1. Ke mantšu afe ao batho ba tlwaetšego go a bolela?

BATHO ba bantši ba kile ba kwa mantšu a rego: ‘Dilo tše dingwe ga o di tšeele godimo go fihlela di se sa le gona.’ Na o kile wa ikwa bjalo? Ge motho a bile le dilo go tloga bjaneng, gantši ga a di tšeele godimo gakaalo. Ka mohlala, motho yo a golelago ka lapeng la bahumi a ka fo se tšeele godimo tše dintši tša dilo tšeo a nago le tšona. Se se ka ba bjalo ka bafsa bao ba sego ba hlwa ba kwešiša ka botlalo dilo tšeo di tlogago di le bohlokwa bophelong, ka ge ba se na phihlelo.

2, 3. (a) Bafsa ba Bakriste ba swanetše go phema’ng? (b) Ke’ng seo se ka re thušago go tšeela godimo seo re nago le sona?

² Ge e ba o le mofsa, mohlomongwe o le mahlalagading goba o le nywageng ya mathomong a bo-20, ke’ng sa bohlokwa go wena? Batho ba bantši lehono ba rata dilo tše di bonagalago—go gola tšhelete e ntši, ntlo e botse goba didirišwa tše di lego nakong tša thekinolotši. Lega go le bjalo, ge e ba dilo tše e le tšona feela tšeo re tshwenyegilego ka tšona, go na le selo sa bohlokwa seo se hlaelago—mahumo a moya. Ka manyami, batho ba dimilione lehono ga se ba tšwa ba thoma go tsoma mahumo a a moya. Lena bafsa bao ba godišitšwego ke batswadi bao e lego Bakriste le swanetše  go ba šedi gore le se ke la lebala bohlokwa bja bohwa bja moya bjo le bo neilwego. (Mat. 5:3) Go se tšeele mahumo a a moya godimo go ka feleletša ka manyami ao a ka go kgomago bophelo ka moka.

³ Lega go le bjalo, o ka thibela seo gore se se direge. Ke’ng seo se tlago go go thuša go tšeela godimo bohwa bja gago bja moya? Anke re ahlaahleng mehlala e itšego ya ka Beibeleng yeo e ka re thušago go bona gore ke ka baka la eng e le gabohlale go tšeela godimo bohwa bja rena bja moya. Mehlala ye re tlago go e ahlaahla e ka thuša bafsa le Mokriste yo mongwe le yo mongwe go tšeela godimo bohwa bja gagwe bja moya.

4. Samuele wa Pele 8:1-5 e re botša’ng ka barwa ba Samuele?

⁴ Go na le dipego tša ka Beibeleng tša batho bao ba ilego ba hwetša bohwa bjo bohlokwa bja moya eupša ba se bo tšeele godimo. Go bile bjalo ka lapeng la moporofeta Samuele yo a hlanketšego Jehofa go tloga bjaneng le yo a bego a ratwa kudu ke Modimo. (1 Sam. 12:1-5) Samuele o beetše barwa ba gagwe, e lego Joele le Abija, mohlala o mobotse wo ba bego ba swanetše go o latela. Lega go le bjalo, ga se ba ka ba o latela gomme ba ile ba fetoga marabele. Beibele e re botša gore ka go se swane le tatago bona, ba ile ba “kgopamiša kahlolo.”—Bala 1 Samuele 8:1-5.

5, 6. Barwa ba Josia le setlogolo sa gagwe ba ile ba itshwara bjang?

⁵ Go bile bjalo le ka barwa ba Kgoši Josia. Josia o ile a bea mohlala o mobotse kudu tabeng ya go rapela Jehofa. Ge puku ya Molao wa Modimo e be e hweditšwe gomme e balelwa Josia, o ile a dira boiteko bjo bogolo bja go latela ditaelo tša Jehofa. O ile a šoma ka thata go fediša borapedi bja medimo ya diswantšho nageng le go fediša mekgwa ya go dirišana le meoya e mebe gomme a kgothaletša setšhaba gore se kwe Jehofa. (2 Dikg. 22:8; 23:2, 3, 12-15, 24, 25) Ruri barwa ba gagwe ba be ba hweditše bohwa bjo bohlokwa kudu bja moya! Ge nako e dutše e eya, barwa ba gagwe ba bararo le setlogolo e ile ya ba dikgoši, eupša ga go le o tee wa bona yo a ilego a tšeela godimo seo a bego a se rutilwe.

