diiri tše tletšego. Ka gona kgaetšedi Emilia o ile a lokišeletša go ahlaahla se le molaodi gomme a rapelela khutšo le sebete.

Nakong ya poledišano, Emilia ka bohlale e bile a le sebete o ile a kgopela go fokoletšwa diiri tša mošomo. O ile a hlalosa gore o šomiša nako ya go se be mošomong go thuša batho ba bangwe ka go botša molaodi gore: “Ke yo mongwe wa Dihlatse tša Jehofa, gomme ke thuša batho ka ditaba tša Modimo. Lehono mekgwa ya boitshwaro ya batho ba bantši e senyegile. Ba nyaka ditekanyetšo tše di kwagalago gabotse tša boitshwaro, gomme bohlale bjoo ke ba fago bjona go tšwa Beibeleng bo bohlokwa kudu go bona. Ga ke nyake gore dilo tšeo ke di dirago ka morago ga mošomo di tsenatsenane le mošomo wa ka, eupša ke kgopela feela nako e oketšegilego gore ke thuše batho. Ke ka baka leo ke nyakago gore diiri tša mošomo wa ka di fokotšwe.”

Molaodi o ile a mo theetša ka kelohloko gomme a re ka nako e nngwe le yena o kile a nyaka go thoma modiro wa go thuša bahloki. Ke moka o ile a re: “Ka mabaka ao o a tšweleditšego, ke ikwa ke swanetše go dumelelana le seo o se kgopelago. Eupša na o a lemoga gore se se tla fokotša mogolo wa gago?” Emilia o ile a re o lemoga seo, gomme a re ge e ba go nyakega o be a tla nolofatša bophelo bja gagwe. O ile a tlaleletša ka gore: “Pakane ya ka e kgolo kudu ke go dira selo seo se thušago batho e le ruri.” Molaodi o ile a mmotša gore: “Ke rata batho bao ka ntle le mabaka a boithati ba šomišago nako ya bona go thuša ba bangwe.”

Ga go na mošomi le o tee wa khampani yeo yo a kilego a šoma ka tlase ga maemo a bjalo a kgethegilego. Emilia ga bjale o dumeletšwe go šoma matšatši a mane feela ka beke. O makaditšwe kudu ke gore o ile a okeletšwa mogolo, gomme a hwetša wo o lekanago le wa pele! O re: “Ke fihleletše seo ke bego ke se kganyoga, ka gona ke mmulamadibogo wa ka mehla gape!”

Na le wena o ile wa naganišiša ka go lokiša maemo a gago gore o kgone go tsenela tirelo ya bobulamadibogo goba go boela go yona ge e ba o kile wa e tlogela?

[Ntlhakgolo go letlakala 32]

Molaodi o ile a mmotša gore: “Ke rata batho bao ka ntle le mabaka a boithati ba šomišago nako ya bona go thuša ba bangwe”