1, 2. (a) Ke’ng seo se bontšhago gore phuthego ya lekgolong la pele la nywaga kua Kolose e be e hlasetšwe? (b) Bana babo rena ba kua Kolose ba ile ba newa keletšo efe gore ba dule ba tiile?

PHUTHEGO ya Bokriste ya lekgolong la pele la nywaga kua Kolose e be e hlasetšwe! Ba bangwe ka phuthegong ba be ba baka dikarogano ka go kgothaletša batho go latela Molao wa Moshe. Ba bangwe ba be ba thekga filosofi ya boheitene ya gore go thabela dilo tše itšego bophelong go fošagetše. E le gore a lwantšhe dithuto tšeo tša maaka, moapostola Paulo o ile a ngwalela Bakolose lengwalo le le kgothatšago gomme a ba lemoša ka gore: “Kgonthišetšang gore go se be le yo a le thopago ka filosofi le bofora bja lefeela go ya ka tlwaelo ya batho, go ya ka dilo tša motheo tša lefase, e sego go ya ka Kriste.”—Bakol. 2:8.

² Ge e ba Bakriste bao ba tloditšwego ba ile ba tsepamiša menagano ya bona “dilong tša motheo tša lefase,” seo e be e tla ba go furalela tokišetšo ya Jehofa ya go ba phološa. (Bakol. 2:20-23) E le go ba thuša go šireletša tswalano ya bona e bohlokwa le Modimo, Paulo o ile a ba eletša ka gore: “Tsepamišang menagano ya lena dilong tša legodimong, e sego dilong tša lefaseng.” (Bakol. 3:2) Ee, bana babo Kriste ba be ba swanetše go tsepamišetša menagano ya bona kholofelong ya bona ya go tlo hwetša bohwa bjo bo sa senyegego  bjoo ba bego ba bo ‘boloketšwe magodimong.’—Bakol. 1:4, 5.

3. (a) Ke kholofelo efe yeo Bakriste ba tloditšwego ba dulago ba nagana ka yona? (b) Re tlo ahlaahla dipotšišo dife sehlogong se?

³ Lehono, Bakriste ba tloditšwego le bona ba tsepamišeditše menagano ya bona Mmušong wa Modimo wa legodimong le kholofelong ya bona ya go ba “bajabohwagotee le Kriste.” (Baroma 8:14-17) Eupša go thwe’ng ka bao ba nago le kholofelo ya go tlo phela mo lefaseng? Mantšu a Paulo a šoma bjang go bona? “Dinku tše dingwe” di ka tsepamišetša bjang menagano ya tšona “dilong tša legodimong”? (Joh. 10:16) Le gona ka moka ga rena re ka holwa bjang ke go ahlaahla mehlala ya banna ba botegago ba bogologolo ba go swana le Aborahama le Moshe, bao go sa šetšwe mathata, ba ilego ba dula ba tsepamišeditše mahlo a bona dilong tša legodimong?

4. Dinku tše dingwe di ka dula bjang di tsepamišeditše menagano ya tšona dilong tša legodimong?

⁴ Gaešita le ge ba dinku tše dingwe ba se na kholofelo ya go yo phela legodimong, fela le bona ba ka tsepamišetša menagano ya bona dilong tša legodimong. Bjang? Ka go etiša pele Jehofa Modimo le dikgahlego tša Mmušo maphelong a bona. (Luka 10:25-27) Ka baka leo, re lebelela Kriste e le mohlala wa rena. (1 Pet. 2:21) Go swana le bana babo rena ba lekgolong la pele la nywaga, le rena re kopana le dithuto tša maaka, difilosofi tša lefase le moya wa go rata dilo tše di bonagalago lefaseng la Sathane. (Bala 2 Bakorinthe 10:5.) Ka ge re ekiša Jesu, re swanetše go ntšha mahlo dinameng gore dilo tše bjalo di se ke tša re gobatša moyeng.

5. Re ka itlhahloba bjang go bona ge e ba re thomile go phegelela dilo tše di bonagalago?

⁵ Na re šetše re tsenwe ke moya wa lefase wa go phegelela dilo tše di bonagalago? Gantši dilo tšeo re di ratago di bonagala dilong tšeo re naganago ka tšona le ditirong tša rena. Jesu o itše: “Moo letlotlo la gago le lego gona, ke moo pelo ya gago le yona e tlago go ba gona.” (Mat. 6:21) Ge re nyaka go bona gore dipelo tša rena di sekametše kae, re swanetše go itlhahloba nako le nako. Ipotšiše gore: ‘Ke fetša nako e kae ke nagana ka tšhelete? Na ke fetša nako e ntši ke nagana ka go ba le kgwebo, go hwetša mošomo o mokaone goba go kaonefatša bophelo bja ka? Goba na ke katanela go dula ke swaregile ka dilo tša moya?’ (Mat. 6:22) Jesu o bontšhitše gore bao ba tshwenyegago kudu ka “go ipolokela matlotlo lefaseng” ba ipea kotsing e kgolo ya moya.—Mat. 6:19, 20, 24.

