1, 2. (a) Ke lenyalo la mang leo le tla tlišago lethabo legodimong? (b) Go rotoga dipotšišo dife?

GANTŠI go lokišeletša lenyalo go tšea nako e telele. Eupša mo re tlo bolela ka lenyalo leo le kgethegilego kudu—lenyalo la ka bogošing. E fo nagana ka seo! Go tšere nywaga e ka bago e 2 000 go lokišeletšwa lenyalo leo. Ga bjale nako ya gore monyadi a kopane le monyadiwa e batamela ka lebelo le legolo. Kgauswinyane, go tla kwagala mmino wa lethabo ka mošate wa Kgoši yeo gomme mašaba a legodimong a tla opela ka gore: “Tumišang Jah, gobane Jehofa Modimo wa rena, Ramatlaohle o thomile go buša e le kgoši. A re thabeng re hlalaleng kudu re be re mo neeng letago gobane lenyalo la Kwana le tlile gomme mosadi wa yona o itokišitše.”—Kut. 19:6, 7.

² “Kwana” yeo lenyalo la yona le tla tlišago lethabo legodimong ke Jesu Kriste. (Joh. 1:29) O apere’ng bakeng sa lenyalo la gagwe? Monyadiwa wa gagwe ke mang? Monyadiwa yo o itokišitše bjang bakeng sa lenyalo? Lenyalo le tlo ba neng? Lenyalo le le tlo tliša lethabo legodimong, eupša na bao ba nago le kholofelo ya go phela ka mo go sa felego mo lefaseng ba tla tšea karolo lethabong leo? Re fagahletše go tseba seo, re tlo hlahloba dipotšišo tše ge re tšwela pele ka go ahlaahla Psalme 45.

3, 4. (a) Diaparo tša Monyadi tša lenyalo di hlaloswa bjang, gona ke’ng seo se oketšago lethabo la gagwe? (b) “Mohumagadi” le “barwedi ba dikgoši” bao ba thabilego le Monyadi ke bomang?

³ Bala Psalme 45:8, 9. Monyadi e lego Jesu Kriste, o apere diaparo tša gagwe tša letago tša ka bogošing tša lenyalo. Ga go makatše ge diaparo tša gagwe di nkga bose go etša ‘dinkgišabose tše di nkgago bose kudu,’ tše bjalo ka mira le kasia, tšeo kua Isiraele di bego di le gare ga metswako ya go dira makhura a makgethwa a go tlotša motho ge a kgethwa.—Ek. 30:23-25.

⁴ Mmino wa legodimong wo o kwagalago ka mošate wa gagwe o oketša lethabo la Monyadi yo ge lenyalo la gagwe le dutše le batamela. Batho bao ba thabilego le yena ke “mohumagadi,” e lego karolo ya legodimong ya mokgatlo wa Modimo, yeo e akaretšago “barwedi ba dikgoši,” e lego barongwa ba bakgethwa. Go thabiša kudu go kwa mantšu a bao ba lego legodimong a re: “A re thabeng re hlalaleng kudu . . . gobane lenyalo la Kwana le tlile”!

5. “Mosadi wa Kwana” ke mang?

⁵ Bala Psalme 45:10, 11. Re šetše re bone gore Monyadi ke mang, eupša monyadiwa yena ke mang? Ga se motho o tee, eupša o bopša ke ditho tša phuthego yeo hlogo ya yona e lego Jesu Kriste. (Bala Baefeso 5:23, 24.) Ditho tšeo e tla ba karolo ya bao ba tlago go buša le Kriste Mmušong wa Mesia. (Luka 12:32) Bakriste ba bao ba tloditšwego ba 144 000, ba “[latela] Kwana kae le kae mo e yago gona.” (Kut. 14:1-4) Eba “mosadi wa Kwana,” gomme ba dula le yona legodimong.—Kut. 21:9; Joh. 14:2, 3.

6. Ke ka baka la’ng batlotšwa ba bitšwa gore ke “morwedi wa kgoši,” gona ke ka baka la’ng ba laelwa gore ‘ba lebale batho ba gabo bona’?

⁶ Monyadiwa yo wa nakong e tlago ga a bitšwe feela gore ke “morwedi” eupša gape o bitšwa gore ke “morwedi wa kgoši.” (Ps. 45:13) “Kgoši” yeo ke mang? Bakriste bao ba tloditšwego ba amogetšwe e le “bana” ba Jehofa. (Baroma 8:15-17) Ka ge batlotšwa ba ba tla bopa monyadiwa wa legodimong, ba laelwa gore: ‘Lebalang batho ba gabo lena le ba dintlo tša botatago lena [ba nama].’ Ba swanetše go ‘tsepamišetša menagano ya bona dilong tša legodimong, e sego dilong tša lefaseng.’—Bakol. 3:1-4.

