1. Anega pego ya ka Beibeleng yeo e bontšhago tsela yeo ba bangwe ba batho ba Modimo ba iphorago ka yona. (Bona seswantšho se se lego ka mo godimo.)

MESONG e mengwe, Moperisita yo a Phagamego e lego Arone o ile a ema mojakong wa taberenakele ya Jehofa a swere sebjana sa go fišetša diorelo. Kgauswi le yena go be go eme Kora gotee le banna ba 250 bao le bona ba bego ba neela Jehofa dibego, yo mongwe le yo mongwe a swere sebjana sa gagwe sa go swara magala. (Num. 16:16-18) Banna bao ka moka ge o ba lebelela ba be ba bonagala e le barapedi ba botegago ba Jehofa. Lega go le bjalo, ka go se swane le Arone, ka moka ga bona e be e le bahlanogi bao ba ikgogomošago bao ba ilego ba leka go itšeela boperisita. (Num. 16:1-11) Ba be ba iphorile ka go nagana gore Modimo o tla amogela borapedi bja bona. Eupša ba be ba šišimiša Jehofa, ka gobane o kgona go bona seo se lego ka pelong e bile o be a kgona go bona le boikaketši bja bona.—Jer. 17:10.

2. Ke’ng seo Moshe a bego a se boletše e sa le pele, gona na mantšu a gagwe a ile a phethagala?

² Letšatši pele ga tiragalo ye, Moshe o be a boletše e sa le pele gore: “Mesong Jehofa o tla tsebatša yoo e lego wa gagwe.” (Num. 16:5) Bjalo ka ge Moshe a be a boletše, Jehofa o ile a bontšha phapano magareng ga barapedi ba kgonthe le ba mankekišane ge ‘mollo o tšwago go Jehofa o be o tšhuma Kora le banna ba 250 bao ba bego ba neela diorelo.’ (Num. 16:35; 26:10) Ka yona nako yeo, Jehofa o ile a phološa Arone, ka go re’alo a bontšha gore ke mang  yo e bego e le moperisita wa kgonthe le morapedi wa kgonthe wa Modimo.—Bala 1 Bakorinthe 8:3.

3. (a) Ke boemo bofe bjoo bo ilego bja tšwelela mehleng ya moapostola Paulo? (b) Re ka ithuta’ng go seo Jehofa a ilego a se dira marabele a mehleng ya Moshe?

³ Boemo bjo bo swanago bo ile bja tšwelela ka morago ga nywaga e ka bago e 1 500 mehleng ya moapostola Paulo. Ba bangwe ba bao ba bego ba ipitša Bakriste ba ile ba amogela dithuto tša maaka; eupša ba tšwela pele ba kopanela le phuthego. Ge o ba lebelela ba be ba bonagala ba sa fapane le ditho tše dingwe tša phuthego. Eupša bohlanogi bja bona bo be bo bea Bakriste ba botegago kotsing. Diphiri tše tšeo di bego di apere matlalo a dinku di ile tša thoma go “phekgola tumelo ya ba bangwe.” (2 Tim. 2:16-18) Na Jehofa o be a lebeletše? Ee. Paulo o be a tseba seo Modimo a ilego a se dira Kora le bathekgi ba gagwe ba marabele, ka gona le mo nakong ye o be a kgodišegile gore Jehofa o bona seo se diregago. Le rena re ka ba le kgodišego e swanago. Anke re ithute kamoo re ka dirago seo ka gona mantšung a kgahlišago ao Paulo a a ngwaletšego Timotheo.