6. Re ka fenya bjang dilo tšeo di ratwago ke mebele ya rena?

⁶ Mebele ya rena e sa phethagalago e re tutueletša go dira dilo tše di fošagetšego. (Bala Baroma 7:21-25.) Ge e ba moya o mokgethwa wa Modimo o sa šome maphelong a rena, re ka ineela ‘medirong ya leswiswi.’ Mediro yeo e akaretša dilo tša go swana le ‘menyanya ya mašata, botagwa, bootswa le boitshwaro bjo bo hlephilego.’ (Baroma 13:12, 13) E le gore re kgone go fenya ‘dilo tša lefaseng,’ e lego dilo tšeo di ratwago ke mebele ya rena, re swanetše go dula re tsepamišeditše menagano ya rena dilong tša legodimong. Re swanetše go šoma ka thata gore re fihlelele seo. Ke ka baka leo moapostola Paulo a itšego: “Ke tula mmele wa ka gomme ka o laola bjalo ka lekgoba.” (1 Bakor. 9:27) Ka gona ge e ba re nyaka go dula re le lebelong la go ya bophelong, ga se ra swanela go nama maoto! Anke re ahlaahleng seo banna ba bangwe ba babedi ba botegago ba bogologolo ba ilego ba se dira gore ba “[kgahliše] Modimo gabotse.”—Baheb. 11:6.

7, 8. (a) Aborahama le Sara ba ile ba lebeletšana le mathata afe? (b) Aborahama o ile a tsepamišetša monagano wa gagwe kae?

⁷ Ge Jehofa a be a laela Aborahama gore a  hudugele nageng ya Kanana le lapa la gagwe, o ile a dira seo ka pelo ka moka. Ka ge Aborahama a ile a bontšha tumelo le go kwa, Jehofa o ile a dira kgwerano le yena, a re: “Go wena ke tla ntšha setšhaba se segolo, ka go šegofatša.” (Gen. 12:2) Eupša ka morago ga nywaga e mentši, Aborahama le mosadi wa gagwe e lego Sara ba be ba sa dutše ba se na bana. Na Jehofa o be a lebetše seo a bego a se holofeditše Aborahama? Godimo ga moo, bophelo kua Kanana bo be bo le thata. Aborahama le lapa la gagwe ba be ba tlogetše ntlo le metswalo kua Uri, e lego motse wo o bego o humile kua Mesopotamia. Ba ile ba sepela dikhilomithara tša ka godimo ga tše 1 600 gore ba fihle Kanana, moo ba ilego ba dula ka ditenteng, ba kgotlelela tlala le go hlakišwa ke mahodu. (Gen. 12:5, 10; 13:18; 14:10-16) Lega go le bjalo, ga se ba ka ba nagana ka go boela morago bophelong bja maemo kua Uri!—Bala Baheberu 11:8-12, 15.

⁸ Go e na le gore Aborahama a nagane ka ‘dilo tša lefaseng,’ o ile “a ba le tumelo go Jehofa.” (Gen. 15:6) Ee, o ile a tsepamišetša monagano wa gagwe dilong tša legodimong ka go dula a naganne ka dikholofetšo tša Modimo. Ka go re’alo, tumelo ya Aborahama e ile ya putswa ge Modimo yo Godimodimo a be a iponagatša go yena gomme a re: “‘Hle anke o lebelele godimo magodimong gomme o bale dinaledi ge e ba o ka kgona go di bala.’ A iša pele a re go yena: ‘Ka gona peu ya gago e tla lekana le tšona.’” (Gen. 15:5) Ruri mantšu ao a swanetše go ba a ile a kgonthišetša Aborahama gore Modimo ga se a mo lebala! Ka mehla ge Aborahama a be a lebelela legodimong leo le tletšego dinaledi, o be a tla gopola kholofetšo ya Jehofa ya gore o tla atiša peu ya gagwe. Ka nako ya Modimo ya maleba, Aborahama o ile a ba le morwa, go etša ge a be a holofeditšwe seo.—Gen. 21:1, 2.

9. Go latela mohlala wa Aborahama go tla re thuša bjang go dula re swaregile tirelong ya Modimo?

⁹ Go etša Aborahama, le rena re letetše go phethagala ga dikholofetšo tša Modimo. (2 Pet. 3:13) Ge e ba re sa tsepamišetše menagano ya rena dilong tša legodimong, re ka bona eka dikholofetšo tšeo di a diega gomme ra thoma go goga maoto dilong tša moya. Ka mohlala, na nakong e fetilego o ile wa dira boikgafo bja gore o kgone go tšea bobulamadibogo goba go tsenela tirelo e nngwe e itšego? Ge e ba go le bjalo, re a go reta. Go thwe’ng ka gona bjale? Gopola gore Aborahama o ile a dula a nagana ka “motse wo o nago le metheo ya kgonthe.” (Baheb. 11:10) O ile a “bontšha tumelo go Jehofa gomme a balelwa seo e le go loka.”—Baroma 4:3.

