1, 2. Re fapana bjang malapeng a gabo rena le tseleng yeo re godišitšwego ka yona moyeng?

JEHOFA ke mothomi wa lapa. (Baef. 3:14, 15) Eupša le ge re ka ba re le bana ba motho, re na le dika tše di sa swanego le maemo a sa swanego. O ka ba o godišitšwe ke batswadi ba gago. Ba bangwe ba ka ba ba hwetšwe ke batswadi, mohlomongwe ka baka la bolwetši, kotsi ya koloi goba masetlapelo a mangwe. Ka lehlakoreng le lengwe, ba bangwe ga ba tsebe batswadi ba bona.

² Gaešita le rena re le ditho tša lapa la barapedi ba Jehofa, ga se ra godišwa ka go swana moyeng. O ka ba o ‘godišeditšwe therešong,’ go etša ge ba bangwe ba tlwaetše go re’alo, gomme batswadi ba gago ba nweleditše melao ya motheo ya Modimo ka pelong ya gago. (Doit. 6:6, 7) Goba o ka ba o le yo mongwe wa batho ba diketekete bao ba ithutilego therešo ka modiro wa boboledi wa bahlanka ba Jehofa.—Baroma 10:13-15; 1 Tim. 2:3, 4.

3. Ke dilo dife tšeo ka moka ga rena re swanago ka tšona?

³ Go sa šetšwe dilo tšeo di boletšwego ka mo godimo, ka moka ga rena re na le dilo tšeo re swanago ka tšona. Ka moka ga rena re tlaišwa ke ditlamorago tša go se kwe ga Adama e bile re abetše go se phethagale, sebe le lehu. (Baroma 5:12) Lega go le bjalo, ka ge re le barapedi ba therešo, re na le tshwanelo ya go bitša Jehofa gore  ke “Tatago rena.” Ge Jesaya 64:8 e bolela ka batho ba mehleng ya bogologolo bao Modimo a bego a ba kgethile, e re: “Wena Jehofa, o Tatago rena.” Go oketša moo, Jesu o ile a thoma thapelo ya gagwe ya mohlala ka mantšu ao a rego: “Tatago rena wa magodimong, leina la gago a le kgethagatšwe.”—Mat. 6:9.

4, 5. Ge re dutše re ahlaahla gore re tšeela Tatago rena e lego Jehofa godimo gakaakang, ke dintlha dife tšeo re tlago go di ahlaahla?

⁴ Tatago rena wa legodimong o re nea tlhokomelo le tšhireletšego tšeo re di nyakago ka ge re bitša leina la gagwe ka tumelo. Mopsalme o tsopola Modimo a bolela gore: “Gobane yena [morapedi wa therešo] o mpontšhitše lerato, ke tla ba ka mo hlakodiša. Ke tla mo šireletša ka gobane a tseba leina la ka.” (Ps. 91:14) Ee, ka lerato Jehofa Modimo o re hlakodiša manabeng a rena le go re šireletša ka ge re le batho ba gagwe, e le gore re se ke ra fedišwa.

⁵ E le gore re tšeele Tatago rena wa legodimong godimo le go feta, anke re ahlaahleng dintlha tše tše tharo tša bohlokwa: (1) Tatago rena ke Mohlokomedi wa rena. (2) Jehofa ke Mošireletši wa rena. (3) Modimo ke Mogwera wa rena yo mogolo. Ge re dutše re ahlaahla dintlha tše, e tla ba mo gobotse gore re naganišiše ka tswalano ya rena le Modimo le go bona kamoo re ka mo godišago ka gona e le Tatago rena. Le gona re tla holega kudu ge re ka naganišiša ka ditšhegofatšo tšeo Jehofa a di boloketšego bao ba mmatamelago.—Jak. 4:8.

