Phakgamelang Melaba ya Diabolo!

“Phonyokga molabeng wa Diabolo.”—2 TIM. 2:26.

O BE O TLA ARABA BJANG?

Ke boitlhahlobo bofe bjo bo nyakegago ge e ba o tlwaetše go swayaswaya ba bangwe diphošo?

Go tšwa mehlaleng ya Pilato le Petro, re ka ithuta’ng mabapi le go se ineele poifong le kgateletšong ya dithaka?

O ka phema bjang molaba wa go ikwa o le molato ka mo go feteletšego?

1, 2. Ke melaba efe ya Diabolo yeo re tlago go e ahlaahla sehlogong se?

DIABOLO o lalela bahlanka ba Jehofa. Pakane ya gagwe ga se go ba fediša go etša ge motsomi a bolaya phoofolo yeo a e tantšego. Go e na le moo, pakane ya gagwe ke go swara batho ba sa phela le go ba šomiša go ya kamoo a ratago ka gona.—Bala 2 Timotheo 2:24-26.

² Motsomi a ka diriša molaba o itšego gore a sware phoofolo e phela. A ka leka go ntšha phoofolo yeo moo e utamego gore a kgone go e swara ka segole. Goba a ka diriša molaba o utegilego woo o nago le segoketši gore a sware phoofolo yeo e se ya letela. Diabolo o diriša melaba e swanago le yeo e le gore a sware bahlanka ba Modimo ba phela. Ge e ba re nyaka go phema go tanywa, gona re swanetše go phakgama le go lemoga maswao ao a laetšago gore re kgauswi le o mongwe wa melaba goba mereo ya Sathane. Sehlogo se se tla ahlaahla tsela yeo re ka itšhireletšago melabeng e meraro yeo Diabolo a ilego a e diriša ka katlego e kgolo. Melaba yeo ke (1) go bolela ka go se šetše, (2) poifo le kgateletšo ya dithaka le (3) go ikwa o le molato ka mo go feteletšego. Sehlogo se se latelago se tla ahlaahla melaba goba mereo e mengwe e mebedi ya Sathane.

TIMA MOLLO WA GO BOLELA KA GO SE ŠETŠE

3, 4. Go ka ba le mafelelo afe ge e ba re palelwa ke go laola maleme a rena? Nea mohlala.

³ Motsomi a ka fiša hlaga e le gore a ntšhe diphoofolo moo di utamego gomme a di swara ge di leka go tšhaba. Ka tsela ya seswantšhetšo, Diabolo o nyaka go fiša hlaga ka phuthegong ya Bokriste. Ge e ba a ka atlega, a ka ntšha ditho tša yona lefelong leo le le šireletšegilego gomme a dire gore di wele diatleng tša gagwe. Re ka dirišana bjang le Sathane tabeng ye re sa lemoge gomme a re tanya?

 ⁴ Morutiwa Jakobo o ile a swantšha leleme le mollo. (Bala Jakobo 3:6-8) Ge e ba re palelwa ke go laola maleme a rena, ka tsela ya seswantšhetšo, re ka thoma mollo wa hlaga ka phuthegong. Se se ka direga bjang? Ela hloko tiragalo e latelago: Sebokeng sa phuthego go dirwa tsebišo ya gore kgaetšedi yo a itšego o kgethilwe go ba mmulamadibogo wa ka mehla. Ka morago ga seboka seo, bagoeledi ba babedi ba boledišana ka tsebišo ye. Yo mongwe o thabile gomme o rata ge mmulamadibogo yo a sa tšwago go kgethwa a ka atlega. Mola yo mongwe a belaela maikemišetšo a mmulamadibogo yoo le go nagana gore o fo ba a nyaka botumo ka phuthegong. Ke mang gare ga bagoeledi ba ba babedi yo o ka ratago gore e be mogwera wa gago? Ga go thata go bona gore ke ofe yoo go bonagalago a nyaka go fiša hlaga ka phuthegong ka seo a se bolelago.

