Lwantšhang Melaba ya Sathane Gomme le e Pheme!

‘Lwantšhang ditiro tša bohwirihwiri tša Diabolo le tiile.’—BAEF. 6:11.

O BE O TLA ARABA BJANG?

Mohlanka wa Jehofa a ka phema bjang go tanywa molabeng wa go rata dilo tše di bonagalago?

Mokriste yo a lego lenyalong a ka thušwa ke eng gore a se wele molabeng wa go dira bohlotlolo?

Ke ka baka la’ng o nagana gore go a hola go lwantšha go rata dilo tše di bonagalago le boitshwaro bjo bo gobogilego bja tša botona le botshadi?

1, 2. (a) Ke ka baka la’ng Sathane a sa hlomogele batlotšwa le “dinku tše dingwe” pelo? (b) Re tlo ahlaahla melaba efe ya Sathane sehlogong se?

SATHANE DIABOLO ga a hlomogele batho pelo, kudukudu bao ba hlankelago Jehofa. Ge e le gabotse, Sathane o lwa le mašaledi a batlotšwa. (Kut. 12:17) Batlotšwa bao ba eteletše pele modirong wa go bolela ka Mmušo ka sebete le gona ba pepentšhitše Sathane e le mmuši wa lefase le. Le gona Diabolo ga a rate “dinku tše dingwe” tšeo di thekgago batlotšwa le tšeo di nago le kholofelo ya go phela ka mo go sa felego, e lego kholofelo yeo Sathane a se sa hlwago a na le yona. (Joh. 10:16) Ga go makatše ge a galefile gakaakaa! Sathane ke lenaba la rena, go sa šetšwe gore re na le kholofelo ya go phela legodimong goba mo lefaseng. Pakane ya gagwe ke go re hlasela.—1 Pet. 5:8.

² E le gore a fihlelele pakane yeo, Sathane o theile melaba goba mereo e fapafapanego. Ka ge ‘a foufaditše menagano’ ya ba ba sa dumelego, ga ba amogele ditaba tše dibotse e bile ga ba kgone go bona melaba yeo. Lega go le bjalo, Diabolo o tanya le ba bangwe bao ba amogetšego molaetša wa Mmušo. (2 Bakor. 4:3, 4) Sehlogo se fetilego se bontšhitše kamoo re ka phemago melaba e meraro ya Sathane: (1) go bolela ka go se šetše, (2) poifo le kgateletšo ya dithaka gotee le (3) go ikwa o le molato ka mo go feteletšego. Ga bjale anke re ahlaahleng tsela yeo re ka lwantšhago melaba goba mereo e mengwe e mebedi ya Sathane re tiile—go rata dilo tše di bonagalago le teko ya go dira bohlotlolo.

GO RATA DILO TŠE DI BONAGALAGO—MOLABA WOO O KGAMAGO

3, 4. Dipelaelo tša lefase le di ka dira bjang gore motho a rate dilo tše di bonagalago?

³ Seswantšhong se sengwe sa gagwe, Jesu o ile a bolela ka peu yeo e bjetšwego meetlweng. O bontšhitše gore motho a ka kwa lentšu, “eupša dipelaelo tša lefase le gotee le  matla a forago a mahumo a bipa lentšu gomme a ba yo a sa enywego.” (Mat. 13:22) Ee, go rata dilo tše di bonagalago ke o mongwe wa melaba yeo e dirišwago ke lenaba la rena Sathane.

⁴ Go na le dilo tše pedi tšeo di bipago lentšu. E nngwe ke “dipelaelo tša lefase le.” ‘Dinakong tše tšeo di hlobaetšago tšeo go lego thata go lebeletšana le tšona,’ go na le dilo tše dintši tšeo di ka dirago gore re belaele. (2 Tim. 3:1) O ka hwetša go le thata gore o iphediše ka baka la go phagama ga ditheko le go hlokega ga mešomo. Le gona o ka ba o tshwenyegile ka bokamoso e bile o ipotšiša gore: ‘Na ke tla ba le tšhelete e lekanego ka morago ga go rola modiro?’ Ka baka la pelaelo e bjalo, ba bangwe ba ile ba phegelela mahumo, ba nagana gore tšhelete e tla ba nea tšhireletšo yeo ba e nyakago.

5. ‘Matla a mahumo’ a ka fora ka tsela efe?

