1. Boemo bja kgopolo bja ramabelo yo mongwe bo bontšha bjang maikemišetšo a rena a gore re se hwe matwa?

GO TLOGA mola Mary Decker e thomago go ba kgarebjana, go ile gwa bonagala gabotse gore e tla ba ramabelo wa go tuma. Go be go letetšwe gore a thope mentlele wa gauta lebelong la makgaolakgang la dimithara tše 3 000 dipapading tša di-Olympic tša 1984. Lega go le bjalo, o ile a palelwa ke go fetša lebelo leo. O ile a kgopša ke leoto la ramabelo yo mongwe gomme a wela fase. O ile a rwalelwa ka ntle a gobetše e bile a tšholla megokgo. Lega go le bjalo, Mary e be e se motho wa go hwa matwa. Mo e ka bago ngwaga ka morago, o ile a thoma go kitima gape gomme a hloma rekhoto e mpsha ya lefase lebelong la basadi ka 1985.

2. Bakriste ba therešo ba kitima lebelo ka kgopolo efe, gomme ke eng seo re swanetšego go lwela go se fihlelela?

² Ka ge re le Bakriste, le rena re kitima lebelo la seswantšhetšo. Re swanetše go lwela go fenya lebelo leo. Lebelo leo re le kitimago ga se le lekopana leo le nyakago gore re kitime ka go ipheleletša gore re fenye. Le gona ga se lebelo leo le nyakago gore re kitime ka go nanya gomme re fele re khutša. Go e na le moo, le ka swantšhwa le lebelo le letelele leo go nyakegago kgotlelelo gore motho a fenye. Moapostola Paulo o ile a diriša tshwantšhišo ya ramabelo lengwalong la gagwe leo a le ngwaletšego Bakriste bao ba bego ba dula Korinthe, e lego motse woo o bego o tsebja ka diphadišano tša boramabelo. O ngwadile gore: “Na ga le tsebe gore bakitimi lebelong ba kitima ka moka, eupša ke o tee feela yo a hwetšago moputso? Kitimang ka tsela yeo gore le o thope.”—1 Bakor. 9:24.

3. Go kgonega bjang gore bakitimi ka moka ba amogele moputso wa lebelo la bophelo bjo bo sa felego?

³ Beibele e re botša gore re kitime lebelo le la seswantšhetšo. (Bala 1 Bakorinthe 9:25-27.) Moputso wa gona ke bophelo bjo bo sa felego, e ka ba e le legodimong bakeng sa Bakriste ba tloditšwego goba mo lefaseng bakeng sa rena ba bangwe ka moka. Ka go fapana le diphadišano tše dintši  tša boramabelo, bohle bao ba tsenelago lebelo le gomme ba kgotlelela go fihla bofelong ba amogela moputso. (Mat. 24:13) Ke feela ge batšeakarolo ba palelwa ke go kitima go ya ka melao goba ba sa fetšego lebelo moo ba sa amogelego moputso. Go oketša moo, le ke lona lebelo feela leo moputso wa lona e lego bophelo bjo bo sa felego.

4. Ke eng seo se dirago gore lebelo la rena la go hwetša bophelo bjo bo sa felego le be boima?

⁴ Go fenya lebelo le ga go bonolo. Go nyakega gore motho a be le boitshwaro le morero. Ke motho o tee feela yo a kgonnego go fetša lebelo le ntle le go kgopša le gatee. Motho yoo ke Jesu Kriste. Eupša morutiwa wa gagwe Jakobo o ngwadile gore balatedi ba Kriste “ka moka ga [bona ba] kgopša gantši.” (Jak. 3:2) Ruri seo ke therešo! Ka moka ga rena re lebeletšana le go se phethagale ga rena ka noši le ga batho ba bangwe. Ka gona ka dinako tše dingwe re ka kgopša, ra thekesela gomme ra palelwa ke go ya pele. Re ka ba ra wa; eupša re a tsoga gomme ra tšwela pele re kitima. Ba bangwe ba ile ba wa gabohloko moo go ilego gwa nyakega gore ba thušwe go tsoga gomme ba tšwele pele ka lebelo gore ba le fetše. Ka gona, go na le kgonagalo ya gore re kgopše goba re we ka nakwana goba kgafetšakgafetša.—1 Dikg. 8:46.

