1. Na tsela yeo re swarago batho ka yona bodireding e bohlokwa? Nea mohlala. (Bona seswantšho se se lego ka mo godimo.)

NYWAGENG e sego kae e fetilego, banyalani ba bangwe ba Bakriste kua Fiji ba be ba tšea karolo lesolong la go laletša batho Segopotšong sa lehu la Kriste. Pula e ile ya thoma go na ba sa bolela le mosadi yo mongwe ka ntle ga ntlo ya gagwe. Ngwanabo rena o ile a nea mosadi yoo amporela ya gagwe gomme yena a tsena ka amporeleng e tee le mosadi wa gagwe. Banyalani bao ba ile ba thaba kudu ge ba bona mosadi yoo a tlile Segopotšong. O ile a bolela gore ga a sa gopola bontši bja dilo tšeo banyalani bao ba di boletšego ge ba be ba mo etetše. Eupša o be a kgahlilwe kudu ke tsela yeo ba ilego ba mo swara ka yona moo a ilego a bona gore o swanetše go ba gona Segopotšong. Ke’ng seo se dirilego gore mosadi yo a arabele gabotse? Banyalani bao ba be ba dirišitše molao woo gantši o bitšwago Molao wa Gauta.

2. Molao wa Gauta ke’ng, gona re ka o diriša bjang?

² Molao wa Gauta ke’ng? Ke keletšo yeo Jesu a e neilego ge a be a re: “Dilo tšohle . . . tše le nyakago batho ba le dira tšona, le lena le ba dire tšona.” (Mat. 7:12) Re ka diriša bjang molao wo? Ka go gata megato e mebedi. Sa pele, re swanetše go ipotšiša gore: ‘Ge nkabe ke le boemong bja motho yo mongwe, ke be ke tla nyaka a ntshwara bjang?’ Sa bobedi, re swanetše go dira sona seo, re sware motho yo  mongwe kamoo re ka nyakago go swarwa ka gona.—1 Bakor. 10:24.

3, 4. (a) Hlalosa gore ke ka baka la’ng Molao wa Gauta o sa šome feela ge re dirišana le badumedigotee le rena. (b) Re tlo ahlaahla’ng sehlogong se?

³ Gantši re diriša Molao wa Gauta ge re dirišana le badumedigotee le rena. Eupša Jesu ga se a ka a bolela gore re swanetše go diriša molao wo feela go bao re tswalanago le bona tumelong. Ge e le gabotse, o boletše ka Molao wa Gauta ge a be a ahlaahla kamoo re swanetšego go swara batho ka moka gaešita le manaba a rena. (Bala Luka 6:27, 28, 31, 35.) Ge e ba go letetšwe gore re diriše Molao wa Gauta go manaba a rena, gona re swanetše go o diriša kudu le go feta ge re botša batho ditaba tše dibotse—bao ba bantši ba bona ba ka bago ba na “le tshekamelo e swanetšego ka bophelo bjo bo sa felego.”—Dit. 13:48.

⁴ Ga bjale re tlo ahlaahla dipotšišo tše tše nne tšeo re ka dulago re di gopola ge re tšea karolo bodireding: Batho bao ke boledišanago le bona ke bomang? Ke boledišana le bona kae? Nako e botse ya go boledišana le bona ke efe? Ke swanetše go boledišana le bona bjang? Go etša ge re tla bona, dipotšišo tše di ka re thuša go naganela maikwelo a bao re boledišanago le bona bodireding gomme ra kgona go fetofetoga le maemo.—1 Bakor. 9:19-23.

5. Ke dipotšišo dife tšeo re ka ipotšišago tšona?

⁵ Gantši bodireding bja rena re boledišana le batho ba fapafapanego. Motho yo mongwe le yo mongwe o na le setlogo sa gagwe sa moswananoši le mathata. (2 Dikor. 6:29) Ge o botša motho yo a itšego ditaba tše dibotse, ipotšiše gore: ‘Ge nna nka ba motho yoo, ke be ke tla nyaka gore a ntebelele bjang? Na ke be ke tla thaba ge a be a ka fo ntšea ke le motho wa go se re selo? Goba na ke be ke tla thabela gore a ntsebe le go ntšea bjalo ka motho?’ Go naganišiša ka dipotšišo tše bjalo go tla re gopotša gore re sware mong wa ntlo yo mongwe le yo mongwe e le motho.

6, 7. Re swanetše go dira’ng ge motho yo re kopanago le yena bodireding a bonagala a se na bogwera?

