Le Tšwele Pele le Itshwara Bjalo ka Baagi ba Mmušong!

“Le tšwele pele le itshwara bjalo ka baagi.”—BAFIL. 1:27, mongwalo wa ka tlase wa Reference Bible.

O BE O TLA ARABA BJANG?

Ke bomang bao e ka bago baagi ba Mmušong?

Ke eng seo re swanetšego go se dira ka leleme, histori le melao ya Mmušong wa Modimo?

Baagi ba Mmušong ba bontšha bjang gore ba rata ditekanyetšo tša Modimo?

1, 2. Ke ka baka la’ng keletšo ya Paulo go phuthego ya Filipi e be e kgoma phuthego yeo ka tsela e kgethegilego?

MOAPOSTOLA PAULO o ile a kgothaletša phuthego ya Filipi gore e “[itshware] ka mokgwa o swanelago ditaba tše dibotse ka Kriste.” (Bala Bafilipi 1:27.) Lentšu la Segerika leo Paulo a le dirišitšego bakeng sa lentšu “itshwareng,” le ka fetolelwa gape e le “le tšwele pele le itshwara bjalo ka baagi.” Polelwana yeo e be e kgoma phuthego ya Filipi ka tsela e kgethegilego. Ka baka la’ng? Ka gobane go bonagala motse wa Filipi e be e le o mongwe wa metse e kgethilwego woo badudi ba wona ba bego ba neilwe tshwanelo ya go ba baagi ba Roma. Baagi ba Roma bao ba bego ba le Filipi le dikarolong tše dingwe ka moka Mmušong wa Roma ba be ba ikgantšha ka boemo bjoo gomme ba be ba thabela tšhireletšego e kgethegilego ka tlase ga molao wa Roma.

² Ditho tša phuthego ya Filipi di be di na le lebaka le legolo la gore di ikgantšhe ka boemo bja tšona. Paulo o ba gopoditše gore ka ge e be e le Bakriste ba tloditšwego, ba be ba na le tshwanelo ya go ba baagi ba “legodimong.” (Bafil. 3:20) E be e se baagi mmušong wa batho feela, eupša e be e le baagi Mmušong wa Modimo. Ka baka leo, ba be ba thabela tšhireletšego le mehola yeo e bego e sa lekanywe le selo.—Baef. 2:19-22.

3. (a) Ke bomang bao ba nago le sebaka sa go ba baagi ba Mmušong? (b) Re tla ahlaahla eng sehlogong se?

³ Keletšo ya Paulo ya gore “le tšwele pele le itshwara bjalo ka baagi” e šoma ka go lebanya go bao ba tlago go buša le Kriste legodimong. (Bafil. 3:20) Eupša re ka bolela gape gore e ka dirišwa ke bao e tlago go ba balata ba mo lefaseng ba Mmušo wa Modimo. Ka baka la’ng? Ka gobane Bakriste ka moka bao ba ineetšego ba hlankela Kgoši e tee, e lego Jehofa, gomme ba swanetše go phela ka ditekanyetšo tša go swana. (Baef. 4:4-6) Lehono, batho ba bantši ba šoma ka thata gore ba swanelegele go ba baagi ba naga e humilego. Na rena ga se ra swanela go tšeela godimo sebaka sa gore  re be baagi ba Mmušong? E le gore re bone bohlokwa bja go tšeela godimo tshwanelo yeo, anke re bapišeng tše dingwe tša dinyakwa tša mmušo wa batho le tša Mmušo wa Modimo go bao ba nyakago go ba baagi ba yona. Ke moka re tla hlahloba dilo tše tharo tšeo re swanetšego go di dira ge e ba re tla tšwela pele re na le tshwanelo ya go ba baagi ba Mmušong.

