1. Ke senyakwa sefe seo batho ba nago le sona, gona ke mang a ka se kgotsofatšago?

BATHO ba nyaka go ikwa ba batamelane le batho ba bangwe. Batho bao ba “batamelanego ke bao ba ratanago kudu le go tsebana gabotse.” Gantši re thabela ditswalano tšeo re nago le tšona le ba malapa a gabo rena le bagwera bao ba re ratago, ba re hlomphago le go re kwešiša. Lega go le bjalo, Motho yo re swanetšego go ba le tswalano ya kgauswi le yena go feta batho ka moka ke Mmopi wa rena yo Mogolo.—Mmo. 12:1.

2. Jehofa o re holofetša’ng, eupša ke ka baka la’ng batho ba bantši ba sa dumele kholofetšo yeo?

² Jehofa ka Lentšung la gagwe o re kgothaletša gore re ‘mmatamele,’ gomme o holofetša gore ge re ka dira bjalo, ‘o tla re batamela.’ (Jak. 4:8) A mantšu a kgothatšago gakaakang! Lega go le bjalo, batho ba bantši ba nagana gore ke go iphora go dumela gore Modimo o nyaka go ba batamela; ba nagana gore ga ba swanelwe ke go mmatamela goba gore o kgole kudu gore a ka batamelwa. Na go batamela Jehofa go a kgonega?

3. Ke’ng seo re swanetšego go se tseba ka Jehofa?

³ Seo re swanetšego go se tseba ke gore Jehofa “ga a kgole le yo mongwe le yo mongwe wa rena” yo a nyakago go mo hwetša; go a kgonega gore re mo tsebe. (Bala Ditiro 17:26, 27; Psalme 145: 18.) Morero wa Modimo ke gore gaešita le batho ba sa phethagalago ba swanetše go mmatamela, le gona o ikemišeditše e bile o nyaka go ba amogela gore e be bagwera ba gagwe ba kgauswi. (Jes. 41:8; 55:6) Mopsalme o be a ka ngwala ka Jehofa go tšwa phihlelong ya gagwe gore: “Wena Mokwi wa thapelo, go wena go tla tla batho ba mehuta ka moka. Go thaba yo o mo kgethago le yo o mmatametšago” kgauswi. (Ps. 65:2, 4) Pego ya Beibele ya mabapi le Kgoši Asa wa Juda e re nea mohlala wa motho yo a ilego a batamela kgauswi le Modimo, le gona e bontšha kamoo Jehofa a ilego a arabela ka gona. *

4. Kgoši Asa o ile a beela batho ba Juda mohlala ofe?

⁴ Kgoši Asa o ile a fišegela kudu borapedi bjo bo sekilego, ka ge a ile a fediša bagweba-ka-mmele ba tempeleng le borapedi bja medimo ya diswantšho bjo bo bego bo atile nageng. (1 Dikg. 15:9-13) Ka ge a be a na le tswalano ya kgauswi le Jehofa, o ile a kgothaletša batho “gore ba tsome Jehofa Modimo wa borakgolokhukhu ba bona, le gore ba phethe molao le ditaelo tša gagwe.” Jehofa o ile a šegofatša nywaga ya mathomo e lesome ya pušo ya Asa ka go dira gore go be le khutšo nageng. Asa o ile a reta mang ka khutšo yeo? O ile a botša setšhaba gore: “Re sa na le naga, ka gobane re tsomile Jehofa Modimo wa rena. Re tsomile, gomme yena o re neile khutšo ka gohle.” (2 Dikor. 14:1-7) Ela hloko seo se ilego sa direga ka morago ga moo.

5. Ke boemong bofe bjoo Asa a ilego a bontšha gore o botile Modimo, gona mafelelo e bile afe?

⁵ Anke o ipee boemong bja Asa. Tsera wa Moethiopia o tlile le banna ba 1 000 000 le dikoloi tše 300 go tlo lwa le Juda. (2 Dikor. 14:8-10) O be o tla arabela bjang ge o bona madira a mantši gakaakaa a tlo lwa le mmušo wa gago? Ka nako yeo wena o na le madira a 580 000 feela! Ka ge madira a Tsera a feta a gago gabedi, na o be o tla ipotšiša gore ke ka baka la’ng Modimo a dumelela tlhaselo e bjalo? Na o be o tla leka go rarolla bothata bjo ka bowena? Tsela yeo Asa a ilego a arabela ka yona e ile ya bontšha gore o be a na le tswalano ya kgauswi le Jehofa e bile a mmota. O ile a bitša Modimo ka go tšwa pelong a re: “Hle Jehofa Modimo wa rena, re thuše, ka gobane re ithekgile ka wena, gomme re tlile go lwa le lešaba le ka leina la gago. Wena Jehofa, o Modimo wa rena. Anke o se dumelele motho wa nama le madi a go feta ka matla.” Modimo o ile a arabela bjang kgopelong ye ya Asa e tšwago pelong? “Jehofa [o ile] a fenya Baethiopia.” Ga go le letee la manaba ao leo le ilego la phologa ntweng yeo!—2 Dikor. 14:11-13.

