1. Batho ba bangwe ba lebelela bjang bašele, eupša ke ka baka la’ng seo se ka se lokafatšwe?

GO ETŠA ge go bontšhitšwe sehlogong se se fetilego, batho ba diriša lentšu “bašele” ka tsela ya lenyatšo, e le go bontšha gore ba hlaswa motho, gaešita le go mo kwera. Ke go bontšha go hloka tlhompho ge e ba re tšea gore batho ba setšhaba se sengwe ba a nyatšega ge ba bapetšwa le ba nageng ya gabo rena. Go oketša moo, boemo bjo bjalo bja kgopolo bo bontšha gore ga re lebelele dilo ka pono ya kgonthe. Puku ya The Races of Mankind e re: “Beibele e bolela therešo ge e re merafo ya batho ke bana ba motho.” Gantši bana ba motho ga ba swane, eupša se se šalago ke gore ke bana ba motho.

2, 3. Pono ya Jehofa ke efe ka bašele?

² Go ba gona, go sa šetšwe gore re dula kae, re na le bašele gare ga rena. Go be go na le bašele gare ga Baisiraele ba bogologolo, bao ka baka la kgwerano ya Molao ba bego ba na le tswalano e kgethegilego le Jehofa Modimo. Ditshwanelo tša bao e bego e se Baisiraele di be di lekanyeditšwe, eupša go be go nyakega gore Baisiraele ba ba sware ka tlhompho le ka toka. Ruri woo ke mohlala o mobotse wo re ka o latelago! Ga se gwa swanela go ba le go beba sefahlego goba kgethollo gare ga Bakriste ba therešo. Ka baka la’ng? Moapostola Petro o itše: “Bjale gona ke kwešiša gabotse gore Modimo ga a bebe sefahlego, eupša setšhabeng se sengwe le se sengwe motho yo a mmoifago gomme a dira se se lokilego o a amogelega go yena.”—Dit. 10:34, 35.

³ Bašele ba Isiraeleng ya bogologolo ba ile ba holwa ke go gwerana ga bona kgauswi le Baisiraele ba tlhago. Seo se ile sa bonagatša tsela ya Jehofa ya go nagana tabeng ye go etša ge moapostola Paulo a ile a bolela ka yona nywaga ka morago ge a be a botšiša ka Jehofa gore: “Na ke Modimo wa Bajuda feela? Na ga se le wa batho ba ditšhaba? Ee, e bile ke wa batho ba ditšhaba.”—Baroma 3:29; Joele 2:32.

4. Ke ka baka la’ng go ka bolelwa gore ga go na bašele ka gare ga “Isiraele ya Modimo”?

 ⁴ Ka baka la kgwerano e mpsha, phuthego ya Bakriste ba tloditšwego e ile ya tšea legato la Isiraele ya tlhago ka go ba setšhaba seo Modimo a bego a tla ba le tswalano e kgethegilego le sona. Ke ka baka leo e bitšwago “Isiraele ya Modimo.” (Bagal. 6:16) Le gona go etša ge Paulo a hlalositše, setšhabeng seo se sefsa, “ga go na Mogerika goba Mojuda, go bolla goba go se bolle, motho o šele, Mosithe, mohlanka le molokologi, eupša Kriste ke dilo tšohle gomme o go bohle.” (Bakol. 3:11) Ka gona, ke ka yona kgopolo yeo go bego go ka se be le bašele ka phuthegong ya Bokriste.

5, 6. (a) Ke potšišo efe yeo e ka rotogago mabapi le Jesaya 61:5, 6? (b) Ke bomang bao ba emelwago ke “baperisita ba Jehofa” le “bašele” bao Jesaya a boletšego ka bona? (c) Dihlopha tše ka bobedi di swana ka eng?

⁵ Ka lehlakoreng le lengwe, yo mongwe a ka ipotšiša seo se bolelwago ke kgaolo 61 ya puku ya Jesaya, e lego yeo e nago le boporofeta bjoo bo phethagalago ka phuthegong ya Bokriste. Temana 6 ya kgaolo yeo e bolela ka bao ba tlago go hlankela e le “baperisita ba Jehofa.” Lega go le bjalo, temana 5 e bolela ka “bašele” bao ba tlago go dirišana le “baperisita” bao gomme ba šoma le bona. Taba ye e swanetše go kwešišwa bjang?

