RE PHELA dinakong tše thata kudu historing ya batho. (2 Tim. 3:1-5) Go rata ga rena Jehofa le maikemišetšo a rena a go phela ka ditekanyetšo tša gagwe tša go loka di lekwa letšatši le letšatši. Jesu o ile a bona e sa le pele dinako tše tše thata, gomme a kgonthišetša balatedi ba gagwe gore o be a tlo ba nea kgothatšo yeo ba e hlokago gore ba kgotlelele go fihla bofelong. (Mat. 24:3, 13; 28:20) E le gore a ba matlafatše, o ile a kgetha mohlanka yo a botegago yo a bego a tla ba nea ‘dijo tša moya ka nako e swanetšego.’—Mat. 24:45, 46.

Ga e sa le mohlanka yo a botegago a kgethwa ka 1919, batho ba maleme ka moka ba dimilione bao e lego ditho tša “ba ntlo” ba kgobokeleditšwe ka mokgatlong wa Modimo gomme ba fepša moyeng. (Mat. 24:14; Kut. 22:17) Lega go le bjalo, dikgatišo tše dingwe ga di gona ka maleme a mangwe, e bile ga se bohle bao ba kgonago go hwetša dikgatišo tša rena Wepesaeteng. Ka mohlala, maleme a mantši ga a na dibidio le dihlogo tšeo di tšwelelago Wepesaeteng ya jw.org feela. Na seo se bolela gore ba bangwe ga ba hwetše dijo tšeo ba di hlokago gore ba dule ba phetše gabotse moyeng? Gore re arabe potšišo ye, a re eleng hloko dikarabo tša dipotšišo tše di latelago tše nne.

Ge Sathane a be a leka Jesu gore a fetoše maswika go ba senkgwa, Jesu o ile a araba ka gore: “Motho a ka se phele ka senkgwa feela, eupša o tla phela le ka polelo e nngwe le e nngwe e tšwago molomong wa Jehofa.” (Mat. 4:3, 4) Mantšu a Jehofa a ngwadilwe ka Beibeleng. (2 Pet. 1:20, 21) Ka go re’alo, Beibele ke sedirišwa se segolo seo Jehofa a se dirišago dijong tša rena tša moya.—2 Tim. 3:16, 17.

Mokgatlo wa Jehofa o dirile gore Phetolelo ya Lefase le Lefsa ya Mangwalo a Makgethwa e hwetšagale e feletše goba ka karolo ya yona ka maleme a ka godimo ga a 120, gomme maleme a a oketšega ngwaga o mongwe le o mongwe. Go tlaleletša phetolelong yeo, dikopi tše dibilione tša diphetolelo tše dingwe tša Beibele di hwetšagala di feletše goba ka karolo ya tšona ka maleme a diketekete. Dipalopalo tše tše dikgolo di dumelelana le thato ya Jehofa ya gore “mehuta yohle ya batho e phološwe gomme e fihle tsebong e nepagetšego ya therešo.” (1 Tim. 2:3, 4) Le gona, ka ge go se “na sebopiwa se se utamego mahlong a [Jehofa],” re ka kgodišega gore o tla gogela bao “ba lemogago gore ba nyaka dilo tša moya” ka mokgatlong wa gagwe gomme a ba nea dijo tša moya.—Baheb. 4:13; Mat. 5:3, 6; Joh. 6:44; 10:14.

Gore motho a be le tumelo e tiilego, ga se a swanela go fo bala Beibele. O swanetše go kwešiša seo a se balago gomme a diriše seo a ithutago sona. (Jak. 1:22-25) Molaki wa Moethiopia o ile a lemoga ntlha yeo lekgolong la pele la nywaga. O be a bala Lentšu la Modimo ge moebangedi Filipi a mmotšiša gore: “Na ruri tše o di balago o a di kwešiša?” Molaki yoo o ile a araba ka gore: “Ruri, nka kgona bjang go kwešiša ka ntle le gore motho yo mongwe a ntlhahle?” (Dit. 8:26-31) Filipi o ile a arabela ka go thuša molaki yo gore a hwetše tsebo e nepagetšego ya Lentšu la Modimo. O ile a kgongwa kudu ke seo a ithutilego sona moo a ilego a kolobetšwa. (Dit. 8:32-38) Ka mo go swanago, dikgatišo tša rena tše di theilwego Beibeleng di re thušitše go hwetša tsebo e nepagetšego ya therešo. Di kgomile dipelo tša rena gomme tša re tutueletša go diriša seo re ithutago sona.—Bakol. 1:9, 10.

Ka dikgatišo tše, bahlanka ba Jehofa ba newa motlalo wa dijo tša moya gore ba je le go nwa. (Jes. 65:13) Ka mohlala, makasine wa Morokami, woo o hwetšagalago ka maleme a ka godimo ga a 210, o hlalosa boporofeta bja Beibele, o re thuša go kwešiša ditherešo tša moya tše di tseneletšego e bile o re kgothaletša go phela ka melao ya motheo ya Beibele. Makasine wa Phafoga!, woo o gatišwago ka maleme a e ka bago a 100, o oketša tsebo ya rena ka tlholo ya Jehofa e bile o re bontšha kamoo re ka dirišago keletšo e šomago ya Beibele. (Die. 3:21-23; Baroma 1:20) Mohlanka yo a botegago o tšweletša dikgatišo tše di theilwego Beibeleng ka maleme a ka godimo ga a 680! Na o ipha nako ya go bala Beibele letšatši le letšatši? Na o bala makasine o mongwe le o mongwe o mofsa le dikgatišo ka moka tše difsa tšeo di gatišwago ngwaga le ngwaga ka leleme la geno?