⁶ Ga go na motho yo a nyakago go tsebja e le motho wa go se kgone go bolela le batho ba bangwe. Ka mohlala: Ka ge re le Bakriste, re leka ka gohle go latela keletšo ya Beibele ya gore ‘mantšu a rena ka mehla e be a kgahlišago.’ (Bakol. 4:6) Lega go le bjalo, ka ge re sa phethagala, ka dinako tše dingwe re bolela dilo tšeo ka morago re itsholelago tšona. (Jak. 3:2) Ge re ka bolela le motho yo mongwe ka tsela e sego botho—mohlomongwe ka baka la ge re se ra tsoga gabotse—re ka se nyake go bitšwa batho ba “lenyatšo” goba “ba go se naganele.” Re tlo letela gore motho yo re bolelago le yena a kwešiše maemo a rena. Na ga se ra swanela go naganela ba bangwe ka tsela e swanago?

⁷ Ge e ba motho yo o kopanago le yena bodireding a bonagala a se na bogwera, na e ka se be mo gobotse go mo kwešiša? Na e ka ba e le gore o lebeletšane le kgateletšo mošomong goba sekolong? Na o na le bothata bjo bogolo bja maphelo? Maemong a mantši, beng ba dintlo bao mathomong a poledišano ba bego ba galefile ba ile ba arabela gabotse ge batho ba Jehofa ba ba swara ka botho le go ba hlompha.—Die. 15:1; 1 Pet. 3:15.

8. Ke ka baka la’ng re se ra swanela go dikadika go botša “batho ba mehuta ka moka” molaetša wa Mmušo?

⁸ Ge re le bodireding re kopana le batho ba mehuta ka moka. Ka mohlala, nywageng e sego kae e fetilego, go gatišitšwe diphihlelo tša ka godimo ga tše 60 lelokelelong la dihlogo tša Morokami tše di rego, “Beibele e Fetoša Maphelo.” Ba bangwe ba batho bao go bolelwago ka bona dihlong tšeo e be e le mahodu, matagwa, ditho tša dihlopha tša disenyi goba ba lemaletše dihlaretagi. Ba bangwe e be e le boradipolotiki, baetapele ba bodumedi goba batho bao ba phelelago mošomo wa boiphedišo le dilo tše dingwe. Ba bangwe ba  be ba phela bophelo bjo bo gobogilego. Lega go le bjalo, ka moka ga bona ba ile ba kwa ditaba tše dibotse, ba amogela thuto ya Beibele, ba dira diphetogo maphelong a bona ke moka ya ba Bakriste. Ka baka leo, le ka mohla ga se ra swanela go naganela gore batho ba itšego ba ka se tsoge ba amogetše molaetša wa Mmušo. (Bala 1 Bakorinthe 6:9-11.) Go e na le moo, re lemoga gore “batho ba mehuta ka moka” ba ka arabela ditabeng tše dibotse.—1 Bakor. 9:22.

9. Ke ka baka la’ng re swanetše go hlompha magae a batho ba bangwe?

⁹ Re boledišana le batho kae ge re le bodireding? Gantši re ya magaeng a bona. (Mat. 10:11-13) Re rata magae a rena, ka gona re a thaba ge ba bangwe ba hlompha magae a rena le dithoto tša rena. Re nyaka go ikwa re šireletšegile le go se šitišwe ke motho. Re swanetše go bontšha baagišani ba rena tlhompho e swanago. Ka baka leo, ge re le bodireding bja ntlo le ntlo ke mo gobotse gore re nagane kamoo re swarago magae a bona ka gona.—Dit. 5:42.

10. Re ka phema bjang go kgopiša batho bodireding bja rena?

¹⁰ Lefaseng la lehono leo le tletšego ka bokebekwa, beng ba dintlo ba bantši ga ba bote batho bao ba sa ba tsebego. (2 Tim. 3:1-5) Ga se ra swanela go dira gore beng ba dintlo ba re belaele. Ka mohlala, a re re re fihla ntlong e itšego gomme re kokota mojakong wa ka pele. Ge e ba go se na motho yo a arabago, re ka lekega go hlodimela ka lefasetere goba go dikologa ntlo re nyakana le mong wa ntlo. Na tikologong ya geno seo se ka galefiša mong wa ntlo? Baagišani ba motho yoo ba ka nagana’ng? Ke therešo gore re swanetše go dira sohle seo re ka se kgonago modirong wa rena wa boboledi. (Dit. 10:42) Re fišegela go botša batho molaetša o kgahlišago e bile maikemišetšo a rena ke a mabotse. (Baroma 1:14, 15) Lega go le bjalo, ka bohlale re phema go dira selo le ge e le sefe seo se ka kgopišago batho ba tšhemong ya gabo rena go sa hlokagale. Moapostola Paulo o ngwadile gore: “Ka tsela le ge e le efe ga re nee lebaka la go kgopša, gore bodiredi bja rena bo se ke bja solwa.” (2 Bakor. 6:3) Ge re hlompha magae le dithoto tša batho ba tšhemong ya gabo rena, boitshwaro bja rena bo ka dira gore ba bangwe ba nyake go ithuta therešo.—Bala 1 Petro 2:12.