⁶ Re kwešiša gore “baperisita ba Jehofa” ke Bakriste ba tloditšwego bao ba nago le kabelo “tsogong ya pele” e bile ‘e tlago go ba baperisita ba Modimo le ba Kriste gomme ba buša le yena e le dikgoši ka nywaga e sekete.’ (Kut. 20:6) Go oketša moo, go na le Bakriste ba bantši ba botegago bao ba nago le kholofelo ya go phela mo lefaseng. Gaešita le ge Bakriste bao ba šoma le bao ba tlago go hlankela legodimong e bile ba gwerane le bona, ke bašele ka kgopolo ya seswantšhetšo. Ba thekga ka lethabo “baperisita ba Jehofa” e bile ba šoma le bona, le gona go ka bolelwa gore ba hlankela e le “balemi” le ‘ba lemago morara.’ Ee, ba thuša batlotšwa gore Modimo a tumišwe, ka go botša batho therešo le go ba ruta yona. Bobedi batlotšwa le “dinku tše dingwe” ba tsoma batho bao ba nyakago go hlankela Modimo ka mo go sa felego, gomme ba ba diša ka lerato.—Joh. 10:16.

7. Ke ka tsela efe Bakriste lehono ba swanago le Aborahama gotee le banna ba bangwe ba botegago ba bogologolo?

⁷ Go etša ge re bone sehlogong se se fetilego,  Bakriste ba therešo ba swana le bašele, goba badudi ba nakwana, lefaseng le kgopo la Sathane. Mo tabeng ye, ba swana le banna ba botegago ba bogologolo—go akaretša Aborahama—bao go bolelwago ka bona gore “e be e le bašele le badiiledi nageng.” (Baheb. 11:13) Go sa šetšwe gore kholofelo ya rena ka bokamoso ke efe, re na le tokelo ya go thabela tswalano yeo Aborahama a bego a na le yona le Jehofa. Jakobo o hlalosa gore “‘Aborahama o bile le tumelo go Jehofa, a balelwa seo e le go loka,’ a tla a bitšwa ‘mogwera wa Jehofa.’”—Jak. 2:23.

8. Aborahama o ile a holofetšwa eng, gomme o ile a ikwa bjang ka go phethagatšwa ga seo?

⁸ Modimo o ile a holofetša gore ka Aborahama le ditlogolo tša gagwe, malapa ka moka a lefase—e sego feela setšhaba setee—a be a tla šegofatšwa. (Bala Genesi 22:15-18.) Gaešita le ge kholofetšo yeo ya Modimo e be e bonagala e le kgole, Aborahama o ile a dula a holofetše gore e tla phethagala. O ile a fetša nako e ntši ya bophelo bja gagwe a ralala le ba lapa la gagwe. Nakong yeo ka moka Aborahama o ile a dula a na le tswalano e botse le Jehofa.

9, 10. (a) Re ka ekiša mohlala wa Aborahama ka ditsela dife? (b) Ke taletšo efe yeo re ka e fetišetšago go ba bangwe?

⁹ Gaešita le ge Aborahama a be a sa tsebe gore o tla leta ka lebaka le lekaakang pele ga ge kholofelo ya gagwe e ka phethagala, lerato leo a bego a rata Jehofa ka lona le boineelo bja gagwe go yena ga se tša ka tša fokotšega. Mahlo a gagwe a ile a dula a tsepame, gomme ga se a ka a ba modudi wa sa ruri setšhabeng se itšego. (Baheb. 11:14, 15) Ruri e tla ba gabohlale gore le rena re latele mohlala wa Aborahama ka go phela maphelo a bonolo gomme re se tshwenyege kudu ka dilo tše di bonagalago, maemo a rena setšhabeng goba dipakane tša rena tša mešomo! Go re’ng re ka katanela go phela bophelo bjo go thwego ke bjo tlwaelegilego tshepedišong ye e lego kgauswi le go fela? Go re’ng re ka rata dilo tšeo e lego tša nakwana feela? Go etša ge go be go le bjalo ka Aborahama, re letetšwe ke tše kaone. Re ikemišeditše go se fele pelo gomme re lete go fihlela ge kholofelo ya rena e phethagaditšwe.—Bala Baroma 8:25.

¹⁰ Jehofa o sa dutše a laletša batho ba ditšhaba ka moka gore ba tle ba šegofatšwe ka peu ya Aborahama. Le gona ‘baperisita ba tloditšwego ba Jehofa,’ gotee le “bašele” ba dinku tše dingwe, ba fetišetša taletšo ye go batho lefaseng ka moka ka maleme a ka godimo ga a 600.

