GO BOLELA therešo, ke be ke sa tšhoga ge ke nea batheetši bao ba banyenyane polelo ka 1957. Ke be ke na le dihlong tša go fetelela. Ge e le gabotse, ge ke sa le yo monyenyane ke be ke ikuta ge baeng ba etla gagešo gaešita le ge ke ba tseba.

Seo se ka go makatšago ke gore dikabelo tša ka tše dintši ka mokgatlong wa Jehofa di be di nkgapeletša go dirišana le batho ba bantši, go akaretša bao ke ba tsebago le bao ke sa ba tsebego. Lega go le bjalo, ke ile ka tšwela pele ke lwantšhana le go lewa ke dihlong le go se ikholofele, ka gona nka se ipethe sehuba ka katlego yeo ke bilego le yona dikabelong tšeo. Go e na le moo, ke bone go rereša ga kholofetšo ya Jehofa yeo e rego: “Ke tla go matlafatša. Ruri ke tla go thuša. Ruri ke tla go swara ka go tia ka seatla sa ka sa le letona sa toko.” (Jes. 41:10) E nngwe ya ditsela tše dikgolo tšeo Jehofa a ilego a nthuša ka tšona ke ka thekgo ya Bakristegotee. E re ke le botšeng ka tše dingwe tša ditsela tšeo, go thoma ge ke be ke sa le ngwana.

Mesong e mengwe ge letšatši le hlabile ka Sontaga ka bo-1940, Elsie Huntingford o ile a tla polaseng ya gešo ka borwabodikela bja Ontario. Mma o ile a boledišana le yena mojako mola tate—yoo a bego a na le dihlong go  swana le nna—a dutše ka ntlong le nna re theeditše. Ka ge tate a be a nagana gore Kgaetšedi Huntingford ke motho wa go rekiša le gore mma o tla reka selo seo re sa se hlokego, mafelelong o ile a ya mojako go yo mmotša gore ga re na kgahlego. Kgaetšedi Huntingford o ile a botšiša gore: “Na ga le kgahlegele thuto ya Beibele?” Tate o ile a araba ka gore: “Re e kgahlegela kudu.”

Kgaetšedi Huntingford o be a re etetše ka nako ya maleba. Batswadi ba ka e be e le ditho tše mafolofolo tša kereke ya United Church of Canada eupša ba sa tšwa go e tlogela. Ka baka la’ng? Ka gobane ge o tsena ka mojako wa kereke, ka mehla o be o hwetša moruti a pharile maina a batho bao ba ntšhago moneelo a a latelantše go ya ka moo ba neetšego ka gona. Batswadi ba ka bao ba bego ba itlhakela, gantši ba be ba e ba mafelelong a lelokelelo leo, gomme baruti ba kereke ba ba gapeletša go oketša moneelo wa bona. E bile moruti yo mongwe o ile a botša batswadi ba ka gore dilo tšeo a di rutago ga a di dumele, o fo ba a sa nyake go lahlegelwa ke mošomo. Ka gona, re ile ra tlogela kereke eupša ra tšwela pele go nyaka tsela ya go kgotsofatša senyakwa sa rena sa moya.

Ka ge modiro wa Dihlatse tša Jehofa ka nako yeo o be o thibetšwe kua Canada, Kgaetšedi Huntingford o be a swara thuto ya Beibele le lapa lešo a diriša Beibele feela le dintlha tšeo a bego a di ngwadile ka pukwaneng e ntsho. Ka morago ga go lemoga gore re ka se botše balaodi ba mmušo ka seo a bego a se dira, o ile a re nea dikgatišo tše di theilwego Beibeleng. Ka morago ga thuto e nngwe le e nngwe, re be re fihla dikgatišo tšeo. *

Go sa šetšwe kganetšo le mathata a mangwe, Kgaetšedi Huntingford o ile a bolela ditaba tše dibotse ka phišego. Phišego ya gagwe e ile ya nkgahla gomme ya ntutueletša go emela therešo. Ka morago ga ngwaga batswadi ba ka ba kolobeditšwe e le Dihlatse tša Jehofa, le nna ke ile ka ineela go Modimo. Ke kolobeditšwe ka February 27, 1949, ka legopong leo borapolase ba bego ba tšhelela diphoofolo meetse. Ke be ke na le nywaga e 17. Ka morago ga moo, ke ile ka ipotša gore ke tlo tsenela tirelo ya nako e tletšego.

