1. Ke ka baka la’ng re ka thoma go fela pelo?

MEHLA ya bofelo ya tshepedišo ya Sathane e thomile ka 1914 ge Mmušo wa Mesia o be o hlongwa. Ka baka la ntwa yeo e bilego gona legodimong, Jesu o ile a lahlela Diabolo le batemona ba gagwe lefaseng. (Bala Kutollo 12:7-9.) Sathane o a tseba gore o šaletšwe feela ke “nako e kopana.” (Kut. 12:12) Lega go le bjalo, “nako” yeo e šetše e tšwetše pele ka nywagasome, gomme ba bangwe ba ka nagana gore mehla ya bofelo e tšere nako e telele. Ge re sa letetše gore Jehofa a gate mogato, na re thomile go fela pelo?

2. Ke’ng seo re tlago go se ahlaahla sehlogong se?

² Go fela pelo go ka ba kotsi ka gobane go ka re diriša dilo ntle le go nagana. Re ka dula bjang re na le moya wa go leta? Sehlogo se se tla re thuša go dira bjalo ka go araba dipotšišo tše di latelago. (1) Re ka ithuta’ng mabapi le go se fele pelo mohlaleng wa moporofeta Mika? (2) Ke ditiragalo dife tšeo di tla bontšhago gore nako ya rena ya go leta e fihlile mafelelong? (3) Re ka bontšha bjang gore re leboga go se fele pelo ga Jehofa?

3. Maemo a be a le bjang kua Isiraele mehleng ya Mika?

³ Bala Mika 7:2-6. Moporofeta wa Jehofa e lego Mika o ile a bona ge Baisiraele ba be ba phuhlama moyeng go fihlela ba dira dilo tše di šišimišago ka tlase ga pušo ya Kgoši Ahasi. Mika o ile a swantšha Baisiraele bao ba sa botegego le “mongana” le “lediga la meetlwa.” Go etša ge mongana goba lediga la meetlwa le gobatša motho le ge e le mang yo a le gatago, Baisiraele bao ba gobogilego ba be ba gobatša motho le ge e le mang yoo ba bego ba dirišana le yena. Kgobogo e ile ya ba e kgolo kudu moo le malapa a ilego a thubega. Ka ge Mika a be a lemoga gore ga go na seo a bego a ka se dira ka bothata bjoo, o ile a rapela Jehofa ka go tšwa pelong. Ke moka a leta ka go se fele pelo gore Modimo a gate mogato.  Mika o be a kgodišegile gore Jehofa o tla tsena ditaba gare ka nako ya Gagwe.

4. Ke ditlhohlo dife tšeo re lebanago le tšona?

⁴ Ka go swana le Mika, re gapeletšega go phela le batho bao ba nago le boithati. Ba bantši ‘ga ba leboge, ga ba botege e bile ga ba na lerato la tlhago.’ (2 Tim. 3:2, 3) Re a tshwenyega ge bao re šomago le bona, bao re tsenago sekolo le bona gotee le baagišani ba bontšha moya wa boithati. Lega go le bjalo, ba bangwe ba bahlanka ba Modimo ba lebeletšane le tlhohlo e kgolo kudu. Jesu o itše balatedi ba gagwe ba be ba tlo tlaišwa ke ba malapa a gabo bona, gomme o dirišitše mantšu ao a nyakilego a swana le ao a begilwego go Mika 7:6 go hlalosa tsela yeo molaetša wa gagwe o bego o tla ba kgoma ka yona. Jesu o itše: “Ke tletše go baka karogano magareng ga motho le tatagwe, morwedi le mmagwe, le magareng ga ngwetši le mmatswale. Ka kgonthe manaba a motho e tla ba batho ba lapeng la gabo.” (Mat. 10:35, 36) Go tloga go le thata go kgotlelela go kwerwa le go ganetšwa ke ditho tša lapa tšeo di sego bodumeding bjo tee le rena! Ge re lebana le teko e bjalo, anke re se ke ra ineela kgateletšong ya lapa. Go e na le moo, anke re duleng re botega le go leta Jehofa ka go se fele pelo gore a lokiše ditaba. Ge e ba ka mehla re kgopela thušo ya gagwe, o tla re nea matla le bohlale tšeo di nyakegago gore re kgotlelele.

5, 6. Jehofa o ile a putsa Mika bjang, eupša ke’ng seo Mika a sa kago a se bona?

