1. Paulo o be a ikwa bjang ka bao ba hlankelago Jehofa ka mafolofolo?

MOAPOSTOLA Paulo o ile a gopola bao ba bego ba šoma ka thata bakeng sa ditaba tše dibotse. Paulo o ngwadile gore: “Re gopola modiro wa lena wa tumelo re sa kgaotše le boitapišo bja lena bjo lerato le kgotlelelo ya lena ka baka la kholofelo ya lena go Morena wa rena Jesu Kriste pele ga Modimo wa rena le Tatago rena.” (1 Bathes. 1:3) Ee, Jehofa ka boyena o gopola boitapišo bjo lerato bja bohle bao ba mo hlankelago ka potego, go sa šetšwe gore maemo a bona a bophelo a ba dumelela go dira mo gontši goba mo gonyenyane.—Baheb. 6:10.

2. Re tlo ahlaahla’ng sehlogong se?

² Ba bantši ba bahlankagotee le rena—ba kgale le ba lehono—ba dirile boikgafo bjo bogolo gore ba hlankele Jehofa ka nako e tletšego. Anke re boneng kamoo ba bangwe ba ilego ba hlankela ka tsela yeo lekgolong la pele la nywaga. Le gona re tlo ahlaahla mehuta e itšego ya tirelo ya nako e tletšego ya mehleng yeno gomme re bone kamoo re ka gopolago bana babo rena ba le dikgaetšedi ba rategago bao ba dirilego boikgafo bja go hlankela Jehofa ka ditsela tše tše di kgethegilego.

3, 4. (a) Ba bangwe ba ile ba hlankela e le eng lekgolong la pele la nywaga? (b) Ba be ba hlokomelwa bjang nameng?

³ Ka moragonyana ga gore a kolobetšwe, Jesu o ile a thoma modiro  wo o bego o tlo fihla dikarolong ka moka tša lefase. (Luka 3:21-23; 4:14, 15, 43) Ka morago ga lehu la gagwe, baapostola ba gagwe ba ile ba etelela pele go katološeng modiro wo wa boboledi. (Dit. 5:42; 6:7) Bakriste ba bangwe, go swana le Filipi, ba ile ba hlankela e le baebangedi le baromiwa kua Palestina. (Dit. 8:5, 40; 21:8) Paulo le ba bangwe ba ile ba fihla le dinageng tše dingwe tša kgojana. (Dit. 13:2-4; 14:26; 2 Bakor. 1:19) Ba bangwe ba go swana le Silibano (Silase), Mareka le Luka ba ile ba hlankela gape e le bangwaledi goba bangwadi. (1 Pet. 5:12) Dikgaetšedi tša Bakriste di ile tša šoma le bana babo rena ba bao ba botegago. (Dit. 18:26; Baroma 16:1, 2) Diphihlelo tša bona tše di kgahlišago di dira gore re ipshine ka go bala Mangwalo a Bakriste a Segerika, le gona di bontšha gore Jehofa ga a lebale bahlanka ba gagwe.

⁴ Bahlanka ba tirelong ya nako e tletšego ba lekgolong la pele la nywaga ba be ba hlokomelwa bjang nameng? Mabakeng a mangwe ba be ba dula le Bakristegotee le bona le go thušwa ka ditsela tše dingwe, eupša ga se ba ka ba gapeletša bana babo rena go ba hlokomela. (1 Bakor. 9:11-15) Ditho tša phuthego le diphuthego ka botšona di be di ithaopela go ba thuša. (Bala Ditiro 16:14, 15; Bafilipi 4:15-18.) Le gona Paulo le basepedigotee le yena ba be ba fela ba šoma mešomo ya boiphedišo ya nakwana gore ba kgone go itlhokomela.