7. (a) Kriste o be a dutše a lokišeletša bjang monyadiwa wa gagwe wa nakong e tlago? (b) Monyadiwa o lebelela bjang Monyadi wa gagwe wa nakong e tlago?

⁷ Go theoša le nywagakgolo, Kriste o be a dutše a lokišeletša monyadiwa wa gagwe wa nakong e tlago bakeng sa lenyalo la legodimong. Moapostola Paulo o hlalositše gore Kriste o “ratile phuthego gomme a ikgafa ka baka la yona, gore a e kgethagatše, a e hlwekiše ka go e hlatswa ka meetse a lentšu la Modimo, e le gore a tšweletše phuthego go yena e le letagong la yona, e se na sepatso goba lešošo goba le ge e le sefe sa dilo tše bjalo, eupša gore e be e kgethwa gomme e hloke bosodi.” (Baef. 5:25-27) Paulo o boditše Bakriste ba tloditšwego ba kua Korinthe ya bogologolo gore: “Ke le hufegela ka lehufa la Modimo, gobane nna ka noši ke le holofeditše lenyalo go monna o tee e le gore ke le iše go Kriste le le kgarebe e sekilego.” (2 Bakor. 11:2) Monyadi e lego Kgoši Jesu Kriste o thabela “botse” bja moya bja monyadiwa wa gagwe wa nakong e tlago. Le gona monyadiwa yo o lebelela Jesu Kriste e le “mong” wa gagwe gomme ‘o mo hlompha’ bjalo ka monna wa gagwe wa nakong e tlago.

8. Ke ka baka la’ng e le ga maleba ge go thwe monyadiwa o “tletše ka letago”?

⁸ Bala Psalme 45:13, 14a. Monyadiwa yo o hlaloswa a “tletše ka letago” bakeng sa lenyalo la ka bogošing. Go Kutollo 21:2, monyadiwa yo o bapetšwa le motse, e lego  Jerusalema o Mofsa, gomme o “[ikgabišeditše] monna wa gagwe.” Motse wo wa legodimong o na le “letago la Modimo” e bile o phadima “go swana le leswika le bohlokwa kudu, bjalo ka leswika leo le bitšwago jasepere le le phadimago ka mo go sekilego bjalo ka legakabje.” (Kut. 21:10, 11) Botse bja Jerusalema o Mofsa bja letago bo hlaloswa ka tsela e kgahlišago ka pukung ya Kutollo. (Kut. 21:18-21) Ga go makatše ge mopsalme a hlalosa monyadiwa yo a “tletše ka letago”! Seo ke sa therešo ka gobane lenyalo le la ka bogošing le direga legodimong.

9. “Kgoši” yeo monyadiwa a tlišwago go yona ke mang, gona monyadiwa yo o apere bjang?

⁹ Monyadiwa yo o tlišwa go Monyadi e lego Kgoši Mesia. Monyadi yo o be a dutše a mo lokiša, ‘a mo hlwekiša ka go mo hlatswa ka meetse a lentšu.’ Ke ‘yo mokgethwa e bile o hloka bosodi.’ (Baef. 5:26, 27) Monyadiwa wa gagwe le yena o swanetše go apara ka tsela yeo e swanelago tiragalo yeo, e bile o apere ka yona tsela yeo! “Diaparo tša gagwe di kgabišitšwe ka mekgabišo ya gauta” gomme “o tla tlišwa go kgoši a apere seaparo se se logilwego.” Bakeng sa lenyalo la Kwana, “o dumeletšwe gore a apare seaparo sa linene e tagilego, e hlwekilego le e botse, gobane linene e botse e emela ditiro tša go loka tša bakgethwa.”—Kut. 19:8.

10. Lenyalo la Kwana le tla ba neng?

¹⁰ Bala Kutollo 19:7. Lenyalo la Kwana le tla ba neng? Gaešita le ge “mosadi wa yona [a] itokišitše” bakeng sa lenyalo, ditemana tša ka morago ga moo ga di hlalose seo se diregago lenyalong leo. Go e na le moo, di hlalosa ka mo go kwagalago karolo ya mafelelo ya masetlapelo a magolo. (Kut. 19:11-21) Na se se bolela gore lenyalo le tla ba gona pele Monyadi yo e lego Kgoši a feleletša phenyo ya gagwe? Aowa. Dipono tšeo di lego ka pukung ya Kutollo ga se tša ngwalwa go ya ka tatelano ya ditiragalo. Go Psalme 45, lenyalo leo la ka bogošing le ba gona ka morago ga ge Kgoši Jesu Kriste a hlomile tšhoša ya gagwe lethekeng gomme ‘a atlegile’ goba a fentše manaba a gagwe.—Ps. 45:3, 4.