Ke ile ka dikadika go bula madibogo di tloga fase. Ke ile ka šoma ka nakwana pankeng le ofising ka gobane ke be ke ipoditše gore ke swanetše go kgoboketša tšhelete pele nka tsenela bobulamadibogo. Lega  go le bjalo, ka ge ke be ke le mofsa yo a se nago phihlelo, ke ile ka diriša tšhelete ya ka bohlaswa. Ka gona ngwanabo rena yo a bitšwago Ted Sargent o ile a nkgothaletša go ba le sebete le go ba le tumelo go Jehofa. (1 Dikor. 28:10) Ka kgothatšo yeo e botho, ke ile ka thoma go bula madibogo ka November 1951. Ke be ke na le ditolara tše 40 feela, paesekele ya kgale le mokotla o mofsa. Eupša Jehofa ka mehla o be a kgonthišetša gore ke hwetša seo ke se hlokago. Ruri ke leboga Ted ge a nkgothaleditše go tsenela tirelo ya bobulamadibogo! Seo se ile sa dira gore ke hwetše ditšhegofatšo tše di oketšegilego.

Bošegong bjo bongwe mafelelong a August 1952, ke ile ka amogela mogala go tšwa kua Toronto. Ofisi ya lekala ya Dihlatse tša Jehofa kua Canada e ile ya ntaletša go tlo hlankela Bethele ka September. Gaešita le ge ke be ke na le dihlong e bile e le la mathomo ke eya lekaleng, ke be ke thabile ka gobane babulamadibogo ba bangwe ba be ba mpoditše dilo tše di kgahlišago ka Bethele. Di tloga fase, ke ile ka ikwa ke le gae ga mahlaku.

Nywaga e mebedi ka morago ga ge ke fihlile Bethele, ke ile ka hlatlama Bill Yacos ke le mohlanka wa phuthego (yoo ga bjale a tsebjago e le molomaganyi wa sehlopha sa bagolo) go e nngwe ya diphuthego tša kua Toronto. Ka ge ke be ke na le nywaga e 23 feela, ke ile ka ikwa ke le mošemanyana wa go hloka phihlelo wa dipolaseng. Eupša Ngwanabo rena Yacos ka boikokobetšo le ka lerato o ile a mpontšha seo ke bego ke swanetše go se dira. Jehofa o ile a nthuša e le ruri.

Ngwanabo rena Yacos, e lego ngwanabo rena wa kgopana yo a dulago a myemyela, o be a kgahlegela batho. O be a rata bana babo rena e bile le bona ba mo rata. Ka mehla o be a ba etela magaeng a bona, eupša e sego feela ge ba na le mathata. Bill Yacos o ile a nkgothaletša go dira se se swanago, go akaretša le go šoma le bana babo rena le dikgaetšedi bodireding bja tšhemo. O ile a re go nna: “Ken, bontšha bana babo rena gore o a ba rata. Seo se tlo dira gore o se šetše kudu mafokodi a bona.”

Jehofa o ile a nthuša ka tsela e kgethegilego ga e sa le go tloga ka January 1957. Kgweding yona yeo ke ile ka nyalana le Evelyn, e lego sealoga sa klase ya bo-14 ya Sekolo sa Gilead. Pele re ka nyalana, o be a hlankela profenseng yeo go bolelwago Sefora kua Quebec. Mehleng yeo, karolo e kgolo ya Quebec e be e laolwa ke Kereke ya Roma Katholika. Ka gona, Evelyn o be a na le kabelo e thata, eupša o ile a e kgomarela ka potego le go kgomarela Jehofa.