6. Tsela e nngwe yeo Jehofa a ipontšhago e le Monei wa “mpho e nngwe le e nngwe e botse” ke efe?

⁶ Morutiwa Jakobo o ngwadile gore: “Mpho e nngwe le e nngwe e botse le neo e nngwe le e nngwe e phethagetšego e tšwa godimo, e theoga e etšwa go Tate wa dietša tša legodimo.” (Jak. 1:17) Bophelo ka bobjona ke mpho e kgahlišago e tšwago go Jehofa. (Ps. 36:9) Ge re diriša maphelo a rena go dira thato ya Modimo, re šegofatšwa kudu gona bjale e bile re ba le kholofelo ya go tlo phela ka mo go sa felego lefaseng le lefsa. (Die. 10:22; 2 Pet. 3:13) Eupša se se ka kgonega bjang mola re sa tlaišwa ke ditlamorago tše bohloko tša go se kwe ga Adama?

7. Modimo o dirile’ng gore re kgone go ba le tswalano le yena?

⁷ Ruri Jehofa ke Mohlokomedi wa rena yo Mogolo ka ditsela tše di sa balegego. Ka mohlala, o re hlakodiša ka baka la botho bja gagwe bjo bogolo. Ee, ka moka ga rena re na le sebe e bile re abetše go se phethagale go tatago rena wa mathomo wa mo lefaseng. (Baroma 3:23) Lega go le bjalo, ka lerato Jehofa o ile a gata mogato wa pele wa go dira gore go kgonege gore re be le tswalano le yena. Moapostola Johane o ngwadile gore: “Re utolletšwe lerato la Modimo ka se, gobane Modimo o rometše Morwa wa gagwe yo a tswetšwego a nnoši lefaseng gore re hwetše bophelo ka yena. Lerato le ka tsela ye, ga se gore rena re ratile Modimo, eupša yena o re ratile gomme a romela Morwa wa gagwe e le sehlabelo sa poelanyo bakeng sa dibe tša rena.”—1 Joh. 4:9, 10.

8, 9. Jehofa o ipontšhitše bjang e le Mohlokomedi yo Mogolo mehleng ya Aborahama le Isaka? (Bona seswantšho seo se lego mathomong a sehlogo.)

⁸ Mo e ka bago nywaga e 1 900 pele Jesu a belegwa, go ile gwa direga tiragalo e itšego ya boporofeta yeo e ilego ya utolla bogolo bja tokišetšo e lerato ya Jehofa ya gore batho bao ba kwago ba tle ba hwetše bophelo bjo bo sa felego. Baheberu 11:17-19 e hlalosa gore: “Ka tumelo Aborahama ge a be a lekwa, go bile bjalo ka ge eka o gafile Isaka; ke monna yo a ilego a amogela dikholofetšo ka lethabo a leka go gafa morwa wa gagwe a nnoši, gaešita le ge go itšwe go yena: ‘Seo se tlago go bitšwa “peu ya gago” se tla ba ka Isaka.’ Eupša a ipotša gore Modimo o be a tla kgona go mo tsoša gaešita le bahung; o ile a mo amogela gape go tšwa moo ka tsela ya seswantšhetšo.” Ga go thata go bona go swana mo go lego gona tabeng ye. Jehofa o ile a gafa Morwa wa  gagwe e lego Jesu Kriste bakeng sa batho ka moka.—Bala Johane 3:16, 36.

⁹ Ruri Isaka o swanetše go ba a ile a thaba ge a be a hlakodišwa go hwa lehu la sehlabelo! Ga go pelaelo gore o ile a leboga tokišetšo ya Modimo ya gore go dirwe sehlabelo ka kgapa yeo e bego e tantšwe ka dinaka dihlašaneng tša kgauswi le moo go e na le gore go bolawe yena. (Gen. 22:10-13) Ga go makatše ge lefelo leo le ile la bitšwa “Jehofa-jire,” yeo e bolelago gore “Jehofa o tla Loga Leano.”—Gen. 22:14; mongwalo wa ka tlase wa Reference Bible.

10, 11. Ke bomang bao ba eteletšego pele “bodiredi bja poelano,” gona ba dirile seo bjang?