6. Asa o re beetše mohlala ofe?

⁶ Ke’ng seo se dirilego gore Asa a bote tlhahlo ya Modimo ka mo go feletšego le tšhireletšo ya gagwe? Beibele e re “Asa o ile a dira se se lokilego mahlong a Jehofa” e bile e re ‘pelo ya gagwe e ile ya dula e botegela Jehofa.’ (1 Dikg. 15:11, 14) Le rena re swanetše go hlankela Modimo ka dipelo ka moka. Go tloga go le bohlokwa gore re dire bjalo ge e ba re nyaka go thabela tswalano ya kgauswi le yena gona bjale le nakong e tlago. Re leboga kudu gore Jehofa o gatile mogato wa pele wa go re batametša go yena le go re thuša go ba le tswalano ya kgauswi le yena gotee le go e kgomarela! Ela hloko ditsela tše pedi tšeo ka tšona Modimo a dirilego seo.

7. (a) Ke’ng seo Jehofa a se dirilego seo se re batametšago go yena? (b) Tsela e kgolokgolo yeo ka yona Modimo a re batametšago go yena ke efe?

⁷ Jehofa o bontšhitše gore o a re rata ka go re bopela legae le lebotse. O sa dutše a bontšha gore o a re rata ka go re nea dinyakwa  tša rena tša nama. (Dit. 17:28; Kut. 4:11) Sa bohlokwa kudu, Jehofa o hlokomela dinyakwa tša rena tša moya. (Luka 12:42) Le gona o re kgonthišetša gore o a re theetša ge re mo rapela. (1 Joh. 5:14) Lega go le bjalo, tsela e kgolokgolo yeo Modimo a re batametšago go yena le yeo e dirago gore le rena re mmatamele ke ka lerato leo a re bontšhitšego lona ka topollo. (Bala 1 Johane 4:9, 10, 19.) Jehofa o rometše “Morwa wa gagwe yo a tswetšwego a nnoši” lefaseng e le gore re lopollwe sebeng le lehung.—Joh. 3:16.

8, 9. Jesu o kgatha tema efe morerong wa Jehofa?

⁸ Jehofa o dirile gore gaešita le batho bao ba phetšego pele Kriste a ka tla lefaseng ba holwe ke topollo. Go tloga ge Jehofa a be a porofeta ka Mophološi wa batho wa nakong e tlago, go ya ka yena go be go swana le gore topollo e šetše e lefilwe, ka gobane o be a tseba gore morero wa gagwe o ka se palelwe. (Gen. 3:15) Nywagakgolo ka morago, moapostola Paulo o ile a leboga Modimo bakeng sa “go lokollwa ka topollo yeo e lefilwego ke Kriste Jesu.” Paulo o okeditše ka gore: “[Modimo] o be a lebalela dibe tšeo di dirilwego nakong e fetilego e bile a bontšha go se fele pelo.” (Baroma 3:21-26) A tema e bohlokwa gakaakaang yeo Jesu a e kgathago go re thuša go ba kgauswi le Modimo!

⁹ Ke feela ka Jesu moo batho ba ikokobeditšego ba ka tsebago Jehofa le go thabela tswalano ya kgauswi le yena. Mangwalo a gatelela bjang therešo ye? Paulo o ngwadile gore: “Modimo o bonagatša lerato la gagwe go rena ka gore, ge re be re sa le badiradibe Kriste o ile a re hwela.” (Baroma 5:6-8) Modimo o re neile sehlabelo sa Jesu sa topollo ka gobane a re rata, e sego ka gobane se re swanela. Jesu o itše: “Ga go motho yo a ka tlago go nna ge a sa gogwe ke Tate yo a nthomilego.” Lebakeng le lengwe o itše: “Ga go yo a tlago go Tate ge e se ka nna.” (Joh. 6:44; 14:6) Jehofa o diriša moya o mokgethwa go gogela batho go yena a diriša Jesu gomme o ba thuša go dula leratong la Gagwe ba na le kholofelo ya go phela ka mo go sa felego. (Bala Juda 20, 21.) Ela hloko tsela e nngwe yeo ka yona Jehofa a re gogelago go yena.