⁵ Jesu o boletše ka selo se sengwe gape, e lego “matla a forago a mahumo.” Selo seo gotee le dipelaelo tša lefase di ka bipa lentšu. Beibele e bolela gore ‘tšhelete e a šireletša.’ (Mmo. 7:12) Lega go le bjalo, ga se gabohlale go phegelela mahumo. Batho ba bantši ba ile ba hwetša gore ge ba leka ka matla go huma, ke moo ba tanywago ke molaba wa go rata dilo tše di bonagalago. Ba bangwe ba ile ba feleletša e le makgoba a mahumo.—Mat. 6:24.

6, 7. (a) Ke ka tsela efe go rata dilo tše di bonagalago go ka bago kotsi mošomong wa motho wa boiphedišo? (b) Ke dilo dife tšeo Mokriste a swanetšego go di ela hloko ge a kgopelwa go šoma diiri tše oketšegilego?

⁶ Motho a ka thoma go ba le kganyogo ya mahumo a sa lemoge. Ka mohlala, ela hloko boemo bjo. Mothwadi wa gago o tla go wena gomme o re: “Ke go swaretše ditaba tše dibotse! Khamphani ye e hweditše konteraka e kgolo. Se se tla ra gore re šome diiri tše oketšegilego kgafetšakgafetša dikgweding tše mmalwa tše di latelago. Eupša ke go botša gore o ka se itshole ka gobane mogolo woo o tla o hwetšago o tla ba o bonagala.” O be o tla arabela bjang go se? Ke therešo gore go hlokomela lapa la gago ka dilo tša nama ke boikarabelo bjo bogolo, eupša ga se bjona feela bjo o nago le bjona. (1 Tim. 5:8) Go na le dilo tše dingwe gape tše mmalwa tšeo o swanetšego go di naganela. O tla šoma diiri tše oketšegilego ka nako e kaaka’ng? Na mošomo wa gago wa boiphedišo o tla šitiša mediro ya gago ya moya, go akaretša diboka tša phuthego le mantšiboa a Borapedi bja Lapa?

⁷ Ge o dira phetho tabeng ye, ke selo sefe seo o tlago go se lebelela e le sa bohlokwa kudu? Na ke tsela yeo go šoma diiri tše oketšegilego go tlago go kgoma akhaonto ya gago ya panka goba tsela yeo e ka kgomago bomoya bja gago? Na kganyogo ya go hwetša tšhelete e oketšegilego e ka go thibela go etiša dikgahlego tša Mmušo pele bophelong bja gago? Na o bona kamoo go rata dilo tše di bonagalago go ka go kgomago ge e ba o be o ka hlokomologa bomoya bja gago le bja lapa la gago? Ge e ba seo se go diragalela gona bjale, o ka ema bjang o tiile e le gore o pheme go kgangwa ke  go rata dilo tše di bonagalago?—Bala 1 Timotheo 6:9, 10.

8. Ke mehlala efe e tšwago Mangwalong yeo e ka re thušago go lekola tsela yeo re phelago ka yona?

⁸ E le gore o pheme go kgangwa ke go rata dilo tše di bonagalago, o swanetše go dula o lekola tsela yeo o phelago ka yona. Le ka mohla o se nyake go swana le Esau, yo a ilego a bontšha ka ditiro tša gagwe gore o nyatša dilo tša moya! (Gen. 25:34; Baheb. 12:16) Le gona o se ke wa swana le lesogana la mohumi leo le ilego la kgopelwa gore le rekiše dilo tša lona, le nee badiidi ke moka le latele Jesu. Go e na le gore le dire seo, le ile “la tloga le kwele bohloko, gobane le be le na le dilo tše dintši.” (Mat. 19:21, 22) Ka ge le be le tantšwe ke mahumo ao le bego le na le ona, le ile la lahlegelwa ke tokelo e kgolo—ya go latela motho yo a phagamego kudu yo a kilego a phela! Hlokomela gore o se lahlegelwe ke tokelo ya go ba morutiwa wa Jesu Kriste.

9, 10. O nagana gore pono ya Mangwalo ke efe ka dilo tše di bonagalago?

⁹ E le gore re se tshwenyege kudu ka dilo tše di bonagalago, re swanetše go kwa keletšo ya Jesu e rego: “Le ka mohla le se ke la belaela la re: ‘Re tla ja’ng, ra nwa’ng goba ra apara’ng?’ Gobane tše ka moka ke dilo tše ditšhaba di di phegelelago ka phišego. Tatago lena wa legodimong o a tseba gore dilo tše ka moka le a di nyaka.”—Mat. 6:31, 32; Luka 21:34, 35.

