1. (a) Batho ba arabela ka ditsela dife ge ba eletšwa, gona ka baka la’ng? (b) Boikgogomošo bo ka dira gore motho a lebelele keletšo bjang?

BATHO ba arabela ka ditsela tše di sa swanego ge ba eletšwa. Ge motho yo a lego maemong a taolo a ba eletša ba ka arabela ka pelo e tšhweu, eupša ba se be le taba ge ba eletšwa ke dithaka tša bona goba batho bao ba ba nyatšago. Le gona tsela yeo batho ba arabelago ka yona maikwelong ge ba eletšwa goba ba kgalemelwa e ka fapana kudu. Ba bangwe ba ka nyama, ba hlokofala, ba lewa ke dihlong, ba ikwa ba nyatšwa gomme ba bangwe ba ka gata mogato wa go lokiša. Go re’ng batho ba arabela ka ditsela tše di sa swanego? Lebaka le lengwe ke boikgogomošo. Ruri boikgogomošo bo ka foufatša kahlolo ya motho, bja mo dira gore a gane keletšo gomme a se rutege.—Die. 16:18.

2. Ke ka baka la’ng Bakriste ba therešo ba amogela ka pelo e tšhweu keletšo e tšwago Lentšung la Modimo?

² Ka lehlakoreng le lengwe, Bakriste ba therešo ba amogela keletšo ka pelo e tšhweu, kudukudu ge e theilwe Lentšung la Modimo. Dikgopotšo tša Jehofa di re nea temogo, di a re ruta le go re thuša go phema melaba ya go swana le go rata dilo tše di bonagalago, boitshwaro bjo bo gobogilego le go diriša gampe dihlaretagi goba bjala. (Die. 20:1; 2 Bakor. 7:1; 1 Bathes. 4:3-5; 1 Tim. 6:6-11) Go oketša moo, re thabela “boemo bjo bobotse bja pelo” ka baka la go kwa dikgopotšo tša Jehofa.—Jes. 65:14.

3. Ke boemo bofe bja kgopolo bja mopsalme bjo re swanetšego go bo ekiša?

³ E le gore re šireletše tswalano ya rena e bohlokwa le Tatago rena wa legodimong, re swanetše go tšwela pele re diriša tlhahlo ya gagwe e bohlale maphelong a rena. Ruri e tla ba mo go kgahlišago ge re ka bontšha boemo bja kgopolo bja go swana le mopsalme yo a ngwadilego  gore: “Dikgopotšo tša gago ke di tšere e le leruo go iša mehleng ya neng le neng, ka gobane di dira gore pelo ya ka e hlalale.” (Ps. 119:111) Na le rena re thabela ditaelo tša Jehofa, goba na re fela re di lebelela e le morwalo? Le ge re fela re thatafalelwa ke go amogela keletšo, ga se ra swanela go nyema moko. Re ka bota bohlale bja Modimo bjo bo sa bapišwego le selo! Anke re ahlaahleng ditsela tše tharo tša kamoo re ka dirago seo ka gona.

4. Ke’ng seo Dafida a sa kago a kgaotša go se dira bophelong bja gagwe?

⁴ Kgoši Dafida o ile a ba le dinako tše bose le tše bohloko bophelong bja gagwe, eupša go na le selo seo se sa kago sa fetoga—o ile a dula a botile Mmopi. O itše: “Ke emišetša moya wa ka go wena Jehofa. Wena Modimo wa ka, ke botile wena.” (Ps. 25:1, 2) Ke’ng seo se thušitšego Dafida go bota Tatagwe wa legodimong?

5, 6. Lentšu la Modimo le re botša’ng ka tswalano yeo Dafida a bego a na le yona le Jehofa?