⁵ Jehofa o ile a putsa Mika ka baka la go se fele pelo ga gagwe. Mika o ile a bona ge Kgoši Ahasi a be a fedišwa le ge go be go fedišwa pušo ya gagwe e kgopo. O ile a bona ge morwa wa Ahasi, e lego Kgoši Hesekia wa go loka, a dula sedulong sa bogoši gomme a tsošološa borapedi bjo bo sekilego. Le gona molaetša wa Jehofa wa go ahlola Samaria woo o boletšwego ke Mika o ile wa phethagala ge Baasiria ba be ba šwahlela mmušo wa ka leboa wa Isiraele.—Mika 1:6.

⁶ Lega go le bjalo, Mika ga se a ka a bona go phethagala ga dilo ka moka tšeo Jehofa a ilego a mmudulela gore a di porofete. Ka mohlala, Mika o ngwadile gore: “Mehleng ya bofelo thaba ya ntlo ya Jehofa e tla thewa ya tia e phagametše dithaba tše dingwe gomme e tla phagamela le meboto; meraforafo e tla kgeregela go yona. Ditšhaba di tlo ya go yona tša re: ‘Etlang re rotogeleng thabeng ya Jehofa.’” (Mika 4:1, 2) Mika o hwile nako e telele pele ga ge boporofeta bjoo bo ka phethagala. Lega go le bjalo, o be a ikemišeditše go dula a botegela Jehofa go fihla lehung, go sa šetšwe seo batho bao a bego a phela le bona ba bego ba se dira. Tabeng ye, Mika o ngwadile gore: “Ge e le morafo o mongwe le o mongwe o tla sepela ka leina la modimo wa wona; eupša ge e le rena, re tla sepela ka leina la Jehofa Modimo wa rena go iša mehleng ya neng le neng, gaešita le ka mo go sa felego.” (Mika 4:5) Mika o ile a kgona go leta ka go se fele pelo dinakong tše thata ka baka la ge a be a tloga a kgodišegile gore Jehofa o tla phethagatša dikholofetšo tša Gagwe ka moka. Moporofeta yo yo a botegago o be a bota Jehofa.

7, 8. (a) Ke ka baka la’ng re na le lebaka la go bota Jehofa? (b) Ke’ng seo se tla dirago gore nako e fete ka go akgofa?

⁷ Na le rena re bota Jehofa ka tsela e swanago? Re na le lebaka le le kwagalago la go mmota. Re bone ka noši go phethagala ga boporofeta bja Mika. “Mehleng ya bofelo,” batho ba dimilione go tšwa ditšhabeng, melokong le malemeng ka moka ba kgeregetše ‘thabeng ya ntlo ya Jehofa.’ Gaešita le ge barapedi ba ba etšwa ditšhabeng tšeo di sa kwanego, ba rutše “ditšhoša tša bona ba di dira megoma” gomme ga ba sa ‘hlwa ba ithuta ntwa.’ (Mika 4:3) Ruri re na le tokelo e kgolo kudu ya go ba gare ga batho ba Jehofa bao ba nago le khutšo!

⁸ Re na le lebaka le le kwagalago la go nyaka gore Jehofa a tliše bofelo bja tshepedišo ye ya dilo kgauswinyane. Lega go le bjalo, e le gore re kgone go leta ka go se  fele pelo, re swanetše go lebelela ditaba go ya ka pono ya Jehofa. O beile letšatši leo a tlago go ahlola batho “a diriša motho yo a mmeilego,” e lego Jesu Kriste. (Dit. 17:31) Eupša pele ga moo, Modimo o nea batho ba mehuta ka moka sebaka sa go hwetša ‘tsebo e nepagetšego ya therešo,’ gore ba diriše tsebo yeo gomme ba phološwe. Maphelo a kotsing. (Bala 1 Timotheo 2:3, 4.) Ge e ba re swaregile ka go thuša ba bangwe go hwetša tsebo e nepagetšego ka Modimo, nako yeo e šetšego pele kahlolo ya Jehofa e etla e tla feta ka go akgofa. Kgauswinyane—ka ponyo ya leihlo—bofelo bo tla tla. Ge bofelo bo fihla, re tla thaba gakaakang gore re ile ra dula re swaregile modirong wa go bolela ka Mmušo!

9-11. Na lengwalo la 1 Bathesalonika 5:3 le šetše le phethagetše? Hlalosa.

⁹ Bala 1 Bathesalonika 5:1-3. Go se go ye kae, ditšhaba di tla re: “Go na le khutšo le polokego!” E le gore kgoeletšo ye e se ke ya re hwetša re sa itebetše, a “re duleng re phafogile gomme re dule re hlaphogetšwe monaganong.” (1 Bathes. 5:6) Go re thuša gore re dule re phafogile moyeng, anke re ahlaahleng ka bokopana ditiragalo tšeo di lebišago kgoeletšong ye.