11. Ke eng seo Solomone a se boletšego ka bao e bego e se Baisiraele?

¹¹ Ka go dumelelana le kholofetšo yeo Jehofa a e dirilego go Aborahama, Solomone o ile a bolela nakong ya go kgakolwa ga tempele ka 1026 B.C.E. gore batho ba ditšhaba ka moka ba be ba tla tla ba tumiša Jehofa. O ile a rapela go tšwa pelong gore: “Le motho o šele yo e sego wa setšhaba sa gago sa Isiraele yoo a tšwago nageng ya kgole ka baka la ge a kwele ka leina la gago (gobane ba tla kwa ka leina la gago le legolo le seatla sa gago se matla le letsogo la gago leo le otlolotšwego), ge a ka tla a rapela a lebeletše ntlong ye, gona anke wena o theetše o le magodimong, o le lefelong la gago le le tsepamego la bodulo gomme o dire sohle seo motho o šele a se kgopelago go wena; e le gore merafo ka moka ya lefaseng e tsebe leina la gago gore e go boife go etša ge setšhaba sa gago sa Isiraele se go boifa.”—1 Dikg. 8:41-43.

12. Ke ka baka la’ng batho ba bangwe ba ka nagana gore Dihlatse tša Jehofa ga se tša tlwaelega goba ke batho “bašele”?

¹² Motho o šele ke yo a dulago nageng yeo e sego ya gabo goba ke motho yo a dulago motseng wo e sego wa gabo a etšwa go o mongwe. Se se hlalosa gabotse boemo bja Dihlatse tša Jehofa. Di thekga feela mmušo wa legodimong, e lego Mmušo wa Modimo woo o eteletšwego pele ke Kriste. Ka baka leo, di dula di kgomaretše boemagare ditabeng tša  dipolitiki, gaešita le ge batho ba bangwe ba bolela gore di šiilwe ke nako.

13. (a) Ke ka kgopolo efe lentšu “bašele” gantši e fo go ba taba ya boikgopolelo? (b) Na morero wa Jehofa wa mathomong o be o akaretša gore go be le bašele? Hlalosa.

¹³ Gantši bašele re ba tseba ka dika tšeo di tlwaelegilego go batho ba sego kae setšhabeng sa bona. Re ka ba tseba ka leleme la bona, ditšo tša bona, ponagalo ya bona gaešita le moaparo wa bona. Lega go le bjalo, dilo tšeo ba swanago ka tšona le batho ba bangwe ka moka, go sa šetšwe gore ba tšwa setšhabeng sefe, di bohlokwa kudu go feta dika tšeo re sa tšwago go bolela ka tšona. Ka gona, ge e le gabotse motho o šele e fo ba motho yo a lebelelwago ka tsela yeo ka gobane a fapane le ba bangwe ka ditsela tše itšego. Ge e ba re ithuta go se tshwenyege ka dilo tše tša kgonthe goba tšeo re inaganelago tšona tšeo re fapanago ka tšona le yena, gona re ka se sa mo lebelela e le yo šele. Ge e ba batho ka moka lefaseng ba be ba bušwa ke mmušo o tee wa dipolitiki, gona go be go ka se be le motho yo re rego o tšwa nageng e šele. Ge e le gabotse, morero wa Jehofa wa mathomong e be e le gore batho ka moka e be batee ka go ba lapa letee ka tlase ga bogoši bjo tee—bogoši bja gagwe. Na ga bjale go ka kgonega gore go be le selo se bjalo gare ba batho ba ditšhaba ka moka go dikologa lefase?

14, 15. Ke eng seo Dihlatse tša Jehofa e le sehlopha di se fihleletšego?

¹⁴ Lefaseng le la boithati le la botšhaba, ke mo go lapološago go hwetša batho bao ba sa tshwenyegego ka mellwane ya ditšhaba. Therešo ke gore ga go bonolo go fenya kgethollo. Mothomi wa seteišene sa thelebišene sa CNN, e lego Ted Turner, o bolela ka mošomo wa gagwe wo a o dirilego le batho ba nago le bokgoni go tšwa dinageng tše di fapafapanego gore: “E bile selo se se kgahlišago kudu go kopana le batho ba bjalo. Ke ile ka se lebelele batho bao ba tšwago dinageng tše dingwe e le ‘bašele,’ eupša ke ile ka ba lebelela e le badudigotee le nna polaneteng ye. Ke ile ka thoma go bona polelwana ‘selo se šele’ e le ya lenyatšo gomme ka thea molao go CNN wa gore polelwana yeo e se dirišwe ge re bega ditaba goba dipoledišanong tša rena tša ka thoko ge re le mošomong. Go e na le moo, ke ile ka re go dirišwe lentšu ‘ditšhabatšhaba.’”

