SEHLOPHA sa bafsa ba Bakriste se phetha ka gore se yo bogela mobi. Bafsa ba ba kwele gore dithaka tša bona tše dintši sekolong di ipshinne ka wona. Ge ba fihla lefelong la go bogela dimobi, ba lebelela diswantšho tša go bapatša mobi woo gomme ba bona go na le dibetša tša go boifiša le mosadi yo a sa aparago gabotse. Ba tla dira’ng? Na ba tla fo tsena gomme ba o bogela?

Boemo bjo bo bontšha gore re kopana le maemo a mantši ao a nyakago gore re dire diphetho tšeo di ka kgomago bomoya bja rena le tswalano ya rena le Jehofa, ka tsela e botse goba e mpe. Ka dinako tše dingwe o ka ipotša gore o nyaka go dira selo se itšego, eupša ka morago ga go lekodišiša boemo wa swanelwa ke go fetoša monagano. Na seo se ra gore ga o tsebe ditaba tša gago, goba na ke go bontšha bohlale?

Go rata Jehofa go re tutueleditše go ineela go yena le go kolobetšwa. Re nyaka go dula re botegela Modimo ka dipelo tša rena ka moka. Eupša lenaba la rena e lego Sathane Diabolo o ikemišeditše go dira gore re se sa botega. (Kut. 12:17) Re dirile phetho ya go hlankela Jehofa le go kwa melao ya gagwe. Ka ge re ineetše go Jehofa, ruri e tla ba mo go nyamišago ge re ka fetoša monagano tabeng ye! Re tla ba re ikepela lebitla.

Nywageng ya ka godimo ga e 2 600 e fetilego, Nebukadinetsara Kgoši ya Babilona o ile a hloma seswantšho se segolo sa gauta gomme a laela gore batho ka moka ba se khunamele le go se rapela. Motho le ge e le ofe yo a bego a tla gana go dira bjalo o be a tlo lahlelwa sebešong se se tukago mollo. Barapedi ba bararo ba Jehofa e lego Shaderaka, Meshaka le Abedinego, ba ile ba gana go se khunamela. Ka baka leo, ba ile ba lahlelwa sebešong seo se tukago mollo. Jehofa o ile a ba phološa ka mohlolo, eupša ba be ba beile maphelo a bona kotsing ka go rata gomme ba se dumelele selo se dira gore ba fetoše phetho ya bona ya go hlankela Modimo.—Dan. 3:1-27.

 Lebakeng le lengwe, moporofeta Daniele o ile a tšwela pele a rapela Modimo letšatši le letšatši gaešita le ge go be go beilwe molao wa gore yo a ka dirago bjalo o tlo lahlelwa moleteng wa ditau. Ee, o ile a tšwela pele ka mokgwa wa gagwe wa go rapela Jehofa gararo ka letšatši. Daniele ga se a ka a fetoša monagano tabeng ya go rapela Modimo wa therešo. Ka baka leo, Jehofa o ile a hlakodiša moporofeta yo “marofeng a ditau.”—Dan. 6:1-27.

Bahlanka ba Modimo ba mehleng yeno le bona ba phelela boineelo bja bona go yena. Sekolong se sengwe Afrika, sehlopha sa bana ba sekolo ba Dihlatse tša Jehofa se ile sa gana go tšea karolo moletlong wa go rapela folaga ya setšhaba. Ba ile ba botšwa gore ba tla rakwa sekolong ge ba ka se tšee karolo. Ka moragonyana ga moo, tona ya tša thuto e ile ya etela motsaneng woo gomme ya bolela le bana ba bangwe ba Dihlatse tša Jehofa. Bana bao ba ile ba hlalosa boemo bja bona ka sebete le ka tlhompho. Go tloga ka yona nako yeo, taba ye e ile ya fela. Bana babo rena le dikgaetšedi ba bafsa ba kgona go ya sekolong ntle le go boifa gore ba tla gapeletšwa go tšea karolo dilong tšeo di ka senyago tswalano ya bona le Jehofa.

