1. Seo Jehofa a se bolelago se fapana bjang le seo batho ba nago le sebe ba se bolelago?

JEHOFA ke “Modimo wa therešo.” (Ps. 31:5) Ga se ka mehla re ka botago batho ba nago le sebe, eupša ‘ga go kgonege gore Modimo a aketše.’ (Baheb. 6:18; bala Numeri 23:19.) Ka mehla seo a rerago go se direla batho gore ba holege se a phethagala. Ka mohlala, se sengwe le se sengwe seo Modimo a bego a boletše gore o tla se dira ge go thoma nako e nngwe le e nngwe ya ge a be a hlola dilo, se ile ‘sa ba bjalo.’ Ka baka leo, ge letšatši la botshelela la tlholo le fihla mafelelong, “Modimo [o ile] a lebelela se sengwe le se sengwe seo a se dirilego a bona e le se sebotse kudu.”—Gen. 1:6, 7, 30, 31.

2. Letšatši la Modimo la boikhutšo ke eng, gomme ke ka baka la’ng a ile a “le dira le lekgethwa”?

² Ka morago ga gore Jehofa Modimo a bolele gore mediro ya gagwe ya tlholo e be e le e mebotse kudu, o ile a tsebatša gore go be go thoma letšatši la bošupa—e sego la diiri tše 24, eupša e lego lebaka le letelele la nako leo ka lona a bego a khutša modirong wa go hlola dilo tše dingwe gape. (Gen. 2:2) Letšatši la Modimo la boikhutšo ga se la tšwa le fela. (Baheb. 4:9, 10) Beibele ga e re botše ka go lebanya gore le thomile neng. Le thomile neng neng ka morago ga go bopša ga mosadi wa Adama, e lego Efa, mo e ka bago nywaga e 6 000 e fetilego. Rena re emetše Pušo ya Jesu Kriste ya Nywaga e Sekete, e lego yeo e tlago go kgonthišetša go phethagala ga morero wa Modimo wa go bopa lefase gore e be paradeise ya ka mo go sa felego gomme go dule batho ba phethagetšego. (Gen. 1:27, 28; Kut. 20:6) Na o ka kgonthišega gore o tla thabela bokamoso bjo bjalo? Ga go pelaelo gore o ka kgonthišega ka seo! Gobane “Modimo [o ile] a šegofatša letšatši la bošupa gomme a le dira le lekgethwa.” Yeo e be e le kgonthišetšo ya gore le ge go ka rotoga mathata le ge e le afe ao a sa letelwago, morero wa Modimo o tla phethagala ge  letšatši la gagwe la boikhutšo le fihla mafelelong.—Gen. 2:3.

3. (a) Ke borabele bofe bjoo bo ilego bja tšwelela ka morago ga ge go thomile letšatši la Modimo la boikhutšo? (b) Jehofa o ile a bontšha bjang boikemišetšo bja gagwe bja go fediša borabele bjoo?

³ Lega go le bjalo, ka morago ga ge letšatši la Modimo la boikhutšo le thomile, go ile gwa tšwelela bothata bjo bogolo. Sathane, yena morongwa yo e lego morwa wa Modimo, o ile a thoma go itira modimo. O ile a bolela maaka ka lekga la pele gomme a fora Efa gore a se kwe Jehofa. (1 Tim. 2:14) Efa yena o ile a feleletša a dirile gore monna wa gagwe a mo tlatše borabeleng bjoo. (Gen. 3:1-6) Gaešita le nakong yeo ya manyami a magolo historing ya legohle ge go be go belaelwa therešo ya Modimo, Jehofa ga se a ka a bona go nyakega gore a tiišetše ka keno gore morero wa gagwe o be o tla phethagala. Go e na le moo, a diriša mantšu ao a bego a tla kwešišwa ka nako yeo yena Modimo a e beilego, o ile a fo bolela gore borabele bjoo bo be bo tlo fedišwa, a re: “Ke tla tsoša bonaba magareng ga gago [Sathane] le mosadi le magareng ga peu ya gago le peu ya gagwe. E [peu e holofeditšwego] tla go pšhatla hlogo gomme wena wa e loma serethe.”—Gen. 3:15; Kut. 12:9.