5. Banyalani ba bangwe ba boletše’ng mabapi le go ba ga bona tirelong ya nako e tletšego?

⁵ Le lehono ba bantši ba ikgafa mehuteng e fapafapanego ya tirelo ya nako e tletšego. (Bona lepokisi le le rego, “ Mehuta ya Tirelo ya Nako e Tletšego.”) Ba ikwa bjang ka mešomo yeo ba e kgethilego? Ye ke potšišo yeo o swanetšego go ba botšiša yona, gomme ga go pelaelo gore o tla iteboga ge o ka dira bjalo. Ela hloko mohlala o latelago: Ngwanabo rena yo a hlanketšego e le mmulamadibogo wa ka mehla, mmulamadibogo yo a kgethegilego, moromiwa le setho sa lapa la Bethele nageng e šele o re: “Ke nagana gore go tsenela tirelo ya nako e tletšego ke kgetho e botse kudu yeo e di phalago ka moka. Ge ke be ke na le nywaga e 18, ke ile ka lebeletšana le bothata bja go kgetha gare ga go ya yunibesithi, go šoma le go bula madibogo. Ke bone gore Jehofa ga a lebale boikgafo le ge e le bofe bjo re bo dirago go mo hlankela ka nako e tletšego. Ke kgonne go diriša ditalente tša ka goba bokgoni bjoo Jehofa a nneilego bjona ka ditsela tšeo ke bego nka se tsoge ke kgonne ge nkabe ke ile ka kgetha go phegelela dilo tša lefase.” Mosadi wa gagwe o re: “Kabelo e nngwe le e nngwe e nthušitše go gola moyeng. Re bone Jehofa a re šireletša le go re hlahla ka makga a mantši le ka ditsela tšeo re ka bago re sa di bona ge nkabe re ile ra kgetha bophelo bjo bo tlwaelegilego. Letšatši le letšatši ke leboga Jehofa gore re tirelong ya nako e tletšego.” Na le wena o ka rata gore bophelo bja gago bo be bjalo?

6. Ke’ng seo ka moka ga rena re ka kgodišegago ka sona ka Jehofa?

⁶ Ke therešo gore ba bangwe maemo a bona ga se a tšwa a ba dumelela go tsenela tirelo ya nako e tletšego. Re ka kgodišega gore Jehofa o tšeela godimo maiteko a bona ao ba a dirago ka pelo ka moka. Nagana ka bao Paulo a boletšego ka bona go Filemone 1-3, go akaretša le bohle bao e bego e le ditho tša phuthego ya kua Kolose. (Bala.) Paulo o be a ba tšeela godimo, gomme go bjalo le ka Jehofa. Ka mo go swanago, Tatago rena wa legodimong o tšeela tirelo ya gago godimo kudu. Eupša o ka thekga bjang bao ga bjale ba lego tirelong ya nako e tletšego?

7, 8. Tirelo ya bobulamadibogo e akaretša’ng, gona ba bangwe ka phuthegong ba ka ba thuša bjang?

⁷ Go swana le baebangedi ba lekgolong la pele la nywaga, babulamadibogo ba mafolofolo ba kgothatša phuthego kudu. Ba bantši ba bona ba katanela go fetša diiri tše 70 bodireding kgwedi e nngwe le e nngwe. O ka ba thuša bjang?

 ⁸ Kgaetšedi yo mongwe wa mmulamadibogo yo a bitšwago Shari o itše: “Babulamadibogo ba bonagala ba tiile moyeng, ka ge ba hlwa tšhemong letšatši le letšatši. Eupša le bona ba hloka kgothatšo.” (Baroma 1:11, 12) Kgaetšedi yo mongwe yo a ilego a hlankela e le mmulamadibogo ka nywaga e mmalwa o boletše ka babulamadibogo ba phuthegong ya gabo gore: “Ba šoma ka thata le ka go se kgaotše. Ge ditho tša phuthego di ithaopela go ba iša tšhemong ka dikoloi tša tšona, di ba laletša dijong, di ba nea tšhelete ya peterole goba di ba thuša ka tša ditšhelete, ba leboga kudu. Seo se ba bontšha gore le tloga le tshwenyegile ka bona.”

