Na o a Gopola?
Na o a Gopola?
Na o thabetše go bala ditokollo tša morago bjale tša Morokami? Bona ge e ba o ka kgona go araba dipotšišo tše di latelago:
Na Simisone o be a hwetša matla moriring wa gagwe?
Matla a Simisone a be a sa tšwe moriring wa gagwe ka bowona. Moriri wa gagwe o be o emela tswalano e kgethegilego yeo a bego a na le yona le Modimo ka ge e be e le Monasari. Tswalano yeo e ile ya šitišwa ge Delila a dira gore Simisone a beolwe hlogo.—4/15, letlakala 9.
Ge re bapetša le pelo ya rena ya kgonthe, ke dilo dife tše tharo tše bohlokwa tšeo di ka holago pelo ya rena ya seswantšhetšo?
(1) Phepo. Go swana le ge dipelo tša rena tša kgonthe di nyaka dijo tšeo di nago le phepo, le rena re swanetše go kgonthišetša gore re hwetša tekanyo e nyakegago ya dijo tša moya. (2) Go itlwaetša. Go tšea karolo ka phišego bodireding go boloka dipelo tša rena tša seswantšhetšo di phetše gabotse. (3) Tikologo. Re ka fokotša kgateletšego ka go kopana le badumedigotee le rena ka gobane ba tshwenyegile ka rena.—4/15, letlakala 16.
Ka morago ga ge molekane yo mongwe a se a botega lenyalong, banyalani ba ka tsošološa bjang go botana ga bona?
Ba swanetše go (1) botšana therešo; (2) ba šome mmogo; (3) ba dire gore mekgwa ya kgale e tšeelwe legato ke e mefsa; gomme (4) ba lemoge gore ke nako ya gore ba tlogele go boloka sekgopi ka go rarolla bothata bjoo ba nago le bjona.—5/1, matlakala 12-15
Ke ka baka la’ng yo a neago polelo ya poloko a se a swanela go šomiša Psalme 116:15 go šupa go mohu?
Temana ye e re: “Lehu la batho ba Jehofa bao ba mmotegelago le bohlokwa mahlong a gagwe.” Se se bolela gore Modimo a ka se dumelele gore bohle bao ba mmotegelago ba hwe ka gobane o ba lebelela e le ba bohlokwa. A ka se dumelele gore bahlanka ba gagwe e le sehlopha ba fedišwe lefaseng.—5/15, letlakala 22.
Babapatši ba dipuku tša bodumedi e be e le bomang?
Pele ga ngwaga wa 1931, lentšu “babapatši ba dipuku tša bodumedi” le be le šomišwa go bao lehono ba bitšwago babulamadibogo.—5/15, letlakala 31.
Ke dilo dife tšeo di bontšhago gore Beibele ga e fo ba e nngwe ya dipuku tše ngwadilwego ke batho?
Beibele e na le diporofeto tše dintši tšeo di šetšego di phethagetše. E bolela ka histori ya kgonthe, e sego nonwane. E dumelelana le dithuto tša therešo tša thutamahlale, gomme dipuku tša yona ga di thulane. E a hola lehono.—6/1, matlakala 4-8.
Ke bomang bao ba bopago “mebušo ye ka moka” yeo go bolelwago ka yona go Daniele 2:44?
Mo go bolelwa ka mebušo yeo e swantšhetšwago ke dikarolo tše fapafapanego tša seswantšho seo se hlalositšwego ke Daniele.—6/15, letlakala 17.
Mmušo wa Lefase wa Maisemane le Maamerika o bile neng mmušo wa lefase wa bošupa wa boporofeta bja Beibele?
Mmušo wo wa lefase wa mohlakanelwa o thomile ge Brithania le United States di gata mogato di le gotee ka tsela e kgethegilego Ntweng ya I ya Lefase.—6/15, letlakala 19.
Modimo o lebalela bjang le go lebala dibe tša bao ba itsholago?
Jehofa o bolela ka bao a ba ratago gore: “Nka se sa gopola sebe sa bona.” (Jer. 31:34) O lebalela dibe motheong wa topollo. Ge a dira bjalo, Modimo o lebala dibe tša bona ka kgopolo ya gore a ka se di šomišetše go ba otla gape.—7/1, letlakala 18.
Ke ka baka la eng re ka dumela mehlolo yeo e begilwego ka Beibeleng?
Gantši e be e direlwa mafelong a batho bohle, e sego ka sephiring. E be e sa raragana e bile go se na didirišwa tše kgethegilego. E be e direlwa go tagafatša Modimo, e sego batho. Go be go dirwa mehlolo e fapafapanego kudu, gomme baganetši ba mehleng yeo ga se ba ka ba ganetša gore e ile ya direga. Mabaka a ke ona a dirago gore re kgolwe pego ya Beibele ya mehlolo.—8/1, matlakala 7-8.