⁶ Morwa wa Josia e lego Jehoahase o ile a mo hlatlama bogošing, eupša a dira dilo “tše mpe mahlong a Jehofa.” O ile a buša dikgwedi tše tharo feela pele kgoši e itšego ya Egipita e mo golega, gomme a hwela bothopša. (2 Dikg. 23:31-34) Ke moka morwarragwe e lego Jehoyakima a buša nywaga e 11. Le yena ga se a ka a tšeela godimo seo tatagwe a bego a mo rutile sona. Ka baka la bokgopo bja Jehoyakima, Jeremia o ile a porofeta ka yena gore: “O tla bolokwa bjalo ka ge eka go bolokwa pokolo.” (Jer. 22:17-19) Dikgoši tše dingwe tšeo di ilego tša hlatlama Josia—e lego morwa wa gagwe Tsedekia le setlogolo sa gagwe Jehoyakima—le tšona di be di se na tebogo; ga go le e tee ya tšona yeo e ilego ya kgetha go latela ditsela tša Josia tša go loka.—2 Dikg. 24:8, 9, 18, 19.

7, 8. (a) Solomone o ile a senya bohwa bja gagwe bja moya bjang? (b) Re ka ithuta’ng mehlaleng ya ka Beibeleng ya bao ba ilego ba senya bohwa bja bona bja moya?

⁷ Solomone ke kgoši e nngwe yeo e ilego ya hwetša bohwa bjo bogolo go tatago yona e lego Dafida. Gaešita le ge Solomone a be a godišitšwe gabotse moyeng gomme a ile a thoma go buša gabotse, ka morago o ile a se sa ba le taba le ditsela tša go loka. “Ya re mehleng ya ge Solomone a tšofala, basadi ba gagwe ba aroša pelo ya gagwe gore e latele medimo e šele; le gona pelo ya gagwe e be e se e feletšego go Jehofa Modimo wa gagwe go etša pelo ya Dafida tatagwe.” (1 Dikg. 11:4) Ka baka leo, Jehofa o ile a se sa amogela Solomone.

⁸ Go nyamiša gakaakang go bona gore banna ba bao ba godišitšwego gabotse bao gape ba bego ba ka dira se sebotse ba ile ba  se dire bjalo! Lega go le bjalo, ga se bafsa ka moka bao ba ilego ba ba bjalo mehleng ya Beibele, go fo swana le lehono. Anke re ahlaahleng mehlala e mebotse ya bafsa yeo bafsa ba Bakriste ba ka e ekišago.

9. Barwa ba Noa ba beile mohlala o mobotse bjang? (Bona seswantšho seo se lego mathomong a sehlogo.)

⁹ Barwa ba Noa ke mohlala o mobotse kudu. Tatago bona o ile a newa taelo ya gore a age areka le gore a tsenye ba lapa la gagwe ka go yona. Ga go na pelaelo gore barwa ba Noa ba ile ba bona bohlokwa bja go dira thato ya Jehofa. Ba swanetše go ba ba ile ba dirišana le tatago bona. Ge nako e dutše e eya, ba ile ba mo thuša go aga areka ke moka ba tsena ka go yona. (Gen. 7:1, 7) Ka morero ofe? Genesi 7:3 e re ba ile ba tsenya diphoofolo ka arekeng “gore mehuta ya tšona e dule e le gona lefaseng ka moka.” Le bona ba ile ba phološwa. Ka ge barwa ba Noa ba ile ba tšeela godimo seo tatago bona a bego a ba rutile sona, ba bile le tokelo ya go thuša go dira gore batho ba dule ba le gona lefaseng le le hlwekišitšwego le go tsošološa borapedi bja therešo.—Gen. 8:20; 9:18, 19.

