1. Baruti ba Bojakane ba ile ba dira’ng nakong ya ntwa?

NA KE thato ya Modimo gore Bakriste ba therešo ba ye ntweng gomme ba bolaye batho ba morafo o mongwe? Nywageng e 100 e fetilego, batho ba bantši bao ba ipitšago Bakriste ba dirile seo. Baruti ba mašole a kereke ya Katholika ba ile ba rapelela mašole le dibetša tša ona ge a be a eya go lwa le Makatholika a ditšhaba tšeo a lwago le tšona. Baruti ba mašole a kereke ya Protestanta le bona ba ile ba dira se se swanago. Batho bao ba ipitšago Bakriste ba ile ba bolayana kudu nakong ya Ntwa ya Bobedi ya Lefase.

2, 3. Dihlatse tša Jehofa di ile tša kgomarela boemo bofe nakong ya Ntwa ya Bobedi ya Lefase le ka morago ga moo, gona ka baka la’ng?

² Dihlatse tša Jehofa di ile tša dira’ng nakong yeo ya ntwa? Histori e bontšha gore ga se tša ka tša tšea karolo dintweng. Ka baka la’ng? Lebaka le legolo ke gore di be di latela mohlala wa Jesu le dithuto tša gagwe. O itše: “Bohle ba tla tseba ka se gore le barutiwa ba ka, ge e ba le ratana.” (Joh. 13:35) Le gona di ile tša gopola molao wa motheo woo moapostola Paulo a ilego a o bolela ge a be a ngwalela Bakriste ba kua Korinthe.—Bala 2 Bakorinthe 10:3, 4.

³ Ka baka leo, Bakriste ba therešo bao ba tlwaeditšego matswalo a bona ka Beibele, ga ba ithute ntwa goba go tšea karolo dintweng. Ka baka la go kgomarela boemo bjo bja Bokriste, Dihlatse  tše dikete, ba banyenyane le ba bagolo, banna le basadi, ba ile ba tlaišwa. Ba bantši ba ile ba tlaišwa dikampeng tša go gapeletšwa mošomo le dikgolegong. Nakong ya pušo ya Manazi kua Jeremane, ba bangwe ba ile ba bolawa. Go sa šetšwe tlaišo e šoro yeo Dihlatse di ilego tša lebeletšana le yona kua Yuropa, ga se tša ka tša lebala taelo ya gore di bolele ditaba tše dibotse tša Mmušo wa Jehofa. Di ile tša dira seo ka potego—dikgolegong, dikampeng tša tshwenyo le dinageng tšeo di hudušeditšwego go tšona. * Ka morago, Dihlatse di ile tša se tšee karolo dipolaong tša go fedišana ga merafo kua Rwanda ka 1994. Le gona di ile tša se tšee karolo dipolayanong tša morago bjale dintweng tša Balkans ge mmušo wa kgale wa Yugoslavia o be o arogana.

4. Go se tšee karolo dintweng ga Dihlatse tša Jehofa go kgomile batho ba bangwe bjang?

⁴ Go se tšee karolo dintweng ga Dihlatse tša Jehofa go kgodišitše batho ba dikete lefaseng ka bophara gore Dihlatse di rata Modimo le baagišani ba tšona e le ka kgonthe. Ka mantšu a mangwe, ke Bakriste ba therešo. Lega go le bjalo, go na le dibopego tše dingwe tša borapedi bja rena tše di kgodišitšego batho ba bantši gore ge ba bona Dihlatse tša Jehofa, ba bona Bakriste ba therešo.

5. Balatedi ba Kriste ba lekgolong la pele la nywaga ba ile ba lebeletšana le phetogo efe?

⁵ Go tloga mathomong a bodiredi bja gagwe, Jesu o ile a gatelela bohlokwa bja go bolela ditaba tše dibotse tša Mmušo wa Modimo. O ile a kgetha barutiwa ba 12 gore ba tšee karolo go thomeng modiro wo o bego o tla dirwa lefaseng ka bophara; ka morago ga moo a tlwaetša barutiwa ba 70. (Luka 6:13; 10:1) Batho ba ba be ba loketše go botša batho ba bangwe ditaba tše dibotse, gomme ba be ba swanetše go thoma pele ka go ruta Bajuda. Ke moka go be go tlo direga mohlolo! Barutiwa ba Jesu ba be ba tlo iša ditaba tše go batho ba ditšhaba tše dingwe bao ba sa bollago. Ruri yeo e swanetše go ba e bile phetogo e kgolo go barutiwa ba fišegago ba Bajuda!—Dit. 1:8.