11. Ditiragalo di tla latelana ka tsela efe ge Kriste a tlo feleletša phenyo ya gagwe?

¹¹ Ka gona re ka phetha ka gore ditiragalo di tla latelana ka tsela ye: Sa pele, go tla ahlolwa “mogweba-ka-mmele yo mogolo,” e lego Babilona o Mogolo, wona mmušo wa lefase wa bodumedi bja maaka. (Kut. 17:1, 5, 16, 17; 19:1, 2) Sa bobedi, Kriste o tla phetha dikahlolo tša Modimo tshepedišong ka moka e kgopo ya dilo ya Sathane mo lefaseng ka go e fediša ka Haramagedone, e lego “[ntwa] ya letšatši le legolo la Modimo Ramatlaohle.” (Kut. 16:14-16; 19:19-21) Sa mafelelo, Kgoši ya Mohlabani e tla feleletša phenyo ya yona ka go lahlela Sathane le batemona ba gagwe sekoting, ba ba boemong bja ge eka ba hwile.—Kut. 20:1-3.

12, 13. (a) Lenyalo la Kwana le tla ba neng? (b) Ke bomang bao ba tlago go thabela lenyalo la Kwana kua legodimong?

¹² Ge Bakriste ba tloditšwego ba fetša tsela ya bona ya mo lefaseng nakong ya go ba gona ga Kriste, ba tsošetšwa legodimong. Nakong e itšego ka morago ga go fedišwa ga Babilona o Mogolo, Jesu o tla kgobokeletša go yena ditho ka moka tša sehlopha sa monyadiwa tše di tla bego di sa le mo lefaseng. (1 Bathes. 4:16, 17) Ka gona, pele ga ge ntwa ya Haramagedone e ka thoma, ditho ka moka tša sehlopha sa “monyadiwa” di tla be di le legodimong. Ka morago ga ntwa yeo, ke gona lenyalo la Kwana le tla bago gona. Lenyalo leo e tla ba tiragalo e thabišago gakaakang! Kutollo 19:9 e re: “Go thaba bao ba laleditšwego selalelong sa lenyalo la Kwana.” Ruri ditho tše 144 000 tša sehlopha sa monyadiwa di tla thaba. Le gona Monyadi yo e lego Kgoši o tla hlalala kudu ge palo e feletšego  ya babušigotee le yena ‘ba tla be ba eja le go nwa tafoleng ya gagwe Mmušong wa gagwe’ ka tsela ya seswantšhetšo. (Luka 22:18, 28-30) Lega go le bjalo, ga se Monyadi le monyadiwa feela bao ba tlago go thabišwa ke lenyalo la Kwana.

¹³ Go etša ge re bone pejana, mašaba a legodimong a opela gotee ka gore: “A re thabeng re hlalaleng kudu re be re . . . neeng [Jehofa] letago gobane lenyalo la Kwana le tlile gomme mosadi wa yona o itokišitše.” (Kut. 19:6, 7) Lega go le bjalo, go thwe’ng ka bahlanka ba Jehofa ba mo lefaseng? Na le bona ba tla tšea karolo lethabong leo?

14. Go etša ge go boletšwe go Psalme 45, ‘dikgarebe tšeo e lego bagwera’ ba monyadiwa ke bomang?

¹⁴ Bala Psalme 45:12, 14b, 15. Moporofeta Sakaria o boletše e sa le pele gore mehleng ya bofelo, batho ba ditšhaba ba tla ikgweranya ka lethabo le mašaledi a Isiraele ya moya. O ngwadile gore: “Mehleng yeo batho ba lesome bao ba tšwago bathong ba maleme ka moka ba tla itshwarelela morumong wa seaparo sa Mojuda, ba re: ‘Re tla sepela le lena ka gobane re kwele gore Modimo o na le lena.’” (Sak. 8:23) Go Psalme 45:12, “batho [ba] ba lesome” ba seswantšhetšo go bolelwa ka bona e le “morwedi wa Tiro” le “bahumi.” Ba tla go mašaledi a batlotšwa ba swere dimpho, ba nyaka gore a ba amogele le go ba thuša moyeng. Ga e sa le go tloga ka 1935, batho ba dimilione ba dumeletše mašaledi a a batlotšwa ‘gore a ba tliše go lokeng.’ (Dan. 12:3) Bagwera ba bao ba botegago ba Bakriste ba tloditšwego ba sekišitše maphelo a bona, ya ba dikgarebe tša moya. ‘Dikgarebe tše tšeo e lego bagwera’ ba monyadiwa di ineetše go Jehofa gomme di itlhatsetše e le balata ba botegago ba Kgoši yeo e lego Monyadi.

15. ‘Dikgarebe tšeo e lego bagwera’ ba mašaledi a batlotšwa di thušana bjang le ba sehlopha sa monyadiwa bao ba sa lego mo lefaseng?