9, 10. Ke’ng seo ba bangwe ba se dirilego go thuša babulamadibogo ba diphuthegong tša gabo bona?

⁹ Na o ka rata go thuša babulamadibogo bodireding? Mmulamadibogo yo a bitšwago Bobbi o llile ka gore: “Re hloka thekgo ya ditho tša phuthego gare ga beke.” Mmulamadibogogotee le yena yona phuthegong yeo o okeditše ka gore: “Go thata go hwetša motho yo o ka yago le yena tšhemong thapama.” Kgaetšedi yo mongwe yo ga bjale a hlankelago Bethele ya kua Brooklyn o gopola ge e be e sa le mmulamadibogo ka gore: “Kgaetšedi yo mongwe yo a bego a na le koloi o ile a re go nna: ‘Nako le nako ge go se na motho yo o ka tšwago tšhemo le yena o mphounele, ke tla sepela le wena.’ O ile a nthuša kudu gore ke atlege tirelong ye.” Shari le yena o re: “Ka morago ga tšhemo, gantši babulamadibogo bao ba sego lenyalong ba ikela gae ba nnoši. O ka fela o laletša bana babo rena ba bao ba sego lenyalong goba dikgaetšedi borapeding bja lena bja lapa. Go ba akaretša medirong e mengwe le gona go ka ba thuša go dula ba tiile moyeng.”

¹⁰ Ge kgaetšedi yo mongwe yo a bilego tirelong ya nako e tletšego ka nywaga e ka bago e 50 a gopola ge e be e sa le mmulamadibogo le dikgaetšedi tše dingwe tše di bego di sa nyalwa, o re: “Bagolo ba phuthegong ya gabo rena ba be ba etela babulamadibogo dikgweding tše dingwe le tše dingwe tše mmalwa. Ba be ba re botšiša ka mošomo wa boiphedišo, matsogo le ka dilo le ge e le dife tše di re tshwenyago. Ruri ba be ba na le taba le rena. Ba be ba etla mo re dulago go tlo bona ge e ba go na le seo ba ka re thušago ka sona.” Se se ka go gopotša ka Paulo ge a be a leboga hlogo e nngwe ya lapa kua Efeso yeo e ilego ya mo hlokomela.—2 Tim. 1:18.

11. Go hlankela o le mmulamadibogo yo a kgethegilego go akaretša’ng?

 ¹¹ Diphuthego tše dingwe di thabela go ba le babulamadibogo ba kgethegilego. Ba bantši ba bana babo rena ba le dikgaetšedi ba katanela go fetša diiri tše 130 kgwedi e nngwe le e nngwe tšhemong. Ka baka la nako yeo ba e fetšago ba le tšhemong le go re thuša ka ditsela tše dingwe, ga ba na nako ya go šoma mešomo ya boiphedišo. Ofisi ya lekala e ba nea moneelo o monyenyane kgwedi le kgwedi gore ba kgone go swarega kudu bodireding.

12. Bagolo le ba bangwe ba ka thuša bjang babulamadibogo ba kgethegilego?

¹² Re ka thuša bjang babulamadibogo ba kgethegilego? Mogolo yo mongwe ofising e nngwe ya lekala yo a dirišanago kudu le bona o re: “Bagolo ba swanetše go boledišana le bona, ba tsebe maemo a bona, ke moka ba bone kamoo ba ka ba thušago ka gona. Dihlatse tše dingwe di nagana gore babulamadibogo ba kgethegilego ga ba hloke thušo ka ge ofisi ya lekala e ba nea moneelo, eupša bana babo rena ba tikologong yeo ba ka ba thuša ka ditsela tše dintši.” Go fo swana le babulamadibogo ba ka mehla, babulamadibogo ba kgethegilego ba leboga kudu ge re sepela le bona tšhemong. Na o ka ba thuša ka tsela yeo?

13, 14. (a) Ke’ng seo re sa swanelago go se lebala ka balebeledi ba tikologo? (b) O nagana gore o ka dira’ng go thuša bao ba hlankelago modirong wa bosepedi?