5, 6. (a) Ke ka kgopolo efe ‘go se nago tšhitišo’ yeo e ka palelago Mokriste, gomme ke eng seo se tla mo thušago gore a ‘tsoge’? (b) Ke ka baka la eng ba bangwe ba palelwa ke go tsoga ka morago ga gore ba kgopše?

⁵ Seo re se dirago ge re kgopša goba re ewa se bontšha gabotse gore re batho ba mohuta ofe. Ba bangwe bao ba kgopšago goba ba wago ba a itshola gomme ba tšwela pele ba hlankela Modimo. Ba bangwe ba kgetha gore ba se itshole. Diema 24:16 e re: “Moloki le ge a ka wa gašupa, o tla tsoga gape; eupša ba kgopo ba tla wišwa ke bošula.”

⁶ Jehofa a ka se dumelele gore bao ba mmotago ba kgopše goba ba wišwe ke selo seo se tla dirago gore ba palelwe ke go tsoga—e ka ba e le ka baka la bothata goba manyami ao a ba welago borapeding bja bona. Re kgonthišeditšwe gore Jehofa o tla re thuša go “tsoga” e le gore re kgone go mo hlankela ka botlalo. Ruri seo ke se se homotšago go bohle bao ba ratago Jehofa ka dipelo tša bona ka moka! Ba kgopo ga ba na kganyogo yeo ya gore ba tsoge. Ga ba nyake  go thušwa ke moya o mokgethwa wa Modimo le batho ba gagwe, goba ba gana thušo e bjalo ge ba e newa. Go fapana le seo, go bao ba “ratago molao wa Jehofa” ga go tšhitišo yeo e ka ba kgopago sa ruri gore ba se sa tšwela pele ka lebelo la bophelo.—Bala Psalme 119:165.

7, 8. Go tla bjang gore motho a ‘we’ eupša a amogelwe ke Modimo?

⁷ Ba bangwe ba dira sebe se senyenyane—ka makga a mmalwa—ka baka la bofokodi bjo itšego. Eupša e sa dutše e le baloki mahlong a Jehofa ge e ba ba “tsoga,” ke gore, ge e ba ba itshola e le ka kgonthe gomme ba katanela go mo hlankela gape ka potego. Re kgona go bona seo tseleng yeo Modimo a ilego a swaragana le Isiraele ya bogologolo ka yona. (Jes. 41:9, 10) Lengwalo leo le tsopotšwego pejana la Diema 24:16, ga le gatelele kudu taba ya go wa ga rena, eupša le gatelela kudu taba ya go “tsoga” ga rena re thušwa ke Modimo wa rena yo a nago le kgaugelo. (Bala Jesaya 55:7.) Jehofa Modimo le Jesu Kriste ba bontšha gore ba a re bota ka ge ba re kgothaletša ka botho gore re ‘tsoge.’—Ps. 86:5; Joh. 5:19.

⁸ Le ge mokitimi a ka wa nakong ya lebelo le letelele, a ka ba le nako ya go emelela gomme a fetše lebelo leo ge e ba a ka gata megato ka go akgofa. Lebelong la rena la bophelo bjo bo sa felego, ga re tsebe ‘letšatši le iri’ tšeo lebelo le tlago go fela ka tšona. (Mat. 24:36) Lega go le bjalo, ge e ba re phema go se kgopše, re tlo kgona go dula re kitima gabotse, ra dula re le mo lebelong le gomme ra le fetša ka katlego. Ka gona re ka phema bjang go kgopša?

9. Re tlo ahlaahla ditšhitišo dife tše hlano tšeo di ka re kgopago?

⁹ Anke re ahlaahleng dilo tše hlano tšeo di ka re šitišago lebelong la rena—mafokodi a rena ka noši, dikganyogo tša nama, go swarwa gampe ke badumedigotee le rena, masetlapelo goba tlaišego gotee le go se phethagale ga ba bangwe. Eupša gopolang gore ge e ba re ile ra kgopša, Jehofa ga a re felele pelo le gatee. Ga a kitimele go bolela ka rena gore ga re botege.

