MANGWALO a hlalosa maemo a mmalwa ao go wona batho ba ilego ba gagola diaparo tša bona. Go dira seo go ka bonala e le mo go makatšago go babadi ba lehono, eupša go Bajuda seo e be e le pontšho ya maikwelo a matla a go nolega moko, go nyama, go befelwa goba go hlokofala.

Ka mohlala, Rubeni o ile a “gagola diaparo tša gagwe” ge a hwetša gore leano la gagwe la go hlakodiša morwarragwe e lego Josefa, le be le šitišitšwe ka gobane Josefa o be a rekišitšwe gore e be lekgoba. Tatago bona e lego Jakobo, o ile a “gagola diaparo tša gagwe” ge a be a tšea gore Josefa o jelwe ke sebata. (Gen. 37:18-35) Jobo o ile a “gagola seaparo sa gagwe” ge a be a botšwa gore bana ba gagwe ka moka ba hwile. (Jobo 1:18-20) Moromiwa yoo ‘diaparo tša gagwe di gagoganego’ o ile a tla pele ga Moperisita yo a Phagamego Eli go mo tsebiša gore Baisiraele ba fentšwe ntweng, barwa ba Eli ba babedi ba bolailwe le gore areka ya kgwerano e thopilwe. (1 Sam. 4:12-17) Ge Josia a ekwa mantšu a Molao a balwa e bile a lemoga diphošo tša setšhaba sa gabo, o ile a ‘gagola diaparo tša gagwe.’—2 Dikg. 22:8-13.

Ge Jesu a be a sekišwa, Moperisita yo a Phagamego Kayafa o ile a “gagola diaparo tša gagwe tša ka ntle” ge a ekwa seo a bego a phethile ka phošo gore ke thogako. (Mat. 26:59-66) Go ya ka molao o mongwe wa bodumedi wa borabi, mang le mang yo a bego a ekwa leina la Modimo le rogakwa o be a swanetše go gagola diaparo tša gagwe. Lega go le bjalo, kgopolo e nngwe ya borabi yeo e tšweletšego ka morago ga go senywa ga tempele ya Jerusalema, e be e le ya gore “yo a kwago Leina la Modimo le rogakwa mehleng ye ga se a swanela go gagola diaparo tša gagwe, go sego bjalo diaparo tša motho yoo di tla fetošwa mankgeretla.”

Ke therešo gore go gagola ga motho diaparo e be e le ga lefeela mahlong a Modimo ge e ba a se a nyama go tšwa pelong. Ke ka baka leo Jehofa a boditšego batho ba gagwe gore ‘ba gagole dipelo tša bona, e sego diaparo tša bona; ba boele go yena.’—Joele 2:13.