6. Ke’ng seo se dirilego gore Petro a lemoge gore Jehofa ga a bebe sefahlego?

⁶ Moapostola Petro o ile a botšwa gore a ye legaeng la Koronelio, e lego Moditšhaba yo a sa bollago. Ka yona nako yeo, Petro o ile a lemoga gore Modimo ga a bebe sefahlego. Koronelio le ba ntlo ya gagwe ba ile ba kolobetšwa. Bokriste bo be bo phatlalalela tšhemong e mpsha; batho ba ditšhaba ka moka ba be ba ka kwa therešo gomme ba e amogela. (Dit. 10:9-48) Ga bjale tšhemo e be e le lefase ka moka.

7, 8. Mokgatlo wa Jehofa o gatile mogato ofe? (Bona seswantšho seo se lego mathomong a sehlogo.)

⁷ Historing ya mehleng yeno ya Dihlatse tša Jehofa, bao ba etelelago pele ka mokgatlong ba ile ba kgothaletša ka mafolofolo modiro wa go bolela le wa go ruta ditaba tše dibotse lefaseng ka bophara. Lehono, Dihlatse tše mafolofolo tše e ka bago tše dimilione tše seswai di dira sohle seo di ka se kgonago go phatlalatša molaetša wa Kriste ka maleme a ka godimo ga a 600, ao a dulago a oketšega! Dihlatse tša Jehofa di tsebja kudu ka modiro wa tšona wa ntlo le ntlo le ka go nea bohlatse diterateng, ka dinako tše dingwe di diriša ditafola le diteroli tša go bea dikgatišo.

⁸ Bafetoledi ba ka godimo ga ba 2 900 ba hweditše tlwaetšo ya maemo a godimo ya gore ba fetolele Beibele le dikgatišo tše di theilwego Beibeleng. Modiro wa bona ga se feela wa go fetolela maleme ao a tšewago e le a magolo. O akaretša le go fetolela maleme a makgolo ao batho ba bantši ba sa tsebego ka ona eupša a bolelwa ke batho ba dimilione. Ka mohlala, kua Sepania, ma-Catalonia a dimilione a bolela segagabo ona e lego se-Catalan letšatši le letšatši. Morago bjale, se-Catalan  se ile sa thoma go tsošološwa le mebolelwana ya sona kua Andorra, Alicante, Dihlakahlakeng tša Balearic le Valencia. Ga bjale Dihlatse tša Jehofa di tšweletša dikgatišo tše di theilwego Beibeleng ka se-Catalan, le gona diboka tša Bokriste di swarwa ka leleme leo le kgomago dipelo tša ma-Catalonia.

9, 10. Ke’ng seo se bontšhago gore mokgatlo wa Modimo o na le taba le dinyakwa tša moya tša batho ka moka?

⁹ Modiro wo wa bofetoledi le wa go ruta o dirwa le ditšong tše dingwe tše dintši. Kua Mexico go bolelwa Sepanishi eupša go na le batho ba bangwe ba bantši ba nageng yeo bao ba bolelago maleme a mangwe. Ba bangwe ba bona ba bolela Semaya. Lekala la kua Mexico le rometše sehlopha sa bafetoledi ba Semaya gore ba yo šomela karolong ya naga yeo moo ba ka kgonago go bolela leleme leo le go le kwa le bolelwa letšatši le letšatši. Mohlala o mongwe ke Senepali, e lego le lengwe la maleme ao a bolelwago kua Nepal, yeo e nago le baagi ba ka godimo ga dimilione tše 29. Nageng yeo go bolelwa maleme a e ka bago a 120, eupša Senepali ke segagabo batho ba ka godimo ga ba dimilione tše lesome gomme ba bangwe ba bantši ba kgona go se bolela. Dikgatišo tša rena tše di theilwego Beibeleng di tšweletšwa le ka leleme leo.

¹⁰ Thekgo yeo mokgatlo wa Jehofa o e neago dihlopha tše dintši tša bafetoledi lefaseng ka bophara e bontšha gore mokgatlo wo o tšeela godimo kudu taelo ya go bolela ditaba tše dibotse tša Mmušo lefaseng ka bophara. Dipampišana tše dimilionemilione, diporoutšha le dimakasine di ile tša sepedišwa masolong a lefaseng ka bophara, tša newa batho mahala. Ditshenyagalelo tša modiro wo di lefelelwa ka meneelo ya boithatelo ya Dihlatse tša Jehofa tšeo di latelago taelo ya Jesu ya gore: “Le amogetše feela, neang feela.”—Mat. 10:8.

11, 12. Modiro wa boboledi wa lefaseng ka bophara wo o dirwago ke Dihlatse tša Jehofa o dirile gore batho ba phethe ka go re’ng?

