1, 2. Ke ka baka la’ng bofora bo atile gakaakaa lehono, gona bo ka tla ka dibopego dife? (Bona seswantšho se se lego ka mo godimo.)

BORADIA, bomenetša le bofora ke dilo tšeo di atilego tshepedišong ye ya dilo. Se ga se sa swanela go re makatša. Beibele e hlalosa ka mo go kwagalago gore Sathane Diabolo ke mofori wa mahlwa-a-di-bona le mmuši wa tshepedišo ye ya dilo. (1 Tim. 2:14; 1 Joh. 5:19) Ge bofelo bja tshepedišo ye e kgopo ya dilo bo dutše bo batamela, kgalefo ya Sathane e a oketšega ka gobane o šaletšwe feela ke “nako e kopana.” (Kut. 12:12) Ka gona re ka letela gore bofora bja bao ba tutuetšwago ke Diabolo bo oketšege, bao maikemišetšo a bona e lego go fora bao ba thekgago borapedi bja therešo.

² Ka dinako tše dingwe mekerong ya ditaba go bolelwa maaka a matala ka bahlanka ba Jehofa le ka ditumelo tša bona. Dihlogo tša dikuranta, mananeo a thelebišene le mekero ya Inthanete e dirišetšwa go phatlalatša maaka ao. Ka baka leo, batho ba bangwe ba fo dumela maaka a bjalo gomme ba thoma go re hloya.

3. Ke’ng seo se ka re thušago go lwantšhana le bofora?

³ E le gore re lwantšhane le leano le leo le nolago moko la lenaba la rena, re na le Lentšu la Modimo leo le ‘holago ka go phošolla.’ (2 Tim. 3:16) Ke gabohlokwa gore re ithute go tšwa mangwalong a moapostola Paulo ao a bolelago gore Bakriste ba bangwe ba lekgolong la pele la nywaga ba kua Thesalonika ba ile ba arošwa, ba dumela maaka. O ile a ba eletša gore ‘ba se ke ba šišinywa ka pela tlhaologanyong ya bona.’ (2 Bathes. 2:1, 2) Re ka ithuta dithuto dife keletšong ye e lerato ya Paulo, le gona re ka di diriša bjang mehleng yeno?

4. Bakriste ba kua Thesalonika ba ile ba lemošwa bjang ka go tla ga “letšatši la Jehofa,” gomme rena re lemošwa bjang?

⁴ Paulo lengwalong la gagwe la pele leo le yago phuthegong  ya Thesalonika, o ile a lemoša ka go tla ga “letšatši la Jehofa.” O be a sa nyake gore bana babo ba be leswiswing le go itebala. Go e na le moo, o ile a ba eletša bjalo ka “barwa ba seetša” gore ba ‘phafoge gomme ba dule ba hlaphogetšwe monaganong.’ (Bala 1 Bathesalonika 5:1-6.) Lehono, re letetše go fedišwa ga Babilona o Mogolo e lego mmušo wa lefase wa bodumedi bja maaka. Tiragalo ye e tla swaya go thoma ga letšatši le legolo la Jehofa. Re leboga gore re kwešiša kutšwanyana tsela yeo morero wa Jehofa o phethagalago ka yona. Le gona ka mehla ka phuthegong re hwetša dikgopotšo tše di lego nakong tšeo di re thušago gore re dule re hlaphogetšwe monaganong. Ge re ela hloko ditemošo tše tšeo di bolelwago leboelela, re tla matlafatša boikemišetšo bja rena bja go direla Modimo ‘tirelo e kgethwa ka matla a rena a tlhaologanyo.’—Baroma 12:1.

5, 6. (a) Paulo o boletše ka’ng lengwalong la gagwe la bobedi leo le yago go Bathesalonika? (b) Ke’ng seo kgauswinyane Modimo a tlago go laela Jesu gore a se dire, gona re swanetše go ipotšiša’ng?