Nagana le ka Joseph, yoo mosadi wa gagwe a bego a swerwe ke kankere gomme ka morago ga nakwana a hwa. Lapa la gabo Joseph le ile la mo kwešiša le go hlompha kamoo a bego a nyaka gore poloko e sepele ka gona. Lega go le bjalo, ba gabo mosadi wa gagwe ga se Dihlatse, ka gona ba be ba nyaka gore go latelwe metlwae e itšego ya go boloka motho, go akaretša meletlwana yeo e šišimišago Modimo. Joseph o re: “Ge ke be ke sa dumelelane le bona, ba ile ba leka go goketša bana ba ka bao le bona ba ilego ba ema ba tiile. Meloko ya ka e ile ya leka le go swara moletelo legaeng la ka ka ge ba tlwaetše go dira bjalo, eupša ke ile ka ba botša gore ge e ba ba nyaka go dira moletelo ba ka se o direle ka legaeng la ka. Ba be ba tseba gore go dira moletelo ga go dumelelane le ditumelo tša ka le seo mosadi wa ka a bego a se dumela, ka gona ka morago ga ditherišano tše telele ba ile ba o swarela lefelong le lengwe.

“Nakong yeo e thata ya mahloko, ke ile ka lopa Jehofa ka thapelo gore a thuše lapa la ka gore le se ke la roba melao ya gagwe. O ile a kwa dithapelo tša ka gomme a re thuša go ema re tiile go sa šetšwe kgateletšo ya ba leloko.” Joseph le bana ba gagwe ga se ba ka ba tlelwa le ke kgopolo ya go fetoša monagano tabeng ya go hlankela Modimo.

Ka moragonyana ga Paseka ya 32 C.E., mosadi yo mongwe wa Mosirofenikia o ile a tla go Jesu Kriste tikologong ya Sidone. O ile a dulela go mo kgopela gore a leleke motemona go morwedi wa gagwe. Mathomong Jesu o ile a se mo arabe. O ile a botša barutiwa ba gagwe gore: “Ga se ka romelwa go batho le ge e le bafe ge e se go dinku tše di timetšego tša ntlo ya Isiraele.” Ka morago ga gore mosadi yoo a phegelele, Jesu o ile a re: “Ga go a swanela go tšea senkgwa sa bana wa se lahlela dimpšanyana.” Mosadi yo o ile a bontšha tumelo e kgolo ka go botša Jesu gore: “Ee, Morena, eupša ruri dimpšanyana di ja marathana a wago tafoleng ya beng ba tšona.” Jesu o ile a kwa kgopelo ya mosadi yoo gomme a fodiša morwedi wa gagwe.—Mat. 15:21-28.

Ka go dira bjalo, Jesu o be a ekiša Jehofa ka go ikemišetša go fetoša monagano ge maemo a nyaka gore go be bjalo. Ka mohlala, Modimo o be a ikemišeditše go fediša Baisiraele ge ba be ba dirile namane ya gauta, eupša a theetša Moshe ge a be a mo lopa gore a fetoše phetho yeo.—Ek. 32:7-14.

Moapostola Paulo o ile a ekiša Jehofa le Jesu. Nakong e nngwe, Paulo o ile a nagana gore go sepela le Johane Mareka maetong a boromiwa ke go senya nako ka gobane Mareka o kile a tlogela Paulo le Baranaba leetong la bona la mathomo la boromiwa. Eupša ka morago go bonagala Paulo a ile a lemoga gore Mareka o fetogile le gore a ka mo tšwela mohola.  Ka gona Paulo o ile a botša Timotheo gore: “O tle le Mareka gobane o nkhola bodireding.”—2 Tim. 4:11.

Go thwe’ng ka rena? Ge re dutše re ekiša Tatago rena wa legodimong yo a gaugelago, yo a sa felego pelo le yo lerato, re ka kopana le maemo ao a nyakago gore re fetoše monagano. Ka mohlala, re ka swanelwa ke go fetoša tsela yeo re lebelelago ba bangwe ka yona. Ka go se swane le Jehofa le Jesu, ga se ra phethagala. Ka gona ge e ba bona ba kgona go fetoša monagano ka batho ba bangwe, rena re ka šitišwa ke’ng go dira bjalo?