4, 5. Ke sedirišwa sefe sa molao seo Aborahama ka dinako tše dingwe a ilego a se diriša?

⁴ Mathomongthomong a histori ya batho, ga go bonagale tlotlontšu ya batho yeo Modimo a e filego Adama le Efa e be e na le mantšu ao a dirišwago go tiišetša gore seo ba bego ba se bolela e be e le therešo. Batho ba phethagetšego bao ba ratago Modimo gomme ba mo ekiša ga go nyakege gore ba dire keno; ka mehla ba bolela therešo e bile ba botana ka mo go feletšego. Eupša dilo di ile tša fetoga ka morago ga go thoma ga sebe le go se phethagale. Mafelelong, ge batho ba be ba tlwaetše go bolela maaka le go dira dilo tša bofora, go ile gwa nyakega gore ba thome go ikana ditabeng tše bohlokwa.

⁵ Go dira dikeno e be e le sedirišwa sa molao seo mopatriareka Aborahama a ilego a se diriša gabotse ka makga a mararo. (Gen. 21:22-24; 24:2-4, 9) Ka mohlala, o ile a se diriša ka morago ga ge a boa ntweng a fentše kgoši ya Elama le bagwera ba yona. Kgoši ya Salema le kgoši ya Sodoma di ile tša tla go gahlanetša Aborahama. Melekitsedeke, e lego kgoši ya Salema, e be e bile e le “moperisita wa Modimo Yo Godimodimo.” Ka baka leo, o ile a šegofatša Aborahama gomme a tumiša Modimo ge a thušitše Aborahama go fenya manaba a gagwe. (Gen. 14:17-20) Ke moka ge kgoši ya Sodoma e be e nyaka go putsa Aborahama ge a hlakodišitše setšhaba sa yona go manaba ao a bego a se hlasela, Aborahama o ile a ikana ka gore: “Ke emišetša seatla sa ka godimo gomme ke ikana ka Jehofa Modimo Yo Godimodimo, yena Modiri wa legodimo le lefase, gore nka se tšee selo sa gago, e ka ba tlhale goba lerala la ramphašane, e le gore o se ke wa re: ‘Ke nna ke humišitšego Aborama.’”—Gen. 14:21-23.

6. (a) Aborahama o re beetše mohlala ofe? (b) Re tlo holega bjang ka baka la mohlala wa Aborahama wa go kwa?

⁶ E le gore batho ba nago le sebe ba tle ba holege, Jehofa Modimo o ile a ba a dira dikeno ka go diriša dipolelwana tše bjalo ka e rego: “Mmuši Morena Jehofa o re: ‘Ke ikana ka nna yo a phelago.’” (Hesek. 17:16) Beibele e bolela ka ditiragalo tša ka godimo ga tše 40 moo Jehofa Modimo a ilego a dira dikeno. Mohlomongwe o mongwe wa mehlala e kaone tabeng ye ke ditirišanong tša Modimo le Aborahama. Ka nywaga e mentši, Jehofa o ile a dira dikgwerano tše mmalwa tša dikholofetšo go Aborahama tšeo ge di kopanywa di bontšhago gore Peu e holofeditšwego e be e tla tšwelela go Aborahama ka morwa wa gagwe Isaka. (Gen. 12:1-3, 7; 13:14-17; 15:5, 18; 21:12) Ke moka Jehofa o ile a leka Aborahama  ka tsela e kgolo, a mo laela gore a dire sehlabelo ka morwa wa gagwe yoo a bego a mo rata. Ka ntle le go dikadika, Aborahama o ile a kwa taelo yeo gomme o be a le kgauswi le go dira Isaka sehlabelo ge morongwa wa Modimo a be a mo thibela go dira seo. Ke moka Modimo o ile a mo enela gore: “Ke ena ka nna, ke re ka ge o dirile se gomme o se wa gana ka morwa wa gago, e lego morwa wa gago o tee feela, ke tla go šegofatša gomme ka atiša peu ya gago go etša dinaledi tša magodimong le go etša lešabašaba la lešing la lewatle; ba peu ya gago e tla ba beng ba kgoro ya manaba a bona. Ditšhaba ka moka tša lefase di tla šegofatšwa ka peu ya gago ka ge o kwele lentšu la ka.”—Gen. 22:1-3, 9-12, 15-18.

