1, 2. Ke ntwa efe ya kgonthe yeo e letšego ka pele, gona ke eng seo bahlanka ba Modimo ba sa swanelago go se dira ntweng ye?

KA October 30, 1938, batho ba dimilione kua United States ba be ba theeditše lenaneo le le tumilego la radio leo le nago le dipapadi tša sethaleng. Papadi yeo e bego e bapalwa mantšiboeng ao lenaneong leo la radio e be e theilwe pading ya nonwane ya thutamahlale yeo e bitšwago The War of the Worlds. Dibapadi tšeo di bego di bapala karolo ya go itira babegi ba ditaba di ile tša bolela ka tlhaselo ya madira ao a tšwago polaneteng ya Mars ao a bego a tla fediša Lefase. Gaešita le ge go be go tsebišitšwe gore lenaneo leo la radio e be e fo ba papadi, batheetši ba bantši ba ile ba nagana gore tlhaselo yeo e be e le ya kgonthe gomme ba tšhoga. Ba bangwe ba ile ba ba ba gata megato e itšego ba leka go itšhireletša bathong ba boikgopolelo bao ba tšwago polaneteng e nngwe.

² Lehono go na le ntwa ya kgonthe yeo e letšego ka pele. Lega go le bjalo, batho ga ba itokišetše ntwa ye. Ntwa ye ga e tšwe pading ya nonwane ya thutamahlale, eupša e tšwa ka Lentšung le le buduletšwego la Modimo, e lego Beibele. Ke ntwa ya Haramagedone, yeo go yona Modimo a lwantšhanago le batho ba babe tshepedišong ye e mpe ya dilo. (Kut. 16:14-16) Ntweng ye, go ka se nyakege gore bahlanka ba Modimo mo lefaseng ba itšhireletše bathong ba boikgopolelo bao ba tšwago polaneteng e nngwe. Lega go le bjalo, ba tla makatšwa ke ditiragalo tše di tlabago le matla a boifišago a Modimo.

3. Ke boporofeta bofe bjoo re tlago go bo hlahloba, gomme ke ka baka la’ng re nyaka go tseba ka bjona?

³ Boporofeta bja Beibele bjo bo lego go Sakaria kgaolo ya 14 bo kgoma ka go lebanya ntwa ya Haramagedone. Gaešita le ge bo ngwadilwe nywaga e 2 500 e fetilego, boporofeta bjo bo kgoma maphelo a rena. (Baroma 15:4)  Dilo tšeo go boletšwego ka tšona moo di tswalana le maemo ao a kgomago batho ba Modimo ga e sa le go tloga ge Mmušo wa Mesia o hlongwa legodimong ka 1914 le ditiragalo tše di kgahlišago tšeo di tlago go direga kgauswinyane. Dibopego tše di makatšago tša boporofeta bjo di akaretša go bulega ga “moedi o mogolo kudu” le go ela ga “meetse a phelago.” (Sak. 14:4, 8) Moedi wo o kgatha tema e bohlokwa bakeng sa go šireletšwa ga barapedi ba Jehofa. Le gona ge re kwešiša seo meetse a phelago a ka se bolelago go rena, re ka se bone feela go nyakega ga gore re a nwe eupša re tla ba ra nyaka le go a nwa. Ka gona, re tla holega ge re ela hloko boporofeta bjo.—2 Pet. 1:19, 20.

4. (a) “Letšatši la Jehofa” le thomile neng? (b) Nywagasome pele ga 1914, barapedi ba Jehofa ba ile ba tsebatša eng, gomme baetapele ba lefase ba ile ba arabela bjang?

