Ka December 2009, Kgorokgolo ya Tsheko ya Russia e ile ya dumelelana le phetho ya gore go fedišwe mokgatlo wa bodumedi wa Dihlatse tša Jehofa kua Taganrog, Russia, o amogwe Holo ya Mmušo gomme go tsebatšwe gore dikgatišo tša rena tše 34 di kotsi kudu. Tiragalo ye e makatšago e ile ya phatlalatšwa Wepesaeteng ya Dihlatse tša Jehofa gotee le dinepe tša Dihlatse tša moo tšeo di bego di kgongwa ke phetho ye, go akaretša le dinepe tša bana ba banyenyane.

Dikgwedi tše sego kae ka morago, Lefelo la Taolo la Dihlatse tša Jehofa kua Russia le ile la hwetša lepokisana le lengwalo go tšwa go lapa la Dihlatse la Queensland, kua Australia, leo le bonego pego ya phetho ye e dirilwego ke kgoro. Lengwalo leo le be le re: “Bana babo rena ba rategago, bana ba rena e lego Cody le Larissa ba kgomilwe kudu ke tumelo le ditlhohlo tšeo bagwera ba bona ba lebeletšanego le tšona moo Russia. Ba ngwadile dikarata le mangwalo, gomme re dirile dimpho tše dinyenyane tšeo re ratago go di romela bana ba lego Taganrog, gore ba tsebe gore bana ba bangwe ba dulago kgole le bona bao ba hlankelago Jehofa ka potego ba tshwenyegile ka bona. Ba a ba dumediša e bile ba ba rata ka moka ga bona.”

Ge bana bao ba lego Taganrog ba hwetša dimpho tšeo, ba ile ba ngwalela lapa le lego Australia mangwalo a nago le diswantšho gore ba le leboge. Ka ge Hlatse yeo e hlankelago lekaleng la Russia e be e kgomilwe ke dikgothatšo tše tšwago ‘melomong ya bana,’ e ile ya ngwalela Cody le Larissa gore: “Go a nyamiša go bona batho ba godilego le bana ba otlwa ka baka la selo seo ba sa kago ba se dira. Ga go phošo yeo bana babo rena le dikgaetšedi ba Taganrog ba e dirilego, eupša ba amogilwe Holo ya bona ya Mmušo. Se se ba nyamišitše kudu. Ba tla kgothatšega ge ba ekwa gore motho yo mongwe go tšwa nageng e nngwe ya kgole o tshwenyegile ka bona. Re leboga ge le bontšhitše moya o borutho le wa go nea!”—Ps. 8:2.

Ruri re karolo ya borwarre bja lefase ka bophara, gomme lerato leo re ratanago ka lona le dira gore re kgone go kgotlelela ge re lebeletšane le diteko le mathata. Le ge dikgoro tša tsheko di ngangišana ka gore dikgatišo tša Dihlatse tša Jehofa di hlohleletša lehloyo, bana ba rena ba bontšhana lerato ka ditsela tše bonolo, gomme ka go dira bjalo ba tshela mellwane ya botšhaba le ya ditšo, e bile ba bontšha gabotse therešo ya mantšu a Jesu a rego: “Bohle ba tla tseba ka se gore le barutiwa ba ka, ge e ba le ratana.”—Joh. 13:35.