4. Paulo o be a kgodišegile ka’ng, gona o ile a bontšha bjang kgodišego ya gagwe ge a be a ngwalela Timotheo?

⁴ Paulo o be a kgodišegile gore Jehofa o kgona go bona borapedi bja boikaketši, le gona o be a kgodišegile gore Jehofa o tseba bao ba Mo kwago. Paulo o bontšhitše kgodišego ya gagwe e matla ka mantšu ao a ilego a kgetha go a diriša lengwalong leo a buduletšwego go le ngwalela Timotheo. Ka morago ga gore Paulo a bolele ka bahlanogi bao ba bego ba šetše ba fokodiša tumelo ya ba bangwe ka phuthegong, o ile a ngwala gore: “Go sa šetšwe seo, motheo o tiilego wa Modimo o dula o eme, o na le leswao le le rego: ‘Jehofa o tseba ba gagwe,’ le la gore: ‘Yo mongwe le yo mongwe yo a bitšago leina la Jehofa a tlogele go se loke.’”—2 Tim. 2:18, 19.

5, 6. Ke ka baka la’ng polelwana yeo Paulo a e dirišitšego yeo e rego “motheo o tiilego wa Modimo” e le bohlokwa, gona polelwana ye e ka ba e ile ya kgoma Timotheo bjang?

⁵ Ke ka baka la’ng mantšu ao Paulo a a kgethilego lengwalong le a le bohlokwa? Ke ka gobane ditemana tše ke tšona feela ka Beibeleng tšeo di bolelago ka “motheo o tiilego wa Modimo.” Beibele e diriša lentšu “motheo” go swantšhetša dilo tše di fapafapanego, go akaretša le Jerusalema ya kgonthe yeo e bego e le motsemošate wa Isiraele ya bogologolo. (Ps. 87:1, 2) Tema yeo Jesu a e kgathago morerong wa Jehofa le yona e swantšhwa le motheo. (1 Bakor. 3:11; 1 Pet. 2:6) Paulo o be a naganne ka eng ge a be a ngwala ka “motheo o tiilego wa Modimo”?

⁶ Paulo o bolela ka “motheo o tiilego wa Modimo” ditemaneng tšeo a tsopolago mantšu a ge Moshe a be a bolela le Kora le bathekgi ba gagwe, ao a begilwego go Numeri 16:5. Go bonagala Paulo a be a šupa go ditiragalo tša mehleng ya Moshe, e le ge a leka go kgothatša Timotheo le go mo gopotša gore Jehofa o kgona go bona borabele le go bo lwantšha. Morero wa Jehofa o be o ka se folodišwe ke bahlanogi ka phuthegong go etša ge Kora a ile a palelwa nywagakgolo pele ga moo. Paulo ga se a ka a hlalosa ka botlalo seo se swantšhetšwago ke “motheo o tiilego wa Modimo.” Lega go le bjalo, ga go na pelaelo gore mantšu ao a a dirišitšego a ile a dira gore Timotheo a be le kgodišego le go bota ditsela tša Jehofa.

7. Ke ka baka la’ng re ka kgodišega gore Jehofa o tla dira dilo ka toko le ka go rereša?

⁷ Melao ya motheo ya Jehofa e phagamego ga e fetoge. Psalme 33:11 e re: “Morero wa Jehofa wona o tla ema go iša mehleng ya neng le neng; menagano ya pelo ya gagwe ke ya go tloga molokong o mongwe go ya go o mongwe.” Mangwalo a mangwe a bolela ka bogoši bja Jehofa, botho bja gagwe, toko le go rereša ga gagwe e le tša ka mo go sa felego. (Ek. 15:18; Ps. 106:1; 112:9; 117:2) Maleaki 3:6 e re: “Ke nna Jehofa; ga se ka fetoga.”  Ka mo go swanago, Jakobo 1:17 e re Jehofa ‘ga a fetofetoge goba go fetoga go etša meriti yeo e šuthago.’

8, 9. Re ka ithuta’ng go “leswao” la seswantšhong sa Paulo?

⁸ Seswantšhokgopolo sa Paulo seo se begilwego go 2 Timotheo 2:19 se bolela ka motheo wo go wona go ngwadilwego molaetša, bjalo ka ge eka o kgwarilwe leswao. Mehleng ya bogologolo, batho ba be ba tlwaetše go ngwala mantšu a itšego motheong wa moago, mohlomongwe go bontšha gore moago woo o agilwe ke mang goba gore ke wa mang. Paulo e bile mongwadi wa mathomo wa Beibele wa go diriša seswantšho se. * Leswao leo le lego “[motheong] o tiilego wa Modimo” le na le dipolelwana tše pedi tša bohlokwa. Ya pele e re, “Jehofa o tseba ba gagwe,” gomme ya bobedi e re, “Yo mongwe le yo mongwe yo a bitšago leina la Jehofa a tlogele go se loke.” Se se re gopotša mantšu ao re a balago go Numeri 16:5.—Bala.

