JESU o boletše gore ga go leswika la tempele ya Jehofa leo le bego le tla tlogelwa le le godimo ga leswika le lengwe, e lego boporofeta bjo bo ilego bja phethagala ge madira a Roma a senya Jerusalema ka 70 C.E. ka tlase ga taolo ya Titus. (Mat. 24:2) Ka morago ga moo, Mmušiši Julian o ile a rulaganya gore tempele yeo e agwe lefsa.

Julian o bitšwa mmušiši wa mafelelo wa moheitene wa Roma. E be e le ngwana wa morwarrago Constantine yo Mogolo, gomme o ile a rutwa thuto yeo go thwego ke ya Bokriste. Lega go le bjalo, ka morago ga gore e be mmušiši ka 361 C.E., o ile a latola pepeneneng thuto yeo le mohuta wo o gobogilego wa Bokriste bja mehleng ya gagwe gomme a kgetha go ba moheitene. Dipuku tša histori di mmitša “Mohlanogi.”

Julian o be a hlaswa Bokriste. Le lengwe la mabaka e ka ba e be e le gore ge a be a na le nywaga e tshela, o ile a bona ge batho bao ba bego ba ipolela gore ke Bakriste ba bolaya tatagwe le ba leloko labo. Go ya ka boradihistori ba kereke, Julian o ile a kgothaletša Bajuda go aga tempele ya bona lefsa, e le ge a holofetše go bontšha gore Jesu e be e le moporofeta wa maaka. *

Ga go pelaelo gore Julian o ile a rulaganya gore tempele yeo e agwe lefsa. Boradihistori ba ngangišana ka taba ya ge e ba a ile a thoma modiro woo, le gore ge e ba a ile a o thoma, gona ke eng seo se ilego sa dira gore o kgaotše. Lega go le bjalo, go na le selo setee seo re kgodišegago ka sona. Nywaga ya ka tlase ga e mebedi ka morago ga gore Julian e be mmušiši, o ile a bolawa gomme modiro wa gagwe wa go aga tempele o ile wa hwelela le yena.