MMOPI wa rena o file batho seriti ka go ba nea mpho e sa bapišwego le selo ya tokologo ya boikgethelo. Go oketša moo, o šegofatša kudu bao ka go hloka boithati ba dirišago tokologo ya bona ya boikgethelo go tšwetša pele borapedi bja therešo le bao ba tagafatšago leina la gagwe le lekgethwa le go thekga morero wa gagwe o mogolo. Jehofa ga a nyake gore re ikokobeletše yena ka go ikwa re gapeletšega goba ka go ithola kgwara. Go e na le moo, o tšeela godimo kudu boineelo bja go tšwa pelong bjo bo tutuetšwago ke lerato la kgonthe le tebogo e tseneletšego.

Ka mohlala, ge Baisiraele ba be ba le lešokeng la Sinai, Jehofa o ile a ba laela gore ba age lefelo la borapedi. O itše: “Ntšhetšang Jehofa moneelo. Anke yo mongwe le yo mongwe wa pelo e ratago a o tliše gore e be moneelo o yago go Jehofa.” (Ek. 35:5) Moisiraele yo mongwe le yo mongwe o be a ka neela ka seo a ka se kgonago, le gona moneelo o mongwe le o mongwe wa boithatelo—go sa šetšwe gore e be e le eng goba o mokaakang—o be o ka dirišwa ka tsela ya maleba go tšwetša pele morero wa Modimo. Ba ile ba arabela bjang?

“Yo mongwe le yo mongwe yoo pelo ya gagwe e bego e mo šušumetša” le “yo mongwe le yo mongwe yoo moya wa gagwe o bego o mo hlohleletša” a tliša moneelo wa boithatelo, ‘yo mongwe le yo mongwe a dira seo ka pelo yeo e ratago.’ Banna le basadi ba ile ba tliša ka go rata dilo tše di latelago bakeng sa modiro wa Jehofa: dipelete, mangina, dipalamonwana, gauta, silifera, koporo, tlhale e talalerata, boya bjo bo tailwego ka mmala wa bophepolo bjo bohwibidu, lešela la mmala o mohwibiduhwibidu, lešela le boletiana la linene, boya bja pudi, matlalo a dikgapa ao a tailwego ka mmala o mohwibidu, matlalo a boleta, kota ya moduhlare, maswikana a bohlokwa, balesamo le makhura. Mafelelong, “ditlabakelo tšeo e be e le tše di lekanego modiro ka moka wo o bego o tla dirwa, e bile di feta tekanyo.”—Ek. 35:21-24, 27-29; 36:7.

Selo seo se ilego sa thabiša Jehofa kudu ke moya wa go nea ka go rata wa bao ba ilego ba thekga borapedi bja therešo, e sego dilo tšeo di bego di neetšwe. Le gona ba ile ba ithaopela go neela ka nako ya bona le matla a bona. Beibele e re “basadi ka moka bao ba bego ba na le dipelo tše bohlale ba ile ba ohla ka diatla tša bona.” Ee, “basadi ka moka ba dipelo tše bohlale ba šušumeletšega go ohla boya bja pudi.” Go feta moo, Jehofa o ile a nea Betsalele “bohlale, kwešišo, tsebo le bokgoni bja mošomo o mongwe le o mongwe wa diatla.” Ge e le gabotse, Modimo o ile a nea Betsalele le Oholiaba bokgoni bjo bo nyakegago bja go dira mešomo ka moka yeo ba bego ba laetšwe go e dira.—Ek. 35:25, 26, 30-35.

Ge Jehofa a be a botša Baisiraele gore ba ntšhe moneelo, o be a kgodišegile ka botlalo gore “yo mongwe le yo mongwe wa pelo e ratago” o be a tla thekga borapedi bja therešo. Ke moka o ile a šegofatša kudu bao ba ilego ba ikgafa ka go rata ka go ba nea tlhahlo le lethabo le legolo. Ka go re’alo, Jehofa o ile a bontšha gore ge a šegofatša moya wa boikgafo wa bahlanka ba gagwe, o kgonthišetša gore o ba nea bokgoni le didirišwa tše di nyakegago go phethagatša thato ya gagwe. (Ps. 34:9) Ge o dutše o hlankela Jehofa ka go hloka boithati, ruri o tla šegofatša moya wa gago wa boikgafo.