7, 8. (a) Ke ka baka la’ng Modimo a ile a direla Aborahama keno? (b) “Dinku tše dingwe” tša Jesu di tla holwa bjang ke keno ya Modimo?

⁷ Ke ka baka la’ng Modimo a ile a enela Aborahama gore dikholofetšo tša Gagwe di be di tla phethagala? E be e le ka morero wa go kgonthišetša bao e bego e tla ba bajabohwagotee le Kriste, e lego karolo ya bobedi ya “peu” e holofeditšwego, le go matlafatša tumelo ya bona. (Bala Baheberu 6:13-18; Bagal. 3:29) Go etša ge moapostola Paulo a hlalositše, Jehofa “o ile a tsena ka keno, e le gore ka dilo tše pedi tše di sa fetogego [kholofetšo ya gagwe le keno ya gagwe] tšeo go tšona go sa kgonegego gore Modimo a aketše, . . . re be le kgothatšo e matla gore re kakatlele kholofelo yeo e beilwego pele ga rena.”

⁸ Bakriste ba tloditšwego ga se bona feela bao ba holwago ke keno ya Modimo go Aborahama. Ka go diriša “peu” ya Aborahama, Jehofa o ile a ena gore batho ba “ditšhaba ka moka tša lefase [ba] tla šegofatšwa.” (Gen. 22:18) Batho ba bjalo ba šegofaditšwego ba akaretša le “dinku tše dingwe” tše botegago tša Kriste, e lego tšeo di nago le tebelelo ya go phela ka mo go sa felego paradeiseng mo lefaseng. (Joh. 10:16) Go sa šetšwe gore kholofelo ya gago ke ya go phela kua legodimong goba mo lefaseng, e “kakatlele” ka go phela bophelo bjo bo bontšhago gore o kwa Modimo.—Bala Baheberu 6:11, 12.

9. Ke keno efe yeo Modimo a ilego a e dira ge ditlogolo tša Aborahama e be e le makgoba a Baegipita?

⁹ Nywagakgolo ka morago, Jehofa o ile a dira keno gape mabapi le dikholofetšo tšeo go boletšwego ka tšona ka mo godimo ge a be a roma Moshe go yo bolela le ditlogolo tša Aborahama, tšeo ka nako yeo e bego e le makgoba a Baegipita. (Ek. 6:6-8) Ge Modimo a be a bolela ka tiragalo yeo, o itše: “Letšatšing la ge ke be ke kgetha Isiraele, . . . ke ile ka ikana ka go ba emišetša seatla sa ka gore ke ba ntšhe nageng ya Egipita ke ba iše nageng  yeo ke ba nyaketšego yona, yeo e elago maswi le dinose.”—Hesek. 20:5, 6.

10. Ke kholofetšo efe yeo Modimo a ilego a e direla Isiraele ka morago ga gore a e hlakodiše Egipita?

¹⁰ Ka morago ga gore Isiraele e lopollwe Egipita, Jehofa o ile a e enela gape gore: “Ge e ba le ka kwa lentšu la ka e le ruri gomme la boloka kgwerano ya ka, gona le tla ba thoto ya ka e kgethegilego gare ga merafo e mengwe ka moka, ka gobane lefase ka moka ke la ka. Go nna le tla ba mmušo wa baperisita le setšhaba se sekgethwa.” (Ek. 19:5, 6) A tokelo e kgolo gakaakang yeo Modimo a ilego a e nea Isiraele! E be e bolela gore ge e ba batho ba tšwago setšhabeng seo ba be ba ka kwa, gona ba be ba ka ba le kholofelo ya go dirišwa ke Modimo e le mmušo wa baperisita gore batho ka moka ba šegofatšwe. Ka morago ga moo, ge Jehofa a hlalosa seo a se diretšego Isiraele lebakeng leo, o ile a re: “[Ke ile] ka . . . go enela ka ba ka tsenela kgwerano le wena.”—Hesek. 16:8.

11. Isiraele e ile ya arabela bjang taletšong ya Modimo ya gore e tsenele kgwerano le yena ka go ba setšhaba sa gagwe se se kgethilwego?