⁵ Batho ba bantši ba rapela Modimo ge ba le mathateng feela. O be o ka re’ng ge mogwera wa gago goba wa leloko a be a ka boledišana le wena ge feela a nyaka o mo adima tšhelete goba o mo thuša ka selotsoko? Ge nako e dutše e eya, a ka thoma go go lapiša. Eupša Dafida o be a se bjalo. Tswalano ya gagwe le Jehofa e be e bontšha gore bophelong bja gagwe ka moka o be a rata Modimo le go ba le tumelo go yena—go le thata goba go le bose.—Ps. 40:8.

⁶ Ela hloko mantšu a Dafida a go reta Jehofa le go mo leboga, ao a rego: “Ao Jehofa Morena wa rena, leina la gago ke le legolo gakaakang lefaseng ka moka, wena yoo go anegwago ka bogolo bja gago ka godimo ga magodimo!” (Ps. 8:1) Na ga o lemoge tswalano ya kgauswi yeo Dafida a bego a na le yona le Tatagwe wa legodimong? Go tšeela godimo ga Dafida bogolo bja Modimo le letago la gagwe go ile gwa mo tutueletša go reta Jehofa “letšatši ka moka.”—Ps. 35:28.

7. Re holega bjang ge re batamela Modimo ka thapelo?

⁷ Go etša Dafida, re swanetše go boledišana le Jehofa ka mehla gore re kgone go mmota. Beibele e re: “Batamelang Modimo gomme o tla le batamela.” (Jak. 4:8) Go batamela Modimo ka thapelo ke e nngwe ya ditsela tše bohlokwa tša go hwetša moya o mokgethwa.—Bala 1 Johane 3:22.

8. Ke ka baka la’ng re swanetše go phema go boaboeletša mantšu a itšego ge re rapela?

⁸ Ge o rapela, na o na le mokgwa wa go boaboeletša mantšu goba dipolelwana tše itšego? Ge e ba go le bjalo, fetša metsotso e sego kae o naganišiša ka seo o tlago go rapela ka sona. Ge o ka re o bolela le mogwera wa gago goba wa leloko wa dulela go boeletša mantšu a swanago, o tla go tšea bjang? A ka kgaotša go go theetša. Ke therešo gore Jehofa a ka se tsoge a hlokomologile thapelo e tšwago pelong ya mohlanka wa gagwe yo a botegago. Eupša ke mo gobotse gore re pheme go boaboeletša mantšu a itšego ge re bolela le yena.

9, 10. (a) Re ka akaretša’ng dithapelong tša rena? (b) Ke’ng seo se ka re thušago go rapela go tšwa pelong?

⁹ Go molaleng gore re ka se dire dithapelo tša go fo ithola kgwara ge re nyaka go batamela kgauswi le Modimo. Ge re tlwaela go ntšhetša Jehofa sa mafahleng, ke moo re tlago go batamela kgauswi kudu le yena le go mmota. Eupša re swanetše go akaretša’ng dithapelong tša rena? Lentšu la Modimo le araba ka gore: “Dilong tšohle tsebišang Modimo dikgopelo tša lena ka thapelo le ka topo gotee le ka go leboga.” (Bafil. 4:6) Ee, re ka rapela ka selo le ge e le sefe seo se kgomago tswalano ya rena le Modimo goba maphelo a rena re le bahlanka ba gagwe.

¹⁰ Ke mo go holago gore re hlahlobe mantšu a banna le basadi ba ba botegago bao dithapelo tša bona di begilwego ka  Beibeleng. (1 Sam. 1:10, 11; Dit. 4:24-31) Puku ya Dipsalme e tletše ka dithapelo tše di tšwago pelong le dikoša tšeo di opelelwago Jehofa. Dikoša le dithapelo tše di na le maikwelo ka moka, a tlalelo le a lethabo. Go sekaseka mantšu a bjalo ao a boletšwego ke babotegi bao go ka re thuša go rapela Jehofa go tšwa pelong.