¹⁰ Ge e ba re sa nyake go tanywa molabeng o forago wa mahumo, re swanetše go ba le pono ya mongwadi wa Beibele, e lego Aguri, yo a boletšego gore: “O se nnee bodiidi goba mahumo. Anke ke je dijo tšeo di ntekanego.” (Die. 30:8) Go molaleng gore Aguri o be a lemoga gore tšhelete e a nyakega gore motho a phele, e bile o be a kwešiša gore matla a forago a mahumo a ka aroša motho. Re swanetše go lemoga gore dipelaelo tša lefase le le matla a forago a mahumo di ka ba le mafelelo a sa kgahlišego tswalanong ya rena le Modimo. Go tshwenyega kudu ka dilo tše di bonagalago go ka senya nako ya gago, gwa fetša matla a gago le kganyogo ya gago ya gore o phegelele dikgahlego tša Mmušo. Ka gona, ikemišetše gore o se tanywe molabeng wa Sathane wa go rata dilo tše di bonagalago!—Bala Baheberu 13:5.

BOHLOTLOLO—MOLETE WOO O UTILWEGO KA BOHLALE

11, 12. Mokriste a ka wela bjang molabeng wa go dira bohlotlolo mošomong wa boiphedišo?

¹¹ Batsomi bao ba nyakago go tanya phoofolo e matla ba ka dira seo ka go epa molete tsejaneng yeo phoofolo gantši e sepelago go yona. Gantši molete woo o khupetšwa ganyenyane ka dikotana le mobu. Molaba wa mohuta wo ke o mongwe wa diteko tše di atlegago kudu tša Sathane. Teko yeo ke sebe sa boitshwaro bjo bo gobogilego. (Die. 22:14; 23:27) Bakriste ba bantši ba ile ba wela moleteng woo ka go itumelela gore ba be maemong ao go lego bonolo kudu gore ba dire bohlotlolo. Bakriste ba bangwe bao ba lego lenyalong ba ile ba feleletša ba dirile bohlotlolo ka morago ga ge ba hlagoletše ditswalano tša lerato le batho bao ba sa nyalanago le bona.

¹² Mošomong wa gago wa boiphedišo go ka direga gore o hlagolele tswalano ya lerato le motho yo o sa nyalanago le yena. Ge e le gabotse, nyakišišo e nngwe yeo e dirilwego e utolotše gore palo e fetago seripagare ya basadi bao ba ilego ba dira bohlotlolo, ba bo dirile le mošomigotee le bona; le gona mo e ka bago banna ba bararo go ba bane bao ba dirilego bohlotlolo, le bona ba bo dirile le mošomigotee le bona. Na o gapeletšega gore o šome le batho ba bong bjo bo fapanego le bja gago mošomong wa boiphedišo? Ge e ba go le bjalo, ke tswalano ya mohuta mang yeo o nago le yona le bona? Na o beile mellwane tswalanong ya gago le bona gore e felele ditabeng tša mošomo gomme ga o dumelele gore tswalano yeo e fete mellwane yeo? Ka mohlala, ge e ba kgaetšedi wa Mokriste a ka tlwaela go swara mehlamu le monna yo e lego mošomigotee le yena, a ka feleletša ka go tšhollela monna yoo sa mafahleng a gagwe le go mmotša mathata a gagwe a lenyalo. Boemong bjo bongwe, ka morago ga gore monna wa Mokriste a feleletše  a gwerane le mošomigotee le yena wa mosadi, a ka bolela gore: “Mosadi yo o tšeela dikgopolo tša ka godimo le gona o a ntheetša ge ke bolela le yena. E bile o a nkwešiša. Ke duma eka mosadi wa ka nkabe a ntshwara ka tsela ye!” Na o bona kamoo Bakriste bao ba lego maemong a bjalo ba ka ipeago kotsing ya gore ba dire bohlotlolo?