¹¹ Ka nako yeo, Jehofa ga se a ka a tlama Isiraele gore e ene gore e tla mo kwa; le gona Modimo ga se a gapeletša Baisiraele gore ba be tswalanong yeo e kgethegilego. Go e na le moo, ba ile ba bolela ka bobona gore: “Re ikemišeditše go dira tšohle tšeo Jehofa a di boletšego.” (Ek. 19:8) Matšatši a mararo ka morago ga moo, Jehofa Modimo o ile a tsebiša Isiraele seo a bego a nyaka gore se dirwe ke setšhaba sa gagwe seo a se kgethilego. Sa pele, e ile ya kwa ge go balwa Melao e Lesome, ke moka Moshe o ile a e botša ditaelo tše dingwe gape tšeo di begilwego go Ekisodo 20:22 go ya go Ekisodo 23:33. Isiraele e ile ya arabela bjang? “Setšhaba [se ile] sa bolela ka lentšu letee sa re: ‘Mantšu ohle ao Jehofa a a boletšego re ikemišeditše go a dira.’” (Ek. 24:3) Ke moka Moshe o ile a ngwala melao yeo ka gare ga “puku ya kgwerano” gomme a e balela setšhaba ka moka ka lentšu la go hlaboša gore se e kwe gape. Ka morago ga moo, setšhaba se ile sa ikana gape ka lekga la boraro gore: “Tšohle tšeo Jehofa a di boletšego re ikemišeditše go di dira gomme ra di kwa.”—Ek. 24:4, 7, 8.

12. Jehofa o ile a arabela bjang kgweranong yeo a bego a e dirile le setšhaba sa gagwe, gomme sona se ile sa arabela bjang?

¹² Gateetee Jehofa o ile a thoma go kgatha tema ya gagwe kgweranong yeo ya Molao ka go rulaganya gore go be le tente ya borapedi le baperisita bao ba bego ba dira gore batho ba nago le sebe ba kgone go mo hlankela. Ka lehlakoreng le lengwe, Isiraele e ile ya lebala kapelapela boineelo bja yona go Modimo gomme ya “kweša yena Mokgethwa wa Isiraele bohloko.” (Ps. 78:41) Ka mohlala, nakong ya ge Moshe a be a amogela ditaelo tše oketšegilego kua Thabeng ya Sinai, Baisiraele ba ile ba fela pelo gomme ba thoma go se sa ba le tumelo go Modimo, ba nagana gore Moshe o ba lahlile. Ka gona ba ile ba dira namane ya gauta gomme ba botša setšhaba gore: “Wena Isiraele, yo ke Modimo wa gago yo a go etilego pele a go ntšha nageng ya Egipita.” (Ek. 32:1, 4) Ke moka ba ile ba itirela monyanya gomme ba o bitša gore ke “monyanya wa Jehofa,” ba khunamela seswantšho seo ba itiretšego sona le go se direla sehlabelo. Ka morago ga gore Jehofa a bone seo, o ile a botša Moshe gore: “[Setšhaba] se arogile kapelapela tseleng yeo ke se laetšego gore se sepele ka yona.” (Ek. 32:5, 6, 8) Ka manyami, go tloga ka nako yeo go ya pele Isiraele e ile ya ba le histori ya go direla Modimo dikeno tšeo ka morago e bego e di roba.—Num. 30:2.

13. Ke keno efe yeo Modimo a ilego a e direla Kgoši Dafida, gomme e tswalana bjang le Peu e holofeditšwego?

¹³ Nakong ya pušo ya Kgoši Dafida, Jehofa o ile a dira dikeno tše dingwe tše pedi gore go holege bohle bao ba tlago go mo kwa. Sa pele, o ile a enela Dafida gore bogoši bja  gagwe bo tla ba gona ka mo go sa felego. (Ps. 89:35, 36; 132:11, 12) Seo se be se bolela gore Peu e holofeditšwego e be e tla bitšwa “Morwa wa Dafida.” (Mat. 1:1; 21:9) Dafida ka boikokobetšo o ile a bitša setlogolo seo sa gagwe gore ke “Morena” wa gagwe ka gobane Kriste o be a tla ba maemong a phagamego.—Mat. 22:42-44.

