1-3. (a) Re bolela’ng ge re re motho o na le dilo tšeo a itsholelago tšona, gomme seo se ka mo kgoma bjang? (b) Re ithuta’ng go tšwa go Paulo tabeng ya go hlankela Modimo ntle le go itshola?

SERETI se sengwe se ngwadile gore: “Go mantšu ka moka ao motho a ka a bolelago goba go a ngwala, lentšu le bohloko kudu go ona ka moka ke ‘nkabe!’” Sereti seo e be e le J. G. Whittier, gomme o be a bolela ka dilo tšeo re itsholelago tšona, dilo tšeo re dumago ge nkabe re ka di dira gape ka tsela e fapanego. “Go itshola” ke go nyama monaganong, go tlaišega monaganong ka baka la selo seo re se dirilego goba mohlomongwe seo re sa se dirago, e bile go ka bolela gore motho “o lla gape gabohloko.” Ka moka ga rena re dirile dilo tšeo re dumago ge nkabe re ka boela morago gomme ra di dira ka tsela e fapanego. Ke dilo dife tšeo o itsholelago tšona?

² Batho ba bangwe ba dirile diphošo tše dikgolo maphelong a bona, gaešita le dibe tše dikgolo. Ba bangwe ga se gore ba dirile selo se itšego se sebe kudu, eupša ba ipotšiša ge e ba dikgetho tšeo ba di dirilego bophelong e be e tloga e le tše kaone goba go se bjalo. Batho ba bangwe ba kgonne go lebeletšana le diphošo tšeo ba kilego ba di dira bophelong gomme ba tšwela pele ka bophelo ntle le bothata. Ba bangwe ba dula ba itsholela gore “nkabe” ba dirile dilo tše itšego. (Ps. 51:3) Na wena o wela legorong lefe? Na o duma ge o ka hlankela Modimo ntle le go itshola—mohlomongwe go tloga lehono go ya pele? Na go na le mohlala wa kgonthe wa motho yo re ka mo ekišago gomme ra phela ka tsela yeo? Re na le wona mohlala woo, gomme ke wa moapostola Paulo.

³ Paulo o ile a dira diphošo tše dikgolo le dikgetho tše bohlale bophelong bja gagwe. O ile a itshola e le ka kgonthe ka baka la dilo tše mpe tšeo a ilego a di dira, eupša o ile a ithuta le go atlega tirelong ya gagwe ya go hlankela Modimo ka potego. Anke re boneng kamoo mohlala wa gagwe o ka re rutago go hlankela Modimo ntle le go itshola.

4. Ke dilo dife tšeo Paulo a ilego a itsholela tšona?

⁴ Nakong ya ge e be e le mofsa wa Mofarisei, Paulo o ile a  dira dilo tšeo ka morago a ilego a itsholela tšona. Ka mohlala, o ile a etelela pele lesolo la go tlaiša o šoro barutiwa ba Kriste. Pego ya Beibele e bontšha gore gateetee ka morago ga gore Stefano a bolaelwe tumelo, “Saulo [yoo ka morago a ilego a bitšwa Paulo, o ile] . . . a hlokofatša phuthego. O be a šwahlela ntlo le ntlo, a goga banna le basadi a ba gafela kgolegong.” (Dit. 8:3) Seithuti Albert Barnes se boletše gore lentšu la Segerika leo le fetoletšwego e le go “hlokofatša” ke “lentšu le matla, leo le bolelago phišego le pefelo yeo [Saulo] a ilego a tlaiša Bakriste ka yona.” Ka gona, Barnes o itše: “Saulo o ile a lwa le kereke bjalo ka sebata.” Ka ge e be e le Mojuda yo a ineetšego, Saulo o be a na le tumelo ya gore Modimo o mo neile boikarabelo bja go fediša Bokriste. Ka gona, o ile a hlomara Bakriste le go ba tlaiša o šoro, ‘a ba tšhošetša e bile a nyaka go bolaya bobedi banna le basadi,’ a nyaka go ba fediša.—Dit. 9:1, 2; 22:4. *