⁵ Kapejana ka morago ga gore Paulo a romele Bakriste ba Thesalonika lengwalo la pele, o ile a ba romela lengwalo la bobedi. Lengwalong leo o ile a bolela ka masetlapelo a nakong ya ge Morena Jesu a tla be a phetha kahlolo ya Modimo go “bao ba sa tsebego Modimo le bao ba sa kwego ditaba tše dibotse.” (2 Bathes. 1:6-8) Kgaolo ya bobedi ya lengwalo leo e hlalosa gore ba bangwe ka phuthegong yeo ba ile ba “tšhošwa” ke letšatši la Jehofa moo ba ilego ba dumela gore le be le le kgauswi kudu ka nako yeo. (Bala 2 Bathesalonika 2:1, 2.) Bakriste bao ba lekgolong la pele la nywaga ba be ba na le kwešišo e nyenyane ka go phethagala ga morero wa Jehofa, go etša ge ka morago Paulo a ile a bolela mabapi le boporofeta gore: “Re tseba ka boripana gomme re porofeta ka boripana; eupša ge seo se feletšego se fihla, sa boripana se tla fedišwa.” (1 Bakor. 13:9, 10) Lega go le bjalo, ditemošo tše di buduletšwego tšeo di ngwadilwego ke Paulo, moapostola Petro le bana babo rena ba bangwe ba botegago bao ba tloditšwego ba nakong yeo di be di ka ba thuša go kgomarela tumelo ya bona.

⁶ E le gore Paulo a ba phošolle, o ile a budulelwa go hlalosa gore bohlanogi bjo bogolo le “motho wa go hloka molao” di be di tla tšwelela pele letšatši la Jehofa le fihla. * Ka  morago ga moo, ka nako ya gagwe ya maleba, Morena Jesu o be a tla “fetola lefeela” bohle bao ba forilwego. Moapostola yo o hlalositše gore ba be ba tla ahlolwa ka gobane “ba sa ka ba amogela lerato la therešo.” (2 Bathes. 2:3, 8-10) Re swanetše go ipotšiša gore: ‘Ke rata therešo gakaaka’ng? Na ke dula ke le nakong ka kwešišo ya moragorago yeo e lego ka dimakasineng tše le ka dikgatišong tše dingwe tše di theilwego Beibeleng tšeo di newago phuthego ya lefase ka bophara ya batho ba Modimo?’

7, 8. (a) Bakriste ba lekgolong la pele la nywaga ba be ba swanetše go lwantšhana le dikotsi dife? (b) Kotsi e kgolo go Bakriste ba therešo lehono ke efe?

⁷ Ke therešo gore Bakriste ba tla lebana le dikotsi tše dingwe ka ntle le tšeo di tlišwago ke bahlanogi le dithuto tša bona. Paulo o ngwaletše Timotheo gore “lerato la tšhelete ke modu wa mehuta ka moka ya dilo tše di gobatšago.” Moapostola yo o bontšhitše gore “ka go phegelela lerato le, ba bangwe ba ile ba arošwa tumelong gomme ba itlhabile gohle ka mahloko a mantši.” (1 Tim. 6:10) “Mediro ya nama” le yona e tla dula e le kotsi.—Bagal. 5:19-21.