⁹ Re ka ithuta’ng go “leswao” leo Paulo a boletšego ka lona seswantšhong sa gagwe? Re ithuta gore go bao e lego ba Modimo, ditekanyetšo tša Jehofa le melao ya gagwe ya motheo di theilwe ditherešong tše tše pedi tša bohlokwa: (1) Jehofa o rata bao ba mmotegelago, le gore (2) Jehofa o hloile go se loke. Thuto ye e tswalana bjang le bohlanogi ka phuthegong?

10. Ditiro tša bahlanogi di ile tša kgoma bjang babotegi ba mehleng ya Paulo?

¹⁰ Mohlomongwe Timotheo le babotegi ba bangwe ka phuthegong ba be ba hlobja boroko ke ditiro tša bahlanogi gare ga bona. Bakriste ba bangwe ba ka ba ba ile ba ipotšiša gore ke ka baka la’ng batho ba bjalo ba dumelelwa go tšwela pele e le ditho tša phuthego. Bao ba bego ba botega ba ka ba ba ile ba ipotšiša ge e ba Jehofa a be a tloga a bona phapano magareng ga potego ya bona le borapedi bja boikaketši bja bahlanogi.—Dit. 20:29, 30.

11, 12. Lengwalo la Paulo le ile la matlafatša bjang tumelo ya Timotheo?

¹¹ Ga go pelaelo gore lengwalo la Paulo le ile la matlafatša tumelo ya Timotheo ka go mo gopotša seo se ilego sa direga ge Modimo a be a bontšha gore Arone o a botega gomme a pepentšha Kora wa moikaketši le bagwera ba gagwe le go ba fediša. Ge e le gabotse, Paulo o be a bolela gore gaešita le ge gare ga bona go be go na le Bakriste ba mankekišane,  Jehofa o be a tla bona bao e lego ba gagwe e le ka kgonthe, go etša ge a dirile bjalo mehleng ya Moshe.

¹² Jehofa ga a fetoge; re ka mmota. O hloile go se loke, le gona ka nako ya maleba o otla badiri ba bobe bao ba sa itsholego. Ka ge Timotheo e be e le yo mongwe wa bao ba “bitšago leina la Jehofa,” le yena o ile a gopotšwa ka boikarabelo bja gagwe bja gore a gane tutuetšo e sa lokago ya Bakriste ba mankekišane. *

13. Ke’ng seo re ka kgodišegago ka sona?

¹³ Le rena re ka matlafatšwa moyeng ke mantšu a Paulo a buduletšwego. Sa pele, ke mo go kgothatšago go tseba gore Jehofa o bona gabotse potego ya rena. Ga a fo bona seo gomme a se dire selo. Go e na le moo, Jehofa o tloga a na le taba le batho ba gagwe. Beibele e re: “Jehofa yena mahlo a gagwe a lebeletše gohle lefaseng ka moka gore a bontšhe matla a gagwe bakeng sa bao ba mmotegelago ka dipelo ka moka.” (2 Dikor. 16:9) Ka go re’alo, re ka tloga re kgodišega gore ga re itapišetše lefeela ge re hlankela Jehofa ‘ka go tšwa pelong.’—1 Tim. 1:5; 1 Bakor. 15:58.