11. Ke ka baka la’ng re thaba ge batho ba bangwe ba hlompha nako ya rena?

¹¹ Ka ge re le Bakriste, bontši bja rena re dula re swaregile. E le gore re phethe mabaka a rena, re etiša pele dilo tšeo di tlago pele gomme ra rulaganya mananeo a rena ka kelohloko. (Baef. 5:16; Bafil. 1:10) Ge selo se itšego se šitišana le lenaneo la rena, re ka ferekana. Ka baka leo, re a thaba ge batho ba bangwe ba hlompha nako ya rena gomme ba sa re jele nako ge ba re etetše. Re naganne ka Molao wa Gauta, re ka bontšha bjang gore re hlompha batho bao re ba botšago ditaba tše dibotse?

12. Re ka tseba bjang nako e botse ya go etela batho ba tšhemong ya gabo rena?

¹² Re swanetše go tseba nako e botse ya go etela beng ba dintlo. Ke neng moo gantši batho ba lego gona ka gae tšhemong ya gabo rena? Ke neng moo gantši ba ka re theetšago? E tla ba mo gobotse ge re ka fetoša lenaneo la rena gore le dumelelane le dinako tšeo batho ba tla re theetšago. Dinageng tše dingwe, modiro wa rena wa ntlo le ntlo o atlega kudu thapama goba mantšiboa. Ge e ba go le bjalo tšhemong ya gabo lena, na le ka rulaganya go ya ka ntlo le ntlo ka tšona diiri tšeo? (Bala 1 Bakorinthe 10:24.) Re ka kgodišega gore Jehofa o tla šegofatša boikgafo le ge e le bofe bjoo re bo dirago e le gore re tšee karolo bodireding ka dinako tšeo di swanelago batho ba tšhemong ya gabo rena.

13. Re ka hlompha mong wa ntlo bjang?

¹³ Tsela e nngwe ya go hlompha batho ke efe? Ge re hwetša motho yo a thabelago,  re swanetše go mo nea bohlatse ka botlalo eupša re se ke ra dula nako e telele kudu. Mong wa ntlo a ka ba a beetše nako yeo ka thoko go dira selo se sengwe seo a bonago se le bohlokwa. Ge e ba a re o swaregile, re ka mmotša gore re ka se senye nako—gomme re dire bjalo. (Mat. 5:37) Mafelelong a poledišano, re swanetše go botšiša motho yoo gore nako ya maleba ya gore re boe gape e ka ba efe. Bagoeledi ba bangwe ba hweditše mokgwa wo o latelago o šoma. Ba re go mong wa ntlo: “Nka rata go go etela gape. Na o be o ka rata gore ke go leletše mogala goba ke go romele molaetša pele nka go etela?” Ge re dumelelanya maemo a rena le a batho ba tšhemong ya gabo rena, re latela mohlala wa Paulo yoo ‘a bego a sa tsome seo se holago yena a nnoši eupša a bego a tsoma seo se holago ba bantši, e le gore ba phološwe.’—1 Bakor. 10:33.

14-16. (a) Ke ka baka la’ng re swanetše go hlalosetša mong wa ntlo morero wa ketelo ya rena ka tsela e kwagalago? Nea mohlala. (b) Ke mokgwa ofe woo molebeledi yo mongwe wa mosepedi a hweditšego o atlega?

¹⁴ Akanya ka letšatši le lengwe o hwetša mogala eupša o sa tsebe motho yo a go leleditšego. Ga le tsebane eupša o go botšiša gore o rata dijo tša mohuta ofe. O ipotšiša gore motho yoo ke mang le gore ge e le gabotse o nyaka eng. Mohlomongwe ka ge o nyaka go ba botho, o ka boledišana le yena ka bokopana, eupša wa mmontšha gore ga o sa nyaka go tšwetša pele poledišano. Ka lehlakoreng le lengwe, anke o nagane motho yoo a ipolela gore ke yena mang, a go botša gore o šoma ka dijo tše di nago le phepo le gore o na le boitsebišo bjoo bo ka go thušago. Mohlomongwe  o ka mo theetša. Go ba gona, re rata batho bao ba bolelago le rena ka go se dikadike eupša ba le šedi. Re ka dira bjang se se swanago bathong bao re kopanago le bona bodireding?