DINYAKWA TŠA GO BA MOAGI

4. Leleme le le sekilego ke eng, gomme re le bolela bjang?

⁴ Ithute leleme. Mebušo ya dinaga tše dingwe e nyaka gore bao ba kgopelago go ba baagi ba dinaga tša yona ba ithute leleme leo le bolelwago kudu nageng yeo. Gaešita le ka morago ga gore batho ba newe tshwanelo ya go ba baagi, ba ka fetša nywaga e mentši ba kalokana le go ithuta leleme leo le lefsa. Ba ka ithuta kapelapela melao ya popopolelo eupša ba ka tšea nako e telele ba ithuta go bitša mantšu gabotse. Ka mo go swanago, Mmušo wa Modimo o nyaka gore baagi ba wona ba ithute seo Beibele e se bitšago “leleme le le sekilego.” (Bala Tsefanya 3:9.) Leleme leo ke lefe? Ke therešo ya mabapi le Modimo le merero ya gagwe yeo e hwetšwago ka Beibeleng. Re tla ba re ithuta go bolela leleme le le sekilego ge e ba boitshwaro bja rena bo dumelelana le melao ya Modimo le melao ya gagwe ya motheo. Baagi ba Mmušong wa Modimo ba ka ithuta kapejana dithuto tša motheo tša Beibele gomme ba kolobetšwa. Lega go le bjalo, gaešita le ka morago ga gore ba kolobetšwe, ba swanetše go katanela go bolela leleme le le sekilego ka go thelela. Ka tsela efe? Yo mongwe le yo mongwe wa rena o swanetše go tswalela sekgoba se se lego gona magareng ga seo re se tsebago ka melao ya motheo ya Beibele le seo re se dirago.

5. Ke ka baka la’ng re swanetše go ithuta dilo tše dintši ka mo go kgonegago ka histori ya mokgatlo wa Jehofa?

⁵ Ithute histori ya naga. Motho yo a nyakago go ba moagi wa mmušong wa naga e itšego a ka swanelwa ke go ithuta dilo tše itšego ka histori ya mmušo woo. Ka mo go swanago, bao ba nyakago go ba baagi ba Mmušong ba swanetše go katanela go ithuta dilo tše dintši ka mo go kgonegago ka Mmušo wa Modimo. Ela hloko mohlala woo o beilwego ke barwa ba Kora, bao ba bego ba hlankela Isiraeleng ya bogologolo. Ba be ba thabišwa kudu ke Jerusalema le lefelo la yona la borapedi gotee le go bolela ka histori ya motse woo. Ba be ba sa fo kgahlwa ke meago ya motse woo eupša ba be ba kgahlwa ke seo motse woo le lefelo leo la borapedi di bego di se emela. Jerusalema e be e le “motse wa Kgoši e Kgolo,” Jehofa, ka gobane e be e le moo borapedi bjo bo sekilego bo bego bo direlwa gona. Molao wa Jehofa o be o rutwa moo. Jehofa o be a bonagatša lerato la gagwe go batho bao ba bego ba bušwa ke Kgoši ya Jerusalema. (Bala Psalme 48:1, 2, 9, 12, 13.) Na le wena o ba ekiša ka gore o be le kganyogo ya go ithuta le go bolela ka histori ya karolo ya lefaseng ya mokgatlo wa Jehofa? Ge o fetša nako e ntši o ithuta ka mokgatlo wa Modimo  le kamoo Jehofa a thekgago batho ba gagwe, ke gona Mmušo wa Modimo o fetogago selo sa kgonthe go wena. Kganyogo ya gago ya go bolela ditaba tše dibotse tša Mmušo e tla oketšega le go feta.—Jer. 9:24; Luka 4:43.

6. Ke ka baka la’ng e le mo go kwagalago gore Jehofa a nyake gore re ithute le go kwa melao ya Mmušo wa gagwe le melao ya motheo?

⁶ Tseba melao ya naga. Mebušo ya dinaga tše dingwe e nyaka gore baagi ba yona ba ithute melao ya naga gomme ba e latele. Ka gona, go a kwagala gore Jehofa a letele gore re ithute gomme re latele melao ya gagwe le melao ya motheo yeo e laolago baagi ka moka ba Mmušong wa gagwe. (Jes. 2:3; Joh. 15:10; 1 Joh. 5:3) Gantši melao ya batho e kgopame e bile ga e na toka. Eupša go fapana le seo, “molao wa Jehofa o phethagetše.” (Ps. 19:7) Na re kgahlwa ke molao wa Modimo le go bala Lentšu la gagwe letšatši le letšatši? (Ps. 1:1, 2) Tsela e nnoši ya gore re ithute molao wa Modimo ke gore re ipalele wona ka borena. Ga go motho yo a ka ithutago molao woo legatong la rena.