11. Ke ka baka la’ng re swanetše go naganišiša ka dikeletšo tša Modimo?

¹¹ Dafida o itše: “Kgopotšo ya Jehofa e a botega, e dira gore yo a se nago temogo a be bohlale.” (Ps. 19:7) Ee, le ge re se na phihlelo, re ka ba bohlale ka go diriša melao ya Modimo. Lega go le bjalo, dikeletšo tše dingwe tša Mangwalo di nyaka gore re naganišiše ka tšona ge e ba re nyaka di re hola. Re swanetše go dira bjalo ge re nyaka go dula re botega ge re gateletšwa sekolong goba mošomong, ge re nyaka go kgomarela molao wa Modimo mabapi le madi, ge re nyaka go kgomarela boemagare bja Bokriste le ge re nyaka go diriša melao ya motheo ya Beibele mabapi le moaparo le go itokiša. Go ba le monagano wa Modimo dilong tše bjalo go tla re thuša go dula re le komana-madula-a-bapile. Ke moka re tla tseba seo re swanetšego go se dira ge go tšwelela bothata. Go naganišiša mo go bjalo le go itokiša e sa le pele go ka re efoša mathata.—Die. 15:28.

12. Re swanetše go naganišiša ka’ng ge re nyaka go boloka dikgopotšo tša Modimo?

¹² Ge re sa letile go phethagala ga dikholofetšo tša Modimo, na tsela yeo re phelago ka yona e bontšha gore re phakgame moyeng? Ka mohlala, na re tloga re dumela gore Babilona o Mogolo o kgauswi le go fedišwa? Na ditšhegofatšo tša nakong e tlago, tše bjalo ka bophelo bjo bo sa felego lefaseng la paradeise, ke tša kgonthe go rena go etša ge re be re sa thoma go di kwa? Na re sa fišega bodireding go e na le go etiša pele dikgahlego tša rena? Go thwe’ng ka kholofelo ya tsogo, go kgethagatšwa ga leina la Jehofa le go godišwa ga bogoši bja gagwe? Na re sa tšeela dilo tše godimo? Go naganišiša ka dipotšišo tše bjalo go ka re thuša go dira seo mopsalme a se boletšego, re boloke ‘dikgopotšo tša Modimo e le leruo go iša mehleng ya neng le neng.’—Ps. 119:111.

13. Ke ka baka la’ng Bakriste ba lekgolong la pele la nywaga ba ile ba thatafalelwa ke go kwešiša dilo tše dingwe? Nea mohlala.

¹³ Gona bjale re ka fo se kwešiše ka botlalo tše dingwe tša dilo tšeo di boletšwego ka Beibeleng ka gobane e sešo ya ba nako ya Jehofa ya go di utolla. Jesu o ile a botša baapostola ba gagwe leboelela gore o be a swanetše go tlaišwa le go bolawa. (Bala Mateo 12:40; 16:21.) Eupša baapostola ga se ba ka ba mo kwešiša. Ba ile ba kwešiša seo ka morago ga lehu la gagwe le tsogo ge a be a tšwelela go bona ka mmele wa nama, a tšwelela go barutiwa ba mmalwa gomme “a bula menagano ya bona ka mo go feletšego gore ba kwešiše seo se bolelwago ke Mangwalo.” (Luka 24:44-46; Dit. 1:3) Ka mo go swanago, balatedi ba Kriste ba be ba sa kwešiše gore Mmušo wa Modimo o be o theilwe legodimong go fihlela ba tšhollelwa moya o mokgethwa ka Pentekoste ya 33 C.E.—Dit. 1:6-8.

14. Mathomong a lekgolo la bo-20 la nywaga, ke mohlala ofe o mobotse woo bana babo rena ba bantši ba o beilego go sa šetšwe gore ba be ba sa kwešiše dilo tše itšego ka mehla ya bofelo?