13. Ka phuthegong, motho a ka hlagolela bjang tswalano ya lerato le motho yo a sa nyalanago le yena?

¹³ Ka phuthegong, go ka direga gore motho a be le tswalano ya lerato le motho yo a sa nyalanago le yena. Ela hloko seo se ilego sa direga e le ka kgonthe. Daniel le mosadi wa gagwe Sarah * e be e le babulamadibogo ba ka mehla. E bile Daniel o bolela gore e be e le “mogolo wa madumelatšohle.” O be a amogela kabelo e nngwe le e nngwe ka mafolofolo. Daniel o be a swara dithuto tše hlano tša Beibele le masogana a mangwe—a mararo a ona a ile a kolobetšwa. Bana ba babo rena ba bararo bao ba sa tšwago go kolobetšwa ba be ba nyaka thušo e kgolo. Ge Daniel a be a swaregile ka dikabelo tša gagwe tše di fapafapanego tša phuthego, Sarah o be a fela a ba nea thušo yeo. Go se go ye kae, go ile gwa direga se latelago: Barutwana ba Daniel ba Beibele ba be ba nyaka go thekgwa maikwelong, gomme ba ile ba hwetša thekgo yeo go Sarah. Sarah o be a tloga a nyaka tlhokomelo gomme o ile a e hwetša go barutwana bao ba Beibele ba Daniel. Molaba o kotsi o be o theilwe. Daniel o re: “Go ikgafa ga mosadi wa ka ka dikgwedi tše ntši go dirile gore a lape moyeng le maikwelong. Taba ye, go akaretša le ya gore ke be ke mo hlokomologile, e ile ya lebiša kotsing. Mosadi wa ka o ile a dira bohlotlolo le yo mongwe yo e kilego ya ba morutwana wa ka. Sarah o ile a thoma go fokola moyeng pele ga mahlo a ka, eupša ke ile ka se lemoge seo ka ge ke be ke tshwenyegile kudu ka ditokelo tša ka.” O ka phema bjang kotsi e bjalo?

14, 15. Bakriste bao ba lego lenyalong ba ka thušwa ke dilo dife gore ba pheme molaba wa bohlotlolo?

¹⁴ E le gore re pheme molaba wa bohlotlolo, re dira gabotse ge re naganišiša ka seo se bolelwago ke tlemo ya lenyalo. Jesu o itše: “Se Modimo a se tlemagantšego jokong go se be le motho yo a se aroganyago.” (Mat. 19:6) Le ka mohla o se ke wa nagana gore ditokelo tša gago ka phuthegong di bohlokwa kudu go feta molekane wa gago. Go feta moo, hlokomela gore go dula o fetša nako o se na molekane wa gago ka baka la mediro yeo e sego ya bohlokwa, go ka bontšha gore lenyalo la gago le a fokola e bile go ka dira gore o wele tekong le sebeng se segolo.

¹⁵ Lega go le bjalo, ge e ba o le mogolo, go thwe’ng ka mohlape woo o swanetšego go o hlokomela? Moapostola Petro o ngwadile gore: “Dišang mohlape wa Modimo woo le o hlokometšego, e sego ka go gapeletšwa, eupša e be ka go rata; le gona e se be ka go rata leruo la go se botege, eupša e be ka go fišega.” (1 Pet. 5:2) Ke therešo gore ga se wa swanela go hlokomologa ditho tša phuthego. Lega go le bjalo, ga se wa swanela go hlokomela phuthego mola ka lehlakoreng le lengwe o hlokomologile mosadi wa gago. E tla ba mo go sa kwagalego—gaešita le go ba kotsi—gore o fetše nako e ntši o fepa phuthego mola mosadi wa gago a ikwa a bolawa ke tlala moyeng. Daniel o re: “Le ka mohla o se ke wa swarega kudu ka ditokelo tša gago ka phuthegong gomme wa hlokomologa lapa la gago.”

16, 17. (a) Ke megato efe e holago yeo Bakriste bao ba lego lenyalong ba ka e gatago ge ba le mošomong wa boiphedišo go bontšha gore ga ba nyake go ratana le motho yo mongwe? (b) Nea mohlala wo o gatišitšwego woo o ka thušago Bakriste go phema bohlotlolo.