BAAGI BA MMUŠONG BA RATA DITEKANYETŠO TŠA MODIMO

7. Baagi ba Mmušong ba phela ka tekanyetšo efe e phagamego?

⁷ E le gore re dule re le baagi ba Mmušong, ga se ra swanela feela ke go tseba ditekanyetšo tša Modimo, eupša e bile re swanetše go di rata. Baagi ba bantši mebušong ya dinaga tše dingwe ba bolela gore ba dumelelana le melao le ditekanyetšo tša dinaga tšeo ba dulago go tšona. Lega go le bjalo, ge ba hwetša gore molao o itšego o a ba tshwenya e bile ga go motho yo a ba bonago, ba a o roba. Gantši batho ba bjalo ke “bao ba kgahlišago batho.” (Bakol. 3:22) Baagi ba Mmušong ba latela tekanyetšo e phagamego ya bophelo. Re kwa melao ya Modimo ka go rata, gaešita le ge go se motho yo a re bonago. Ka baka la’ng? Ka gobane re rata Mohlami wa Molao.—Jes. 33:22; bala Luka 10:27.

8, 9. O ka tseba bjang ge e ba o tloga o rata melao ya Modimo e le ka kgonthe?

⁸ O ka tseba bjang gore o rata melao ya Modimo e le ka kgonthe? Hlahloba tsela yeo o arabelago ka yona ge o eletšwa ka selo seo o naganago gore ke phetho ya motho ka noši—ka mohlala, tabeng ya moaparo le go itokiša. Pele ga ge o ka ba moagi wa Mmušong, o ka ba o be o rata go apara bošaedi goba ka tsela yeo e tsošago dikganyogo. Ge lerato la gago la go rata Modimo le dutše le gola, o ile wa ithuta go apara ka tsela yeo e mo godišago. (1 Tim. 2:9, 10; 1 Pet. 3:3, 4) Ga bjale o ka ba o bona gore o apara gabotse. Eupša go thwe’ng ge e ba mogolo a ka go botša gore tsela yeo o ratago go apara ka yona e kgopiša o šoro bagoeledi ba mmalwa ka phuthegong? O tla arabela bjang? Na o tla leka go ikemelela, wa mo swara ka pelo goba wa ngangabala? Molao wa motheo Mmušong wa Modimo ke gore baagi ba wona ka moka ba ekiše Kriste. (1 Pet. 2:21) Moapostola Paulo o ngwadile mabapi le mohlala wa Jesu gore: “Anke yo mongwe le yo mongwe wa rena a kgahliše moagišani wa gagwe ka se se holago a be a mo age. Gobane gaešita le Kriste ga se a ka a ikgahliša.” (Baroma 15:2, 3) E le gore go be le khutšo ka phuthegong, Mokriste yo a godilego ka tsebo o tla ikemišetša go dumelelana le maemo gore a se gobatše matswalo a ba bangwe.—Baroma. 14:19-21.

⁹ Ela hloko ditaba tše dingwe gape tše pedi tše bohlokwa: boemo bja rena bja kgopolo ka dikopano tša botona le botshadi le pono ya rena ka lenyalo. Bao e sego ya tšwa e eba baagi ba Mmušong wa Modimo ba ka no se tshwenywe ke bosodoma, ba tšea gore diswantšho tšeo di kgothaletšago bootswa ke boithabišo bjo bo sego kotsi, ba nagana le gore go dira bohlotlolo le go hlala ke phetho ya motho ka noši. Baagi ba Mmušong ba lahlile mekgwa e bjalo ya go bonela dilo kgauswi le ya boithati. Gaešita le ge Bakriste ba bantši ba kile ba phela maphelo a gobogilego, ga bjale ba lebelela dikopano tša botona le botshadi gotee le lenyalo e le dimpho tšeo di tšwago go Modimo. Ba tšeela godimo ditekanyetšo tša Jehofa tše di phagamego gomme ba dumela ka mo go feletšego gore bao ba tšwelago pele ba itshwara gampe ka tša botona le botshadi ba ka se  amogelwe go ba baagi ba Mmušong. (1 Bakor. 6:9-11) Lega go le bjalo, ba bile ba lemoga gore pelo e boradia. (Jer. 17:9) Ka gona ba thabela go hwetša ditemošo tše lebanyago tšeo di ba thušago go kgomarela ditekanyetšo tše di phagamego tša boitshwaro.

BAAGI BA MMUŠONG BA TŠEELA DITEMOŠO GODIMO

10, 11. Ke ditemošo dife tše di lego nakong tšeo Mmušo wa Modimo o di ntšhago, gomme o ikwa bjang ka ditemošo tše bjalo?