10. Masogana a mane a Baheberu ao a bego a le Babilona a ile a bontšha bjang gore a tšeela godimo ditherešo tšeo a ithutilego tšona?

¹⁰ Nywagakgolo ka morago, masogana a mane a Baheberu a ile a bontšha gore seo a ithutilego sona se be se le bohlokwa kudu. Hanania, Mishaele, Asaria le Daniele ba ile ba išwa Babilona ka 617 B.C.E. E be e le masogana a mabotse le a bohlale ao a bego a ka se be le bothata bja go phela bjalo ka Bababilona. Eupša ga se a dira seo. Ditiro tša ona di bontšha gore a ile a gopola bohwa bja ona, seo a bego a se rutilwe. Masogana a a mane a ile a šegofatšwa kudu ka baka la ge a ile a kgomarela seo a se rutilwego bjaneng.—Bala Daniele 1:8, 11-15, 20.

11. Batho ba bangwe ba ile ba holwa bjang ke dilo tša moya tšeo Jesu a bego a di rutilwe?

¹¹ Re tla ba re se ra fetša go ahlaahla mehlala e mebotse ge re sa bolela ka Jesu, yena Morwa wa Modimo. Tatagwe o mo rutile dilo tše dintši gomme o ile a di tšeela godimo kudu. Go tšeela godimo dilo tšeo a di rutilwego go bonagala mantšung a gagwe ao a rego: “Ke bolela dilo tše go etša ge Tate a nthutile.” (Joh. 8:28) Le gona o be a kganyoga gore ba bangwe le bona ba holwe ke seo a ithutilego sona. O ile a botša mašaba a batho gore: “Le metseng e mengwe ke swanetše go bolela ditaba tše dibotse tša Mmušo wa Modimo, gobane ke sona se ke se rometšwego.” (Luka 4:18, 43) O ile a thuša batheetši ba gagwe go bona bohlokwa bja go “se [be] karolo ya lefase” le, leo gantši le sa tšeelego dilo tša moya godimo.—Joh. 15:19.

12. (a) Timotheo wa Bobedi 3:14-17 e šoma bjang go bafsa ba bantši lehono? (b) Bafsa ba Bakriste ba swanetše go ipotšiša dipotšišo dife?

¹² Go swana le masogana ao re boletšego ka ona, le wena o ka ba o godišitšwe ke batswadi bao ba ineetšego go Jehofa Modimo. Ge e ba go le bjalo, boemo bja gago bo ka ba bo swana gabotse le bjoo Mangwalo a bo hlalosago ka Timotheo. (Bala 2 Timotheo 3:14-17.) Batswadi ba gago ke bona ba go ‘rutilego’ ka Modimo wa therešo le kamoo o ka mo kgahlišago. E bile e ka ba e le bona ba thomilego go go ruta go tloga boseeng. Ga go na pelaelo gore se se go thušitše “go go hlalefišetša phologo yeo e lego mabapi le Kriste Jesu” le go go thuša gore o “swanelege ka botlalo” bakeng sa go hlankela Modimo. Bjale potšišo ya bohlokwa še: Na o tla tšeela godimo seo o se amogetšego? Go ka nyakega gore o itlhahlobe. Ipotšiše dipotšišo tše bjalo ka tše: ‘Ke ikwa bjang ka go ba karolo ya dihlatse tše dintši tše di botegago? Ke ikwa bjang ka go ba gare ga batho ba sego kae mo lefaseng lehono bao ba tsebjago  ke Modimo? Na ke tšeela godimo tokelo ye e kgolo ya moswananoši ya go tseba therešo?’

13, 14. Bafsa ba bangwe ba Bakriste ba lebeletšana le teko efe, eupša ke ka baka la’ng go ineela tekong yeo e ka se be gabohlale? Nea mohlala.