¹¹ Ka ge Dihlatse tša Jehofa di ineetše modirong wa boboledi le wa go ruta, di tloga di kgodišegile gore di hweditše therešo moo di dirago boikgafo bjo bogolo gore di botše batho ba ditšhaba tše dingwe le merafo e mengwe therešo yeo. Ba bantši ba nolofaditše maphelo a bona, ba ithuta leleme le lengwe gomme ba tlwaelana le setšo se se fapanego le sa gabo bona e le gore ba tšee karolo modirong wo wa bohlokwa wa Bokriste. Modiro wo wa boboledi le wa go ruta lefaseng ka  bophara ke lebaka le lengwe leo le kgodišago batho ba bantši gore Dihlatse tša Jehofa ke balatedi ba therešo ba Kriste Jesu.

¹² Dihlatse di dira dilo tše ka moka ka gobane di kgodišegile gore di hweditše therešo. Eupša ke selo sefe se sengwe seo se kgodišitšego batho ba dimilione gore Dihlatse tša Jehofa di hweditše therešo?—Bala Baroma 14:17, 18.

13. Dihlatse di kgonne bjang go boloka mokgatlo o hlwekile?

¹³ Re ka holwa ke mantšu a Bakriste bao ba ineetšego ba mehleng ya rena, bao ba kgodišegilego gore ba hweditše therešo. Yo mongwe yoo e lego kgale e le mohlanka wa Jehofa o boletše maikwelo a gagwe ka tsela ye: “Go dirwa boiteko bjo bongwe le bjo bongwe go boloka mokgatlo wa Jehofa o hlwekile boitshwarong le go se šilafatšwe, go sa šetšwe gore ke mang yo a swanetšego go newa keletšo goba tayo.” Seo se fihlelelwa bjang? Ka go latela ditekanyetšo tše di lego ka Lentšung la Modimo le mohlala wo o beilwego ke Jesu le barutiwa ba gagwe. Ka go re’alo, historing ya mehleng yeno ya Dihlatse tša Jehofa, ke batho ba sego kae feela bao ba ilego ba swanelwa ke go ntšhwa ka phuthegong ya Bokriste ka ge ba sa nyake go latela ditekanyetšo tša Modimo. Ba bantši—go akaretša le ba bangwe bao kgale ba bego ba phela ka tsela yeo Modimo a sa e amogelego eupša ba fetoga—ba phela bophelo bjo bo hlwekilego e bile ba bea mohlala o mobotse.—Bala 1 Bakorinthe 6:9-11.

14. Ba bantši bao ba bego ba kgaotšwe ba ile ba dira’ng, gona mafelelo e bile afe?

¹⁴ Go thwe’ng ka bao ba ilego ba swanelwa ke go ntšhwa ka phuthegong, e le ge go latelwa taelo ya Mangwalo? Ba dikete ba ile ba itshola ditirong tša bona tšeo e sego tša Bokriste gomme ba amogelwa gape ka phuthegong. (Bala 2 Bakorinthe 2:6-8.) Go kgomarela ditekanyetšo tše di phagamego tša boitshwaro tša Beibele go feleleditše ka gore go be le phuthego ya Bokriste yeo re ka e botago. Taba ya gore Dihlatse tša Jehofa di kgomarela ditekanyetšo tša Modimo—ka go fapana le dikereke tše dintši tšeo di fo go dumelela dilo—e kgodišitše ba bantši gore di hweditše therešo.

15. Ke’ng seo se kgodišitšego ngwanabo rena yo mongwe gore o hweditše therešo?

¹⁵ Ke ka baka la’ng Dihlatse tše dingwe tša kgale di dumela gore di hweditše therešo? Ngwanabo rena yo mongwe yo a lego nywageng ya bo-50 o hlalositše gore: “Ke thomile go dumela ke sa le mofsa gore tumelo ya ka e theilwe dikokwaneng tše tharo tša motheo: (1) gore Modimo o gona; (2) gore o buduletše Beibele; le (3) gore lehono o diriša phuthego ya Bokriste ya Dihlatse tša Jehofa le go e šegofatša. Ge ke be ke dutše ke ithuta go theoša le nywaga, ka mehla ke be ke leka go šišinya dikokwane tšeo go bona ge e ba di tloga di tiile. Ge nywaga e dutše e eya, ke ile ka ba le bohlatse bjo bo oketšegilego bja gore kokwane e nngwe le e nngwe e tiile,  seo sa matlafatša tumelo ya ka le go tiiša kgodišego ya ka ya gore ruri re hweditše therešo.”