⁸ Lega go le bjalo, o ka kwešiša lebaka leo Paulo a ilego a tloga a lemoša Bathesalonika ka kotsi e kgolo yeo e tšweletšwago ke batho ba bjalo bao kaekae a ba biditšego “baapostola ba maaka.” Gare ga bona go be go na le banna bao ba bego ba bolela “dilo tše di kgopamego gore ba goge barutiwa gore ba ba šale morago.” (2 Bakor. 11:4, 13; Dit. 20:30) Ka morago Jesu o ile a reta phuthego ya Efeso ka gobane e be e sa “kgotlelele batho ba babe.” Baefeso bao ba ile ba “leka” batho bao gomme ba hwetša e le baapostola ba maaka, e le ba go bolela maaka. (Kut. 2:2) Lengwalong la gagwe la bobedi leo le yago go Bathesalonika, Paulo o neile keletšo ye: “Bjale bana bešo, re le fa ditaelo ka leina la Morena Jesu Kriste gore le tloge go ngwanabo rena yo mongwe le yo mongwe yo a sepelago ka go hloka thulaganyo.” Ka morago ga moo o ile a bolela ka go lebanya ka Bakriste bao ba bego ‘ba sa nyake go šoma.’ (2 Bathes. 3:6, 10) Ge e ba Bakriste bao ba go se nyake go šoma ba be ba lebelelwa e le bao ba hlokago thulaganyo, gona seo e be e tla ba sa therešo gakaakang ka bao ba bego ba sekamela bohlanoging! Ee, ka nako yeo go gwerana le Bakriste ba bjalo go be go le kotsi kudu gomme go be go swanetše go phengwa—go sa le bjalo le lehono.—Die. 13:20.

9. Ke ka baka la’ng re swanetše go ba šedi ge motho yo a itšego a thoma go bolela ka dilo tše di sa hlaloswago ka Beibeleng goba a sola tsela yeo dilo di dirwago ka yona ka phuthegong?

⁹ Re kgauswi le go thoma ga masetlapelo a magolo le bofelo bja tshepedišo ye e kgopo, ka gona ditemošo tše di buduletšwego tšeo di neilwego lekgolong la pele la nywaga di bohlokwa le go feta. Re tloga re sa nyake go “lahlegelwa ke morero” wa botho bjo bogolo bja Jehofa gomme ra se hwetše bophelo bjo bo sa felego bjoo a bo holofeditšego, e ka ba legodimong goba mo lefaseng. (2 Bakor. 6:1) Ruri re swanetše go ba šedi ge e ba motho yo a itšego yo a bago gona dibokeng tša rena tša phuthego a leka gore re boledišane ka dilo tšeo di sa hlaloswago ka Beibeleng goba a sola tsela yeo dilo di dirwago ka yona ka phuthegong.—2 Bathes. 3:13-15.

10. Bakriste ba Thesalonika ba ile ba kgothaletšwa go kgomarela mekgwa efe?

¹⁰ Paulo o kgothaleditše bana babo ba Thesalonika gore ba ‘eme ba tiile’ gomme ba kgomarele seo ba ithutilego sona. (Bala 2 Bathesalonika 2:15.) Ke ‘mekgwa’ efe yeo ba bego ba e rutilwe? Ga se yeo e bego e rutwa ke bodumedi bja maaka e bile e kgothaletšwa go le bjalo ka ge eka e be e le ya bohlokwa go etša yeo e hwetšwago ka Mangwalong. Go e na le moo, Paulo o be a bolela ka dithuto tšeo yena le ba bangwe ba bego  ba di hweditše go Jesu gotee le tšeo Modimo a ilego a budulela baapostola go di ngwala, tšeo bontši bja tšona di ilego tša fetoga karolo ya Mangwalo a buduletšwego. Paulo o ile a reta bana babo ba phuthegong ya Korinthe ka gobane ‘dilong ka moka ba be ba mo gopola gomme ba kgomaretše dilo tšeo feela bjalo ka ge a ba fetišeditše tšona.’ (1 Bakor. 11:2) Dithuto tše bjalo di be di etšwa mothopong o ka botwago gomme ruri di be di ka botwa.