⁴ Kgaolo ya 14 ya Sakaria e thoma ka go bolela ka “letšatši la Jehofa.” (Bala Sakaria 14:1, 2.) Letšatši leo ke eng? Ke ‘letšatši la Morena,’ leo le thomilego ge “mmušo wa lefase” o eba “mmušo wa Morena wa rena le wa Kriste wa gagwe.” (Kut. 1:10; 11:15) Letšatši leo le thomile ka 1914 ge Mmušo wa Mesia o be o tswalwa kua magodimong. Nywagasome pele ga 1914, barapedi ba Jehofa ba ile ba tsebatša ditšhabeng gore bofelo bja “dinako tše di beilwego tša ditšhaba” bo be bo tla tla ka ngwaga woo le gore lefase le be le tla ba le mathata ao le sa kago la ba le ona pele. (Luka 21:24) Ditšhaba di ile tša arabela bjang? Go e na le go theetša temošo yeo e bego e le nakong, baetapele ba dipolitiki le ba bodumedi ba ile ba kwera le go tlaiša baebangedi bao ba fišegago ba tloditšwego. Ka go dira bjalo, baetapele ba ba lefase ba be ba kwera Modimo Ramatlaohle ka boyena, ka gobane batseta ba tloditšwego ba Mmušo ba emela “Jerusalema wa legodimong,” e lego Mmušo wa Mesia—woo ba lego karolo ya wona.—Baheb. 12:22, 28.

5, 6. (a) Ke mogato ofe woo go boletšwego ka wona e sa le pele woo ditšhaba di o gatilego go lwantšha “motse” le “baagi” ba wona? (b)“Batho bao ba šetšego” ke bomang?

⁵ Sakaria o boletše e sa le pele ka mogato woo ditšhaba di tlago go o gata, ka gore: “Motse [wa Jerusalema] o tla thopša.” “Motse” woo o swantšhetša Mmušo wa Modimo ka Mesia. Mo lefaseng o emelwa ke “baagi” ba wona, e lego mašaledi a Bakriste ba tloditšwego. (Bafil. 3:20) Nakong ya Ntwa ya I ya Lefase, ditho tše di etelelago pele karolong e bonagalago ya mokgatlo wa Jehofa di ile tša “thopša,” goba tša golegwa, gomme tša lahlelwa kgolegong kua Atlanta, Georgia, U.S.A. ‘Dintlo di ile tša hulwa’ ka kgopolo ya gore manaba ao a ile a swara ditho tšeo le babotegi ba se nago molato ka go hloka toka le sehlogo. Manaba ao a ile a fediša tutuetšo e kgolo yeo mašaledi ao a bego a na le yona ka go thibela dikgatišo tša bona le mediro ya bona ya go ba bagoeledi ba Mmušo.

⁶ Gaešita le ge batho ba Modimo e be e le ba banyenyane ka palo, ba bolelwa gampe, ba ganetšwa le go tlaišwa diatleng tša manaba a bona, borapedi bja therešo ga se bja ka bja fedišwa. E be e le “batho bao ba šetšego,” e lego mašaledi a batlotšwa ao a ilego a gana ka mo go feletšego go ‘fedišwa motseng.’

7. Potego ya Dihlatse tše di tloditšwego tša Jehofa e beela barapedi ba therešo mohlala ofe lehono?

⁷ Na boporofeta bjo bo ile bja phethagala ka mo go feletšego mafelelong a Ntwa ya I ya Lefase? Aowa. Go be go tla ba le ditlhaselo tše dingwe tša ditšhaba go lwantšha mašaledi a tloditšwego le bagwera ba bona ba botegago bao ba nago le kholofelo ya go phela lefaseng. (Kut. 12:17) Ntwa ya II ya Lefase e ile ya hlatsela seo. Potego ya Dihlatse tše di tloditšwego tša Modimo e kgothatša bahlanka ba Modimo lehono gore ba kgotlelele  teko le ge e le efe yeo e ba welago, go akaretša le kganetšo e tšwago go ba leloko bao ba sa dumelego, bašomigotee le bona goba bao ba tsenago le bona sekolo gotee le bao ba ba kwerago ka baka la tumelo ya bona. (1 Pet. 1:6, 7) Go sa šetšwe moo ba dulago gona, barapedi ba therešo ba ikemišeditše go feta le ge e le neng pele gore ba ‘eme ba tiile ka moya o tee,’ ba sa ‘tšhošwe ke baganetši ba bona.’ (Bafil. 1:27, 28) Lega go le bjalo, batho ba Jehofa ba tla hwetša tšhireletšo kae lefaseng le le ba hloilego?—Joh. 15:17-19.