5. Hlalosa kamoo Saulo a ilego a thoma go botša ba bangwe ka Kriste gomme a tlogela go tlaiša balatedi ba Jesu.

⁵ Saulo o be a ikemišeditše go ya Damaseko, go yo šwahlela barutiwa ba Jesu dintlong tša bona gomme a ba gogele Jerusalema gore ba yo otlwa ke Sanhedrine. Eupša o ile a palelwa ka gobane o be a lwantšha Hlogo ya phuthego ya Bokriste. (Baef. 5:23) Ge Saulo a be a le tseleng ya go leba Damaseko, Jesu o ile a mo thibela gomme a mo foufatša ka seetša se se makatšago. Ke moka Jesu o ile a romela Saulo Damaseko go fihlela a mo nea ditaelo tše oketšegilego. Re tseba gabotse seo se ilego sa direga ka morago ga moo.—Dit. 9:3-22.

6, 7. Ke eng seo se bontšhago gore Paulo o be a tseba gabotse dilo tše mpe tšeo a kilego a di dira?

⁶ Boitshwaro bja Paulo bo ile bja fetoga gateetee ka morago ga gore e be Mokriste. Go e na le gore e be lenaba le šoro la Bokriste, o ile a ba mothekgi yo a fišegago wa bjona. Lega go le bjalo, ka morago o ile a ngwala ka yena gore: “Ee, le kwele ka boitshwaro bja ka bja pele Bojudeng, gore ke ile ka dula ke tlaiša phuthego ya Modimo o šoro e bile ke leka go e šwalalanya.” (Bagal. 1:13) Ka morago o ile a ngwalela Bakorinthe, Bafilipi le Timotheo ka dilo tšeo a bego a itsholela tšona. (Bala 1 Bakorinthe 15:9; Bafil. 3:6; 1 Tim. 1:13) Paulo o be a sa ikgantšhe ka dilo tše bjalo tšeo a bego a di ngwala ka yena, le gona o be a sa phele bjalo ka ge eka ga se tša ka tša direga. O be a tseba gabotse gore o ile a dira diphošo tše dikgolo.—Dit. 26:9-11.

⁷ Seithuti sa Beibele e lego Frederic W. Farrar se ile sa bolela ka tema yeo Saulo a ilego a e kgatha “tlaišong yeo e sehlogo.” Farrar o okeditše ka gore ke feela ge re nagana ka karolo ye e bohloko ya bophelo bja Paulo moo “re bonago boitsholo bjo bogolo bjoo a ka bago a bile le bjona, gotee le dikwero tšeo a ilego a kwerwa ka tšona ke manaba a gagwe a magolo.” Go ka direga gore ka dinako tše dingwe Paulo o be a batamelwa ke bana babo bao ba bego ba mmona ka lekga la pele go tšwa diphuthegong tšeo a bego a di etela gomme ba mo dumediša ka gore: ‘Ooo, ke wena Paulo—yo a bego a re tlaiša!’—Dit. 9:21.

8. Paulo o ile a ikwa bjang ka kgaugelo le lerato tšeo Jehofa le Jesu ba mmontšhitšego tšona, gomme seo se re ruta thuto efe?

⁸ Lega go le bjalo, Paulo o ile a lemoga gore tsela feela ya gore a phethagatše bodiredi bja gagwe e be e le ka baka la botho bjo bogolo bja Modimo. O boletše ka seka seo sa kgaugelo ya Modimo ka makga a ka bago a 90 ka mangwalong a gagwe a 14, e lego palo e kgolo go feta ya mongwadi le ge e le ofe yo mongwe wa Beibele. (Bala 1 Bakorinthe 15:10.) Paulo o ile a tšeela godimo tsela yeo a ilego a bontšhwa kgaugelo ka yona, gomme o be a nyaka go kgonthišetša gore go bontšhwa ga gagwe botho bja Modimo e be e se ga lefeela. Ka gona o ile a ‘itapiša go feta’ baapostola ba bangwe ka moka. Mohlala wa Paulo o bontšha gabotse gore ge e ba re ipobola dibe tša rena gomme re fetoša tsela ya rena ya bophelo, Jehofa o ikemišeditše go phumola gaešita le dibe  tša rena tše dikgolo motheong wa sehlabelo sa Jesu sa topollo. Yeo e tloga e le thuto e botse go motho le ge e le ofe yoo a thatafalelwago ke go dumela gore mehola ya sehlabelo sa Kriste e ka dirišwa go yena ka go lebanya! (Bala 1 Timotheo 1:15, 16.) Gaešita le ge Paulo e be e le motlaiši yo šoro wa Kriste, o ile a kgona go ngwala gore: “Morwa wa Modimo o nthatile gomme a ikgafela nna.” (Bagal. 2:20; Dit. 9:5) Ee, Paulo o ile a ithuta tsela ya go hlankela Modimo ntle le go ipakela dilo tše dingwe gape tšeo a tlago go itsholela tšona. Na o ithutile go dira seo?