¹⁴ Ka mo go swanago, mathomong a lekgolo la bo-20 la nywaga, go be go na le dilo tše mmalwa tšeo ka go se kwešiše Bakriste ba therešo ba bego ba di letetše mabapi le ‘mehla ya bofelo.’ (2 Tim. 3:1) Ka mohlala, ka 1914, ba bangwe ba be ba nagana gore go rotošetšwa ga bona legodimong go be go le kgauswi. Ge seo se be se sa direge, ba ile ba fatišiša Mangwalo lefsa gomme ba hwetša gore go sa na le modiro o mogolo wa boboledi woo o bego o swanetše go dirwa. (Mar. 13:10) Ka go re’alo, ka 1922, J. F. Rutherford, yoo ka nako yeo a bego a etelela pele modiro wa boboledi, o ile a botša bao ba bego ba  tlile kopanong ya ditšhabatšhaba kua Cedar Point, Ohio, U.S.A. gore: “Bonang, Kgoši e a buša! Lena le batseta ba yona ba go phatlalatša. Ka gona tsebatšang, tsebatšang, tsebatšang Kgoši le mmušo wa yona.” Go tloga ka yona nako yeo, go phatlalatša “ditaba tše dibotse tša Mmušo” e bile leswao la bahlanka ba Jehofa ba mehleng yeno.—Mat. 4:23; 24:14.

15. Re holwa bjang ke go naganišiša ka tsela yeo Modimo a bego a dirišana ka yona le batho ba gagwe?

¹⁵ Ge re naganišiša ka tsela e botse yeo Jehofa a ilego a dirišana ka yona le batho ba gagwe ba bogologolo le ba mehleng yeno, re ba le kgodišego e matla ya gore o tla phethagatša thato ya gagwe le merero ya gagwe nakong e tlago. Ka nako e swanago, dikgopotšo tša Modimo di re thuša go dula re nagana ka diporofeto tša gagwe tšeo di sa tlogo phethagala. Re ka kgodišega gore go dira bjalo go tla re thuša go bota dikholofetšo tša gagwe.

16. Ke ditšhegofatšo dife tšeo di tlišwago ke go dula re fišega bodireding?

¹⁶ Modimo wa rena Jehofa ke yo matla, ke Modimo yo a gatago mogato. Mopsalme o botšišitše gore: “Ke mang yo a lego matla go swana le wena, wena Jah?” O okeditše ka gore: “Seatla sa gago se tiile, seatla sa gago sa le letona se emišeditšwe godimo.” (Ps. 89:8, 13) Ka baka leo, Jehofa o tšeela godimo le go šegofatša maiteko a rena a go tšwetša pele dikgahlego tša Mmušo. Jehofa o a bona gore bahlanka ba gagwe—go sa šetšwe gore ke banna goba basadi, ba bagolo goba ba banyenyane—ga ba fo phutha matsogo gomme ba ja “dijo tša bobodu.” (Die. 31:27) E le go ekiša Mmopi wa rena, le rena re swarega ka mediro ya pušo ya Modimo. Go hlankela Modimo ka pelo ka moka go a re kgotsofatša, e bile go dira gore Jehofa a thabele go šegofatša bodiredi bja rena.—Bala Psalme 62:12.

17, 18. Ke ka baka la’ng re ka re ditiro tše di bontšhago tumelo di re thuša go bota keletšo ya Jehofa? Nea mohlala.

 ¹⁷ Ditiro tše di bontšhago gore re na le tumelo di re thuša bjang go bota Jehofa? Ela hloko pego ya Mangwalo ya ge Baisiraele ba be ba tsena Nageng ya Kholofetšo. Jehofa o be a laetše baperisita bao ba bego ba rwele areka ya kgwerano gore ba tsene ka Nokeng ya Jorodane. Lega go le bjalo, ge setšhaba se batamela, se ile sa bona gore dipula tša seruthwana di be di tladitše noka wa go falala. Baisiraele ba be ba swanetše go dira’ng? Na ba be ba swanetše go hloma mešaša kgauswi le noka gomme ba lete dibeke goba go feta moo go fihlela meetse a kokobetše? Aowa, ba ile ba bota Jehofa ka mo go feletšego gomme ba latela ditaelo tša gagwe. Mafelelo e bile afe? Pego yeo e re: “Gateetee ge dinao tša baperisita di se na go kgoma meetse, noka ya ema, . . . gomme baperisita ba ema mo go omilego gare ga noka kgauswi le Jeriko ge batho ka moka ba dutše ba tshela.” (Josh. 3:12-17, Contemporary English Version) Akanya kamoo seo se swanetšego go ba se ile sa ba matlafatša ka gona ge ba bona noka e bilokanago e kgaotša go ela! Ruri tumelo ya Baisiraele go Jehofa e ile ya matlafatšwa ka gobane ba ile ba bota ditaelo tša gagwe.