¹³ Gantši balebeledi ba tikologo le basadi ba bona ba lebelelwa e le batho ba tiilego moyeng le bao ba re kgothatšago. Seo ke therešo, eupša le bona ba nyaka go kgothatšwa, go thekgwa bodireding le gore re ba bitše ge re itapološa. Go thwe’ng ge ba ka babja gomme ba išwa sepetlele, mohlomongwe ba swanelwa ke go dirwa ophareišene? Ruri ba a kgothatšega ge bana babo rena le dikgaetšedi ba ba thuša ka dilo tše ba di hlokago le go tshwenyega ka bona. Re ka nagana ka tlhokomelo e lerato yeo Luka “ngaka e rategago,” yena mongwadi wa puku ya Ditiro, a swanetšego go ba a ile a e bontšha Paulo le basepedigotee le yena.—Bakol. 4:14; Dit. 20:5–21:18.

¹⁴ Balebeledi ba basepedi le basadi ba bona ba hloka bagwera ba kgauswi e bile ba ba tšeela godimo. Molebeledi yo mongwe wa tikologo o ngwadile gore: “Go bonagala bagwera ba ka ba tseba nako ya maleba ya ge ke hloka kgothatšo. Ba mpotšiša dipotšišo ka botho, gomme seo se nthuša go ntšha sa mafahleng. Ka go fo ntheetša ka kelohloko, ba nthuša kudu.” Balebeledi ba tikologo le basadi ba bona ba leboga kudu tlhokomelo e lerato yeo bana babo bona le dikgaetšedi ba ba bontšhago yona.

15, 16. Ditho tša lapa la Bethele le tša Diholo tša Kopano di phetha mošomo ofe, gona re ka di thekga bjang?

¹⁵ Lefaseng ka bophara, bao ba hlankelago Bethele le Diholong tša Kopano ba phetha mošomo o bohlokwa kudu wa go thekga modiro wa Mmušo dinageng tšeo di okametšwego ke diofisi tša makala tša gabo bona. Ge e ba le na le ditho tša Bethele phuthegong ya gabo lena goba tikologong ya gabo lena, le ka bontšha bjang gore ga le di lebale?

¹⁶ Ge bana babo rena ba ba sa fihla Bethele, ba ka hlologela gae, ka gobane ba tlogetše malapa le bagwera. Ruri ba thaba kudu ge ditho tše dingwe tša Bethele le ditho tša phuthego di gwerana le bona! (Mar. 10:29, 30) Mošomo wa bona o ba dumelela go ba gona dibokeng le go tšea karolo bodireding beke e nngwe le e nngwe. Lega go le bjalo, ka dinako tše dingwe ditho tša Bethele di newa dikabelo tše dingwe ka morago ga mošomo. Ge diphuthego di kwešiša se gomme di bontšha gore di tšeela godimo ditho tša Bethele le mošomo wa tšona, ka moka ga rena re a holega.—Bala 1 Bathesalonika 2:9.

17, 18. Bao ba hlankelago dinageng dišele ba dira mešomo efe?

¹⁷ Bao ba amogelago kabelo ya go hlankela nageng e nngwe ba ka swanelwa ke go ja dijo  tše ba sa di tsebego, go ithuta maleme a mafsa, go tlwaela setšo sa moo le maemo a mangwe ao a sa swanego le a mo ba tšwago. Ke ka baka la’ng ba kgetha go amogela dikabelo tše bjalo tše thata?