11. Batho ba bangwe ba ka feleletša ba dira’ng ge ba forwa?

¹¹ Ge Paulo a be a ngwalela Baheberu, o boletše ditsela tše pedi tšeo ka tšona Mokriste a ka felelwago ke tumelo gomme a palelwa ke go ema ka go tia. (Bala Baheberu 2:1; 3:12.) O boletše ka go “gogolega” le ka go “katologela kgole.” Ge seketswana se gogolega lebopong, mathomong se ka dira bjalo ka tsela e sa lemogegego. Ganyenyane-ganyenyane sa katologela kgole. Ka lehlakoreng le lengwe, motho yo a kgorometšago seketswana sa gagwe gore se tloge lebopong o dira seo ka boyena. Mehlala ye e mebedi e bontšha boemo bja batho ba bangwe bao ba forwago, ba dumelela gore go kgodišega ga bona ka therešo go fokole.

12. Ke dilo dife tšeo lehono di ka gobatšago bomoya bja rena?

¹² Ba bangwe ba Bathesalonika ba ka ba ba ile ba itumelela go forwa. Na go ka ba bjalo le lehono? Dilo tše di re jelago nako ke mantšha-o-tlogele. Nagana gore motho o fetša diiri tše kae a boledišana le batho Inthaneteng, a bala le go araba melaetša ya elektroniki, a dira mešongwana ya go itloša bodutu goba ka mafolofolo a nyaka go tseba ditaba ka moka tša moragorago mabapi le dipapadi. Mediro ye e ka gobatša Mokriste gomme ya fokodiša phišego ya gagwe. Mafelelo ya ba afe? A ka kgaotša go rapela ka go tšwa pelong, a se sa ba le nako e lekanego ya go ithuta Lentšu la Modimo, go ba gona dibokeng le go botša ba bangwe ditaba tše dibotse. Ka gona re ka dira’ng gore re pheme go šišinywa ka pela tlhaologanyong ya rena?

13. Batho ba bantši ba na le boemo bofe bja kgopolo bjoo go boletšwego ka bjona e sa le pele, gona re tla thušwa ke’ng gore tumelo ya rena e se ke ya fokola?

¹³ Le ka mohla re se ke ra lebala gore re phela mehleng ya bofelo gomme re lemoge kotsi ya go gwerana le batho bao ba sa nyakego go dumela gore re phela “mehleng ya bofelo.” Moapostola Petro o ngwadile mabapi le nako ye gore: “Go tla tla bakweri ka dikwero tša bona, ba yago ka dikganyogo tša bona ba re: ‘Go ba gona mo ga gagwe mo go holofeditšwego go kae? Ruri, ga e sa le go tloga letšatšing leo borakgolokhukhu ba rena ba robetšego ka lona lehung, dilo tšohle di sa le ka tsela yeo di bego di le ka yona mathomong a tlholo.’” (2 Pet. 3:3, 4) Go bala le go ithuta Lentšu la Modimo ka mehla go tla re thuša go dula re gopola gore re phela “mehleng ya bofelo.” Bohlanogi bjo go boletšwego ka bjona e sa le pele bo bonagetše kgale gomme bo sa tšwela pele le lehono. “Motho wa go hloka molao” o sa dutše a le gona e bile o ganetša bahlanka ba Modimo. Ka baka leo, re swanetše go dula re phafogetše go ba kgauswi ga letšatši la Jehofa.—Tsef. 1:7.

14. Go dula re swaregile tirelong ya Modimo go re šireletša bjang?

¹⁴ Tsela ya bohlokwahlokwa ya gore re dule re phafogile gomme re pheme go šišinywa tlhaologanyong ya rena ke gore re tšee karolo ka mehla go boleleng ditaba tše dibotse tša Mmušo. Ka go re’alo, ge Kriste Jesu, yena Hlogo ya phuthego, a be a laela balatedi ba gagwe go dira batho ba ditšhaba ka moka barutiwa le go ba ruta go boloka dilo tšeo a di rutilego, o be a ba nea keletšo yeo e bego e tla ba šireletša. (Mat. 28:19, 20) Go bontšha gore re kwa taelo ye, re swanetše go ba mafolofolo modirong wa boboledi. Na o nagana gore bana beno ba kua Thesalonika ba be ba fo kgotsofatšwa ke go bolela  ditaba tše dibotse le go ruta ka mokgwa wa go ithola kgwara, ba fo goga maoto? Gopola mantšu a a Paulo ao a ba boditšego ona: “Le se ke la tima mollo wa moya. Le se ke la nyatša diporofeto.” (1 Bathes. 5:19, 20) Ruri diporofeto tšeo re ithutago tšona le go di botša batho di a kgahliša!