¹³ Bafsa ba bangwe bao ba godišitšwego ke batswadi ba Bakriste ba ka fo se bone phapano e kgolo magareng ga paradeise ya rena ya gona bjale ya moya le lefase la Sathane leo le sa kgahlišego. Ba bangwe ba ile ba ba ba leka go bona gore lefaseng go bjang. Eupša na o ka kitimela ka pele ga koloi e le feela gore o kwe gore go bohloko bjang—goba go kotsi gakaakang—go thulwa ke koloi? Aowa! Ka mo go swanago, ga go hlokagale gore re latswe ‘tsela ya kgobogo’ lefaseng le e le feela gore re bone kamoo seo se ka kwešago bohloko ka gona.—1 Pet. 4:4.

¹⁴ Ngwanabo rena Gener, yo a dulago kua Asia, o godišeditšwe ka lapeng la Bakriste. O kolobeditšwe a na le nywaga e 12. Lega go le bjalo, ge a be a le mahlalagading o ile a thoma go kgahlwa ke tša lefase le. O re: “Ke be ke nyaka go latswa seo go thwego ke tokologo yeo e hwetšwago lefaseng.” Gener o ile a thoma go phela maphelo a mabedi. Ge a na le nywaga e 15, o be a šetše a thomile go phela bjalo ka bagwera ba gagwe ba babe. O be a enwa bjala e bile a rogana go swana le bona. Gantši Gener o be a boa gae bošego, ka morago ga go bapala snooker le dipapadi tše šoro tša khomphutha le bagwera ba gagwe. Lega go le bjalo, ge nako e dutše e eya, o ile a thoma go lemoga gore menate ya lefase le ga e kgotsofatše. E be e le bophelo bjo bo se nago morero. Ge a hlalosa go boa ga gagwe ka phuthegong o re: “Ke sa lebana le ditlhohlo tše dintši, eupša ditšhegofatšo tše di tšwago go Jehofa di di feta kgole.”

15. Ke’ng seo bafsa bao ba sego ba godišwa ke batswadi ba Bakriste le bona ba swanetšego go naganišiša ka sona?

¹⁵ Ke therešo gore go na le bafsa ba bangwe bao ba kopanelago le phuthego bao ba sego ba godišwa ke batswadi ba Bakriste. Ge e ba o le yo mongwe wa bona, nagana gore ga bjale o na le tokelo e kgolo gakaakang ya go tseba Mmopi le go mo hlankela! Go na le batho ba dibilione lefaseng. Ka gona, ke tšhegofatšo e kgolo go ba gare ga bao Jehofa a ba bontšhitšego botho ka go ba gogela go yena le go ba utollela therešo ya Beibele. (Joh. 6:44, 45) Ke mo e ka bago motho o tee feela go ba 1 000 mo lefaseng yo a tsebago therešo, gomme o yo mongwe wa bona. Na seo ga se sa swanela go re thabiša ka moka ga rena, go sa šetšwe gore re ithutile therešo  bjang? (Bala 1 Bakorinthe 2:12.) Gener o re: “Meriri ya ka e a tšhaba ge ke nagana ka taba yeo. Ke ipotšiša gore ke nna mang nka tsebjago ke Jehofa, yena Mong wa legohle?” (Ps. 8:4) Kgaetšedi yo mongwe wa Mokriste yo a tšwago tikologong yona yeo o itše: “Barutwana ba thaba kudu ge morutiši wa bona a ba tseba. Ka gona ke tokelo e kgolo kudu go tsebja ke Jehofa, yena Mohlahli yo Mogolo!”

16. Ke kgetho efe e bohlale yeo bafsa ba Bakriste ba ka e dirago lehono?

¹⁶ Ka ge o na le tokelo e kgolo kudu ka tsela ye, ke ka baka la’ng o sa ikemišetše le go feta go ba gare ga ba sego kae bao ba dirilego phetho e nepagetšego bophelong? Ka go dira bjalo, o tla ba gare ga bahlanka ba Modimo ba bantši bao ba botegago. Go dira bjalo e tla ba gabohlale go feta go fo latela bafsa ba bantši bao ba fo latelago lefase le ba lebile phedišong.—2 Bakor. 4:3, 4.

