“KE NO ba nka se kgone go ya ka ntlo le ntlo!” Go bile le barutwana ba bafsa ba Beibele bao ba ilego ba ikwa ka tsela ye ka go nea bohlatse go batho bao ba sa ba tsebego! Lega go le bjalo, mantšu a bjalo a ile a bolelwa ke mosepedi wa bodumedi yo e bego e le seboledi se nago le bokgoni sa phatlalatša e bile e le morutiši wa Beibele.

Babadi ba bantši ba makasine wa Zion’s Watch Tower bao ba tlogetšego dikereke tša bona ba be ba duma go bokana le bao ba bego ba nyoretšwe therešo ya Beibele go swana le bona. Makasine wo o ile wa kgothaletša babadi ba wona gore ba tsome ba bangwe bao ba nago le tumelo e swanago e kgethegilego gomme ba kopane ka mehla gore ba ithute Beibele. Go thoma ka bo-1894, Mokgatlo wa Watch Tower o ile wa romela baemedi ba basepedi go dihlopha tšeo di kgopetšego ketelo. Ka morago ba ile ba bitšwa basepedi ba bodumedi; le gona banna bao ba nago le phihlelo e bile ba šoma ka thata, ba be ba kgethwa ka baka la boikokobetšo bja bona, tsebo ya Beibele, go bolela ka thelelo, bokgoni bja go ruta le go bontšha ga bona gore ba amogela seo se bolelwago ke topollo. Ketelo ya bona e be e tšea letšatši feela goba a mabedi a leemaema. Barutwana ba bantši ba Beibele ba ile tšhemong la mathomo ge ba sepediša dipampišana tša taletšo ya polelo ya phatlalatša ya mosepedi wa bodumedi. Mantšiboa a mangwe ge a feditše go neela polelo ya gagwe sekolong, Hugo Riemer yo ka morago a ilego a ba setho sa Sehlopha se Bušago, o ile a araba dipotšišo tšeo batheetši ba bego ba na le tšona ka Beibele go fihlela bošegogare. Le ge a be a lapile, o ile a thabela seo gomme a bolela gore seboka se sepetše ka “thelelo.”

Morokami o ile wa bolela gore “morero o mogolo” wa diketelo tša basepedi ba bodumedi ke go aga “ba lapa la tumelo” ka diboka tšeo di bego di swarelwa magaeng a badumedi. Barutwana ba Beibele go tšwa mafelong a kgauswi ba be ba etla go tlo theetša dipolelo le dipoledišano tša dipotšišo le dikarabo. Ka morago Bakriste ba be ba bontšha moya wa go amogela baeng. Ge Maude Abbott e sa le ngwanenyana, o ile a theetša polelo ya mesong gomme ka morago bohle ba ile ba kgobokana tafoleng e telele ka jarateng. O re: “Go be go na le dijo tše dintši tše rothišago mare—nama ya serope sa kolobe, kgogo e gadikilwego, dinkgwa tša mehutahuta, diphae le dikhekhe! Yo mongwe le yo mongwe o ile a ja wa mpanapalega, gomme mo e ka bago ka iri ya bobedi re ile ra bokana bakeng sa polelo e nngwe.” Eupša o dumela gore: “Ka nako yeo ka moka ga rena re be re otsela.” Mosepedi wa kgale wa bodumedi e lego Benjamin Barton o kile a bolela gore: ‘Ge nkabe ke jele dijo ka moka tšeo ke bego ke di fiwa, nkabe ke hwile kgale.’ Mafelelong lengwalo le le tšwago ntlongkgolo kua Brooklyn le ile la eletša dikgaetšedi tše di nago le maikemišetšo a mabotse gore go kaone di fe basepedi “dijo tše tlwaelegilego” le “go ba fa nako ya go robala.”

Basepedi ba bodumedi ba be ba ruta ka bokgoni ba diriša ditšhate, diswantšho goba se sengwe le se sengwe seo ba bego ba na le sona kgauswi e le go phediša seo ba bolelago ka sona. Dipolelo tša R. H. Barber “di be di kgahliša ka mehla.” W. J. Thorn yo a bego a lebelelwa bjalo ka tate o be a bolela “go swana le mopatriareka wa mehleng ya kgale.” Ka letšatši le lengwe ge Shield Toutjian a be a nametše koloi ya Ford ya mohuta wa Model A, o ile a goeletša ka gore: “Emang!” O ile a tšwa ka koloing ka lebelo, a kga matšoba a nageng gomme a nea banna bao a sepelago le bona polelo e sa lokišetšwago ka tlholo ya Jehofa.