8. (a) Ka Beibeleng, dithaba di ka emela eng? (b) ‘Thaba ya mehlware’ e emela eng?

⁸ Ka ge “motse” wa Jerusalema o swantšhetša Jerusalema ya legodimong, gona “[thaba] ya mehlware, yeo e lego ka pele ga Jerusalema,” le yona e swanetše go tšewa e le ya seswantšhetšo. Thaba yeo e emela eng? E tla ‘fatoga bjang ka bogare’ gomme ya ba dithaba tše pedi? Ke ka baka la’ng Jehofa a di bitša gore ke ‘dithaba tša gagwe’? (Bala Sakaria 14:3-5.) Ka Beibeleng, dithaba di ka emela dipušo goba mebušo. Le gona, ditšhegofatšo le tšhireletšo di tswalanywa le thaba ya Modimo. (Ps. 72:3; Jes. 25:6, 7) Ka go re’alo, thaba ya mehlware yeo Modimo a emego go yona ka bohlabela bja Jerusalema ya lefaseng e emela bogoši bja Jehofa bja legohleng, mmušo wa gagwe o phagamego.

9. ‘Thaba ya mehlware’ e fatoga ka kgopolo efe?

⁹ Ke eng seo se emelwago ke go fatoga ga thaba ya mehlware? Thaba yeo e lego ka bohlabela bja Jerusalema e fatoga ka kgopolo ya gore Jehofa o hloma pušo e nngwe, e lego bogoši bjo bo swanago le bjoo. Bogoši bjoo ke Mmušo wa Mesia woo o lego ka diatleng tša Jesu Kriste. Ke ka fao Jehofa a bolelago gore dithaba tše pedi tšeo di bilego gona ka baka la go fatoga ga ‘thaba ya mehlware’ ke ‘dithaba tša gagwe.’ (Sak. 14:4) Ka moka ga tšona ke tša gagwe.

10. “Moedi o mogolo kudu” wo o lego magareng ga dithaba tše pedi o emela eng?

¹⁰ Ge thaba ya seswantšhetšo e fatoga gomme seripa se sengwe sa yona se eya ka leboa gomme se sengwe se eya ka borwa, maoto a Jehofa a dula a gatile dithaba tšeo ka bobedi. “Moedi o mogolo kudu” o thoma go ba gona ka tlase ga dinao tša Jehofa. Moedi wo wa seswantšhetšo o emela tšhireletšo ya Modimo yeo ka yona bahlanka ba Jehofa ba šireletšwago ka tlase ga bogoši bja gagwe bja legohle le ka tlase ga Mmušo wa Morwa wa gagwe Mesia. Jehofa o tla kgonthišetša gore borapedi bjo bo sekilego le ka mohla bo ka se fedišwe. Go fatoga moo ga thaba ya mehlware go diregile neng? Go diregile ge Mmušo wa Mesia o be o hlongwa mafelelong a Mabaka a Bantle ka 1914. Barapedi ba therešo ba thomile neng go tšhabela moeding wa seswantšhetšo?

11, 12. (a) Go tšhabela moeding wa seswantšhetšo go thomile neng? (b) Ke eng seo se hlatselago gore letsogo le matla la Jehofa le na le batho ba gagwe?