¹⁰ Ge re dutše re naganišiša kamoo Jehofa a ipontšhago e le Mohlokomedi yo Mogolo, re tšeela godimo tema ya bohlokwa yeo Jesu Kriste a e kgathago, ra swana le Paulo yo a ngwadilego gore: “Re phethile ka gore motho o tee o hwetše bohle; ka gona, bohle ba hwile; o hwetše bohle gore bao ba phelago ba se sa hlwa ba iphelela, eupša ba phelele yena yo a ba hwetšego gomme a tsošwa.”—2 Bakor. 5:14, 15.

¹¹ Ka ge Bakriste ba lekgolong la pele la nywaga ba be ba rata Modimo e bile ba tšeela godimo tokelo e sa bapišwego le selo ya go mo hlankela, ba ile ba amogela ka lethabo “bodiredi bja poelano.” Modiro wa bona wa boboledi le wa go dira batho barutiwa o ile wa bulela batho ba dipelo tše dibotse sebaka sa go boelana le Modimo, go thabela go ba bagwera ba gagwe le go feleletša e le bana ba gagwe ba moya. Lehono, bahlanka ba ba tloditšwego ba Jehofa ba phetha bodiredi bjo bo swanago. Seo ba se fihlelelago e le batseta ba Modimo le Kriste se dira gore batho bao ba sekametšego go lokeng ba gogwe ke Jehofa gomme e be badumedi.—Bala 2 Bakorinthe 5:18-20; Joh. 6:44; Dit. 13:48.

12, 13. Re ka bontšha bjang gore re tšeela godimo ditokišetšo ka moka tša Jehofa?

¹² Bakriste ka moka bao ba nago le kholofelo ya go phela mo lefaseng ba thušana le batlotšwa modirong wa boboledi e le ge ba leboga Jehofa ka ge e le Mohlokomedi yo Mogolo. Modirong wo, re diriša Beibele, e lego e nngwe ya ditokišetšo tša Modimo tše di kgahlišago kudu. (2 Tim. 3:16, 17) Ge bodireding bja rena re diriša ka bokgoni Lentšu la Modimo leo le buduletšwego, re nea batho ba bangwe sebaka sa gore ba tle ba hwetše bophelo bjo bo sa felego. E le gore yo mongwe le yo mongwe wa rena a atlege modirong wo, re ithekga ka tokišetšo e nngwe gape ya Jehofa—moya wa gagwe o mokgethwa. (Sak. 4:6; Luka 11:13) Mafelelo a seo e ba a mabotse kudu, go etša ge re bona seo tokollong e nngwe le e nngwe ya Yearbook of Jehovah’s Witnesses. Ruri ke tokelo e kgolo kudu go tšea karolo modirong wo woo ka wona re tumišago Tatago rena le Mohlokomedi wa rena!

¹³ Ka baka la dilo ka moka tšeo Modimo a re neilego tšona, re swanetše go ipotšiša gore: ‘Na ke dira sohle seo nka se kgonago bodireding go bontšha Jehofa gore ke tšeela godimo ditokišetšo tša gagwe? Nka kaonefatša kae gore ke be mogoeledi yo a atlegago wa ditaba tše dibotse?’ Re ka bontšha gore re tšeela godimo ditokišetšo tša Modimo tše lerato ka go etiša pele dikgahlego tša Mmušo maphelong a rena. Ge e ba re dira bjalo, Jehofa o tla kgonthišetša gore re hwetša dilo tšeo re di hlokago. (Mat. 6:25-33) Ka baka la ge Modimo a re rata, ga go pelaelo gore re nyaka go dira sohle seo re ka se kgonago go mo kgahliša le go thabiša pelo ya gagwe.—Die. 27:11.