¹⁰ Ka morago ga ditlamorago tša dintwa tše pedi tša lefase, ditšhaba di be di nyoretšwe khutšo. Ka morago ga ntwa ya pele ya lefase, go ile gwa hlongwa Kgwerano ya Ditšhaba ka kholofelo ya gore e tla tliša khutšo. Ka morago ga ntwa ya bobedi ya lefase, Ditšhaba tše Kopanego e bile kholofelo e kgolo ya go tliša khutšo lefaseng. Baetapele ba mmušo le ba bodumedi ba botile mekgatlo yeo gore e tla tlišetša batho khutšo. Ka mohlala, ka 1986, Ditšhaba tše Kopanego di ile tša tsebiša gore ngwaga woo ke Ngwaga wa Ditšhabatšhaba wa Khutšo. Ngwageng woo, baetapele ba ditšhaba le ba madumedi a mantši ba ile ba bokana le moetapele wa Kereke ya Katholika kua Assisi, Italy, go rapelela khutšo.

¹¹ Lega go le bjalo, kgoeletšo yeo ya khutšo le polokego le tše dingwe tše di swanago le yona ga se tša phethagatša boporofeta bjo bo begilwego go 1 Bathesalonika 5:3.  Ka baka la’ng? Ka gobane “tshenyego ya tšhoganyetšo” yeo go boletšwego ka yona e sa le pele ga se ya tšwa e direga.

12. Re tseba’ng ka kgoeletšo ya gore “Go na le khutšo le polokego”?

¹² Ke bomang bao ba tlago go dira kgoeletšo ye ya nakong e tlago ya gore “Go na le khutšo le polokego”? Baetapele ba Bojakane le ba madumedi a mangwe ba tla kgatha tema efe? Baetapele ba mebušo e fapafapanego ba tla akaretšwa bjang kgoeletšong ye? Mangwalo ga a re botše. Seo re se tsebago ke gore go sa šetšwe gore kgoeletšo yeo e tla tla ka sebopego sefe goba gore e tla ba e le e kgodišago gakaakang, e tla ba e se khutšo ya kgonthe. Tshepedišo ye ya kgale e tla dula e laolwa ke Sathane. E bodile wa go bola gomme e ka se fetoge. Ruri e tla ba mo go nyamišago kudu ge e ba ba bangwe ba rena ba ka dumela maaka a Sathane gomme ba kwanantšha boemagare bja rena bja Bokriste!

13. Ke ka baka la’ng barongwa ba thibile diphefo tše di senyago?

¹³ Bala Kutollo 7:1-4. Ge re sa letile go phethagala ga 1 Bathesalonika 5:3, barongwa ba matla ba thibile diphefo tše di senyago tša masetlapelo a magolo. Ba letile eng? Ba letile tiragalo e nngwe ya bohlokwa yeo e hlalositšwego ke moapostola Johane, e lego ya go swaiwa ga mafelelo ga “bahlanka [bao ba tloditšwego] ba Modimo wa rena.” * Ge go swaiwa moo ga mafelelo go phethilwe, barongwa bao ba tla lokolla diphefo tše di senyago. Go tla direga’ng ka morago ga moo?

14. Re bona ka’ng gore Babilona o Mogolo o kgauswi le go fedišwa?

¹⁴ Babilona o Mogolo, e lego mmušo wa lefase wa bodumedi bja maaka, o tla hwetša phedišo yeo e mo lebanego. “Merafo, mašaba, ditšhaba le maleme” di ka se kgone go mo thekga. Re šetše re bona maswao a gore o kgauswi le go fedišwa. (Kut. 16:12; 17:15-18; 18:7, 8, 21) Ge e le gabotse, gona bjale go tloga go bonagala mekerong ya ditaba gore ga a sa thekgwa, ka gobane bodumedi le baetapele ba bodumedi ba hlaselwa kudu mekerong yeo. Lega go le bjalo, ge e le baetapele ba Babilona o Mogolo bona ba hlabile kgobe ka mootlwa. Ga se ba botšiša! Ka morago ga gore batho ba bolele gore “Go na le khutšo le polokego!” mekgatlo ya dipolitiki ya tshepedišo ya Sathane e tla hlasela bodumedi bja maaka gateetee gomme ya bo fediša. Babilona o Mogolo a ka se sa ba gona le ka mohla! Ruri go letela ditiragalo tše bjalo ka go se fele pelo ga se ga lefeela.—Kut. 18:8, 10.