 ¹⁵ Mašaledi a sehlopha sa monyadiwa a leboga kudu ‘dikgarebe tšeo e lego bagwera’ ba ona ka ge dikgarebe tšeo di a thuša ka phišego go bolela ‘ditaba tše dibotse tša Mmušo’ lefaseng ka moka. (Mat. 24:14) Ga se feela gore “moya le monyadiwa ba re: ‘Tlaa!’” eupša bao ba kwago le bona ba re: “Tlaa!” (Kut. 22:17) Ee, “dinku tše dingwe” di kwele ditho tša batlotšwa tša sehlopha sa monyadiwa di re “Tlaa!” gomme tša tlatša monyadiwa go botšeng badudi ba lefase gore “Tlaa!”—Joh. 10:16.

16. Jehofa o neile dinku tše dingwe tokelo efe?

¹⁶ Mašaledi a batlotšwa a rata bagwera ba ona le gona a thabela go tseba gore Tatago Monyadi e lego Jehofa o neile dinku tše dingwe tše di lego mo lefaseng tokelo ya go thaba le ona ka baka la lenyalo la legodimong la Kwana. Go be go boletšwe e sa le pele gore ‘dikgarebe tše tšeo e lego bagwera’ ba mašaledi di be di tla “tlišwa ka lethabo le ka tlhalalo.” Ee, dinku tše dingwe, tšeo di holofelago go phela ka mo go sa felego mo lefaseng, di tla tšea karolo lethabong la legohleng la ge lenyalo la Kwana le direga legodimong. Puku ya Kutollo e bolela ka ditho tša “lešaba le legolo” di “eme pele ga sedulo sa bogoši le pele ga Kwana.” Di direla Jehofa tirelo e kgethwa lapeng la lefaseng la tempele ya gagwe ya moya.—Kut. 7:9, 15.

17, 18. Lenyalo la Kwana le tliša ditšhegofatšo bjang, gona Kriste e tla ba tatago bomang nakong ya Pušo ya gagwe ya Nywaga e Sekete?

¹⁷ Bala Psalme 45:16. ‘Dikgarebe tšeo e lego bagwera’ ba monyadiwa wa Kriste wa legodimong di tla ba le lebaka le lengwe la go thaba ge di bona lenyalo leo le di tlišetša ditšhegofatšo lefaseng le lefsa. Kgoši yeo e lego Monyadi e tla tliša diphetogo lefaseng gomme ya tsoša “borakgolokhukhu” ba yona ba mo lefaseng bao e tlago go ba “barwa” ba yona ba mo lefaseng. (Joh. 5:25-29; Baheb. 11:35) Gare ga bona e tla kgetha ba bangwe gore e be “dikgošana lefaseng ka moka.” Ga go pelaelo gore Kriste o tla kgetha ba bangwe gare ga bagolo bao ba botegago lehono gore ba etelele pele lefaseng le lefsa.—Jes. 32:1.

¹⁸ Nakong ya Pušo ya gagwe ya Nywaga e Sekete, Kriste e tla ba tatago sehlopha se sengwe gape sa batho. Ge e le gabotse, badudi ka moka ba lefaseng bao ba tlago go hwetša bophelo bjo bo sa felego ba tla bo hwetša ka baka la ge ba bontšhitše tumelo sehlabelong sa Jesu sa topollo. (Joh. 3:16) Ka go re’alo, e ba ‘Tatago bona wa ka mo go sa Felego.’—Jes. 9:6, 7.

19, 20. Ditiragalo tše di kgahlišago tšeo di boletšwego go Psalme 45 di kgoma bjang Bakriste ka moka ba therešo lehono?

¹⁹ Bala Psalme 45:1, 17. Ditiragalo tšeo di begilwego go Psalme 45 di kgoma Bakriste ka moka. Batlotšwa bao ba sa lego mo lefaseng ba thabišwa kudu ke go tseba gore kgauswinyane ba tla kopanywa le bana babo bona le Monyadi wa bona legodimong. Dinku tše dingwe di tutueletšega go ikokobeletša le go feta Kgoši ya tšona ya letago le gona di tšeela godimo tokelo ya go ba bagwera ba ditho tše di sa šetšego mo lefaseng tša monyadiwa wa yona. Ka morago ga lenyalo la bona, Kriste le babušigotee le yena Mmušong ba tla tlišetša badudi ba lefaseng ditšhegofatšo tše dintši kudu.—Kut. 7:17; 21:1-4.

²⁰ Ge re sa letetše go phethagala ga “taba e botse” ya mabapi le Kgoši Mesia, na ga re tutueletšege go ‘bolela ka leina la gagwe’? Eka re ka ba gare ga bao ba tlago ‘go reta Kgoši ka mo go sa felego.’