KA NYWAGASOME, banna le basadi lefaseng ka bophara ba be ba dutše ba kgahlwa e bile ba holwa ke molaetša wo o theilwego Beibeleng wo o gatišitšwego matlakaleng a Morokami. Ka July 2011, tokollo ya pele ya kgatišo e nolofaditšwego e ithutwago ya makasine wo e ile ya gatišwa ka Seisemane. Tokollo yeo e hlalositše gore: “Kgatišo ye e mpsha e tla lekwa ka ngwaga o tee, gomme ge e ba e ka ba e holago, e tla tšwela pele e gatišwa.”

Ga bjale re thabela go le tsebiša gore re phethile ka gore kgatišo ye e tšwele pele e gatišwa. Go feta moo, ge nako e dutše e eya, kgatišo yeo e nolofaditšwego e tla hwetšagala ka Sefora, Sepotokisi le Sepanishi.

Ka morago ga go hwetša kgatišo ye, ba mmalwa go tšwa Pacific Borwa ba begile gore: “Ga bjale bana babo rena ba kgona go kwešiša Morokami gabotse.” Lengwalo le lengwe le itše: “Nako yeo peleng e bego e fetšwa go nyakwa mantšu le ditlhaloso ga bjale e dirišetšwa go kwešiša mangwalo a bontšhitšwego le kamoo a tswalanago ka gona le seo se ithutwago.”

Sealoga se sengwe sa kholetšheng kua United States se re: “Ke feditše nywaga e 18 ke bolela le go ngwala leleme le thata la thuto e phagamego. Ke ile ka thoma go ba le mokgwa wa go bolela le go nagana ka tsela e raraganego kudu go sa nyakege. Ke ile ka lemoga gore ke swanetše  go dira diphetogo tše dikgolo kudu tseleng yeo ke naganago le go bolela ka yona.” Ka ge ga bjale e le moebangedi yo a atlegago, o ngwala gore: “Morokami wo o nolofaditšwego o itlhatsetše e le thušo e kgolo kudu. Tsela yeo o nolofaditšwego ka yona e mpontšha mohlala o mobotse kudu wa kamoo nka bolelago ka tsela e bonolo.”

Kgaetšedi yo mongwe yo a tšwago Engelane yo a kolobeditšwego ka 1972 o ngwadile mabapi le Morokami wo gore: “Ge ke be ke bala tokollo ya wona ya pele, ke ile ka ikwa eka Jehofa o dutše thoko ga ka o beile matsogo a gagwe godimo ga magetla a ka gomme re o bala mmogo. Go be go etša tate yo a balelago ngwana wa gagwe dinonwane pele a robala.”

Kgaetšedi yo mongwe yo a lego Bethele ya kua United States yo a nago le nywaga ya ka godimo ga e 40 a kolobeditšwe o boletše gore ka dinako tše dingwe kgatišo ye e ile ya mo thuša go kwešiša dilo ka lefsa. Ka mohlala, lepokisi leo le rego: “Dipolelwana tše Dingwe di a Hlaloswa” ka go tokollo ya September 15, 2011, le hlalositše polelwana “leru la dihlatse” go Baheberu 12:1 ka mantšu a: “E be e le ba bantši kudu moo ba ka se kgonego go balwa.” O itše: “Seo se dirile gore ke kwešiše temana ye gabotse.” Mabapi le diboka tša beke le beke, o okeditše ka gore: “Le ge dikarabo tša bana di etšwa ka go lebanya kgatišong ye, ga di na mantšu a swanago le a kgatišo e tlwaelegilego ya Morokami yeo bontši bo e swerego. Ka gona dikarabo tša bona e ba tše difsa go batheetši.”

Kgaetšedi yo mongwe yo a lego Bethele o ngwadile gore: “Ke dula ke fagahletše go kwa dikarabo tša bana dibokeng. Morokami o nolofaditšwego o ba thušitše go araba ka kgodišego  e kgolo. Dikarabo tša bona di nkgothatša kudu.”

Kgaetšedi yo mongwe yo a kolobeditšwego ka 1984 o lebogile kgatišo ye ka gore: “Ke ikwa o ka re e ngwaletšwe nna. E dira gore ke kwešiše gabonolo seo ke se balago. Ga bjale ke na le sebete sa go araba Thutong ya Morokami.”

Mmago mošemanyana wa nywaga e šupa o hlalositše gore: “Ke be ke fetša nako e ntši ke gapeletšega go mo hlalosetša mafoko a mantši nakong ya ge re lokišetša Thuto ya Morokami, gomme seo se be se lapiša.” Kgatišo ye e thušitše bjang? O ngwala gore: “Ke makatšwa kudu ke gore o kgona go bala dirapa le go kwešiša gabotse seo a se balago. Ka ge mantšu a se thata e bile mafoko e le a makopana, ga a tšhošwe ke selo. O šetše a thomile go lokišetša dikarabo bakeng sa diboka a nnoši ntle le thušo ya ka, gomme kgopolo ya gagwe e dula e tsepame thutong ka moka.”

Mmago ngwanenyana wa nywaga e senyane o ngwadile gore: “Peleng ke be ke swanetše go mo thuša ka dikarabo tša gagwe. Ga bjale o di lokišeletša ka boyena. Ga se gantši re fetšago nako re hlalosa taba ka diripa ka diripa. Ka ge a sa thatafalelwe ke go kwešiša seo a se balago, ga bjale o ikwa e le karolo ya Thuto ya Morokami.”

Bana ba bantši ba ikwa eka Morokami o nolofaditšwego o be o ngwalelwa bona. Rebecca wa nywaga e 12 o kgopetše gore: “Hle anke kgatišo ye e mpsha e dule e tšweletšwa!” O okeditše ka gore: “Ke rata karolo e rego: ‘Dipolelwana tše Dingwe di a Hlaloswa.’ E bonolo kudu go bana.”

Nicolette wa nywaga e šupa o ikwa ka mokgwa o swanago: “Ke be ke thatafalelwa ke go kwešiša Morokami. Ga bjale ke kgona go nea dikarabo tše dintši ka bonna.” Emma wa nywaga e senyane o ngwadile gore: “E bile thušo e kgolo kudu go nna le kgaetšedi ya ka ya nywaga e tshelelago. Re kgona go kwešiša gabonolo seo re se balago! Ke a leboga!”

Go bonagala gabotse gore ba bantši ba holwa ke kgatišo ye ya Morokami yeo e dirišago mantšu a kwešišegago gabonolo le mafoko a bonolo. E phetha morero o mogolo e bile e tla tšwela pele e gatišwa mmogo le kgatišo e tlwaelegilego yeo e bilego tokišetšo e bohlokwa go tloga ka 1879.