Evelyn o ile a nkgomarela ka potego. (Baef. 5:31) Ge e le gabotse, potego ya gagwe e ile ya lekwa ka morago ga gore re nyalane! Re be re rulagantše go tšea leeto la go ya Florida, U.S.A., eupša letšatši ka morago ga lenyalo la rena, lekala le ile la nkgopela go ya sebokeng seo se bego se tlo tšea beke ka moka kua Bethele ya Canada. Ke therešo gore seboka se se ile sa šitišana le leeto la rena, eupša nna le Evelyn re be re ikemišeditše go dira sohle seo Jehofa a re kgopelago go se dira. Ka gona re ile ra se sa ya maikhutšong ka morago ga letšatši la lenyalo la rena. Bekeng yona yeo, Evelyn o ile a šoma tšhemo kgauswi le lekala. Le ge tšhemo yeo e be e fapane le ya Quebec, o ile a kgotlelela.

Mafelelong a beke yeo, go ile gwa direga selo seo ke bego ke sa se letela—ke ile ka abelwa go ba molebeledi wa tikologo ka leboa la Ontario. Ke be ke sa  tšwa go nyala, ke na le nywaga e 25 feela gomme ke se na phihlelo, eupša re ile ra amogela kabelo yeo re botile Jehofa. Gare ga marega kua Canada, re ile ra namela terene bošego le balebeledi ba basepedi ba mmalwa bao ba nago le phihlelo bao ba bego ba boela dikabelong tša bona. Ba ile ba re kgothatša kudu! Ngwanabo rena yo mongwe o ile a ba a re phegelela gore re robale mpeteng wo a bego a o lefeletše ka moo tereneng e le gore re se dule bošego ka moka. Mesong e latetšego, ka morago ga matšatši a 15 a lenyalo la rena, re ile ra makala ge re kgopelwa go etela sehlophana seo ke boletšego ka sona pejana sa kua Hornepayne.

Nna le Evelyn re be re sa tlo dira diphetogo tše dintši. Ge ke be ke sa le molebeledi wa selete mafelelong a bo-1960, ke ile ka amogela taletšo ya go ba gona klaseng ya bo-36 ya Sekolo sa Gilead, e lego klase ya dikgwedi tše lesome yeo e bego e tlo thoma mathomong a February 1961 kua Brooklyn, New York. Ke be ke thabile kudu, eupša ka nyamišwa ke gore Evelyn o be a se a laletšwa. Go e na le moo, go fo swana le basadi ba bangwe bao ba bego ba se ba laletšwa, Evelyn o ile a kgopelwa go ngwala lengwalo gomme a hlalose ge e ba a dumela go arogana le nna dikgwedi tše lesome. Evelyn o ile a lla, eupša ra dumelelana ka gore ke ye sekolong, gomme a thabišwa ke gore ke yo hwetša tlwaetšo e botse Gilead.

Nakong ya sekolo, Evelyn o be a hlankela lekaleng la Canada. O bile le tokelo e kgethegilego ya go dula ka phapošing e tee le kgaetšedi yo a rategago wa motlotšwa e lego Margaret Lovell. Ke therešo gore nna le Evelyn re be re hlologelana kudu. Lega go le bjalo, Jehofa o ile a re thuša go tlwaela dikabelong tša rena tša nakwana. Ke ile ka kgongwa kudu ke go ikemišetša ga Evelyn go gafa nako yeo nkabego re e fetša re le gotee gore re šomišwe ke Jehofa le mokgatlo wa gagwe.

Ka morago ga dikgwedi tše e ka bago tše tharo ke le Gilead, Ngwanabo rena Nathan Knorr, yoo ka nako yeo a bego a etelela pele modiro wa lefase ka bophara, o ile a nkgopela go dira selo seo ke bego ke sa se letela. O ile a mpotšiša ge e ba nka kgona go tlogela Sekolo sa Gilead ka nako yeo gomme ke boele lekaleng kua Canada go yo hlankela ke le mohlahli wa Sekolo sa Bodiredi sa Mmušo ka nakwana. Ngwanabo rena Knorr o ile a mpotša gore kabelo yeo ga se kgapeletšo. O ile a re nka feleletša Sekolo sa Gilead ge ke rata, mohlomongwe ka morago ga moo ka abelwa modiro wa boromiwa. O boletše le gore ge e ba ke kgetha go boela Canada, go ka direga gore ke se laletšwe Gilead gape le gore ge nako e dutše e eya, mohlomongwe ke be ke tla abelwa go boela tšhemong kua Canada. O ile a re ke boledišane le mosadi wa ka ka taba ye ke moka ke dire phetho.