5. E ka ba mo gobotse go dira boitlhahlobo bofe e le gore re time mollo wa go bolela ka go se šetše?

⁵ Re ka tima bjang mollo wa go bolela ka go se šetše? Jesu o itše: “Molomo o bolela go tšwa go se se tletšego pelong.” (Mat. 12:34) Ka gona mogato wa mathomo ke go hlahloba seo se lego ka dipelong tša rena. Na re phema maikwelo a fošagetšego ao a gakatšago polelo yeo e sa agego? Ka mohlala, ge re ekwa gore ngwanabo rena o katanela go fihlelela ditokelo tše itšego tša tirelo, na re nagana gore maikemišetšo a gagwe e tloga e le a mabotse goba re belaela gore o dira seo ka baka la boithati? Ge e ba re tlwaetše go swayaswaya diphošo, ke mo gobotse go gopola gore Diabolo o ile a belaela maikemišetšo a mohlanka yo a botegago wa Modimo e lego Jobo. (Jobo 1:9-11) Go e na le go belaela ngwanabo rena, re tla ba re dira gabotse go ela hloko lebaka leo re mo swayaswayago diphošo. Na ruri re na le lebaka le lebotse la go dira seo? Goba na pelo ya rena e šilafaditšwe ke moya wa go hloka lerato woo o tlwaelegilego mehleng ye ya bofelo?—2 Tim. 3:1-4.

6, 7. (a) Ke mabaka afe a mangwe ao a ka dirago gore re swayeswaye ba bangwe diphošo? (b) Re swanetše go arabela bjang ge e ba re rogwa?

⁶ Ela hloko a mangwe a mabaka ao a ka dirago gore re swayeswaye ba bangwe diphošo. Le lengwe la mabaka e ka ba gore re nyaka batho ba bone seo rena re se fihleletšego. Ge e le gabotse, re ka ba re leka go phagamela ba bangwe ka gore re ba gatelele. Goba re ka ba re leka go lokafatša mafokodi a rena ao a re paledišago gore re gate megato ya maleba. Go sa šetšwe gore re tutuetšwa ke boikgogomošo, mona goba go se ikholofele, mafelelo e ka ba a kotsi.

⁷ Mohlomongwe re nagana gore ke mo swanetšego go bolela gampe ka motho yo mongwe. Go ka direga gore o ile a bolela gampe ka rena. Ge e ba boemo e le bjoo, go itefeletša ga go rarolle bothata. Go dira seo go fo ba go gakatša boemo bjoo e bile ke go dira dilo ka go dumelelana le thato ya Diabolo, e sego ya Modimo. (2 Tim. 2:26) E tla ba mo gobotse gore re ekiše Jesu tabeng ye. Ge a be a rogwa  gabohloko, “ga se a ka a ithogela.” Go e na le moo, o ile a “ikgafela yo a ahlolago ka go loka.” (1 Pet. 2:21-23) Jesu o be a kgodišegile gore Jehofa o tla laola ditaba ka tsela le nako ya Gagwe. Le rena re swanetše go bota Modimo ka tsela yeo. Ge re diriša polelo ya rena go aga ba bangwe, gona re thuša go boloka ‘setlemo se se tlemaganyago sa khutšo’ ka phuthegong ya gabo rena.—Bala Baefeso 4:1-3.

TŠHABA SEGOLE SA POIFO LE KGATELETŠO YA DITHAKA

8, 9. Ke’ng seo se dirilego gore Pilato a ahlolele Jesu lehu?

⁸ Phoofolo yeo e tantšwego ke molaba ga e kgone go laola mosepelo wa yona. Ka tsela e swanago, motho yo a ineelago poifong le kgateletšong ya dithaka ga a sa kgona go laola bophelo bja gagwe ka mo go feletšego. (Bala Diema 29:25) Anke re ele hloko mehlala e mebedi ya banna bao ba sa swanego bao ba ilego ba ineela kgateletšong ya dithaka le poifong gomme re bone seo re ka ithutago sona diphihlelong tša bona.