¹⁸ Ke therešo gore lehono Jehofa ga a direle bahlanka ba gagwe mehlolo, eupša o šegofatša ditiro tša bona tša go bontšha tumelo. Moya wa Modimo o šomago o ba matlafaletša go phetha modiro wo a ba neilego wona wa go bolela ka molaetša wa Mmušo lefaseng ka bophara. Le gona Hlatse e kgolo ya Jehofa, e lego Kriste Jesu yo a tsošitšwego, o ile a kgonthišetša barutiwa ba gagwe gore o tla ba thekga modirong wo o bohlokwa, ge a be a re: “Eyang le dire batho ba ditšhaba ka moka barutiwa . . . Ke na le lena matšatši ka moka go fihla bofelong bja tshepedišo ya dilo.” (Mat. 28:19, 20) Dihlatse tše dintši tše di bego di na le dihlong goba letšhogo di ka hlatsela gore moya o mokgethwa wa Modimo o di neile sebete sa go bolela le batho bao di sa ba tsebego bodireding.—Bala Psalme 119:46; 2 Bakorinthe 4:7.

19. Re na le kgodišego efe go sa šetšwe mafokodi ao re ka bago re na le ona?

¹⁹ Bana babo rena ba bangwe le dikgaetšedi ga ba kgone go dira dilo tše itšego ka baka la bolwetši goba botšofadi. Lega go le bjalo, ba ka kgodišega gore “Tate wa dikgaugelo le Modimo wa khomotšo yohle” o kwešiša maemo a Mokriste yo mongwe le yo mongwe wa therešo. (2 Bakor. 1:3) O tšeela godimo sohle seo re se dirago go tšwetša pele dikgahlego tša Mmušo. Ka moka ga rena re swanetše go dula re gopola gore go bontšha ga rena tumelo sehlabelong sa Kriste ke gona go re lebišago go phedišweng ga moya ge re dutše re dira sohle seo re ka se kgonago.—Baheb. 10:39.

20, 21. Re ka bontšha ka ditsela dife tše dingwe gore re bota Jehofa?

²⁰ Borapedi bja rena bo akaretša go gafa ka mo re ka kgonago ka gona nako ya rena, matla le dilo tša rena tše di bonagalago. Ee, re nyaka ka dipelo tša rena ka moka go “dira modiro wa moebangedi.” (2 Tim. 4:5) Ge e le gabotse re thabela go dira bjalo, ka ge seo se thuša ba bangwe gore ba “fihle tsebong e nepagetšego ya therešo.” (1 Tim. 2:4) Ruri go godiša Jehofa le go mo tumiša go re humiša moyeng. (Die. 10:22) Le gona go re thuša go bota Mmopi wa rena ka mo go feletšego go sa šetšwe seo se diregago.—Baroma 8:35-39.

²¹ Go etša ge re boletše, go bota gore Jehofa o tla re nea tlhahlo e bohlale ga go fo itiragalela ka mohlolo; re swanetše go go hlagolela. Ka gona ithekge ka Jehofa ka mo go feletšego ka thapelo. Naganišiša kamoo Jehofa a phethagaditšego thato ya gagwe nakong e fetilego le kamoo a tlago go e phethagatša ka gona nakong e tlago. Le gona tšwela pele o matlafatša go bota ga gago Jehofa ka ditiro tšeo di bontšhago tumelo. Ruri dikgopotšo tša Jehofa di tla dula di le gona go iša mehleng ya neng le neng. Go ka ba bjalo le ka wena!