14. Jehofa e bile Mohlakodiši wa batho ba gagwe bjang?

¹⁴ Mopsalme Dafida o opetše ka gore: “Ke a hlaka e bile ke a diila. Jehofa yena o a ntšhetša. O mothuši wa ka le Mohlakodiši wa ka.” (Ps. 40:17) Jehofa e bile Mohlakodiši wa batho ba gagwe e le sehlopha ka makga a mantši, kudukudu ge ba be ba tlaišwa o šoro le go hlakišwa ke manaba a bona. Ruri re leboga thušo ya Jehofa dinakong tše bjalo gotee le ditokišetšo tše dintši tša moya tšeo a re direlago tšona ka mehla!

15. Hlalosa kamoo tate yo lerato a lekago ka gohle go šireletša ngwana wa gagwe.

¹⁵ Tate yo lerato ga a fo hlokomela bana ba gagwe, eupša e bile o a ba šireletša. Ka tlhago o tla leka go ba hlakodiša ge ba le kotsing. Ngwanabo rena yo mongwe o gopola selo se sengwe seo se ilego sa direga ge e be e sa le yo monyenyane. Yena le tatagwe ba be ba boela gae ba etšwa tšhemong gomme ba swanetše go tshela noka. Mesong yeo pula e be tšhologile gomme noka yeo e tletše wa go falala. Tsela feela ya gore ba tshele noka yeo e be e le gore ba gate godimo ga maswika a magolo. Mošemanyana yo o ile a eta tatagwe pele gomme a gata leswika le lengwe ka thoko, a phonkgela ka mafuleng ao ke moka a nwelela gabedi. Ruri mošemanyana yo o ile a thaba ge tatagwe kapejana a mo swara ka legetla ke moka a mo hlakodiša! Tatago rena wa legodimong o re hlakodiša dilong tšeo re ka rego ke mafula a matla a lefase le le kgopo le go mmuši wa lona, Sathane. Ruri Jehofa ke Mošireletši wa rena wa kgonthe.—Mat. 6:13; 1 Joh. 5:19.

16, 17. Jehofa o ile a thuša Baisiraele bjang le go ba šireletša ge ba be ba elwa le Baamaleke?

¹⁶ Tšhireletšo e lerato yeo Jehofa a kilego a e bontšha e bonagetše gabotse ka morago ga gore a hlakodiše Baisiraele bokgobeng bja Egipita gomme ka mohlolo a ba šireletša ge ba be ba tshela Lewatle le Lehwibidu ka 1513 B.C.E. Ka morago ga gore setšhaba se phatše lešokeng se lebile Thabeng ya Sinai, se ile sa fihla Rafidima.

¹⁷ Ka baka la boporofeta bjo Modimo a bo boletšego go Genesi 3:15, Sathane a ka ba a be a tsoma go diriša sebaka se sengwe le se sengwe go hlasela Baisiraele ba bao ba bego ba bonagala ba sa šireletšega. O ile a dira seo a diriša Baamaleke bao e bego e le manaba a batho ba Modimo. (Num. 24:20) Nagana ka seo Jehofa a ilego a se fihlelela a diriša banna ba bane bao ba botegago e lego Joshua, Moshe, Arone le Huru. Ge Joshua a dutše  a elwa le Baamaleke, Moshe, Arone le Huru ba be ba eme mmotong wa kgauswi le moo. Ge Moshe a be a emišeditše diatla tša gagwe godimo, Baisiraele ba be ba fenya. Eupša ge diatla tša gagwe di be di thoma go lapa, Arone le Huru ba ile ba di thekga. Ka gona ka thušo ya Jehofa le tšhireletšo ya gagwe, “Joshua [o ile] a fenya Amaleke le setšhaba sa gagwe.” (Ek. 17:8-13) Moshe o ile a aga aletare gomme a e reela leina a re ke “Jehofa-nisi,” yeo e bolelago gore “Jehofa ke Seka sa ka [Kota ya ka].”—Bala Ekisodo 17:14, 15; mongwalo wa ka tlase.

18, 19. Ke tšhireletšo efe yeo Modimo a e neago bahlanka ba gagwe mehleng yeno?