16. Ke’ng seo se kgodišitšego kgaetšedi yo a itšego gore o hweditše therešo?

¹⁶ Kgaetšedi yo a nyetšwego yo a hlankelago ntlongkgolo ya lefase kua New York o boletše mabapi le mokgatlo wa Jehofa gore: “Ke mokgatlo o nnoši wo o tsebatšago leina la Jehofa ka go se kgaotše. Seo se tloga se kwagala, kudukudu ge re nagana taba ya gore leina la Modimo le tšwelela ka makga a e ka bago a 7 000 ka Beibeleng! Ke rata kgothatšo yeo e lego go 2 Dikoronika 16:9, yeo e rego: ‘Jehofa yena mahlo a gagwe a lebeletše gohle lefaseng ka moka gore a bontšhe matla a gagwe bakeng sa bao ba mmotegelago ka dipelo ka moka.’” O tšwela pele ka gore: “Therešo e mpontšhitše kamoo nka botegago ka pelo ka moka e le gore Jehofa a mpontšhe matla a gagwe. Ke tšeela godimo kudu tswalano ya ka le Jehofa. Le gona ke tšeela godimo seo Jesu a se dirilego ka go re nea tsebo ya Modimo yeo e mmatlafatšago.”

17. Motho yo mongwe yo e bego e le moilaModimo o ile a kgodišega ka’ng, gona ka baka la’ng?

¹⁷ Motho yo mongwe yo e bego e le moilaModimo o ipobotše ka gore: “Tlholo e nkgodiša gore Modimo o nyaka gore batho ba thabele bophelo, ka go re’alo a ka se dumelele tlaišego e tšwela pele ka mo go sa felego. Le gona, ge lefase le le dutše le nwelela mekgweng yeo e sa kgahlišego Modimo, batho ba Jehofa ba tšwela pele go bontšha tumelo, phišego le lerato. Ke moya wa Jehofa feela wo o ka dirago mohlolo wo wa mehleng yeno.”—Bala 1 Petro 4:1-4.

18. O ikwa bjang ka mantšu ao a boletšwego ke bana babo rena ba bangwe ba babedi?

¹⁸ Hlatse e nngwe ya kgale e neile mabaka a go dumela therešo yeo re e rutago ka gore: “Seo ke ithutilego sona go theoša le nywaga se nkgodišitše gore Dihlatse di dirile maiteko a magolo go latela mohlala wo o beilwego ke Bakriste ba lekgolong la pele la nywaga. Ke iponetše ka noši botee bja Dihlatse tša Jehofa lefaseng ka bophara ge ke dutše ke etela dinageng tše dingwe. Therešo yeo e lego ka Beibeleng e dirile gore ke kgotsofale le go thaba.” Ge ngwanabo rena yo mongwe wa nywaga ya ka godimo ga e 60 a be a botšišwa lebaka leo le mo kgodišago gore o hweditše therešo, o ile a bolela kudu ka Jesu Kriste, a hlalosa gore: “Re ithutile bophelo bja Jesu le bodiredi bja gagwe ka kelohloko gomme re tšeela godimo kudu mohlala wa gagwe. Re dirile diphetogo tseleng yeo re bego re phela ka yona e le gore re batamele kgauswi le Modimo ka Kriste Jesu. Re lemogile gore ke feela ka go bontšha tumelo sehlabelong sa Kriste sa topollo moo re tlago go phološwa. Le gona re a tseba gore o tsošitšwe bahung. Re na le bohlatse bja dihlatse tše di botwago tšeo di bonego tiragalo ye.”—Bala 1 Bakorinthe 15:3-8.

19, 20. (a) Paulo o ile a botša phuthego ya kua Roma ka boikarabelo bofe? (b) Ka ge re le Bakriste ba ineetšego, re na le tokelo efe?

¹⁹ Ka ge re rata baagišani ba rena, re ka se homole ka therešo ye e bohlokwa. Paulo o ile a botša bana babo ba phuthegong ya kua Roma gore: “Ge e ba o bolela phatlalatša ‘lentšu leo le lego molomong wa gago,’ gore Jesu ke Morena, le gona o dumela pelong ya gago gore Modimo o mo tsošitše bahung, gona o tla phološwa. Gobane motho o dumela ka pelo bakeng sa toko, eupša motho o bolela phatlalatša ka molomo bakeng sa phološo.”—Baroma 10:9, 10.

²⁰ Ka ge re le Dihlatse tša Jehofa tše di ineetšego, re kgodišegile gore re hweditše therešo le gona re a lemoga gore re na le tokelo ya go ruta ba bangwe ditaba tše dibotse tša Mmušo wa Modimo. Ge re dutše re phetha modiro wa rena wa boboledi, anke re se kgotsofatšwe feela ke go ruta batho Beibele eupša re ba bontšhe gore re kgodišegile gore re hweditše therešo.