9, 10. (a) Ke ka baka la’ng bahlanka ba bangwe ba Jehofa ba itshola? (b) Ke ka baka la’ng go fošagetše gore motho a dule a tshwenyega ka dilo tšeo di diregilego nakong e fetilego?

⁹ Na go na le dilo tšeo o itsholelago gore o kile wa di dira? Na o kile wa senya matla a gago le nako ya gago e bohlokwa o dira dilo tša go se re selo? Na o kile wa dira selo se itšego seo se ilego sa feleletša se kwešitše ba bangwe bohloko? Goba mohlomongwe go na le selo se sengwe seo o itsholelago sona. Potšišo ke gore: Ke eng seo o ka se dirago boemong bjoo?

¹⁰ Selo seo batho ba bantši ba se dirago ke gore ba tshwenyege! Go dula o tshwenyegile go bolela go ikimetša ka bothata, go ikopiša hlogo le go itlaiša. Go bakela motho dipelaelo tše dikgolo. Na go tshwenyega ga motho go ka lokiša bothata bjo a nago le bjona? Go ka se lokiše le bjo tee! Go e na le gore re tshwenyege, go kaone go dira selo seo se ka kaonefatšago boemo. O ka kgopela tshwarelo go motho yo o mo fošeditšego, gomme seo mohlomongwe se ka lokiša tswalano ya lena e botse. O ka phema go dira selo seo se dirilego gore o dire bobe bjoo, ka go re’alo wa phema mathata ao a ka tlago ka morago. Godimo ga moo, go ka nyakega gore o kgotlelele maemo a mangwe bophelong. Eupša go tshwenyega go ka golofatša motho moyeng gomme a palelwa ke go hlankela Modimo ka botlalo. Le gona motho ga a boelwe ke selo ge a tshwenyega!

11. (a) Jehofa a ka re bontšha bjang kgaugelo le botho? (b) Tsela ya Modimo ya gore re be le khutšo ya monagano ka diphošo tša rena tša nakong e fetilego ke efe?

¹¹ Ba bangwe ba itlwaeditše go dumelela diphošo  tša bona tša nakong e fetilego di ba imela go fihla bokgoleng bja gore ba ikwa ba se sa na mohola pele ga mahlo a Modimo. Ba ka ba ba nagana gore Modimo a ka se ba gaugele, mohlomongwe ka gobane ba dirile dibe tše dikgolo kudu goba ba di dirile ka makga a mantši kudu. Lega go le bjalo, therešo ke gore go sa šetšwe gore seo ba se dirilego nakong e fetilego ke sefe, ba ka sokologa, ba fetoga gomme ba kgopela go lebalelwa. (Dit. 3:19) Jehofa a ka ba gaugela le go ba bontšha botho, go etša ge a dirile bjalo ka batho ba bangwe ba bantši. Jehofa o kwela motho yo a ikokobeditšego le yo a botegago bohloko, e bile o tšeela godimo boitsholo bja gagwe bja go tšwa pelong. Modimo o dirile sona seo go Jobo yo a itšego: “Ke itshola ke le leroleng le meloreng.” (Jobo 42:6) Ka moka ga rena re swanetše go latela tsela ya Modimo ya go hwetša khutšo ya monagano ya gore: “Yo a bipago dikarogo tša gagwe a ka se atlege, eupša yo a ipobolago tšona gomme a di tlogela o tla gaugelwa.” (Die. 28:13; Jak. 5:14-16) Ka gona, re ka ipobola go Modimo, re rapelele gore a re lebalele gomme re gate megato ya go lokiša diphošo tša rena. (2 Bakor. 7:10, 11) Ge e ba re dirile dilo tše, gona re ka gaugelwa ke Yoo a ‘lebalelago kudu.’—Jes. 55:7.

