GEORGE NAISH o ile a botšiša gore: “Dilo tše ka moka ke tša eng?” O be a šupa mokgobo wa dikota tša dimithara tše 18 lefelong leo go bego go bewa dilo tša ntwa nakong ya Ntwa ya Pele ya Lefase motseng wa Saskatoon, Saskatchewan, kua Canada. O ile a botšwa gore dikota tšeo di be di dirišetšwa go aga tora ya go ntšha ditemošo nakong ya Ntwa ya Pele ya Lefase. Ka morago Ngwanabo rena Naish o ile a anega ka gore: “Ke moo ke ilego ka tlelwa ke kgopolo ya gore re ka diriša dikota tšeo go aga ditora tša seteišene sa radio, gomme re ile ra nagana go diriša seteišene seo go dira modiro wa boboledi.” Ngwaga o tee feela ka morago, ka 1924, seteišene sa CHUC se ile sa thoma go gaša seyalemoyeng. E bile seteišene sa pele sa radio sa go gaša ditaba tša bodumedi kua Canada.

Ka lebaka la gore Canada ke naga e kgolo kudu, go dira boboledi ka seyalemoya go be go e swanela. Florence Johnson yoo a bego a šoma seteišeneng sona seo kua Saskatoon o itše: “Ka baka la dithero tša rena tša seyalemoyeng, therešo e ile ya fihlelela batho ba bantši bao re bego re ka se kgone go ba fihlelela. Le gona ka ge radio e be e le selo se sefsa, batho ba be ba fagahlela go theetša selo se sengwe le se sengwe seo se bego se gašwa go yona.” Ka 1926, Barutwana ba Beibele (go etša ge Dihlatse tša Jehofa di be di bitšwa bjalo ka nako yeo) ba be ba na le diteišene tša bona tša radio ditoropong tše nne tša Canada. *

O be o tla kwa eng ge o be o ka letša tše dingwe tša diteišene tšeo? O be o tla kwa diopedi go tšwa diphuthegong tša moo di opela mmogo le baletši ba diletšo tša mmino. Se sengwe ke gore bana babo rena ba be ba nea dithero le go swara dipoledišano tša Beibele. Amy Jones, yoo a bego a tšea karolo dipoledišanong tšeo o gopola gore: “Ge ke be ke le tšhemong gomme ke itsebiša go beng ba dintlo, ka dinako tše dingwe ba bangwe ba bona ba be ba bolela gore: ‘Ke go kwele seyalemoyeng.’”

Barutwana ba Beibele kua Halifax, Nova Scotia, ba ile ba diriša mokgwa woo o bego o sa tšo thoma go dirišwa nakong yeo seyalemoyeng, e lego wa lenaneo leo batheetši ba bego ba ka leletše seyalemoyeng gomme ba botšiše dipotšišo tša Beibele nakong ya lenaneo. Ngwanabo rena yo mongwe o ngwadile gore: “Tsela yeo batho ba bego ba arabela ka yona lenaneong le e be e le e  makatšago kudu. Go be go letša batho ba bantši moo re bego re sa kgone go araba megala ka moka.”

Go swana le mehleng ya moapostola Paulo, ba bangwe ba ile ba arabela gabotse mola ba bangwe ba sa ka ba amogela molaetša wa Barutwana ba Beibele. (Ditiro 17:1-5) Batheetši ba bangwe ba ile ba o rata. Ka mohlala, ge Hector Marshall a ekwa Barutwana ba Beibele ba bolela ka dibolumo tša Studies in the Scriptures seyalemoyeng, o ile a beeletša tše tshelela tša tšona. Ka morago o ile a ngwala gore: “Ke be ke nagana gore dipuku tšeo di be di tla nthuša go ruta sehlopha sa sekolo sa Sontaga kerekeng.” Lega go le bjalo, ka morago ga ge Hector a feditše go bala bolumo ya pele, o ile a phetha ka go tlogela kereke ya gagwe. O ile a ba moebangedi yo a fišegago, gomme go ba go fihla lehung la gagwe ka 1998, o hlanketše Jehofa ka potego. Kua bohlabela bja Nova Scotia, letšatši ka morago ga go gašwa ga polelo e rego: “Mmušo, Kholofelo ya Lefase,” Mokolonele J. A. MacDonald o boditše ngwanabo rena wa moo gore: “Maabane batho ba Sehlakahlakeng sa Cape Breton ba kwele molaetša o kaonekaone woo o kilego wa kwewa karolong ye ya lefase.”

Ka lehlakoreng le lengwe baruti ba be ba galefile. Ditho tše dingwe tša Katholika kua Halifax di ile tša tšhošetša ka gore di tla senya seteišene seo se bego se gaša mananeo a Barutwana ba Beibele. Ka go hlohleletšwa ke baetapele ba bodumedi, gateetee ka 1928 mmušo o ile wa tsebiša gore o ka se sa tsošološa mangwalo a molao a diteišene tša radio tšeo di bego di laolwa ke Barutwana ba Beibele. Ka go fetola seo, bana babo rena le dikgaetšedi ba ile ba phatlalatša molaetša woo o gatišitšwego woo o bego o ganetša tiro yeo ya go hloka toka ka pampišana e bitšwago Who Owns the Air? Lega go le bjalo, baetapele ba mmušo ba ile ba gana go tsošološa mangwalo a molao a Barutwana ba Beibele a go gaša.

Na seo se ile sa nyamiša sehlopha se senyenyane sa bahlanka ba Jehofa kua Canada? Isabel Wainwright o ile a dumela ka gore: “Mathomong, go be go bonagala eka ke phenyo e kgolo kudu ya manaba a rena. Eupša ke be ke tseba gore Jehofa nkabe a e thibetše ge e ba e be e swanela morero wa gagwe. Gona se mohlomongwe se be se bolela gore re be re swanetše go fetola mokgwa woo re bego re o diriša wa go nea bohlatse gomme re diriše o mongwe o kaone wa go bolela ditaba tše dibotse tša Mmušo.” Go e na le go ithekga kudu ka go diriša seyalemoya go nea bohlatse, Barutwana ba Beibele kua Canada ba ile ba thoma go šetša kudu modiro wa go etela batho ka go lebanya magaeng a bona. Lega go le bjalo, ka nako e swanetšego seyalemoya se ile sa bapala karolo ya sona e kgolo ya go gaša ‘molaetša o kaonekaone woo o kilego wa kwewa.’—Go tšwa bobolokelong bja rena kua Canada.