¹⁵ Dinageng tše dintši go dikologa lefase, Dihlatse tša Jehofa ke sehlopha seo se amogetšego tsela ya Modimo ya go nagana tabeng ye. Ka go ithuta go lebelela batho ka tsela yeo Jehofa a ba lebelelago ka yona, mafelelong di kgonne go fetoša tsela yeo di naganago le go ikwa ka yona ka ba bangwe. Go e na le gore di palelwe ke go bota batho ba ditšhaba tše dingwe, go ba belaela goba go ba hloya, di ithutile go lebelela mekgwa e fapafapanego le bokgoni bja batho bao e le selo se sebotse. Na o lemogile kamoo seo se phethagalago ka  gona le ka tsela yeo se go thušitšego go dirišana le batho ba bangwe ka yona?

16, 17. Go phethagala ga Kutollo 16:16 le Daniele 2:44 go tla bolela’ng go wena?

¹⁶ Kgauswinyane ditšhaba ka moka di tla lebana le Jesu Kriste le madira a gagwe a legodimong ntweng ya mafelelo ya go lwela bogoši bja Modimo, ntweng yeo e “bitšwago Haramagedone ka Seheberu.” (Kut. 16:14, 16; 19:11-16) Nywaga ya ka godimo ga e 2 500 e fetilego, moporofeta Daniele o ile a budulelwa gore a ngwale seo se tlago go diragalela mebušo ya batho yeo e lwantšhago morero wa Modimo, a re: “Mehleng ya dikgoši tšeo Modimo wa legodimo o tla hloma mmušo wo o ka se kego wa fedišwa. Mmušo woo o ka se ke wa fetišetšwa go batho ba bangwe. O tla pšhatlaganya mebušo ye ka moka wa e fediša gomme wona o tla ema go iša mehleng ya neng le neng.”—Dan. 2:44.

¹⁷ Na o ka nagana gore go phethagatšwa ga boporofeta bjoo go tla bolela’ng go wena? Mellwane yeo e hlomilwego ke batho, yeo lehono e dirago gore batho ka moka e be bašele ka tsela e itšego, e ka se sa hlwa e sa ba gona. Go fapana ga ponagalo ya batho ka tsela le ge e le efe go tla ba go bontšha ka tsela e kgahlišago gore dilo tšeo Modimo a di hlodilego ga di swane. Tebelelo yeo e kgahlišago e swanetše go tutuetša yo mongwe le yo mongwe wa rena go dira sohle seo a ka se kgonago go tšwela pele a tumiša le go godiša Mmopi wa rena, Jehofa Modimo.

18. Ke selo sefe seo se sa tšwago go direga morago bjale seo se bontšhago gore kgopolo ya gore go na le “bašele” e ka fenywa?

¹⁸ Na ke toro feela go nagana gore phetogo yeo ya lefase ka bophara e tla direga? Aowa, ga se toro le gatee. Ge e le gabotse, e tloga e le mo go kwagalago go dumela gore seo se tla direga. Gaešita le mo nakong ye Dihlatse tša Jehofa ga di lebelele batho ba bangwe e le bašele. Ka mohlala, diofisi tša bona tše sego kae tše dinyenyane tša makala di ile tša kopanywa e le gore go nolofatšwe modiro wa bao ba di hlokometšego gomme go be le katlego e oketšegilego modirong wa go bolela ditaba tše dibotse tša Mmušo. (Mat. 24:14) Diphetogo tše ga se tša dirwa go nagannwe ka mellwane ya ditšhaba, gaešita le ge go ile gwa latelwa melao e itšego ya dinaga tšeo. Bjoo ke bjo bongwe bja bohlatse bjo bo lego molaleng bja gore Mmuši yo a swanelegago yoo Jehofa a mmeilego sedulong sa bogoši e lego Jesu Kriste o robaganya mellwane yeo e hlomilwego ke batho, gomme go se go ye kae o tla “feleletša phenyo ya gagwe.”—Kut. 6:2.

19. Ke eng seo leleme le le sekilego la therešo le se fihleletšego?

¹⁹ Le ge Dihlatse tša Jehofa di etšwa ditšhabeng tše di fapafapanego e bile di bolela maleme a mehutahuta, di katanela go bolela leleme le le sekilego la therešo. Se se dira gore di be le botee bjoo go ka se kgonegego gore motho yo mongwe a bo senye. (Bala Tsefanya 3:9.) Le ke lapa la ditšhabatšhaba leo le lego gare ga tshepedišo ye e kgopo ya dilo eupša le fapane le batho ba yona. Lapa le leo le lego boteeng e fo ba mathomomayo a seo se tlago go direga lefaseng le le tlago—lefaseng leo le se nago bašele. Ke moka batho bohle bao ba tlago go ba ba phela ka nako yeo ba tla lemoga therešo ya seo se boletšwego ke puku e tsopotšwego pejana ge e re: “Beibele e bolela therešo ge e re merafo ya batho ke bana ba motho.”—The Races of Mankind.