14. Ke keno efe yeo Jehofa a ilego a e dira mabapi le Peu e holofeditšwego, gomme e re hola bjang?

¹⁴ Sa bobedi, Jehofa o ile a budulela Dafida go bolela gore Kgoši ye ya moswananoši e be e tla ba Moperisita yo a Phagamego. Kua Isiraele, bogoši le boperisita e be e le dilo tše pedi tše di fapanego. Baperisita ba be ba etšwa lelokong la Lefi, gomme dikgoši di be di etšwa lelokong la Juda. Eupša Dafida o ile a bolela ka yo e bego e tla ba mohlatlami wa gagwe wa ka moso sedulong sa bogoši gore: “Jehofa o boditše Morena wa ka a re: ‘Dula ka letsogong la ka la le letona go fihla ke bea manaba a gago e le bogato bja dinao tša gago.’ Jehofa o enne (gomme a ka se itshole.) O itše: ‘O moperisita go iša mehleng ya neng le neng go ya ka mokgwa wa Melekitsedeke!’” (Ps. 110:1, 4) E le go phethagatšwa ga boporofeta bjoo, Jesu Kriste, e lego yena Peu e holofeditšwego, ga bjale o buša a le legodimong. Le gona, o hlankela e le Moperisita yo a Phagamego wa batho ka go thuša bao ba itsholago gore ba be le tswalano e amogelegago le Modimo.—Bala Baheberu 7:21, 25, 26.

15, 16. (a) Beibele e bolela ka Isiraele ka ditsela dife tše pedi, gomme ke Isiraele efe yeo e šegofatšwago ke Modimo lehono? (b) Ke taelo efe yeo Jesu a ilego a e nea balatedi ba gagwe mabapi le go dira dikeno?

¹⁵ Ka ge setšhaba sa Isiraele se ile sa gana Jesu Kriste, mafelelong se ile sa lahlegelwa ke boemo bja sona le Modimo gotee le tebelelo ya gore se be “mmušo wa baperisita.” Jesu o be a boditše baetapele ba Bajuda gore: “Le tla amogwa Mmušo wa Modimo wa newa setšhaba seo se tšweletšago dienywa tša wona.” (Mat. 21:43) Setšhaba seo se sefsa se ile sa tswalwa ka Pentekoste ya 33 C.E. ge moya wa Modimo o be o tšhollelwa godimo ga barutiwa ba ka bago 120 ba Jesu bao ba bego ba bokane Jerusalema. Ba ile ba bitšwa “Isiraele ya Modimo” gomme go se go ye kae e ile ya ba ba dikete tše mmalwa go tšwa setšhabeng se sengwe le se sengwe seo se bego se tsebja ka nako yeo.—Bagal. 6:16.

¹⁶ Go fapana le Isiraele ya nama, setšhaba se sefsa sa Modimo sa moya se ile sa tšwela pela se enywa dienywa tše dibotse ka go dula se ekwa Modimo. E nngwe ya ditaelo tšeo ditho tša sona di e kwago ke ya mabapi le go dira dikeno. Mokgwa wa go dira dikeno o be o dirišwa gampe nakong ya ge Jesu a be a le mo lefaseng, ka ge batho ba be ba ena maaka goba ba ena ka ditaba tše di sa rego selo. (Mat. 23:16-22) Jesu o rutile balatedi ba gagwe gore: “Le se ke la ena le gatee . . . Fela anke ‘ee’ ya lena e be ee, ‘aowa’ ya lena e be aowa; gobane se se fetago tše se tšwa go yo mobe.”—Mat. 5:34, 37.

17. Ke dipotšišo dife tšeo di tlago go ahlaahlwa sehlogong se se latelago?

¹⁷ Na se se bolela gore ka mehla go fošagetše go dira keno? Se bohlokwa le go feta, ke eng seo se akaretšwago ke go dira gore Ee ya gago e be Ee? Dipotšišo tše di tla ahlaahlwa sehlogong se se latelago. Ge re dutše re naganišiša ka seo se lego ka Lentšung la Modimo, eka re ka tutueletšega go dula re ekwa Jehofa. Ke moka le yena o tla thabela go re šegofatša ka mo go sa felego ka go dumelelana le dikeno tša gagwe tše di kgahlišago.