12. (a) Mohlala wa Dafida o re ruta eng ka tsela e kaone ya go swaragana le letswalo le molato? (b) Jehofa o ile a itshola ka kgopolo efe, gomme go tseba ga rena seo go re thuša bjang? (Bona lepokisi.)

¹² Thapelo e ka re fa matla a gore Modimo a re thuše. Dafida o ile a ntšha sa mafahleng a gagwe ge a be a rapela a na le tumelo thapelo e botse yeo re e hwetšago ka gare ga Dipsalme. (Bala Psalme 32:1-5.) Go etša ge Dafida a bontšha, go leka go gatelela letswalo le molato go ile gwa mo fetša matla! Go bonagala a ile a tlaišega monaganong le mmeleng gomme a felelwa ke lethabo ka baka la go palelwa ke go ipobola dibe. Ke eng seo se dirilego gore Dafida a lebalelwe gomme a imologe? Ke ka go ipobola go Modimo. Jehofa o ile a araba dithapelo tša Dafida gomme a mo matlafaletša gore a tšwele pele ka bophelo gomme a dire dilo tšeo di nago le mohola. Ka mo go swanago, ge e ba o rapela ka pelo ka moka, o ka kgodišega gore Jehofa o tla go theetša ka kelohloko ge o mo lopa. Ge e ba o tlaišwa ke diphošo tšeo o di dirilego nakong e fetilego, di lokiše go fihla bokgoleng bjoo o ka kgonago gomme o dumele ge Jehofa a go kgonthišetša gore o go lebaletše!—Ps. 86:5.

13, 14. (a) Ke selo sefe se segolo seo re swanetšego go tshwenyega ka sona gona bjale? (b) Ke dipotšišo dife tšeo di ka re šušumeletšago gore re hlahlobe tsela yeo re phelago ka yona gona bjale?

¹³ Ke therešo gore re ka ithuta go dilo tša nakong e fetilego, eupša ga se ra swanela go dula re tshwenyega ka tšona. Go e na le go tshwenyega ka dilo tša nakong e fetilego, re swanetše go tshwenyega ka dilo tša gona bjale le tša ka moso. Ke eng seo re se dirago gona bjale, goba seo re palelwago ke go se dira, seo nywaga e mentši go tloga bjale re ka tlago ra duma ge nkabe re se ra se dira goba re se dirile ka tsela e fapanego? Na re phela bophelo bja go botega bjoo bo tlago go re thuša gore re se  ke ra tla ra itshola ka tsela le ge e le efe nakong e tlago?

¹⁴ Ge masetlapelo a magolo a dutše a batamela, ga re nyake gore re tshwenywe ke dipelaelo tše bjalo ka tše rego: ‘Na mohlomongwe nkabe ke ile ka dira mo go oketšegilego tirelong ya Modimo? Go re’ng motho a ile a se tsenele bobulamadibogo ge nako e be e mmulegetše? Ke eng seo se mpaledišitšego go hlankela ke le mohlanka wa bodiredi? Na ke ile ka dira boiteko bjo bogolo bja gore ke be le semelo se sefsa? Na ke mohuta wa motho yoo Jehofa a mo nyakago lefaseng la gagwe le lefsa?’ Go e na le gore re tshwenyege ka dipotšišo tšeo tše bohlokwa, re swanetše go di dirišetša go itlhahloba gomme re kgonthišetše gore re dira sohle seo se lego matleng a rena tirelong ya Jehofa. Ge e ba re sa dire bjalo, re tla ba re phela ka tsela yeo e ka feleletšago ka gore re itshole le go feta.—2 Tim. 2:15.