15. Ke ka baka la’ng Jehofa a sa kitimele go gata mogato?

¹⁵ Go sa šetšwe thogako yeo batho ba pharago leina la gagwe ka yona, Jehofa o letile ka go se fele pelo nako ya maleba ya gore a gate mogato. Jehofa ga a nyake gore motho le ge e le ofe wa pelo e botse a fedišwe. (2 Pet. 3:9, 10) Na le rena re ikwa bjalo? Pele letšatši la Jehofa le fihla, re ka bontšha gore re leboga go se fele pelo ga gagwe ka go dira dilo tšeo di latelago.

16, 17. (a) Ke ka baka la’ng re swanetše go thuša bao ba tapilego? (b) Ke ka baka la’ng bao ba tapilego ba swanetše go boela go Jehofa ka pelapela?

¹⁶ A re thušeng bao ba tapilego. Jesu o itše go ba le lethabo le legolo legodimong ge nku e tee feela yeo e timetšego e hwetšwa. (Mat. 18:14; Luka 15:3-7) Go molaleng gore Jehofa o tshwenyega kudu ka bohle bao ba bontšhitšego gore ba rata leina la gagwe, gaešita le ge ga bjale ba sa mo hlankele ka mafolofolo. Ge re thuša batho ba bjalo go boela ka phuthegong, re tsenya letsogo go thabišeng Jehofa le barongwa.

¹⁷ Na o gare ga bao ga bjale ba sa hlankelego Modimo ka mafolofolo? Mohlomongwe yo mongwe ka phuthegong o ile a  go kgopiša gomme wa tlogela mokgatlo wa Jehofa. Ka ge e ka ba e le kgajana seo se diregile, ipotšiše gore: ‘Na ga bjale bophelo bja ka bo bose le go thabiša go feta pele? Na ke kgopišitšwe ke Jehofa goba ke motho wa go swana le nna? Na Jehofa Modimo o kile a nkweša bohloko?’ Ge re bolela therešo, ke kgale Jehofa a re phutha. Le ge re fela re aroga boineelong bja rena, o re dumelela go thabela dilo tše dibotse tšeo a re neago tšona. (Jak. 1:16, 17) Letšatši la Jehofa le kgauswi kudu. Ga bjale ke nako ya gore re boele ka diatleng tše lerato tša Tatago rena wa legodimong le ka phuthegong—lefelo le nnoši le le šireletšegilego mehleng ye ya bofelo.—Doit. 33:27; Baheb. 10:24, 25.

18. Ke ka baka la’ng re swanetše go thekga bao ba re etelelago pele?

¹⁸ A re thekgeng ka pelo ka moka bao ba etelelago pele. Ka ge Jehofa e le Modiši yo lerato, o a re hlahla le go re šireletša. O kgethile Morwa wa gagwe gore e be Modiši yo Mogolo wa mohlape. (1 Pet. 5:4) Bagolo diphuthegong tša ka godimo ga tše 100 000 ba diša dinku tša Modimo ka e tee ka e tee. (Dit. 20:28) Ge re thekga ka pelo ka moka bao ba kgethilwego gore ba re etelele pele, re bontšha gore re leboga Jehofa le Jesu bakeng sa sohle seo ba re diretšego sona.

19. Re ka ba ngatana e tee bjang?

¹⁹ A re batamelaneng. Se se ra go re’ng? Ge madira ao a tlwaeditšwego gabotse a hlaselwa ke manaba, madira ka moka a a kgobokana, ke gore, lešole le lengwe le batamela kgauswi le le lengwe. Ka go re’alo a ba ngatana e tee yeo e sa fenyegego. Sathane o gakatša ditlhaselo tša gagwe bathong ba Modimo. Ye ga se nako ya gore re lwe le bana babo rena. Ke nako ya gore re batamelane, re hlokomologe mafokodi a ba bangwe gomme re bote boetapele bja Jehofa.

20. Re swanetše go dira’ng gona bjale?

²⁰ Eka ka moka ga rena re ka dula re phakgame moyeng gomme re bontšhe moya wa go leta. Anke re leteng ka go se fele pelo kgoeletšo ya gore “Go na le khutšo le polokego!” le nako ya go swaiwa ga mafelelo ga bakgethwa. Ka morago ga moo, barongwa ba bane ba tla bulela diphefo tše di senyago gomme Babilona o Mogolo a fedišwa. Ge re sa letetše ditiragalo tše tše bohlokwa, anke re amogeleng tlhahlo yeo re e newago ke bao ba kgethilwego gore ba re etelele pele ka mokgatlong wa Jehofa. Anke re lweng le Diabolo le batemona ba gagwe re le ngatana e tee! Ye ke nako ya gore re kwe kgothatšo ya mopsalme, e rego: “Ebang le sebete gomme le beteng pelo, lena bohle bao le letetšego Jehofa.”—Ps. 31:24.