¹⁵ Mafelong a mantši, re swanetše go hlalosetša mong wa ntlo morero wa ketelo ya rena. Ke therešo gore re na le ditaba tša bohlokwa tšeo mong wa ntlo a sa di tsebego, eupša a re re ga se ra itsebiša gomme re thomile feela ka go tsena tabeng ka go botšiša gore: “Ke bothata bofe bjo o bego o ka rata go bo rarolla mo lefaseng?” Re a tseba gore morero wa potšišo yeo ke go hwetša seo motho a se naganago ke moka re mo lebiše ka Beibeleng. Lega go le bjalo, mong wa ntlo a ka ipotšiša gore: ‘Motho yo ke mang, gona ke ka baka la’ng a mpotšiša potšišo ye? Bothata bja gagwe ke’ng?’ Ga se ra swanela go dira gore mong wa ntlo a ipotšiše dipotšišo tše. (Bafil. 2:3, 4) Re ka dira seo bjang?

¹⁶ Molebeledi yo mongwe wa mosepedi o hweditše mokgwa wo o latelago o šoma. Ka morago ga gore a dumedišane le mong wa ntlo, o mo nea pampišana ya Na o ka Rata go Tseba Therešo? ke moka a re: “Lehono re nea yo mongwe le yo mongwe pampišana ye. E ahlaahla dipotšišo tše tshelelago tšeo batho ba bantši ba ipotšišago tšona. Kopi ya gago še.” Ngwanabo rena yo o re batho bantši ba a lokologa ge ba tseba morero wa ketelo ya gago. Gantši go ba bonolo go tšwetša pele poledišano ge ba šetše ba go tseba e bile ba tseba seo o tlilego ka sona. Ke moka molebeledi yo wa tikologo o botšiša mong yoo wa ntlo gore: “Na o kile wa ipotšiša e nngwe ya dipotšišo tše?” Ge e ba mong wa ntlo a ka kgetha e nngwe ya tšona, ngwanabo rena o bula pampišana yeo ke moka ba ahlaahla seo Beibele e se bolelago ka potšišo yeo. Goba o fo kgetha e nngwe ya dipotšišo tšeo ke moka a tšwetša pele poledišano ntle le go swariša mong wa ntlo dihlong. Ke therešo gore go na le mekgwa e mentši ya go thoma poledišano. Mafelong a mangwe, beng ba dintlo ba ka nyaka gore re latele mokgwa o itšego wa go dumediša pele re tsena ditabeng. Selo sa bohlokwa ke go fetoša matseno a rena gore a dumelelane le mokgwa wa batho ba tikologong ya gabo rena.

17. Go etša ge re ithutile sehlogong se, ke ditsela dife tše dingwe tšeo ka tšona re ka dirišago Molao wa Gauta?

¹⁷ Ke ditsela dife tšeo re di ahlaahlilego tšeo ka tšona re dirišago Molao wa Gauta bodireding? Re swara mong wa ntlo yo mongwe le mongwe ka seriti. Re hlompha legae la mong wa ntlo le dithoto tša gagwe. Re katanela go tšea karolo bodireding ka dinako tšeo beng ba dintlo ba lego gona ka gae e bile ba ka re theetšago. Le gona re rola matseno a rena ka tsela yeo batho ba tšhemong ya gabo rena ba tlago go re amogela.

18. Go swara batho ba tšhemong ya gabo rena ka tsela yeo re ka ratago go swarwa ka yona go na le mehola efe?

¹⁸ Go swara batho ba tšhemong ya gabo rena ka tsela yeo re ka ratago go swarwa ka yona go na le mehola e mentši. Ka go swara batho ka botho le ka go ba naganela, re dira gore seetša sa rena se bonege, re gatelela bohlokwa bja melao ya motheo ya Mangwalo le gona re tagafatša Tatago rena wa legodimong. (Mat. 5:16) Re ka gogela batho ba bantši therešong ka tsela yeo re boledišanago le bona ka yona. (1 Tim. 4:16) Go sa šetšwe gore batho bao re boledišanago le bona ba amogela molaetša wa Mmušo goba ga ba o amogele, re thabišwa ke go tseba gore re dira sohle seo re ka se kgonago go phetha bodiredi bja rena. (2 Tim. 4:5) Anke yo mongwe le yo mongwe wa rena a ekiše moapostola Paulo yo a ngwadilego gore: “Ke dira dilo tšohle bakeng sa ditaba tše dibotse, e le gore ke di abelane le ba bangwe.” (1 Bakor. 9:23) Ka baka leo, anke ka mehla re diriše Molao wa Gauta ge re le bodireding.