17-19. Ke’ng se se ka go thušago go ba le pono e lekalekanego mabapi le go se swane le lefase?

¹⁷ Seo ga se bolele gore go fapana le lefase go tla dula go le bonolo. Lega go le bjalo, ke gabohlale gore re se swane le lefase. Ka mohlala: Nagana ka ramabelo yo a kitimago dipapading tša di-Olympic. Ga go pelaelo gore o swanetše go fapana le boramabelo ba bangwe gore a swanelege go tsenela dipapadi tšeo. O swanetše go itima dilo tše dintši tšeo di ka mo jelago nako le go mo šitiša, tša mo palediša go itlwaetša. Ka lehlakoreng le lengwe, go ikemišetša go se swane le dithaka tša gagwe go tla dira gore a be le nako e ntši ya go itlwaetša le go fihlelela pakane ya gagwe.

¹⁸ Lefase ga le na ponelopele ka bophelo. Ge o ka bonela dilo pele, wa fapana le lefase gomme wa se tšee karolo medirong ya lona e senyago boitshwaro le yeo e gobatšago moyeng, o tla “[swarelela] ka go tia bophelong bja kgonthe.” (1 Tim. 6:19) Kgaetšedi yo go boletšwego ka yena pejana o re: “Ge o ka emela seo o se dumelago, o tla thaba kudu mafelelong. Se se tla bontšha gore o na le sebete sa go dira se se fapanego le lefase la Sathane. Sa bohlokwa kudu, go bjalo ka ge eka o bona Jehofa Modimo a ikgantšha ka wena e bile a myemyela! Ge o ikwa ka tsela yeo o tla iteboga e le ruri!”

¹⁹ Bophelo ga bo na morero ge e ba motho a naganne feela ka seo a ka se hwetšago gona bjale. (Mmo. 9:2, 10) Ge e ba o le mofsa yo a naganišišago gabotse ka morero wa bophelo le gore o ka phela nako e telele gakaakang, ke gabohlale go phema ‘go sepela go etša ditšhaba’ gomme o phele bophelo bjo bo nago le morero e le ka kgonthe.—Baef. 4:17; Mal. 3:18.

20, 21. Re tla hwetša’ng ge e ba re ka dira diphetho tše dibotse, eupša go letetšwe gore re dire’ng?

²⁰ Ge e ba re ka dira diphetho tše dibotse, re tla phela bophelo bjo bo kgotsofatšago gona bjale gomme ra tla ra swanelega go “ja bohwa bja lefase”—go hwetša bophelo bjo bo sa felego. Re tlo hwetša ditšhegofatšo tše dintši kudu tše di kgahlišago e bile ditšhegofatšo tša gona ga re kgone le go di nagana ka moka. (Mat. 5:5; 19:29; 25:34) Ke therešo gore Modimo ga a fo re nea dilo. O nyaka gore re dire selo se itšego. (Bala 1 Johane 5:3, 4.) Eupša le ka mohla re ka se itsholele gore re ile ra mo hlankela ka potego!

²¹ Ruri ke tokelo e kgolo gore Modimo o re neile dilo tše dintši ka tsela ye! Re na le tsebo e nepagetšego ya Lentšu la gagwe e bile re kwešiša gabotse therešo ka yena le merero ya gagwe. Re thabela tokelo ya go bitšwa ka leina la gagwe le go ba Dihlatse tša gagwe. Modimo o re holofetša gore o ka lehlakoreng la rena. (Ps. 118:7) Anke ka moka ga rena, go sa šetšwe gore re bafsa goba re ba bagolo, re bontšhe tebogo ka go phela ka tsela yeo e bontšhago gore re tloga re nyaka go nea Jehofa ‘letago ka mo go sa felego.’—Baroma 11:33-36; Ps. 33:12.