15. Ke dilo dife tše di holago tšeo re ka di ahlaahlago borapeding bja lapa?

¹⁵ Ke mo go kwagalago gore re nyaka go thuša malapa a rena go ba le bokgoni tirelong ya tšhemo. Ba bantši ba bana babo rena le dikgaetšedi ba hweditše gore tsela e nngwe ya go dira seo ke ka go diriša karolo ya borapedi bja bona bja lapa go itlwaeletša bodiredi. O ka hwetša e le mo go holago go ahlaahla kamoo ditho tša lapa di ka dirago maeto a go boela bathong bao ba thabelago. Di tlo ahlaahla’ng ketelong e latelago? Ke ditaba dife tšeo di ka dirago gore bao ba thabelago ba tšwele pele ba na le kgahlego? Nako e kaone ya go boela ke efe? Le gona ba bantši ba diriša e nngwe ya nako ya borapedi bja lapa go lokišeletša diboka tša phuthego e le gore ba tsebe seo se tlago go ahlaahlwa dibokeng. Na le ka lokišeletša le naganne ka gore le tle le tšee karolo? Go tšea ga lena karolo go tla matlafatša tumelo ya lena gomme gwa le thuša go phema go šišinywa tlhaologanyong ya lena. (Ps. 35:18) Go ba le borapedi bja lapa go tla le šireletša bathong bao ba bolelago dilo tšeo di sa hlaloswago ka Beibeleng le dikgopolo tše di belaetšago.

16. Bakriste bao ba tloditšwego ba tutueletšwa ke’ng gore ba se šišinywe tlhaologanyong ya bona?

¹⁶ Ge re nagana ka tsela yeo Jehofa a šegofaditšego batho ba gagwe go theoša le nywaga gore ba kwešiše boporofeta bja Beibele ka mo go oketšegilego, re kgona go bona gore o tla re putsa kudu nakong e tlago. Batlotšwa ba na le kholofelo ya go ba le Kriste legodimong. Ruri seo se ba tutueletša gore ba se šišinywe tlhaologanyong ya bona! Mantšu a ao Paulo a a ngwaletšego Bathesalonika a šoma go bona: “Re tlamegile go leboga Modimo ka mehla ka baka la lena bana babo rena bao ba ratwago ke Jehofa, gobane Modimo o le hlaotše . . . ka go le kgethagatša ka moya wa gagwe le ka tumelo ya lena therešong.”—2 Bathes. 2:13.

17. O hwetša kgothatšo efe mantšung a 2 Bathesalonika 3:1-5?

¹⁷ Bao ba fagahletšego go hwetša bophelo bjo bo sa felego mo lefaseng le bona ba swanetše go katanela go phema go šišinywa ka pela tlhaologanyong ya bona. Ge e ba o na le kholofelo ya go phela mo lefaseng, ka mehla kgothatšwa ke seo Paulo ka lerato a se ngwaletšego batlotšwagotee le yena ba kua Thesalonika. (Bala 2 Bathesalonika 3:1-5.) Yo mongwe le yo mongwe wa rena o swanetše go tšeela godimo kudu mantšu ao a lerato. Ee, mangwalo ao Paulo a a ngwaletšego Bathesalonika a re nea ditemošo tša bohlokwa mabapi le dilo tšeo di sa hlaloswago ka Beibeleng goba dikgopolo tšeo di belaetšago. Ka ge bofelo bo le kgauswi, re leboga kudu ditemošo tše.