¹⁶ Go na le keletšo e ntši e botse yeo e tšweletšego matlakaleng a Morokami le Phafoga! bakeng sa go thuša Bakriste bao ba lego lenyalong gore ba pheme go wela molabeng wa bohlotlolo. Ka mohlala, Morokami wa September 15, 2006, o neile keletšo e latelago: “Mošomong le lefelong le lengwe, phafogela maemo ao a ka dirago gore o tlwaelane kudu le batho ba bong bjo bo sa swanego le bja gago. Ka mohlala, go fetša diiri tše di oketšegilego o šoma le motho yo mongwe wa bong bjo bo fapanego  le bja gago go ka lebiša tekong. O le monna yo a nyetšego goba mosadi yo a nyetšwego, o swanetše go tiiša ka ganong le go bontšha ka boitshwaro gore ga o nyake go tsenela tswalano e bjalo ya lerato ka ge o [na] le molekane wa gago. Bjalo ka motho yo a dulago a kgomaretše boineelo bja gagwe go Modimo, ruri o ka se rate go dira gore motho a be le kgahlego e sa nyakegego go wena ka go bapala ka lerato goba ka go se apare goba go itokiša gabotse. . . . Go bea dinepe tša molekane wa gago le tša bana ba gago mo o šomelago gona e tla ba kgopotšo go wena le ba bangwe gore go na le dilo tšeo o di lebelelago e le tša bohlokwa. Ikemišetše gore o se ke wa kgothaletša—goba gaešita le go kgotlelela—dikgoketšo tša lerato tša motho yo mongwe.”

¹⁷ Sehlogo seo se lego ka go Phafoga! ya July-September 2009 se rego: “Go Dula o Botega Lenyalong—Ge e le Gabotse go Bolela’ng?” se ile sa lemoša ka go ba le dikakanyo tša dikopano tša botona le botshadi le motho yo mongwe yo e sego molekane wa gago wa lenyalo. Sehlogo seo se bontšhitše gore go ba le dikakanyo tša dikopano tša botona le botshadi go tla oketša kgonagalo ya gore o dire bohlotlolo. (Jak. 1:14, 15) Ge e ba o le lenyalong, ke mo gobotse gore wena le molekane wa gago le ahlaahle tsebišo e bjalo nako le nako le le gotee. Lenyalo ke thulaganyo e kgethwa le yeo e thomilwego ke Jehofa ka boyena. Go beela ka thoko nako ya go boledišana le molekane wa gago ka lenyalo la lena ke tsela e botse ya go bontšha gore o tšeela godimo dilo tše kgethwa.—Gen. 2:21-24.

18, 19. (a) Ditlamorago tša go dira bohlotlolo ke dife? (b) Go botega lenyalong go hola ka eng?

¹⁸ Ge e ba o ka ikhwetša o lekega gore o be le tswalano e sa swanelago le motho yo o sa nyalanago le yena, naganišiša ka ditlamorago tša bootswa le bohlotlolo. (Die. 7:22, 23; Bagal. 6:7) Bao ba itshwarago ka tsela e gobogilego ba nyamiša Jehofa e bile ba a ikgobatša le go gobatša balekane ba bona. (Bala Maleaki 2:13, 14.) Ka lehlakoreng le lengwe, naganišiša ka mehola yeo e tlelago bao ba kgomarelago boitshwaro bjo bo hlwekilego. Ga se feela gore ba holofela go phela ka mo go sa felego eupša gape ba thabela bophelo bjo bokaonekaone gona bjale, go akaretša go ba le letswalo le le hlwekilego.—Bala Diema 3:1, 2.

¹⁹ Mopsalme o opetše ka gore: “Bao ba ratago molao wa gago [Modimo] ba atetšwe ke khutšo, ga ba na tšhitišo.” (Ps. 119:165) Ka gona, ratang therešo gomme le ‘dule le phakgametše gore kamoo le sepelago ka gona ga se bjalo ka batho ba ba sa hlalefago eupša ke bjalo ka ba bohlale’ mehleng ye e mebe. (Baef. 5:15, 16) Ditsela tšeo re sepelago ka tšona di tletše ka melaba yeo e theilwego ke Sathane e le gore a tanye barapedi ba therešo. Eupša re hlametšwe gore re itšhireletše. Jehofa o re neile seo re se hlokago e le gore re ‘lwantšhe’ le “go tima mesebe ka moka e tukago ya yo kgopo”!—Baef. 6:11, 16.

[Mongwalo wa tlase]

[Dipotšišo tša Thuto]

[Seswantšho go letlakala 26]

Go rata dilo tše di bonagalago go ka kgama motho moyeng. O se ke wa dumelela seo se go diragalela

[Seswantšho go letlakala 29]

Go bapala ka lerato goba go thabela tiro e bjalo—go ka lebiša bohlotlolong