¹¹ Jesu o lemošitše balatedi ba gagwe gore: “Le tla ba ba hloilwego ke ditšhaba tšohle ka baka la leina la ka.” (Mat. 24:9) Ga e sa le go tloga ge mehla ya bofelo bja tshepedišo ye ya dilo bo thoma ka 1914, lehloyo leo le ile la gakala kudu. Go sa šetšwe go hlaselwa o šoro ga mašaledi a tloditšwego ke manaba a ona nakong ya Ntwa ya I ya Lefase, sehlopha seo se botegago ga se sa ka sa bolawa ka moka. Ka 1919 se ile sa lokollwa diatleng tša Babilona o Mogolo—mmušo wa lefase wa bodumedi bja maaka. (Kut. 11:11, 12) * Ye ke nako yeo go tšhabela moeding wa dithaba tša Jehofa go thomilego ka yona.

 ¹² Ga e sa le go tloga ka 1919, moedi wa Modimo wa tšhireletšo o tšwela pele go šireletša barapedi ba therešo lefaseng ka bophara. Nywagasomeng e fetilego, bodiredi bja tšhemo le dikgatišo tše di theilwego Beibeleng tša Dihlatse tša Jehofa di ile tša thibelwa dikarolong tše dintši tša lefase. Dithibelo tše bjalo di sa dutše di le gona dinageng tše dingwe. Lega go le bjalo, le ge ditšhaba di ka leka go fediša borapedi bja therešo, di ka se tsoge di atlegile le gatee! Letsogo le matla la Jehofa le tla ba le batho ba gagwe.—Doit. 11:2.

13. Re ka dula bjang re šireletšegile moeding wa Jehofa, gomme ke ka baka la’ng go le bohlokwa kudu gona bjale gore re dire seo?

¹³ Ge e ba re kgomarela Jehofa gomme re dula re tiile therešong, yena le Morwa wa gagwe Jesu Kriste ba tla phetha karolo ya bona, gomme Modimo a ka se dumelele motho le ge e le ofe goba selo le ge e le sefe se re ‘ubula seatleng sa Gagwe.’ (Joh. 10:28, 29) Jehofa o ikemišeditše go re thuša ka ditsela tšohle gore re mo kwe ka ge e le Mmuši wa Legohle gomme re dule re le balata ba botegago ba Mmušo wa Mesia. Go bohlokwa gore re dule re le moeding wa tšhireletšo, ka ge moedi woo o tla bolela se segolo kudu go barapedi ba therešo nakong ya masetlapelo a magolo ao a batamelago ka lebelo.

14, 15. Boemo e tla ba bofe go bao ba lego ka ntle ga moedi ‘mohla wa ge Modimo a elwa le manaba a gagwe ntweng’?

¹⁴ Ge bofelo bja tshepedišo ye ya dilo bo batamela, Sathane o tla matlafatša ditlhaselo tša gagwe go bahlanka ba Jehofa. Ke moka go tla tla ‘mohla wa ge Modimo a elwa le manaba a gagwe ntweng.’ Jehofa o tla kgonthišetša gore e nngwe ya ditlhaselo tša Sathane e ba ya mafelelo. Ka letšatši leo, Mmuši wa legohle o tla bontšha gabotse gore ke Mogale yo matla go feta wa “ntweng” le ge e le efe yeo e kilego ya lwewa.—Sak. 14:3.