15, 16. (a) Ba bantši ba gafile dilo dife e le gore ba etiše pele tirelo ya bona go Modimo maphelong a bona? (b) Ke ka baka la’ng re sa swanela go itsholela boikgafo le ge e le bofe bjoo re bo dirilego e le gore re etiše Mmušo pele?

¹⁵ Go thwe’ng ka lena bao le ikgafilego gore le hlankele Jehofa ka go ba tirelong ya nako e tletšego? Mohlomongwe o ile wa kgetha go tlogela go phegelela mošomo o lefago tšhelete e ntši goba kgwebo e atlegilego e le gore o nolofatše bophelo bja gago gomme o be le nako e ntši ya go phegelela dikgahlego tša Mmušo. Goba mohlomongwe o ile wa se tsene lenyalong, goba ge e ba o le lenyalong, o ile wa kgetha go se be le bana e le gore o ka tsenela tirelo ya nako e tletšego yeo o bego o ka se kgone go e tsenela ge e ba o na le bana—e ka ba e le tirelo ya Bethele, modiro wa go aga wa ditšhabatšhaba, modiro wa tikologo goba tirelo ya boromiwa. Na o swanetše go itsholela diphetho tšeo ka ge bjale o tšofalela tirelong ya Jehofa? Na o swanetše go nagana gore boikgafo bjoo o bo dirilego bo be bo sa nyakege goba o bo dirile ka nako e sa swanelago? Le gatee!

¹⁶ O dirile diphetho tšeo ka gobane o rata Jehofa ka mo go tseneletšego le ka gobane o be o tloga o kganyoga go thuša bao ba bego ba nyaka go mo hlankela. O se ke wa nagana gore dilo nkabe di le kaone kudu ge nkabe o ile wa phela bophelo bja gago ka tsela e nngwe e fapanego. O swanetše go kgotsofatšwa kudu ke gore o dirile seo o bego o tseba gore se lokile go ya ka maemo a gago. Thabišwa ke gore o dirile sohle seo o ka se kgonago gore o hlankele Jehofa. A ka se tsoge a lebetše boikgafo bjoo o bo dirilego bophelong. Bophelong bja kgonthe bjo bo tlago, o tla go putsa ka ditšhegofatšo tšeo di phalago kgole tšeo o ka bago o di nagana ga bjale!—Ps. 145:16; 1 Tim. 6:19.

17, 18. (a) Ke eng seo se thušitšego Paulo gore a hlankele Modimo ntle le go itshola? (b) O ikemišeditše go dira eng ka tirelo ya gago go Jehofa ya nakong e fetilego, ya gona bjale le ya nakong e tlago?

¹⁷ Ke selo sefe seo Paulo a ithutilego sona seo se mo thušitšego gore a hlankele Modimo ntle le go itshola? Go etša ge phetholelo ya J. B. Phillips e bontšha, Paulo o ngwadile gore: “Tša kgale ke di tlogela kua morago gomme ke otlollela matsogo a ka go selo le ge e le sefe seo se lego kua pele e le gore ke fihlelele pakane ya ka.” (Bala Bafilipi 3:13, 14.) Paulo ga se a ka a dulela go nagana ka tsela e fošagetšego yeo a phetšego ka yona bodumeding bja Sejuda. Go e na le moo, o ile a fetša matla a gagwe ka moka a katanela gore a swanelegele moputso wa nakong e tlago wa bophelo bjo bo sa felego.

¹⁸ Ka moka ga rena re ka ithuta selo se sengwe mantšung ao a Paulo. Go e na le gore re dule re nagana ka dilo tša nakong e fetilego gomme ra tshwenyega ka dilo tšeo re ka se di dirollego, re swanetše go phegelela dilo tšeo di letšego kua pele. Go ba gona, re ka no se lebale diphošo tša rena tša nakong e fetilego, eupša ga se ra swanela go dula re ikopiša hlogo ka tšona. Re ka katanela go lebala ka dilo tša kgale, re dire sohle seo re ka se kgonago go hlankela Modimo gomme re fagahlele go bona bokamoso bjo bo kgahlišago!