⁹ Mmuši wa Roma e lego Pontio Pilato o be a tseba gore Jesu ga a na molato e bile go bonagala a be a sa nyake go mo gobatša. Ge e le gabotse, Pilato o boletše gore Jesu ga se a ka a dira “selo seo se swanelwago ke lehu.” Lega go le bjalo, Pilato o ile a mo ahlolela lehu. Ka baka la’ng? Ka gobane Pilato o ile a ineela kgateletšong ya bahlolampherefere. (Luka 23:15, 21-25) Baganetši bao ba ile ba goeletša ba re: “Ge e ba o ka lokolla motho yo, gona ga o mogwera wa Kesara,” ka go re’alo ba mo gatelela e le gore ba hwetše seo ba se nyakago. (Joh. 19:12) Mohlomongwe Pilato o be a tšhaba gore o tla lahlegelwa ke maemo a gagwe—goba bophelo bja gagwe—ge e ba a ka ema le Kriste. Ka gona o ile a gokeletšwa go dira thato ya Diabolo.

10. Ke’ng seo se dirilego gore Petro a latole Jesu?

¹⁰ Moapostola Petro e be e le yo mongwe wa bagwera ba kgauswiuswi ba Jesu. O ile a bolela phatlalatša gore Jesu e be e le Mesia. (Mat. 16:16) Petro o ile a dula a botega ge barutiwa ba bangwe ba be ba sa kwešiše seo Jesu a se boletšego gomme ba Mo tlogela. (Joh. 6:66-69) Le gona ge manaba a be a golega Jesu, Petro o ile a diriša tšhoša gore a šireletše Mong wa gagwe. (Joh. 18:10, 11) Lega go le bjalo, ka morago ga moo Petro o ile a ineela poifong gomme a ba a latola gore o tseba Jesu Kriste. Ka nakwana, moapostola yoo o be a tantšwe molabeng wa go boifa batho gomme a o dumeletše go mo thibela go ba le sebete.—Mat. 26:74, 75.

11. Ke ditutuetšo dife tše di sa lokago tšeo re swanetšego go lwantšhana le tšona?

¹¹ Ka ge re le Bakriste, re swanetše go ganetša kgateletšo ya go dira dilo tšeo di sa kgahlišego Modimo. Bathwadi goba batho ba bangwe ba ka leka go re gapeletša gore re se botege goba ba ka re tutueletša go kopanela boitshwarong bjo bo gobogilego bja tša botona le botshadi. Barutwana ba sekolo ba ka swanelwa ke go lebeletšana le dithaka tšeo di lekago go ba gapeletša gore ba se botege ditlhahlobong, ba bogele diswantšho tše di kgothaletšago bootswa, ba kgoge, ba diriše dihlaretagi, ba diriše bjala gampe goba ba itshware gampe ka tša botona le botshadi. Ka gona re ka thušwa ke eng gore re efoge molaba wa poifo le kgateletšo ya dithaka tšeo di ka dirago gore re se kgahliše Jehofa?

12. Re ka ithuta dithuto dife go tšwa go Pilato le Petro?

¹² Anke re bone seo re ka ithutago sona go tšwa mehlaleng ya Pilato le Petro. Pilato o be a sa tsebe go gontši ka Kriste. Lega go le bjalo, o be a tseba gore Jesu ga a na molato le gore e be e se motho yo a tlwaelegilego. Eupša Pilato o be a se na boikokobetšo le lerato la go rata Modimo wa therešo. Diabolo o ile a mo tanya gabonolo a sa phela. Petro yena o be a na le tsebo e nepagetšego e bile a rata Modimo. Lega go le bjalo, ka dinako tše dingwe o ile a hloka boipoetšo, a ba le poifo gomme a ineela kgateletšong. Pejana ga go golegwa ga Jesu, Petro o ile a ikgantšha a re: “Gaešita le ge ba bangwe ka moka ba ka kgopša, nna nka se kgopše.” (Mar. 14:29) Moapostola yoo a ka be a ile a itokišeletša diteko tšeo di bego di letše ka pele ge nkabe a ile a gata megato ya mopsalme yo a  bego a holofetše Modimo gomme a opela a re: “Jehofa o ka lehlakoreng la ka; nka se boife. Motho wa lefaseng a ka ntira’ng?” (Ps. 118:6) Bošegong bja Gagwe bja mafelelo ge a le mo lefaseng, Jesu o ile a tšea Petro le baapostola ba bangwe ba babedi a ba iša garegare ga serapa sa Getsemane. Lega go le bjalo, go e na le gore Petro le bagwera ba gagwe ba dule ba phakgame, ba ile ba robala. Jesu o ile a ba tsoša gomme a re go bona: “Dulang le phakgame e bile le rapela, e le gore le se tsene molekong.” (Mar. 14:38) Eupša Petro o ile a robala gape ke moka ka moragonyana a ineela poifong le kgateletšong ya dithaka.