10. Bophelo bja Moshe bo be bo le bjang ge e be e sa le mofsa?

¹⁰ Monna yo mongwe yo a ilego a dula a tsepamišeditše monagano wa gagwe dilong tša legodimong ke Moshe. Ge e be e sa le mofsa, o ile a “rutwa ka bohlale ka moka bja Baegipita.” Ye e be e se thuto yeo e bego e hwetšwa ke mang le mang. Ga se feela gore Egipita e be e le mmušo wa lefase ka nako yeo, eupša gape Moshe o be a dula ka lapeng la Farao. Ka gona ga go makatše ge Moshe a ile a ba “matla mantšung a gagwe le ditirong tša gagwe” ka baka la thuto yeo ya maemo. (Dit. 7:22) Nagana gore thuto yeo nkabe e ile ya mmulela dibaka dife! Eupša Moshe o be a tsepamišeditše monagano wa gagwe dilong tša bohlokwa kudu—go direng thato ya Modimo.

11, 12. Ke thuto efe yeo Moshe a ilego a e tšea e le bohlokwa kudu, gona re tseba bjang?

¹¹ Ga go pelaelo gore ge Moshe e be e sa le yo monyenyane mmagwe e lego Jogobede o ile a mo ruta ka Modimo wa Baheberu. Moshe o ile a tšea go tseba Jehofa go le bohlokwa kudu go feta mahumo le ge e le afe. Ka go re’alo, o ile a gana maemo le dilo tšeo a bego a tla ba le tšona ka ge e be e le setho sa lapa la Farao. (Bala Baheberu 11:24-27.) Ruri thuto ya moya yeo Moshe a e hweditšego le tumelo ya gagwe go Jehofa di ile tša mo thuša  go tsepamišetša monagano wa gagwe dilong tša legodimong.

¹² Moshe o ile a newa thuto e phagamego go di feta ka moka mehleng ya gagwe, eupša na o ile a e dirišetša go ba le maemo kua Egipita, go tuma goba go ikgobokeletša mahumo? Aowa. Ge nkabe a ile a dira bjalo, nkabe a se a “gana go bitšwa morwa wa morwedi wa Farao, a kgetha go swarwa gampe le setšhaba sa Modimo go e na le go thabela boipshino bja nakwana bja sebe.” Go molaleng gore Moshe o ile a diriša thuto ya moya yeo a e hweditšego go tšwetša pele morero wa Jehofa.

13, 14. (a) Ke’ng seo se ilego sa thuša Moshe gore a swanelegele kabelo yeo Jehofa a bego a tlo mo nea yona? (b) Go swana le Moshe, ke’ng seo le rena re ka swanelwago ke go se dira?

¹³ Moshe o be a tshwenyega kudu ka Jehofa le batho ba Gagwe. Ge a be a na le nywaga e 40, o ile a nagana gore o loketše go yo lokolla batho ba Modimo bokgobeng kua Egipita. (Dit. 7:23-25) Lega go le bjalo, pele ga ge Jehofa a ka mo nea kabelo yeo, Moshe o be a sa hloka selo se itšego. O be a swanetše go hlagolela dika tša go swana le boikokobetšo, go se fele pelo, boleta le boitshwaro. (Die. 15:33) Moshe o be a hloka tlwaetšo yeo e bego e tla mo lokišeletša go kgotlelela diteko le mathata ao a bego a tlo lebeletšana le ona. Nywaga e 40 yeo a e feditšego e le modiši e mo thušitše gore a be le dika tšeo Modimo a di nyakago.

¹⁴ Na Moshe o ile a holwa ke go ba modiši? Ee! Lentšu la Modimo le re Moshe o ile a ba “motho yo boletaleta go feta batho bohle bao ba bego ba phela lefaseng.” (Num. 12:3) O be a hlagoletše boikokobetšo, bjoo bo ilego bja mo thuša go dirišana ka go se fele pelo le batho ba fapafapanego le go ba rarollela mathata a bona a magolo. (Ek. 18:26) Ka mo go swanago, le rena go ka nyakega gore re hlagolele dika tša moya tšeo di tlago go re thuša go phologa ‘masetlapelo a magolo’ gomme ra tsena lefaseng le lefsa la go loka la Modimo. (Kut. 7:14) Na gona bjale re kgona go phedišana gabotse le ba bangwe, go akaretša le bao re naganago gore ba na le matepe goba ba kgopišega ka pela? Re swanetše go kwa mantšu a moapostola Petro yoo a ilego a kgothaletša badumedigotee le yena gore: “Godišang batho ba mehuta ka moka, ratang mokgatlo wohle wa bana babo rena.”—1 Pet. 2:17.