Ka ge Evelyn a be a mpoditše kamoo a lebelelago dikabelo tša pušo ya Modimo ka gona, gateetee ke ile ka botša Ngwanabo rena Knorr gore: “Kabelo le ge e le efe yeo mokgatlo wa Jehofa o nyakago gore re e dire, re tla thabela go e dira.” Re be re ipoditše gore re swanetše go ya le ge e le kae moo mokgatlo wa Jehofa o re abelago gona, go sa šetšwe gore re rata go hlankela kae.

Ka gona, ka April 1961, ke ile ka tloga Brooklyn gomme ka boela Canada go yo ruta Sekolong sa  Bodiredi sa Mmušo. Ka morago, nna le Evelyn re ile ra thoma go hlankela re le ditho tša lapa la Bethele. Ke moka ke ile ka tlabja ke ge ke amogela taletšo ya go ba gona klaseng ya bo-40 ya Sekolo sa Gilead, yeo e bego e tlo thoma ka 1965. Le lekgeng le, Evelyn o ile a swanelwa ke go ngwala lengwalo la ge e ba a dumela re arogana. Eupša ka morago ga dibeke tše sego kae, re ile ra thaba ge a amogela taletšo ya gore le yena a tle sekolong seo.

Ge re fihla Sekolong sa Gilead, Ngwanabo rena Knorr o ile a re botša gore barutwana bao ba ngwadišitšwego klaseng ya Sefora, go etša ge go be go le bjalo ka rena, ba tlo romelwa Afrika. Lega go le bjalo, ge re be re aloga, re ile ra abelwa Canada gape! Ke ile ka kgethwa go ba molebeledi wa lekala (yoo ga bjale e lego molomaganyi wa Komiti ya Lekala). Ka ge ke be ke na le nywaga e 34 feela, ke ile ka gopotša Ngwanabo rena Knorr gore: “Ke sa le yo monyenyane.” Eupša o ile a nkgothatša. Di tloga fase, ke ile ka kgopela thušo go bana babo rena bao ba godilego le bao ba nago le phihlelo mo Bethele pele ke dira diphetho tše dikgolo.

Tirelo ya Bethele e mphile dibaka tše di kgahlišago tša go ithuta go ba bangwe. Ke hlompha dithogotee le nna tša Komiti ya Lekala le go di tšeela godimo. Le gona ke ile ka kgothatšwa ka ditsela tše dibotse ke banna le basadi ba Bakriste ba makgolo—ba banyenyane le ba bagolo—bao re phetšego le bona mo lekaleng le diphuthegong tše di fapafapanego tšeo re hlanketšego go tšona.

Le gona tirelo ya Bethele e mphile dibaka tša go ruta ba bangwe le go matlafatša tumelo ya bona. Moapostola Paulo o boditše Timotheo gore: “Tšwela pele dilong tše o ithutilego tšona.” O boletše gape gore: “Dilo tše o di kwelego go nna tšeo di ilego tša thekgwa ke dihlatse tše dintši, dilo tšeo o di gafele banna ba botegago, bao le bona ba tlago go swanelegela gabotse go ruta ba bangwe.” (2 Tim. 2:2; 3:14) Ka dinako tše dingwe Bakristegotee ba mpotšiša gore ke ithutile eng nywageng e 57 yeo ke e feditšego ke le tirelong ya Bethele. Karabo ya ka e bonolo ke gore: “Go ikemišetša go dira le semeetseng seo mokgatlo wa Jehofa o go kgopelago go se dira le go ithekga ka Jehofa gore a go thuše.”

Ke sa gopola gabotse ge ke be ke fihla Bethele ke le lesogana la dihlong leo le se nago phihlelo. Lega go le bjalo, nywageng ye ka moka, Jehofa o be a dutše a ‘swere seatla sa ka sa le letona.’ Ka thušo e botho le yeo e lego nakong ya badumedigotee, o tšwela pele go nkgonthišetša gore: “O se ke wa boifa. Ke tla go thuša.”—Jes. 41:13.