10. Ke’ng seo Beibele e re rutago sona seo se re thušago go batamela kgauswi le Modimo?

¹⁰ Go fihla ga bjale mo sehlogong se, re tsopotše dipuku tša Beibele tše e ka bago tše 14. Ge nkabe e se ka Beibele, re be re tla tseba bjang gore re ka batamela kgauswi le Mmopi wa rena? Ka ntle le yona, re be re tla tseba bjang ka topollo le kamoo Jesu a re thušago go batamela go Jehofa? Jehofa o dirišitše moya wa gagwe go budulela batho go ngwala Beibele, yeo e re utollelago semelo sa gagwe se se kgahlišago le merero ya gagwe e megolo. Ka mohlala, go Ekisodo 34:6, 7, Jehofa o itlhalositše go Moshe e le “Modimo yo a gaugelago le yo a šokelago, yo a diegago go galefa, yo a tletšego botho le therešo, yo a bolokelago ba dikete botho bja gagwe, yo a swarelago molato, karogo le sebe.” Ke mang a ka se nyakego go batamela kgauswi le motho yo bjalo? Jehofa o a tseba gore ge re dutše re ithuta ka yena re diriša Beibele, ke moo a tla bago motho wa kgonthe kudu go rena gomme ra ikwa re le kgauswi le yena.

11. Ke ka baka la’ng re swanetše go katanela go ithuta ka dika tša Modimo le ditsela tša gagwe? (Bona seswantšho seo se lego mathomong a sehlogo.)

¹¹ Ge mantšu a ketapele a puku ya Batamela Kgaufsi le Jehofa a hlalosa kamoo re ka bago le tswalano ya kgauswi le Modimo a re: “Segwera se sengwe le se sengwe seo re se dirago, tlemo ya sona e thewa go tsebeng motho, go kgahlweng le go tšeeleng godimo dika tša gagwe tša moswananoši. Ka gona, dika le ditsela tša Modimo bjalo ka ge di utollwa ka Beibeleng, ke taba ya bohlokwa yeo e ka ithutwago.” Ka go re’alo, re leboga kudu  gore Jehofa o dirile gore Lentšu la gagwe le ngwalwe ka tsela yeo re ka le kwešišago!

12. Ke ka baka la’ng Jehofa a ile a diriša batho go ngwala Beibele?

¹² Jehofa a ka ba a ile a dira gore barongwa ba ngwale Beibele. Go ba gona, ba a re rata e bile ba kgahlegela mediro ya rena. (1 Pet. 1:12) Ga go pelaelo gore barongwa ba ka ba ba ile ba kgona go re ngwalela molaetša wa Modimo. Eupša na ba ka ba ba ile ba kgona go bona dilo go ya ka pono ya motho? Na ba ka ba ba ile ba kgona go kwešiša dinyakwa tša rena, mafokodi a rena le dikganyogo tša rena? Aowa, Jehofa o be a tseba gore ba be ba ka se kgone. Jehofa o dirile gore re kwešiše Beibele ka go dira gore e ngwalwe ke batho. Re kgona go kwešiša tsela ya go nagana le maikwelo a bangwadi ba Beibele le batho ba bangwe bao go bolelwago ka bona ka Mangwalong. Re kgona go kwešiša dilo tšeo di ilego tša ba nyamiša, tšeo ba bego ba sa kgodišege ka tšona, tšeo ba bego ba di boifa, mafokodi a bona gotee le go thabišwa ke dilo tše di bego di ba thabiša le tšeo ba atlegilego go tšona. Go etša moporofeta Eliya, bangwadi ka moka ba Beibele ba be ba na le “maikwelo a swanago le a rena.”—Jak. 5:17.

13. O ikwa bjang ka thapelo ya Jona?

¹³ Ka mohlala, na o nagana gore morongwa a ka ba a ile a kgona go hlalosa gabotse tsela yeo Jona a bego a ikwa ka yona ge moporofeta yo a be a tšhabela kabelo yeo Modimo a bego a mo neile yona?Go bile kaone kudu gore Jehofa o ile a kgetha Jona gore a ngwale pego ye ya gagwe, go akaretša le thapelo yeo a e rapetšego ka go tšwa pelong ge a be a le bodibeng bja lewatle! Jona o itše: “Eitše ge ke fela matla, Jehofa ya ba Yena yo ke mo gopolago.”—Jona 1:3, 10; 2:1-9.

14. Ke ka baka la’ng o kwešiša seo Jesaya a se ngwadilego ka yena?

¹⁴ Le gona ela hloko seo Jehofa a ilego a laela Jesaya gore a se ngwale ka yena. Ka morago ga go bona pono ya letago la Modimo,  moporofeta yo o ile a tutueletšega go bolela ka go ba ga gagwe le sebe gore: “Ke wa madimabe ka gobane go bjalo ka ge eka ke hwile, ka ge ke le motho wa molomo o sa hlwekago, ke dula gare ga batho ba melomo e sa hlwekago; ka gobane mahlo a ka a bone yena Kgoši, Jehofa wa madira!” (Jes. 6:5) Ke morongwa ofe yo a bego a ka tutueletšega go bolela mantšu a bjalo? Eupša Jesaya o ile a kgona go a bolela, le gona re kwešiša kamoo a ilego a ikwa ka gona.