10, 11. Dafida o ile a lwantšha bofokodi bofe?

¹⁰ Mafokodi a rena ka noši a ka swantšhwa le maswika a mantši ao a tletšego tseleng yeo re kitimago lebelo go yona. Go hlahloba ga rena ditiragalo tša bophelo bja Kgoši Dafida le bja moapostola Petro go ka re thuša go bona a mabedi a mafokodi a bjalo—go hloka boitshwaro le go boifa batho.

¹¹ Kgoši Dafida o ile a ba le bofokodi bja go palelwa ke go itshwara, go etša ge seo se bonagala tseleng yeo a ilego a dira dilo ka yona tabeng ya gagwe le Batseba. Le gona nakong ya ge Nabala a be a mo roga, Dafida o nyakile a dira dilo ka tsela e sego bohlale. Ee, o ile a palelwa ke go itshwara, eupša ga se a ka a kgaotša go leka go thabiša Jehofa. O ile a thušwa ke ba bangwe gore a hlankele Modimo ka tsela ya maleba.—1 Sam. 25:5-13, 32, 33; 2 Sam. 12:1-13.

12. Petro o ile a tšwela pele bjang a kitima lebelo go sa šetšwe go kgopša ga gagwe?

¹² Petro o ile a boifa batho, gomme seo sa dira gore ka dinako tše dingwe a kgopše gabohloko; eupša o ile a dula a botegela Jesu le Jehofa. Ka mohlala, o ile a latola Mong wa gagwe ka makga a mararo. (Luka 22:54-62) Ka morago ga moo, Petro o ile a palelwa ke go swara batho ka tsela ya Bokriste, ka gobane a be a swara badumedi ba Bantle bjalo ka ge eka ba be ba nyatšega ge ba bapetšwa le Bakriste ba bolotšego ba Bajuda. Lega go le bjalo, moapostola Paulo o ile a mo lemoša kotsi ya seo—gore kgethollo ga e nyakege ka phuthegong. Petro o be a fošitše. Pele ga ge boitshwaro bjoo bja Petro bo ka senya segwera se sebotse gare ga bana babo ka phuthegong, Paulo o ile a gata mogato ka gore a laye Petro ka go lebanya, ba lebantše difahlego. (Bagal. 2:11-14) Na Petro o ile a ikwa a nyaditšwe moo a ilego a kgaotša go kitima lebelo la bophelo? Aowa. O ile a naganišiša ka tayo ya Paulo, a e diriša gomme a tšwela pele a kitima lebelo.

13. Bolwetši bo ka dira bjang gore re kgopše?

¹³ Ka dinako tše dingwe bofokodi bja rena bo ka tlišwa ke bolwetši. Seo le sona se ka fetoga tšhitišo go rena. Bolwetši bo ka fokotša  lebelo la rena dilong tša moya gomme bja dira gore re thekesele re be re lape. Ka mohlala, kgaetšedi yo mongwe wa Mojapane o ile a swarwa ke bolwetši bjo bošoro nywaga e 17 ka morago ga gore a kolobetšwe. O ile a tshwenyega kudu ka boemo bja gagwe bja bophelo moo a ilego a thoma go fokola moyeng. Go se go ye kae o ile a tapa. Bagolo ba babedi ba ile ba mo etela. O ile a thoma go ya dibokeng gape ka morago ga gore ba mo kgothatše. O gopola gore: “Ke ile ka tšholla megokgo ka gobane bana babo rena ba ile ba ntumediša ka borutho.” Ga bjale kgaetšedi yo o boetše lebelong.

14, 15. Go nyakega megato efe ya kapelapela ge dikganyogo tše di fošagetšego di tšwelela? Bontšha.

¹⁴ Ba bantši ba kgopilwe ke dikganyogo tša nama. Ge dikganyogo tše di re leka, re swanetše go gata megato kapelapela gore re dule re hlwekile monaganong, boitshwarong le moyeng. Gopola keletšo ya Jesu ya gore re “lahlele kgole” ka tsela ya seswantšhetšo selo se sengwe le se sengwe seo se ka re kgopago, gaešita le ge e le leihlo la rena goba seatla sa rena. Na seo se ka se akaretše go nagana gotee le go dira dilo tše di gobogilego tšeo di dirilego gore ba bangwe ba kgaotše go kitima lebelo le?—Bala Mateo 5:29, 30.