Go tlaleletša tabeng ya go tšweletša dikgatišo, mokgatlo wa Jehofa o lokišeletša dithulaganyo tša dipolelo tše di theilwego Beibeleng tšeo re di newago dibokeng tša rena le dikopanong tše dikgolo le tše dinyenyane. Na o thabela dipolelo, diterama, dipontšho gotee le dipoledišano tšeo di dirwago dikopanong tšeo? Ruri Jehofa o re direla monyanya wa dijo tša moya!—Jes. 25:6.

Karabo ke aowa. Le gona ga se ra swanela go makatšwa ke gore bahlanka ba bangwe ba Jehofa ka dinako tše dingwe ba ka hwetša dijo tše dintši tša moya go feta ba bangwe. Ka baka la’ng? Nagana ka baapostola. Ba ile ba hwetša tlhahlo e ntši go feta barutiwa ba bangwe ba lekgolong la pele la nywaga. (Mar. 4:10; 9:35-37) Lega go le bjalo, barutiwa bao ba ile ba dula ba phetše gabotse moyeng; ba ile ba hwetša dijo tša moya tšeo ba bego ba di hloka.—Baef. 4:20-24; 1 Pet. 1:8.

Le gona ke gabohlokwa go lemoga gore bontši bja dilo tšeo Jesu a di boletšego le tšeo a di dirilego ge a be a le mo lefaseng ga se tša ngwalwa ka dipegong tša Diebangedi. Moapostola Johane o ngwadile gore: “Ge e le gabotse go na le dilo tše dingwe tše dintši tšeo Jesu a di dirilego, tšeo ge e ba di be di ka ngwalwa ka botlalo, ke naganago gore lefase ka bolona le be le ka se kgone go rwala mangwalo a go phuthwa ao a ngwadilwego.” (Joh. 21:25) Gaešita le ge balatedi ba Jesu ba lekgolong la pele la nywaga ba be ba tseba dilo tše dintši ka yena go feta rena, ga re leswiswing. Jehofa o kgonthišeditše gore re tseba ka mo go lekanego ka Jesu e le gore re latele dikgato tša gagwe.—1 Pet. 2:21.

Nagana gape ka mangwalo ao baapostola ba ilego ba a ngwalela diphuthego tša lekgolong la pele la nywaga. Ke lengwalo letee feela leo le ngwadilwego ke Paulo leo le sa kago la ba karolo ya Beibele. (Bakol. 4:16) Na re bolawa ke tlala ya moya feela ka gobane re se na lengwalo leo? Aowa. Jehofa o tseba dilo tšeo re di nyakago gomme o re neile dijo tše di lekanego gore re dule re tiile moyeng.—Mat. 6:8.

Lehono, bahlanka ba bangwe ba Jehofa ba hwetša dijo tša moya go feta ba bangwe. Na dikgatišo tša rena ke tše sego kae ka segageno? Ge e ba go le bjalo, tseba gore Jehofa o na le taba le wena. Ithute dikgatišo tšeo di lego gona ka segageno, gomme ge e ba go kgonega, eba gona dibokeng tša leleme leo o le kwešišago. Le gona kgonthišega gore Jehofa o tla go matlafatša moyeng.—Ps. 1:2; Baheb. 10:24, 25.

Wepesaeteng ye ya rena re tsenya dimakasine tša rena le dikgatišo tše dingwe tša go ithuta Beibele. Le gona Wepesaete ye e na le dihlogo tšeo di thušago banyalani, bafsa gotee le bao ba nago le bana. Malapa a holwa ke go hlahloba dihlogo tše Borapeding bja Lapa. Go oketša moo, Wepesaete ya rena e re botša ka ditiragalo tše di kgethegilego tša go swana le tša ge barutwana ba Gilead ba aloga le seboka sa ngwaga le ngwaga, e bile e dula e tsebiša bana babo rena lefaseng ka bophara ka dikotsi tša tlhago gotee le ditaba tša dikgorong tša tsheko tšeo di kgomago batho ba Jehofa. (1 Pet. 5:8, 9) Le gona Wepesaete ye ke sedirišwa se matla sa go dira boboledi, ka gobane e dira gore ditaba tše dibotse di fihle le dinageng tšeo modiro wa rena o šitišwago goba o thibetšwego.

Lega go le bjalo, o ka dula o phetše gabotse moyeng go sa šetšwe gore o kgona go hwetša tsebišo Wepesaeteng ya rena goba go se bjalo. Mohlanka o šomile ka thata go tšweletša dikgatišo tše di lekanego go thuša yo mongwe le yo mongwe wa ba ntlo go phela gabotse moyeng. Ka baka leo, ga se wa swanela go ikwa o gapeletšega go reka sedirišwa sa elektroniki e le feela gore o tle o kgone go tsena go jw.org. Ba bangwe ba ka itirela ditokišetšo tša go phrintha dihlogo tše sego kae tšeo di tšwelelago Wepesaeteng ya rena gomme ba di nea bao ba sa kgonego go tsena go yona, eupša ga se gwa letelwa gore diphuthego di dire se.

Re leboga Jesu ge a phethagaditše kholofetšo ya gagwe ya gore o tla re hlokomela moyeng. Ge mehla ye e thata ya bofelo e lebile bofelong, re ka kgodišega gore Jehofa o tla tšwela pele go re nea ‘dijo tša moya ka nako e swanetšego.’