“EUREKA!” Lentšu le le bolela gore: “Ke e hweditše!” Ge gauta e be e sa tšwa go utollwa lekgolong la bo-19 la nywaga kua California, U.S.A., lentšu le le be le kwewa ge mošomi wa moepong a hweditše gauta. Lega go le bjalo, Charles Taze Russell le Barutwanagotee le yena ba Beibele, ba be ba hweditše selo sa bohlokwa go feta gauta—therešo ya Beibele. Le gona ba be ba fagahletše go e botša ba bangwe.

Ka 1914, batho ba dimilione ba metseng e megolo ba ile ba tla ka bontši go tlo bogela “Photo-Drama of Creation,” e lego filimi ya diiri tše seswai yeo e hlamilwego ke International Bible Students Association (I.B.S.A.). Filimi ye ya mabapi le Beibele ya diswantšho tše di sepelago, diselaete tša mebalabala, molaodiši wa sekgwari le mmino o bosana, e be e bontšha babogedi ditiragalo tša go thoma ka tlholo, go latele histori ya batho ke moka e feleletše ka Pušo ya Jesu Kriste ya Nywaga e Sekete.—Kut. 20:4. *

Eupša go thwe’ng ka batho bao ba bego ba dula metsaneng le metsemagaeng? E le gore bao ba bego ba rata therešo ba se bolawe ke tlala ya moya, ka August 1914 mokgatlo wa I.B.S.A. o ile wa lokolla “Eureka Drama”—e lego filimi e kopana e rwalegago yeo e bego e tšerwe filiming ya “Photo-Drama.” Difilimi tše e be e le tše tharo, e nngwe le e nngwe e hwetšagala ka maleme a mmalwa: “Eureka X” e be e na le mantšu ka moka a molaodiši le mmino. “Eureka Y” e be e na le mantšu a molaodiši, mmino gotee le diselaete tše dibotsana tša mebala e sa tagago. Ke moka “Eureka Family Drama,” yeo e bego e hlametšwe go bogelwa ka gae, e be e na le dikarolo tše itšego tša molaodiši le dikopelo. Dikeramafomo tše di sa bitšego kudu le metšhene ya go bapala difilimi tše le tšona di be di hwetšagala.

Ka ge Barutwana ba Beibele ba be ba sa hloke motšhene wa go bapala difilimi goba sekirini se segolo metsemagaeng, ba be ba tšea filimi ye ba e bontšha batho mahala moo, ka go re’alo ba fihlelela ditšhemo tše difsa ka molaetša wa Mmušo. Filimi ya go theetšwa feela ya “Eureka X” e be e ka bapalwa mosegare goba bošego. Filimi ya diselaete ya “Eureka Y” e be e ka bapalwa ntle le mohlagase, go šomišwa lebone la mohuta o itšego. Pego e nngwe ka go Morokami wa Sefinishi e itše: “Re kgona go bontšha batho diswantšho tše mo e nyakilego go ba kae le kae.” Go be go se na therešo e fetago yeo!

Go e na le go hira diholo tše dikgolo, Barutwana ba bohlale ba Beibele gantši ba be ba diriša meago ya mahala, go etša diklase, meago ya mmušo, diteišene tša diterene gaešita le diphapoši tša boithabišo. Gantši batho ba be ba bogela difilimi tše ka ntle, moo go bego go dirwa sekirini  ka lešela le legolo le lešweu leo le bego le pharwa lebotong la setala. Anthony Hambuch o ngwadile gore: “Borapolase ba be ba dira ditulo ka dikota tša dihlare gomme batho ba thabela lenaneo ba dutše moo.” Bana babo rena bao ba bego ba bapala filimi ya “Eureka” ba be ba sepela ka seo se bego se bitšwa Karikana ya Diterama go rwala ditlabakelo, disutukheise, malao le ditlabakelo tša go apea.

Babogedi ba filimi ya “Eureka” ba be ba tloga go ba sego kae go ya go ba makgolo. Kua United States, batho ba 400 ba ile ba bogela filimi ye motsaneng wa badudi ba 150. Motsaneng o mongwe, ba bangwe ba ile ba sepela dikhilomithara tše seswai go ya le tše seswai go boa gore ba tlo bogela “Eureka Drama.” Kua Sweden, baagišani ba Charlotte Ahlberg bao ba bego ba kgobokane ka ntlong ya gagwe e nyenyane ba ile ba “kgongwa kudu” ke direkhoto tšeo. Batho ba e ka bago ba 1 500 ba ile ba tla go e bogela motsaneng o lego lekatana moepong o mongwe kua Australia. Morokami o ile wa bega gore dikolong tše di phagamego le dikholetšheng, “diporofesara le barutwana ba kgahlwa kudu ke diswantšho tša filimi ye le direkhoto tša rena tšeo di bapalwago ka dikeramafomo.” “Eureka Drama” e be e ratwa kudu gaešita le mafelong a go bogela dimobi.

“Eureka Drama” e ile ya ba sedirišwa sa bohlokwa kudu “Modirong wa go Katološa Klase,” moo diklase tša Barutwana ba Beibele di bego di romela diboledi gore di yo thoma diklase tše dingwe tša go ithuta Beibele. Ga re tsebe gore ke batho ba bakae bao ba bogetšego “Eureka Drama.” Difilimi tše dingwe di be di bogelwa ka mehla. Lega go le bjalo, ka 1915 ke feela dihlopha tše 14 go tše 86 tša bana babo rena bao ba bego ba bontšha batho filimi ye tšeo di bego di bega ka mehla. Le ge pego ya mafelelong a ngwaga e ile ya se kgotsofatše, dipalopalo tše di ile tša bontšha gore batho ba ka godimo ga milione ba bone filimi ya “Eureka.” Batho ba e ka bago ba 30 000 ba ile ba kgopela dikgatišo tše di theilwego Beibeleng.

Le ge batho ba bantši ba ka ba ba ile ba lebala “Eureka Drama,” eupša ga go pelaelo gore ba dimilione go tloga Australia go fihla Argentina, go tloga Afrika Borwa go fihla British Isles, India le Dihlakahlakeng tša Caribbean, ba bone filimi ye e kgahlišago. Ba bantši ba bao ba e bonego ba hweditše therešo ya Beibele—selo sa bohlokwa go feta gauta—gomme ba be ba ka goeletša ka gore “Eureka!”