¹⁵ Ngwanabo rena yo mongwe yo a godišeditšwego lapeng la Bakriste o ngwadile gore ke kgale a tshwenywa ke mekgwa ya bosodoma. O re: “Ka mehla ke be ke ikwa gore ga ke tsebe gabotse ge ke le mošemane goba mosetsana.” Ge a be a na le nywaga e 20, e be e šetše e le mmulamadibogo wa ka mehla e bile e le mohlanka wa bodiredi ka phuthegong. Ke moka o ile a kgopša gabohloko, a newa tayo ya Mangwalo le thušo e tšwago go bagolo. Ka go rapela, go ithuta Lentšu la Modimo le go fetša nako e ntši a thuša ba bangwe, o ile a itsoša gomme a thoma go kitima gape. Nywaga ka morago o dumela ka gore: “Ka dinako tše dingwe ke fela ke eba le maikwelo ao, eupša ga ke a dumelele gore a ntaole. Ke ithutile gore Jehofa a ka se dumelele gore o lekwe ka tsela yeo o ka se kgonego go kgotlelela. Ka gona ke dumela gore Modimo o nagana gore nka kgona go fenya.” Ngwanabo rena yo o phetha ka gore: “Mathata ka moka ao ke a kgotleletšego a tla fela lefaseng le lefsa. Ke nyaka sona seo! Go ba go fihlela ge nako yeo e etla, ke tla tšwela pele ke elwa.” O ikemišeditše go dula a le lebelong le.

16, 17. (a) Ke eng seo se thušitšego ngwanabo rena yo mongwe yo a bego a nagana gore o ile a swarwa gampe? (b) Re swanetše go tsepelela mang ge e ba re nyaka go phema go kgopša?

¹⁶ Go swarwa gampe ke badumedigotee le rena go ka fetoga ditšhitišo. Kua Fora, ngwanabo rena yo mongwe yo e kilego ya ba mogolo o ile a ipotša gore o swerwe gampe, gomme o ile a galefa o šoro. Ka baka la seo, o ile a kgaotša go kopanela le phuthego gomme a tapa. Bagolo ba babedi ba ile ba mo etela gomme ba mo theetša ka kelohloko ntle le go mo tsena ganong ge a dutše a ba anegela kamoo ditaba di diregilego ka gona go ya ka pono ya gagwe. Ba ile ba mo kgothaletša gore a lahlele maima a gagwe go Jehofa gomme ba gatelela gore selo se bohlokwahlokwa e be e le go kgahliša Modimo. O ile a arabela gabotse gomme go se go ye kae ke ge a boetše lebelong, a swaregile gape ka mediro ya phuthego.

¹⁷ Bakriste ka moka ba swanetše go tsepelela Hlogo e kgethilwego ya phuthego, e lego Jesu Kriste, e sego batho ba sa phethagalago. Jesu, yoo mahlo a gagwe ‘a etšago kgabo ya mollo,’ o bona dilo tšohle ka pono e nepagetšego, ke ka baka leo a bonago gabotse go feta kamoo re ka tsogago re bone ka gona. (Kut. 1:13-16) Ka mohlala, o a tseba gore seo rena re se lebelelago e le go swarwa gampe se ka ba se bakilwe ke go se kwešiše ga rena boemo bjoo goba go bo kwešišetša thoko. Jesu o tla swaragana le ditaba tša phuthego ka tsela e phethagetšego le ka nako ya maleba. Ka gona, ga se ra swanela go dumelela boitshwaro goba diphetho tša Mokristegotee le rena di fetoga ditšhitišo go rena.