¹⁸ Jehofa o šireletša bao ba mo ratago le go mo kwa. Go swana le Baisiraele kua Rafidima, re tšhabela go Modimo gore a re šireletše ge manaba a rena a re hlasela. Ke gantši Jehofa a re šireletša re le sehlopha, e bile o re šireletša ditlhaselong tša Diabolo. Nagana ka makga a mantši ao ka ona Modimo a šireleditšego bana babo rena bao ba bego ba kgomarela boemagare bja bona bja Bokriste. Ka mohlala, o ile a dira seo mehleng ya Manazi kua Jeremane le dinageng tše dingwe ka bo-1930 le mathomong a bo-1940. Go bala le go naganišiša ka diphihlelo le dipego tše di lego ka go Yearbook tša mabapi le kamoo Modimo a ilego a šireletša batho ba gagwe dinakong tša tlaišo, go tla dira gore re mmote le go feta e le Setšhabelo sa rena.—Ps. 91:2.

¹⁹ Jehofa e bile o re šireletša ka go re nea dikgopotšo tše lerato a diriša mokgatlo wa gagwe le dikgatišo tša rena. Ela hloko kamoo se se re hotšego ka gona morago bjale. Ge lefase le le nwelela le go feta boitshwarong bjo bo gobogilego le go bogela diswantšho tše di kgothaletšago bootswa, Jehofa o re nea dikgopotšo kapejana le go re thuša go lemoga dikotsi tša boitshwaro. Ka mohlala, o re nea keletšo e lerato bjalo ka tate ya gore re pheme bagwera ba babe ka go se diriše gampe mekero ya dipoledišano Inthaneteng. *—1 Bakor. 15:33.

20. Re hwetša tšhireletšego efe le tlhahlo ka phuthegong ya Bokriste?

²⁰ Re ka bontšha bjang gore ruri re ‘rutwa ke Jehofa’? Re ka bontšha seo ka go kwa melao ya gagwe ka mo go feletšego. (Jes. 54:13) Ka diphuthegong tša gabo rena tše di šireletšegilego, re hwetša tlhahlo le tšhireletšego yeo re e hlokago, ka gobane ke gona moo banna ba ba botegago bao ba hlankelago e le bagolo ba re neago thušo ya Mangwalo le keletšo. (Bagal. 6:1) Ke ka “dimpho [tše] tšeo e lego banna” moo re hwetšago tlhokomelo e kgolo ya Jehofa. (Baef. 4:7, 8) Re swanetše go arabela bjang? Ge re ikokobeletša bona ka go rata le go ba kwa, Modimo o tla re šegofatša.—Baheb. 13:17.

21. (a) Re swanetše go ikemišetša go dira’ng? (b) Ke’ng seo se tlago go ahlaahlwa sehlogong se se latelago?

²¹ Anke re ikemišetšeng go hlahlwa ke moya o mokgethwa gomme re dumelele Tatago rena wa legodimong gore a re hlahle. Le gona re swanetše go naganišiša ka tsela yeo Morwa wa gagwe e lego Jesu Kriste a bego a phela ka yona, yena yoo re katanelago go latela mohlala wa gagwe o sa bapišwego le selo. Ka ge Jesu a ile a kwa go fihla lehung, o ile a newa moputso o mogolo kudu. (Bafil. 2:5-11) Le rena re tla šegofatšwa kudu ge e ba re ka bota Jehofa ka dipelo tša rena ka moka. (Die. 3:5, 6) Ka gona, anke ka mehla re ithekgeng ka Jehofa e le Mohlokomedi wa rena le Mošireletši wa rena yo a sa bapišwego le selo. Ruri ke tokelo e kgolo le e thabišago gore re bahlanka ba gagwe! Re tla mo rata kudu ge re dutše re nagana ka seka sa boraro sa Tatago rena seo se bontšhago gore o a re hlokomela—bogwera bja gagwe. Sehlogo se se latelago se tla ahlaahla kamoo Jehofa e lego Mogwera wa rena yo mogolo.