Na o badile ka kelohloko ditokollo tša morago bjale tša Morokami? Bona ge e ba o ka kgona go araba dipotšišo tše di latelago:

Jesu o boletše neng le “meoya yeo e bego e le kgolegong”? (1 Pet. 3:19)

Go bonagala eka neng neng ka morago ga ge Jesu a tsošitšwe bahung, o ile a botša meoya e kgopo gore e tla hwetša kotlo e feletšego yeo e e swanetšego.—6/15, letlakala 23.

Ke ditlhohlo dife tše tharo tšeo di ka dirago gore lenyalo la bobedi le se atlege?

Ke tše di latelago: Go thatafalelwa ke go dira gore lenyalo la gago la pele le se tsenatsenane le lenyalo la gago la bobedi; go fetša nako o na le bagwera ba kgale bao ba sa tlwaelanago le molekane wa gago yo mofsa; go thatafalelwa ke go bota molekane wa gago ka ge molekane wa pele a ile a se botege.—7/1, matlakala 9-10.

Jesu o ahlola neng batho gore ke dinku goba dipudi? (Mat. 25:32)

Se se tla direga ge Jesu a etla go ahlola batho nakong ya masetlapelo a magolo, ka morago ga go fedišwa ga bodumedi bja maaka.—7/15, letlakala 6.

Ke neng moo batho ba go hloka molao bao go boletšwego ka bona seswantšhong sa korong le mefoka ba tlago go tsikitlanya meno? (Mat. 13:36, 41, 42)

Ba tla dira bjalo nakong ya masetlapelo a magolo ge ba lemoga gore ba ka se phologe phedišo yeo.—7/15, letlakala 13.

Mantšu a Jesu a mabapi le mohlanka yo a botegago le wa temogo a phethagatše neng? (Mat. 24:45-47)

A thomile go phethagala ka morago ga 1914, e sego ka Pentekoste ya 33 C.E. Ka 1919, mohlanka o ile a bewa gore a hlokomele ba ntlo, bao ba akaretšago Bakriste ka moka bao ba newago dijo tša moya.—7/15, matlakala 21-23.

Jesu o bea neng mohlanka yo a botegago gore a hlokomele dilo tša gagwe ka moka?

Seo se tla direga nakong e tlago, nakong ya masetlapelo a magolo ge mohlanka yo a botegago a hwetša moputso wa legodimong.—7/15, letlakala 25.

Na ge Beibele e sa bitše baanegwa ba bangwe ka maina go ra gore ba be ba tsebja ka mekgwa e mebe goba ba se bohlokwa?

Aowa, re ka se re’alo. Go na le batho ba bangwe bao Beibele e sa ba bitšego ka maina bao ba bego ba lokile le bao ba bego ba dira dilo tše mpe. (Ruthe 4:1-3; Mat. 26:18) Beibele e re botša ka barongwa ba babedi feela bao ba botegago.—8/1, letlakala 10.

Go tlaleletša matleng a tšwago go Modimo, ke eng seo se ilego sa thuša Dihlatse tše 230 go phologa mogwanto wa go tloga kampeng ya tshwenyo ya Sachsenhausen?

Le ge di be di feditšwe matla ke tlala le malwetši, di ile tša dula di kgothatšana gore di tšwele pele di sepela.—8/15, letlakala 18.

Ke ka baka la’ng pego ya ge Baisiraele ba be ba tshela Noka ya Jorodane go tsena Nageng ya Kholofetšo e re kgothatša?

Le ge noka yeo e be e tletše wa go falala, Jehofa o ile a emiša meetse a yona gore batho ba gagwe ba kgone go tshela. Seo se swanetše go ba se ile sa matlafatša tumelo ya bona go Jehofa le go mmota, le gona pego yeo e ka re matlafatša.—9/15, letlakala 16.

Go dirišwa ga mebala ka makga a mantši ka Beibeleng go bontšha’ng?

Go dirišwa ga mebala ka Beibeleng go bontšha gore Modimo o kwešiša kamoo mmala o kgomago batho maikwelong le gore mmala o ka re thuša go gopola dilo tše itšego.—10/1, matlakala 14-15.

Boporofeta bjo bo begilwego go Mika 5:5 mabapi le bakgomana le badiši bo phethagala bjang lehono?

Re kwešiša gore ‘badiši ba šupago le bakgomana ba seswai’ bao go boletšwego ka bona go Mika 5:5 ba šupa go bagolo bao ba kgethilwego ka diphuthegong, bao ba matlafatšago batho ba Modimo bakeng sa tlhaselo e tlago yeo ba tlago go lebeletšana le yona yeo go boletšwego ka yona e sa le pele.—11/15, letlakala 20.

A mangwe a mabaka a gore re nyake Modimo ke afe?

Re nyaka tlhahlo e botse le ditharollo tša mathata a bophelo, e lego dilo tšeo re ka di hwetšago go Modimo. O re thuša gore re phele gabotse le gore re thabe, le gona o tla phethagatša dikholofetšo tšeo di lego ka Lentšung la gagwe e le gore se se kgonege.—12/1, matlakala 4-6..