¹⁰ Mebušo ya dinaga tše dingwe e ka lemoša baagi ba yona ka kotsi ya dijo tše itšego le dihlare. Go molaleng gore ga se dijo ka moka le dihlare tšeo di lego kotsi. Eupša ge e ba setšweletšwa se itšego se ka baka kotsi, gona mmušo o ka ntšha ditemošo tše di kwagalago tša go šireletša baagi ba naga. Ge e ba mmušo woo o ka se dire seo, o tla bewa molato wa gore o ile wa hlokomologa dilo ka boomo. Ka mo go swanago, Mmušo wa Modimo o ntšha ditemošo tše di lego nakong mabapi le dikotsi tšeo di ka gobatšago batho boitshwarong le moyeng. Ka mohlala, Inthanete ke sedirišwa se holago sa poledišano, thuto le boithabišo. Mokgatlo wa Modimo o diriša Inthanete gomme o kgona go phetha dilo tše dintši tše dibotse ka yona. Lega go le bjalo, Diwepesaete tše dintši tša Inthanete di kotsi boitshwarong le moyeng. Diwepesaete tšeo di phatlalatšago diswantšho tše di kgothaletšago bootswa di bea bomoya bja baagi ba Mmušong kotsing e kgolo. Sehlopha sa mohlanka yo a botegago se re lemošitše ka Diwepesaete tšeo ka nywagasome. Ruri re tloga re leboga ditemošo tšeo tša go re šireletša moyeng!

¹¹ Nywageng ya morago bjale, go na le mehuta e mengwe ya Diwepesaete yeo e tumilego kudu—e lego yeo e ka holago ge e ba e dirišwa ka šedi e kgolo. Eupša Diwepesaete tše, tšeo di tsebjago e le Diwepesaete tša go dira bagwera ka Inthanete, di ka baka tshenyo e kgolo kudu. Di ka dira gore motho a tlwaelane le bagwera ba babe. (1 Bakor. 15:33) Ka gona, ga go makatše ge mokgatlo wa Modimo o ntšhitše ditemošo tše di kwagalago mabapi le go dirišwa ga Diwepesaete tše bjalo. Na o badile dihlogo ka moka tša morago bjale tšeo di gatišitšwego ke mohlanka yo a botegago tša mabapi le go diriša Diwepesaete tša go dira bagwera ka Inthanete? Ruri e ka se be gabohlale gore motho a diriše Diwepesaete tšeo ntle le gore a bale dihlogo tšeo! * Seo se tla swana le go nwa sehlare se bogale ntle le go bala ditemošo tšeo di kgomareditšwego lepotlelong la sona.

12. Ke ka baka la’ng e le bošilo go hlokomologa ditemošo?

¹² Bao ba hlokomologago ditemošo tšeo di ntšhwago ke mohlanka yo a botegago ba ipakela dikgobalo gotee le go gobatša baratiwa ba bona. Ba bangwe ba lemaletše go bogela diswantšho tše di kgothaletšago bootswa goba ba ile ba itshwara ka tsela e gobogilego gomme ba iphora ka go ipotša gore Jehofa a ka se bone seo ba se dirago. Ruri ke bošilo go nagana gore re ka utela Jehofa boitshwaro bja rena! (Die. 15:3; bala Baheberu 4:13.) Modimo o nyaka go thuša batho ba bjalo ka go tutueletša baemedi ba gagwe mo lefaseng gore ba leke go ba thuša. (Bagal. 6:1) Lega go le bjalo, go fo swana le ge mebušo ya batho e ka amoga motho tshwanelo ya go ba moagi wa naga ge e ba a dira dilo tše itšego tše mpe, bao ba tshelago ditekanyetšo tša Jehofa gomme ba sa itshole, yena o tla ba amoga tshwanelo ya go ba baagi ba Mmušong. * (1 Bakor. 5:11-13) Eupša Modimo o na le kgaugelo. Bao ba itsholago ke moka ba fetoša tsela ya bona ya boitshwaro ba ka boela  ba ba le boemo bjo bobotse le Jehofa gomme ba tšwela pele e le baagi ba Mmušong. (2 Bakor. 2:5-8) E tloga e le tokelo e kgolo gakaakang go hlankela Kgoši e bjalo e nago le lerato!