¹⁸ Ba bangwe ke baromiwa bao ba hlankelago kudu ditšhemong tšeo go tšona batho ba bantši ba moo ba tla holwago ke tlwaetšo e kgethegilego yeo ba e neilwego. Ofisi ya lekala e nyakela baromiwa madulo a itekanetšego le go ba nea moneelo o itšego gore ba kgone go iphediša. Ba bangwe bao ba hlankelago dinageng dišele ba abelwa go hlankela ofising ya lekala goba go thuša ka go agwa ga meago ya makala, diofisi tša bofetoledi, Diholo tša Kopano goba Diholo tša Mmušo. Ba newa dijo, madulo le dinyakwa tše dingwe. Go swana le ditho tša lapa la Bethele, le bona ba ba gona dibokeng ka mehla le go tšea karolo bodireding lefelong leo ba hlankelago go lona, ka gona ke tšhegofatšo go rena ka ditsela tše dintši.

19. Ke’ng seo re swanetšego go dula re se gopola ka bao ba hlankelago dinageng dišele?

¹⁹ O ka gopola bjang bahlanka ba bao ba lego tirelong ya nako e tletšego? Gopola gore—mathomong—ba ka fo se rate dijo tša nageng ya gabo lena. O ka gopola seo ge o ba laletša dijong; o ka thoma ka go ba botšiša dijo tšeo ba tla ratago go di ja goba go di leka. O se ke wa ba felela pelo ge ba dutše ba ithuta leleme la geno goba setšo. Go ka ba tšea nako gore ba thome go kwešiša dilo ka moka tšeo le di bolelago, eupša ka botho o ka ba thuša ka mmiletšo wa mantšu. Ba tloga ba nyaka go ithuta!

20. Re ka gopola bjang bao ba lego tirelong ya nako e tletšego le batswadi ba bona?

²⁰ Bao ba lego tirelong ya nako e tletšego ba a tšofala ge nako e dutše e eya, gomme go bjalo le ka batswadi ba bona. Ge batswadi ba bona e le Dihlatse, gantši kganyogo ya bona ke gore bana ba bona ba dule dikabelong tša bona. (3 Joh. 4) Ke therešo gore bao ba lego tirelong ya nako e tletšego ba tla dira sohle seo ba ka se kgonago ge e ba batswadi ba bona ba nyaka go hlokomelwa gomme ba tla fela ba etla gae ge maemo a dumela. Lega go le bjalo, bao ba šetšego gae ba ka thuša bao ba lego tirelong ya nako e tletšego ka go šala ba hlokomela batswadi ba bona bao ba tšofetšego ge ba hloka thušo. Gopola gore bao ba lego tirelong ya nako e tletšego ba kgatha tema e kgolo modirong wa bohlokwahlokwa lefaseng ka bophara. (Mat. 28:19, 20) Na wena goba phuthego ya geno le ka thuša bao ba lego tirelong ya nako e tletšego ge e ba batswadi ba bona ba hloka thušo?

21. Bao ba lego tirelong ya nako e tletšego ba ikwa bjang ka thušo le kgothatšo tšeo ba di newago?

²¹ Batho ba bantši ba šoma ka thata gore ba hume. Eupša bao ba kgethago go tsenela tirelo ya nako e tletšego ba dira seo ka gobane ba rata go hlankela Jehofa le ba bangwe. Ba leboga kudu thušo le ge e le efe yeo o ka ba neago yona. Kgaetšedi yo mongwe yo a hlankelago nageng e šele o boletše kamoo ba bantši ba ikwago ka gona ka gore: “Gaešita le lengwalwana la ditebogo le bontšha gore ba bangwe ba nagana ka wena le gore ba leboga seo o se dirago.”

22. O ikwa bjang ka tirelo ya nako e tletšego?

²² Ruri go hlankela Jehofa ka nako e tletšego ke tsela e di phalago tšohle ya bophelo. Mathata wona a gona, eupša o a rutega le go hwetša kgotsofalo. Le gona go dira seo go re lokišeletša tirelo ya nakong e tlago e thabišago yeo bahlanka ka moka ba botegago ba Jehofa ba tlago go e dira ka mo go sa felego ka tlase ga Mmušo wa Modimo. Anke ka moka ga rena ‘re gopoleng re sa kgaotše modiro wa tumelo le boitapišo’ bja bao ba lego tirelong ya nako e tletšego.—1 Bathes. 1:3.