¹⁵ Mohlang woo wa ntwa ya Modimo, boemo e tla ba bofe go bao ba lego ka ntle ga “moedi o mogolo” wa tšhireletšo? Ba ‘ka se hlabelwe ke seetša’ se se bontšhago gore ba amogelwa ke Modimo. Mohlang woo wa ntwa, “dipere, dimeila, dikamela, dipokolo tše tona le mehuta ka moka ya diruiwa,” e lego dika tšeo di swantšhetšago dibetša tša ditšhaba, di tla kgongwa ke seo. Dibetša tšeo di tla “kgahla,” tša se kgone go šoma bjalo ka ge eka di gwagwaladitšwe ke go tonya. Le gona Jehofa o tla diriša leuba la bolwetši le “kotlo.” Go sa šetšwe gore kotlo ye e tla ba ya kgonthe goba go se bjalo, e tla fediša ditšhošetšo tše di boifišago. Ka letšatši leo, ‘mahlo a motho le leleme la gagwe di tla bola’ ka kgopolo ya gore bahlasedi bao ba tla itia moya feela gomme ba tswalelwa melomo ya bona ya go ikgantšha. (Sak. 14:6, 7, 12, 15.) Ga go karolo ya lefase le yeo e tlago go phologa phedišo ye. Madira ao a lego ka lehlakoreng la Sathane ntweng yeo e tla ba e le a mantši. (Kut. 19:19-21) “Bao ba bolailwego ke Jehofa ba tla tlala go tloga pheletšong e nngwe ya lefase go ya go e nngwe.”—Jer. 25:32, 33.

16. Mabapi le mohla wa ntwa ya Modimo e batamelago, ke dipotšišo dife tšeo re swanetšego go naganišiša ka tšona, gomme ke eng seo re tla swanelwago ke go se dira?

¹⁶ Ntwa ka mehla e tliša tlaišego, gaešita le go bao mafelelong e tlago go ba bafenyi. Dijo di ka fela. Dithoto di ka lobja. Maemo a bophelo a ka theoga. Tokologo ya batho e ka no lekanyetšwa. Re tla arabela bjang ge mathata ao a re wela? Na re tla boifa? Na re tla latola tumelo ya rena ge re le ka tlase ga kgateletšo? Na re tla lahlegelwa ke kholofelo gomme ra nyama? Ruri go bohlokwa gore nakong ya masetlapelo a magolo re tšwele pele re bontšha tumelo matleng a phološago a Jehofa le go dula moeding wa Jehofa wa tšhireletšo!—Bala Habakuku 3:17, 18.

17, 18. (a) “Meetse a phelago” ke eng? (b) Ke eng seo se emelwago ke ‘lewatle la ka bohlabela’ le ‘lewatle la ka bodikela’? (c) Boikemišetšo bja gago ke bofe ge o dutše o lebeletše pele bokamosong?

¹⁷ Ka morago ga Haramagedone, “meetse a phelago” a tla tšwela pele a ela go tšwa sedulong sa bogoši sa Mmušo wa Mesia. “Meetse [ao] a phelago” ke ditokišetšo tša Jehofa tšeo di re thušago gore re hwetše bophelo. ‘Lewatle la ka bohlabela’ le šupa go Lewatle le le Hwilego, gomme ‘lewatle la ka bodikela’ le šupa go Lewatle la Mediterranean. Mawatle a ka bobedi a swantšhetša batho. Lewatle le le Hwilego le emela batho ka moka bao ba lego mabitleng. Ka ge Lewatle la Mediterranean le be le tletše ka diphedi, le emela gabotse “lešaba le legolo” la baphologi ba Haramagedone. (Bala Sakaria 14:8, 9; Kut. 7:9-15) Ka go re’alo, dihlopha tšeo ka bobedi di tla holwa ke go lokollwa kotlong ya lehu leo le bakilwego ke Adama ge di dula di timola lenyora la tšona ka meetse a phelago a seswantšhetšo, goba ka “noka ya meetse a bophelo.”—Kut. 22:1, 2.

¹⁸ Ka tlase ga tšhireletšo ya Jehofa, re tla phologa bofelo bja tshepedišo ye e mpe ya dilo gomme ra tsena lefaseng le lefsa la go loka la Modimo. Gaešita le ge re hloilwe ke ditšhaba ka moka, anke re fetšeng le dipelo tša rena gore re tla tšwela pele re le balata ba botegago ba Mmušo wa Modimo, re ikemišetšeng go dula re šireletšegile moeding wa Jehofa.