15, 16. (a) Ke ka baka la’ng go le bohlokwa kudu gore re tsepamišetše menagano ya rena dilong tše di nepagetšego? (b) Ke ka baka la’ng go le bohlokwa gore Bakriste ba dule ba itshwere gabotse?

¹⁵ Re phela “[dinakong] tše di hlobaetšago tšeo go lego thata go lebeletšana le tšona.” (2 Tim. 3:1) Ka gona go bohlokwa kudu gore re dule re tsepamišeditše menagano ya rena dilong tše di nepagetšego gore re kgone go dula re phakgame moyeng. (1 Bathes. 5:6-9) Ela hloko kamoo re ka dirago seo ka gona dikarolong tše tharo tša maphelo a rena.

¹⁶ Boitshwaro bja rena: Petro o ile a lemoga bohlokwa bja boitshwaro bjo bobotse. O itše: “Dulang le itshwere gabotse gare ga ditšhaba, gore . . . ba be dihlatse tše di bonago ka mahlo mediro ya lena e mebotse, gomme ka baka la seo, ba tagafatše Modimo.” (1 Pet. 2:12) Go sa šetšwe gore re ka gae, mošomong, sekolong, boitapološong goba bodireding, re dira sohle seo re ka se kgonago go tagafatša Jehofa ka boitshwaro bja rena bjo bobotse. Ke therešo gore ka moka ga rena re dira diphošo ka ge re sa phethagala. (Baroma 3:23) Eupša ge re ka tšwela pele re “elwa ntwa e botse ya tumelo,” re ka fenya mebele ya rena e sa phethagalago.—1 Tim. 6:12.

17. Re ka ekiša bjang monagano wa Kriste Jesu? (Bona seswantšho seo se lego mathomong a sehlogo.)

¹⁷ Boemo bja rena bja kgopolo: Selo se sengwe seo se sepedišanago kudu le go dula re itshwere gabotse ke go ba le boemo bjo bo nepagetšego bja kgopolo. Moapostola Paulo o itše: “Dulang le na le boemo bjo bja  monagano bjo bo bego bo le go Kriste Jesu.” (Bafil. 2:5) Jesu o be a na le boemo bofe bja kgopolo? O be a ikokobeditše. Boikokobetšo bo ile bja mo tutueletša go bontšha boikgafo bodireding. Selo seo a bego a dula a nagana ka sona ke go botša ba bangwe ditaba tše dibotse tša Mmušo wa Modimo. (Mar. 1:38; 13:10) Dilo tšohle tšeo Jesu a bego a di ruta di be di theilwe Lentšung la Modimo. (Joh. 7:16; 8:28) O be a ithuta Mangwalo a Makgethwa ka kelohloko e le gore a kgone go a tsopola, go a lwela le go a hlalosa. Ge re ka ikokobetša gomme ra ba mafolofolo bodireding le go ithuta Beibele ka kelohloko, re tla ba le monagano wa go swana le wa Kriste kutšwanyana.

18. Ke tsela efe ya bohlokwa yeo ka yona re ka thekgago modiro wa Jehofa?

¹⁸ Thekgo ya rena: Morero wa Jehofa ke gore “letolo le lengwe le le lengwe la bao ba lego legodimong le bao ba lego lefaseng . . . le khuname leineng la Jesu.” (Bafil. 2:9-11) Gaešita le maemong ao a phagamego, Jesu o be a sa dutše a tlo ikokobeletša thato ya Tagagwe, gomme le rena re swanetše go dira bjalo. (1 Bakor. 15:28) Bjang? Ka go thekga ka pelo ka moka modiro wo re laetšwego go o dira, e lego modiro wa go “[dira] batho ba ditšhaba ka moka barutiwa.” (Mat. 28:19) Le gona re nyaka go “[direla] bohle botse,” go swara baagišani ba rena le bana babo rena gabotse.—Bagal. 6:10.

19. Ke’ng seo re swanetšego go ikemišetša go se dira?

¹⁹ Re leboga kudu gore Jehofa o re gopotša gore re tsepamišetše menagano ya rena dilong tša legodimong! Ka go re’alo, re swanetše go “[kitima] ka kgotlelelo lebelo leo le beilwego pele ga rena.” (Baheb. 12:1) Eka ka moka ga rena re ka šoma ‘ka moya ka moka bjalo ka ge eka re direla Jehofa,’ gomme Tatago rena wa legodimong o tla šegofatša maiteko a rena.—Bakol. 3:23, 24.