18. Re ka fenya bjang diteko goba maemo a thata?

¹⁸ Ditšhitišo tše dingwe tše pedi ke masetlapelo goba tlaišego le go se phethagale ga ba bangwe ka phuthegong. Seswantšhong sa gagwe sa mobjadi,  Jesu o boletše gore “masetlapelo goba tlaišego” yeo e tlago ka baka la lentšu e tla dira gore batho ba bangwe ba kgopše. Go sa šetšwe gore tlaišego yeo e tlišwa ke ba lapa, baagišani goba balaodi ba mmušo, e ka kgoma ka go lebanya motho yoo ‘a sa tsemago modu,’ yo a sa tiago moyeng. (Mat. 13:21) Lega go le bjalo, ge e ba re dula re na le boemo bjo bo nepagetšego bja pelo, peu ya Mmušo e tla re thuša go ba le medu e tseneletšego yeo e thušago tumelo ya rena gore e se šišinyege. Ge o welwa ke diteko, katanela go rapela le go naganišiša ka dilo tšeo di tumišegago. (Bala Bafilipi 4:6-9.) Ka go thekgwa ke Jehofa, re tla kgona go fenya diteko, ra se dumelele gore maemo a thata e be ditšhitišo go rena.

19. Re ka phema bjang gore go kgopišwa ga rena ke batho ba bangwe e se be tšhitišo?

¹⁹ Ka manyami, ba bangwe go theoša le nywaga ba ile ba dumelela gore go se phethagale ga ba bangwe go ba dire gore ba kgaotše go kitima lebelong le. Go ba le pono e fapanego le ya ba bangwe ditabeng tšeo di nyakago gore motho a itirele phetho go ya ka letswalo la gagwe, go ile gwa fetoga ditšhitišo go bona. (1 Bakor. 8:12, 13) Ge e ba motho yo mongwe a re kgopiša, na re tla dumelela se e eba bothata bjo bogolo? Beibele e kgothaletša Bakriste gore ba tlogele go ahlola, ba lebalele ba bangwe gomme ba pheme go gapeletša go dira dilo tšeo ba nago le tshwanelo ya go di dira. (Luka 6:37) Ge o lebeletšane le tšhitišo, ipotšiše gore: ‘Na ke ahlola ba bangwe go ya ka dipono tša ka? Ka ge ke tseba gore bana bešo ga se ba phethagala, na ke tla dumelela go se phethagale ga motho yo mongwe go dira gore ke kgaotše go kitima lebelo la bophelo?’ Go rata ga rena Jehofa go ka re thuša gore re ikemišetše go se dumelele selo le ge e le sefe seo motho yo mongwe a se dirago se re thibela go fetša lebelo le.

20, 21. Ke eng seo o ikemišeditšego go se dira lebelong le la bophelo?

²⁰ Na o ikemišeditše go ‘fetša go kitima lebelo le’? (2 Tim. 4:7, 8) Ge e ba go le bjalo, o swanetše go ba le thuto ya motho ka noši. Diriša Beibele le dikgatišo tša rena go go thuša go dira nyakišišo, go naganišiša le go bona dilo tšeo e ka bago ditšhitišo. Kgopela moya o mokgethwa gore o go thuše go ba le kgotlelelo yeo o e nyakago. Gopola gore ga go mokitimi yoo a ka se fenyego lebelo la bophelo e le feela ka baka la ge a kgopša goba a ewa ka dinako tše dingwe. A ka tsoga gomme a boela lebelong. A ka ba a ithuta diphošong tša gagwe e le gore a kitime lebelo le ka tsela e kaone kudu.

²¹ Beibele e bontšha gore re swanetše go ba batšeakarolo lebelong la go hwetša bophelo bjo bo sa felego, e sego babogedi feela. Ga go swane le go fo namela pese yeo e rwalago batho gomme ya ba fihliša moo lebelo le fetšwago gona. Re swanetše go kitima ka borena lebelong le la bophelo. Ge re dutše re dira bjalo, re tla ‘atelwa ke khutšo’ e tšwago go Jehofa yeo e re kgorometšago ka morago bjalo ka phefo. (Ps. 119:165) Re ka kgodišega ka ditšhegofatšo tša gagwe tša gona bjale le ditšhegofatšo tša ka mo go sa felego tšeo di tlago go newa bohle bao ba tlago go fetša lebelo le.—Jak. 1:12.