Maemo a thata a mošomo wa basepedi ba bodumedi a be a na le ditlhohlo tše dintši, kudukudu go bao ba lego  nywageng ya magareng goba ka godimo ga moo. Lega go le bjalo, teko e kgolo go ba bangwe e bile ge go dirwa diphetogo mošomong wa bona. Ga bjale ba be ba swanetše go etelela pele modirong wa go bolela ka ntlo le ntlo. Morokami (wa Seisemane) wa March 15, 1924, o ile wa hlalosa gore “thomo e bohlokwahlokwa” ya Bakriste ba therešo “ke go nea bohlatse ka mmušo wa Modimo. Basepedi ba bodumedi ba romelwa go phetha morero wo.”

Go bonagala basepedi ba bangwe ba be ba tenwa ke phetogo ye, ka ge ba ile ba tlogela modiro wa bosepedi gomme ba bangwe bao ba bego ba ngongorega ba ile ba ithomela dikereke tša bona. Robie D. Adkins o anega gore mosepedi yo mongwe wa bodumedi yo e bego e le seboledi se nago le bokgoni o boletše ka go tenega gore: “Ke tseba feela go bolela ke le sethaleng. Ke no ba nka se kgone go ya ka ntlo le ntlo!” Ngwanabo rena Adkins o gopola gore: “Ke ile ka mmona gape ka 1924 kopanong ya kua Columbus, Ohio. O be a bonagala a šulafetše go feta batho ka moka moo, a dutše a nnoši moriting wa sehlašana se sengwe, a hlomola pelo gare ga bana babo rena ba thabilego ba dikete. E be e le la mafelelo ke mmona. O tlogetše mokgatlo ka moragonyana ga moo.” Go fapana le seo, “bana babo rena ba thabilego ba be ba swere dipuku ba di iša dikoloing tša bona,” go le molaleng gore ba fagahletše go nea bohlatse ka ntlo le ntlo.—Dit. 20:20, 21.

Le ge basepedi ba bantši ba be ba tšhogile go swana le bao ba bego ba swanetše go ba ruta, ba ile ba šoma ka phišego. Mabapi le go nea bohlatse ka ntlo le ntlo, mosepedi Maxwell G. Friend (Freschel) yo a bolelago Sejeremane o ngwadile gore: “Karolo ye ya modiro wa bosepedi ke e nngwe ya ditšhegofatšo tša ketelo ye.” Mosepedi John A. Bohnet o begile gore mo e ka bago bana babo rena ka moka ba be ba thekga ka phišego modiro wa go bolela ka Mmušo. Go ya ka yena, bontši bja bona ba be ba “fišegela go ba mothalading wa pele ntweng ye.”

Go theoša le nywaga, bana babo rena ba botegago ba basepedi ba bile tšhušumetšo e botse go bana babo rena le dikgaetšedi. Hlatse ya kgale Norman Larson o boletše gore: “Le ge ke be ke sa le mošemane, go be go le molaleng gore basepedi ba na le mohola e bile ba bohlokwa. Ba nthušitše kudu gore ke tsene tseleng.” Go fihlela lehono le, balebeledi ba basepedi bao ba ikgafago le ba botegago ba thuša badumedigotee le bona go bolela gore: “Re ka kgona go ya ka ntlo le ntlo!”

[Ntlhakgolo go letlakala 32]

E be e le letšatši le thabišago ge mosepedi wa bodumedi a fihla!

[Seswantšho go letlakala 31]

Benjamin Barton ka 1905 o be a etela mafelo a 170

[Seswantšho go letlakala 32]

Walter J. Thorn e be e le mosepedi, gomme batho ba rata go mmitša Pappy ka ge a na le botho bja tate bja go swana le bja Kriste

[Seswantšho go letlakala 32]

Mosepedi J. A. Browne o ile a romelwa Jamaica ka bo-1902 go tiiša le go kgothatša dihlopha tše 14 tše nyenyane

[Seswantšho go letlakala 32]

Basepedi ba bodumedi ba be ba matlafatša tumelo, ba tiiša botee bja Bakriste gomme ba dira gore bana babo rena ba be kgauswi le mokgatlo