Go fetoša monagano e ka ba selo se sebotse ge re nagana ka dipakane tša go hlankela Modimo. Ba bangwe bao ba ithutago Beibele gomme e le kgajana ba etla dibokeng tša phuthego ba ka dikadika go kolobetšwa. Goba bana babo rena ba bangwe ba ka dikadika go tšea bobulamadibogo, gaešita le ge maemo a bona a ba dumelela go bo tšea. Le gona bana babo rena ba bangwe ba gogela morago ge ba swanetše go katanela ditokelo tše itšego ka phuthegong. (1 Tim. 3:1) Na le wena o balwa gare ga batho ba? Jehofa ka lerato o go kgothaletša gore o katanele go fihlelela ditokelo tše bjalo. Ka gona ke ka baka la’ng o sa fetoše monagano wa gago gomme o ipshine ka lethabo la go hlankela Modimo le ba bangwe?

Ge Ella a hlalosa tirelo ya gagwe ofising ya lekala la Dihlatse tša Jehofa Afrika o re: “Ge ke sa fihla Bethele, ke be ke sa nagane gore ke tla dula. Ke be ke rata go hlankela Jehofa ka moya wa ka ka moka, eupša ke be ke bile ke rata lapa la gešo kudu. Mathomong, ke be ke hlologela gae kudu! Eupša kgaetšedi yo ke bego ke dula le yena ka phapošing o ile a nkgothatša, ka gona ka phetha ka gore ke dule Bethele. Ka ge ga bjale ke na le nywaga e lesome ke dula Bethele, ke nyaka go tšwela pele ke hlankela bana bešo le dikgaetšedi gona mo, ge maemo a sa ntumelela.”

Na o sa gopola seo se ilego sa diragalela Kaine ge a be a jela ngwanabo mona gomme a tuka bogale? Modimo o ile a botša monna yo wa sefelapelwana gore ge a ka fetoša monagano gomme a dira botse o tla mo amogela. Modimo o ile a eletša Kaine gore a fenye sebe seo se bego se mo ‘laletše mojako.’ Nkabe Kaine a ile a fetoša monagano, eupša o ile a kgetha go se kwe keletšo ya Modimo. Ka manyami, Kaine o ile a bolaya ngwanabo gomme a fetoga mmolai wa mathomo!—Gen. 4:2-8.

Nagana le ka mohlala wa Kgoši Usia. Mathomong Usia o be a dira dilo tše di lokilego mahlong a Jehofa gomme ka mehla a tsoma Modimo. Lega go le bjalo, ka manyami Usia o ile a senya botumo bja gagwe bjo bobotse ka go thoma go ikgogomoša. O ile a tsena ka tempeleng gore a fiše diorelo, gaešita le ge e be e se moperisita. Na o ile a fetoša monagano ge baperisita ba be ba mo kgalemela gore a se ikgogomoše ka go dira seo? Aowa. Usia o ile a “befelwa” gomme a gana keletšo ya bona. Ka baka leo, Jehofa o ile a mo otla ka lephera.—2 Dikor. 26:3-5, 16-20.

Ee, go na le dinako tšeo ka tšona go tlogago go nyakega gore re fetoše monagano. Mohlala wa mehleng yeno šo. Joachim o kolobeditšwe ka 1955, eupša ka 1978 a kgaolwa. Ka morago ga nywaga e 20, o ile a itshola gomme a bušetšwa ka phuthegong gore e be yo mongwe wa Dihlatse tša Jehofa. Morago bjale, mogolo yo mongwe o ile a mmotšiša gore ke ka baka la eng a ile a dumelela go feta nywaga e mentši gakaakaa a sa kgopele go bušetšwa. Joachim o ile a araba ka gore: “Ke be ke galefile e bile ke ikgantšha. Ke a itshola gore ke ile ka se kgopele go bušetšwa ka pela. Ge ke be ke kgaotšwe, ke be ke tseba gore Dihlatse tša Jehofa di ruta therešo.” Joachim o be a swanetše go fetoša monagano le go itshola.

Le rena re ka ikhwetša re le boemong bjo bo nyakago gore re fetoše monagano le ditsela tša rena. Eka re ka ikemišetša go dira bjalo gore re kgahliše Jehofa.—Ps. 34:8.