14. Ke borapedi bja mohuta ofe bjoo Jehofa a sa bo kgotlelelego?

¹⁴ Le gona go a thabiša go tseba gore Jehofa ga a kgotlelele borapedi bja boikaketši. Ka ge mahlo a gagwe a “lebeletše gohle lefaseng ka moka,” o kgona go bona bao ba sa ‘mmotegelego ka dipelo ka moka.’ Diema 3:32 e re “motho wa moradia o šišimiša Jehofa,” motho wa go swana le yo a itirago eka o a kwa mola a dira sebe ka sephiring. Gaešita le ge motho wa moradia a ka kgona go radia batho ba bangwe ka nakwana, a ka se kgone go radia Jehofa ka gobane ke Modimo Ramatlaohle le yo a ratago tša go loka. Beibele e re: “Yo a bipago dikarogo tša gagwe a ka se atlege.”—Die. 28:13; bala 1 Timotheo 5:24; Baheberu 4:13.

15. Re swanetše go phema’ng, gona ka baka la’ng?

¹⁵ Batho ba Jehofa ba bantši ba ineetše go yena ka dipelo ka moka. Go tla makatša kudu ge motho yo a itšego ka phuthegong ka boomo a thoma go hlankela Modimo ka boikaketši. Lega go le bjalo, ge e ba seo se ile sa direga mehleng ya Moshe le nakong ya phuthego ya Bokriste ya lekgolong la pele la nywaga, gona se ka direga le lehono. (2 Tim. 3:1, 5) Eupša na re swanetše go gononela Bakristegotee le rena, re belaela ge e ba ba tloga ba botegela Jehofa? Le gatee! E tla ba mo go fošagetšego go hlwa re belaela bana babo rena le dikgaetšedi ntle le lebaka. (Bala Baroma 14:10-12; 1 Bakorinthe 13:7.) Go oketša moo, go hlwa re belaela gore ba bangwe ba a botega ka phuthegong go tla gobatša rena moyeng.

16. (a) Yo mongwe le yo mongwe wa rena a ka dira’ng go thibela gore boikaketši bo se mele ka pelong ya gagwe? (b) Re ka ithuta dithuto dife lepokising leo le rego, “ Dulang le Itekola . . . Dulang le Itlhatsela . . . ”?

¹⁶ Mokriste yo mongwe le yo mongwe o swanetše go ‘hlahloba ditiro tša gagwe.’ (Bagal. 6:4) Ka baka la tshekamelo ya rena ya go dira sebe, re ka thoma go hlankela Modimo ka mabaka a boithati re sa lemoge. (Baheb. 3:12, 13) Ka baka leo, nako le nako re swanetše go hlahloba morero wa rena wa go hlankela Jehofa. Re ka ipotšiša gore: ‘Na ke hlankela Jehofa ka gobane ke mo rata e bile ke thekga bogoši bja gagwe? Goba na ke mo hlankela feela ka gobane ke nyaka go hwetša ditšhegofatšo tša Paradeiseng?’ (Kut. 4:11) Ruri ka moka ga rena re ka holwa ke go hlahloba ditiro tša rena le go tloša boikaketši le ge e le bofe bjo bo ka bago bo le gona ka dipelong tša rena.

17, 18. Ke ka baka la’ng re swanetše go hlankela Jehofa ka go tšwa pelong?

¹⁷ Ge re dutše re katanela go hlankela Jehofa ka go tšwa pelong, re hwetša mehola e  mentši. Mopsalme o re: “Go thaba motho yoo Jehofa a sa mmalelego molato pegong ya gagwe, le yo moya wa gagwe o se nago bofora.” (Ps. 32:2) Ee, bao ba tlošago bofora ka dipelong tša bona ba thabile, le gona ba tla thaba le go feta nakong e tlago.

¹⁸ Ka nako e swanetšego, Jehofa o tla utolla bohle bao ba dirago bobe goba bao ba phelago maphelo a mabedi, a bontšha gabotse “phapano magareng ga moloki le yo kgopo le magareng ga yo a hlankelago Modimo le yo a sa mo hlankelego.” (Mal. 3:18) Ge re sa letile nako yeo, ke mo go kgothatšago go tseba gore “mahlo a Jehofa a lebeletše baloki gomme ditsebe tša gagwe di kwa ditopo tša bona.”—1 Pet. 3:12.