13. Re ka lwantšha bjang kgateletšo ya go dira selo se se fošagetšego?

¹³ Mehlala ya Pilato le Petro e ka re ruta thuto e nngwe gape e bohlokwa: Go atlega ga rena go ganetšeng kgateletšo ya dithaka go akaretša go ba le dilo tše bjalo ka tsebo e nepagetšego, boikokobetšo, boipoetšo, lerato la go rata Modimo le go boifa Jehofa, e sego batho. Ge e ba tumelo ya rena e theilwe tsebong e nepagetšego, re tla bolela ditumelo tša rena ka sebete le kgodišego. Se se tla re thuša go lwantšha kgateletšo ya dithaka le go fenya poifo ya go boifa batho. Therešo ke gore ga se ra swanela go ikholofela kudu. Eupša ka boikokobetšo re swanetše go lemoga gore re nyaka matla a Modimo e le gore re lwantšhe kgateletšo ya dithaka. Re swanetše go rapelela moya wa Jehofa le go dumelela lerato leo re mo ratago ka lona le re tutueletša go hlompha leina la gagwe le go kgomarela ditekanyetšo tša gagwe. Go oketša moo, re swanetše go itokišeletša go lebeletšana le teko ya kgateletšo ya dithaka pele ga ge e tšwelela. Ka mohlala, go itokišeletša e sa le pele gotee le go rapela go ka thuša bana ba rena go arabela gabotse ge dithaka tša bona di leka go ba gokeletša go dira selo se se fošagetšego.—2 Bakor. 13:7. *

PHEMA MOLABA WOO O WIŠAGO—GO IKWA O LE MOLATO KA MO GO FETELETŠEGO

14. Diabolo o nyaka gore re nagane eng mabapi le diphošo tša rena tša kgale?

¹⁴ Ka dinako tše dingwe molaba wa phoofolo o ka sebopego sa kota e boima goba leswika le legolo leo le lekelelago tseleng yeo gantši phoofolo e sepelago go yona. Phoofolo yeo e sa lemogego e ka gata thapo yeo e bofeletšwego koteng yeo goba leswikeng leo gomme seo sa dira gore leswika leo le wele godimo ga yona ke moka le e kgatle. Go ikwa o le molato ka mo go feteletšego go ka swantšhwa le morwalo o boima woo o re wišetšago fase. Ge re nagana ka diphošo tša kgale, re ka ikwa re “nyamile o šoro.” (Bala Psalme 38:3-5, 8) Sathane o nyaka gore re ipone eka ga re swanelwe ke kgaugelo ya Jehofa le gore re ka se kgone go fihlelela dinyakwa tša Gagwe.

15, 16. O ka phema bjang molaba wa go ikwa o le molato ka mo go feteletšego?

¹⁵ Re ka phema bjang molaba wo o wišago? Ge e ba o kile wa dira sebe se segolo, gata megato gona bjale e le gore o tsošološe segwera sa gago le Jehofa. Boledišana le bagolo gomme o kgopele thušo ya bona. (Jak. 5:14-16) Dira sohle seo se lego matleng a gago e le gore o lokiše phošo yeo. (2 Bakor. 7:11) Ge e ba o laiwa, o se ke wa nyama. Tayo ke bohlatse bjo bo lego molaleng bja gore Jehofa o a go rata. (Baheb. 12:6) Ikemišetše go se boeletše diphošo tšeo di dirilego gore o wele sebeng gomme o dire dilo go ya ka boikemišetšo bjoo. Ka morago ga gore o itshole le go sokologa, eba le tumelo sehlabelong sa topollo sa Jesu Kriste gore dibe tša gago di ka lebalelwa e le ruri.—1 Joh. 4:9, 14.