15, 16. (a) Ke ka baka la’ng re kgona go kwešiša tsela yeo batho ba bangwe ba ikwago ka yona? Nea mehlala. (b) Ke’ng seo se tlago go re thuša go batamela kgauswi le Jehofa?

¹⁵ Na barongwa ba be ba ka kgona go bolela gore ga ba “swanelwe” ke botho bja Modimo go etša ge Jakobo a boletše, goba gore ba na le “sebe,” go etša kamoo Petro a ilego a ikwa ka gona? (Gen. 32:10; Luka 5:8) Na ba ka ba ba ile ba “boifa” go etša barutiwa ba Jesu, goba na barongwa ba go loka ba ka ba ba ile ba swanelwa ke go “rapa sebete” ge ba ganetšwa go bolela ditaba tše dibotse, go etša ge Paulo le ba bangwe ba ile ba swanelwa ke go dira bjalo? (Joh. 6:19; 1 Bathes. 2:2) Aowa, barongwa ba phethagetše e bile ba na le matla ao a fetago a rena batho. Lega go le bjalo, ge batho ba sa phethagalago ba bonagatša maikwelo a bjalo, re ba kwešiša kapejana ka gobane le rena re batho. Ge re bala Lentšu la Modimo, re kgona go ‘thaba le bao ba thabago gomme ra lla le bao ba llago.’—Baroma 12:15.

¹⁶ Ge e ba re naganišiša ka seo Beibele e se bolelago mabapi le kamoo Jehofa a ilego a dirišana ka gona le bahlanka ba gagwe ba botegago ba bogologolo, re tla ithuta dilo tše dintši tše di kgahlišago ka Modimo wa rena, yoo ka go se fele pelo le ka lerato a ilego a batamela kgauswi le batho bao ba sa phethagalago. Ka go re’alo, re tla tseba Jehofa gabotse kudu le go mo rata ka dipelo ka moka gomme ra kgona go batamela kgauswi le yena.—Bala Psalme 25:14.

17. (a) Asaria o ile a nea Asa keletšo efe e botse? (b) Asa o ile a hlokomologa bjang keletšo ya Asaria, gona seo se bile le mafelelo afe?

¹⁷ Ka morago ga gore Kgoši Asa a fenye madira a Baethiopia, moporofeta wa Modimo e lego Asaria o ile a botša yena le batho ba gagwe mantšu a bohlale. Asaria o itše: “Jehofa o na le lena ge feela le ka ba le yena; ge e ba le mo tsoma, o tla dira gore le mo hwetše, eupša ge e ba le mo tlogela, le yena o tla le tlogela.” (2 Dikor. 15:1, 2) Lega go le bjalo, ka morago Asa o ile a palelwa ke go latela keletšo yeo e botse. Ge mmušo wa ka leboa wa Isiraele o be o nyaka go mo hlasela, Asa o ile a kgopela thušo go Baasiria. Go e na le gore le mo lekgeng le a kgopele thušo go Jehofa, o ile a kgopela thušo go baheitene. Ka baka leo, Asa o ile a botšwa gore: “Wena o dirile tša bošilo tabeng ye, ka gona go tloga bjale go ya pele o tla welwa ke dintwa.” Nywaga ya mafelelo ya pušo ya Asa e be e tletše dintwa. (2 Dikor. 16:1-9) Re ithuta’ng go se?

18, 19. (a) Re swanetše go dira’ng ge e ba re katologetše kgole le Modimo? (b) Re ka batamela bjang kgauswi le Jehofa?

¹⁸ Le ka mohla ga se ra swanela go ba kgole le Jehofa. Eupša ge e ba go šetše go le bjalo, re swanetše go gata mogato ka go dumelelana le Hosea 12:6, yeo e rego: “Boela go Modimo wa gago, o lote botho le toka; o dule o holofetše Modimo wa gago.” Ka gona, anke re batameleng kgauswi kudu le Jehofa ka go naganišiša ka topollo le ka go ithuta ka mafolofolo Lentšu la gagwe e lego Beibele.—Bala Doiteronomio 13:4.

¹⁹ Mopsalme o ngwadile gore: “Ge e le nna ke kgahlwa ke go batamela Modimo.” (Ps. 73:28) Anke ka moka ga rena re tšweleng pele go ithuta dilo tše difsa ka Jehofa gomme re be le mabaka a mantši a go mo rata. Le gona anke Jehofa a batamele kgauswiuswi le rena gona bjale le go iša ka mo go sa felego!