BAAGI BA MMUŠONG BA TŠEELA THUTO GODIMO

13. Baagi ba Mmušong ba bontšha bjang gore ba tšeela thuto godimo?

¹³ Mebušo ya dinaga tše dintši e šoma ka thata go ruta baagi ba yona. Mebušo yeo e rulaganya dikolo tšeo di rutago batho go bala le go ngwala gotee le go ba thuša go dira mešomo e mengwe e holago. Baagi ba Mmušong ba leboga dikolo tše bjalo gomme ba šoma ka thata go ithuta go bala le go ngwala ke moka ba kgona go itlhokomela ka tša ditšhelete. Thuto yeo ba e tšeelago godimo le go feta ke yeo e ba thušago go ba baagi ba Mmušong wa Modimo. Jehofa o ruta batho a diriša phuthego ya Bokriste. Batswadi ba kgothaletšwa go bala le ba bona. Kgwedi le kgwedi, mohlanka yo a botegago o gatiša matlakala a mmalwa a dimakasine tša Morokami le Phafoga! tšeo di theilwego Beibeleng. Ge e ba o bala matlakala a sego kae letšatši le letšatši mo kgweding, gona o tla ba o sepedišana le mokero o bohlokwa wa thuto ya Mmušo wa Modimo.

14. (a) Ke tlwaetšo efe yeo re e amogelago? (b) Ke ditšhišinyo dife tša mantšiboa a Borapedi bja Lapa tšeo o thabetšego go di diriša?

¹⁴ Bekeng e nngwe le e nngwe, baagi ba Mmušong ba amogela tlwaetšo dibokeng tša diphuthego tša gabo bona. Ka mohlala, Sekolo sa Bodiredi sa Pušo ya Modimo se na le nywaga ya ka godimo ga e 60 se thuša barutwana ba sona gore e be barutiši ba atlegago ba Lentšu la Modimo. Na o ngwadišitšwe sekolong se? Nywageng ya morago bjale, mohlanka yo a botegago o kgothaleditše kudu gore go be le mantšiboa a Borapedi bja Lapa beke le beke. Thulaganyo ye e matlafatša malapa. Na o kgonne go diriša ditšhišinyo tšeo di gatišitšwego dikgatišong tša rena? *

15. E nngwe ya ditokelo tše kgolo yeo re nago le yona ke efe?

¹⁵ Baagi ba mebušo ya dinaga tše dingwe ba thekga phatlalatša mekgatlo ya bona ya dipolitiki, gaešita le go ya ka ntlo le ntlo go dira seo. Baagi ba Mmušong ba dira mo gontši go thekga Mmušo wa Modimo ka phišego ka go dira seo ditarateng le ka ntlo le ntlo. Ge e le gabotse, go etša ge go boletšwe sehlogong se se fetilego seo re ithutilego sona, Morokami, e lego woo o tsebatšago Mmušo wa Jehofa, ga bjale ke makasine woo o phatlalatšwago ka bontši go feta makasine le ge e le ofe mo lefaseng! E nngwe ya ditokelo tše kgolo yeo re nago le yona ke ya go botša ba bangwe ka Mmušo wa Modimo. Na o tšea karolo ka phišego modirong wa boboledi?—Mat. 28:19, 20.

16. O ka bontšha bjang gore o moagi yo mobotse wa Mmušong wa Modimo?

¹⁶ Go se go ye kae Mmušo wa Modimo e tla ba e le wona mmušo o nnoši woo o bušago lefase. O tla okamela ditiragalo ka moka tša letšatši le letšatši, tša leago gotee le tša moya. Na o tla ba moagi yo mobotse wa Mmušong wa Modimo ka nako yeo? Ga bjale ke nako ya go bontšha gore o tla ba moagi yo bjalo. Diphethong tša gago ka moka tšeo o di dirago letšatši le letšatši, dira dilo tšohle go tagafatša Jehofa gomme o hlatsele gore o tšwela pele o le moagi yo mobotse wa Mmušong wa Modimo.—1 Bakor. 10:31.

[Mengwalo ya tlase]

[Dipotšišo tša Thuto]

[Ntlhakgolo go letlakala 14]

Na o ela hloko ditemošo tše di theilwego Beibeleng mabapi le dikotsi tša Inthanete?

[Seswantšho go letlakala 12]

Ka go swana le barwa ba Kora, na o thabišwa ke borapedi bjo bo sekilego le histori ya bjona?

[Seswantšho go letlakala 15]

Mantšiboa a Borapedi bja Lapa la gago a ka dira gore wena le baratiwa ba gago le be baagi ba babotse ba Mmušong