¹⁶ Batho ba bangwe ba dula ba ikwa ba na le molato wa dibe tšeo ge e le gabotse ba di lebaletšwego. Ge e ba seo e le sa therešo ka wena, gopola gore Jehofa o ile a lebalela Petro le baapostola ba bangwe ka morago ga gore ba tlogele Morwa wa Gagwe yo a rategago Jesu nakong ya ge a be a nyaka thekgo ya bona. Jehofa o ile a lebalela monna yo a bego a rakilwe phuthegong ya Korinthe ka baka la boitshwaro bjo bo šišimišago eupša yoo ka morago a  ilego a itshola. (1 Bakor. 5:1-5; 2 Bakor. 2:6-8) Lentšu la Modimo le bolela ka badiradibe ba bagolo bao ba ilego ba itshola gomme Modimo a ba lebalela.—2 Dikor. 33:2, 10-13; 1 Bakor. 6:9-11.

17. Topollo e ka re direla eng?

¹⁷ Jehofa o tla go lebalela diphošo tša gago tša nakong e fetilego e bile a ka se di gopole ge e ba o tloga o itshola gomme o tsoma kgaugelo ya gagwe. Le ka mohla o se ke wa nagana gore sehlabelo sa Jesu sa topollo se ka se kgone go bipa dibe tša gago. O tla ba o wela go o mongwe wa melaba ya Sathane ge o dira bjalo. Go sa šetšwe seo Diabolo a nyakago gore o se nagane, topollo e ka kgona go bipa dibe tša bohle bao ba wetšego sebeng gomme ba itshotše. (Die. 24:16) Go ba le tumelo topollong go ka go imolla morwalo woo o lego magetleng a gago wa go ikwa o le molato ka mo go feteletšego gomme go ka go nea matla a go hlankela Modimo ka pelo ya gago ka moka, monagano wa gago ka moka le ka moya wa gago ka moka.—Mat. 22:37.

RE TSEBA MAANO A SATHANE

18. Re ka phema bjang melaba ya Diabolo?

¹⁸ Sathane ga a na taba gore ke molaba ofe woo o re swarago, se segolo go yena ke ge a re tantše. Ka ge re tseba maano a Sathane Diabolo, re ka phema gore a re radie. (2 Bakor. 2:10, 11) Re ka se tanywe ke melaba goba mereo ya gagwe ge e ba re rapelela bohlale bja go lebeletšana le diteko tša rena. Jakobo o ngwadile gore: “Ge e ba mang le mang wa lena a hloka bohlale, a a tšwele pele a kgopela Modimo, gobane o fa bohle kudu ka ntle le go goboša; o tla bo newa.” (Jak. 1:5) Re swanetše go dira dilo ka go dumelelana le dithapelo tša rena le ka go ithuta ka mehla re le noši gomme re diriše seo se lego ka Lentšung la Modimo. Dikgatišo tše di theilwego Beibeleng tšeo di lokišeditšwego ke sehlopha sa mohlanka yo a botegago le wa temogo di re hlabišetša seetša melabeng yeo re e beelwago ke Diabolo e bile di re thuša go e phema.

19, 20. Ke ka baka la’ng re swanetše go hloya se sebe?

¹⁹ Go rapela le go ithuta Beibele go dira gore re rate se se lokilego. Eupša ka mo go swanago, go bohlokwa gore re hlagolele lehloyo la go hloya se sebe. (Ps. 97:10) Go naganišiša ka ditlamorago tša go phegelela dikganyogo tša boithati go ka re thuša gore re di pheme. (Jak. 1:14, 15) Ge re ithuta go hloya se sebe le go rata se se lokilego, digoketši tšeo Sathane a di beago melabeng ya gagwe di thoma go re šišimiša; ga di re leke.

²⁰ Re leboga gakaakang gore Modimo o re thuša gore re se ke ra radiiwa ke Sathane! Jehofa o re hlakodiša “go yo kgopo” ka moya wa Gagwe, Lentšu la gagwe le mokgatlo wa gagwe. (Mat. 6:13) Sehlogong se se latelago, re tla ithuta kamoo re ka phemago melaba e mengwe e mebedi yeo Diabolo a hweditšego e le e atlegago gore a tanye bahlanka ba Modimo ba phela.

[Mongwalo wa tlase]

[Dipotšišo tša Thuto]

[Seswantšho go letlakala 21]

Go bolela ka go se šetše go ka baka mathata ao a fišago hlaga ka phuthegong

[Seswantšho go letlakala 24]

O ka imologa morwalong wa go ikwa o le molato ka mo go feteletšego