GO BOLELA ditaba tše dibotse ke modiro o bohlokwa kudu woo o dirwago lefaseng lehono. Ke tokelo e kgolo kudu go emela Jehofa modirong wo wa go ruta. Lega go le bjalo, ka dinako tše dingwe e ka ba tlhohlo gore babulamadibogo le bagoeledi ba dule ba fišegela bodiredi. Ka baka la’ng?

Bagoeledi ba bangwe ba bolela le batho ba sego kae ge ba le bodireding bja ntlo le ntlo ka gobane ba bantši ba ba ba se gona ka gae. Le gona ge batho ba le gona ka gae, ba ka no se be le kgahlego molaetšeng wa Mmušo e bile ba ka re galefela. Bagoeledi ba bangwe ba na le tšhemo e kgolo le yeo e enywago eupša ba nagana gore ba ka se tsoge ba akareditše tšhemo ya bona. Ba bangwe ke kgale ba dira boboledi gomme ba nyamišitšwe ke gore bofelo ga se bja hlwa bo fihla.

Go tlo ba le ditlhohlo bodireding bja rena tšeo di ka kgomago phišego ya rena. Re phela lefaseng leo le laolwago ke “yo kgopo,” e lego Sathane Diabolo, ka gona re letetše gore go bolela ditaba tše dibotse go be thata.—1 Johane 5:19.

Go sa šetšwe ditlhohlo tšeo o lebeletšanago le tšona bodireding, o ka kgodišega gore Jehofa o tla go thuša go di fenya. Eupša ke’ng seo o ka se dirago go oketša phišego ya gago bodireding? Anke re ahlaahleng ditšhišinyo tše sego kae.

Ngwaga o mongwe le o mongwe go kolobetšwa batho ba diketekete gore e be Dihlatse tša Jehofa. Ge e ba o sa tšwa go kolobetšwa, o ka ithuta mo gontši go bao e lego kgale ba dira boboledi. Le gona ge e ba e le kgale o le mogoeledi, na o ka thuša go tlwaetša bao e sa tšwago go ba bagoeledi? O tla thaba kudu ge o ka dira bjalo.

Jesu o be a tseba gore barutiwa ba gagwe ba be ba hloka tlhahlo gore e be barutiši bao ba atlegago, e bile o ile a ba bontšha kamoo ba swanetšego go dira boboledi ka gona. (Luka 8:1) Lehono, bao e sa tšwago go ba bagoeledi le bona ba hloka tlhahlo e swanago gore ba atlege bodireding.

Ga se ra swanela go nagana gore ge motho yo e sa tšwago go ba mogoeledi a eya bodireding, napile o ithuta go ruta. Re swanetše go mo hlahla ka  botho le ka lerato. Mogoeledi yo a nago le phihlelo o swanetše go mo ruta (1) kamoo a ka lokišetšago le go itlwaetša seo a swanetšego go se botša mong wa ntlo, (2) kamoo a ka boledišanago le batho, (3) kamoo a ka sepedišago dikgatišo, (4) kamoo a ka dirago maeto a go boela go bao ba thabelago (5) le kamoo a ka thomago thuto ya Beibele. Motho yo e sa tšwago go ba mogoeledi a ka atlega kudu tšhemong ge e ba a lebelela kamoo mogoeledi yo a nago le phihlelo a rutago ka gona gomme a mo ekiša. (Luka 6:40) Le gona o tla ikholofela kutšwanyana ge a tseba gore go na le motho yo a tlago go mo thuša ge go nyakega. Go reta motho yo e sa tšwago go ba mogoeledi le go mo nea ditšhišinyo le gona go ka mo thuša.—Mmoledi 4:9, 10.

Go sa šetšwe maiteko a gago ka moka a go boledišana le beng ba dintlo, ka dinako tše dingwe poledišano e botse yeo o tla bago le yona ke ge o boledišana le motho yo o sepelago le yena bodireding. Gopola gore Jesu o ile a roma barutiwa ba gagwe bodireding “ka babedi ka babedi.” (Luka 10:1) Ge ba dutše ba šoma gotee, ba be ba kgothatšana le go matlafatšana. Re na le sebaka se sebotse sa gore “re kgothatšane” ge re šoma le bana babo rena le dikgaetšedi bodireding.—Baroma 1:12.

Le ka boledišana ka’ng? Na yo mongwe wa lena o sa tšwa go ba le phihlelo e kgothatšago? Na o ithutile ntlha e kgahlišago thutong ya motho ka noši goba borapeding bja lapa? Na o kgothaditšwe ke selo se itšego seo o se kwelego dibokeng? Ka dinako tše dingwe o ka šoma tšhemo le mogoeledi yo o sa mo tsebego gabotse. Mohlomongwe o ka mmotšiša gore o hweditše therešo bjang. Ke’ng seo se mo kgodišitšego gore wo ke mokgatlo wa Jehofa? Ke ditokelo goba diphihlelo dife tšeo a bilego le tšona? Mohlomongwe le wena o ka bolela ka diphihlelo tšeo o bilego le tšona. Go sa šetšwe kamoo batho ba arabelago ka gona bodireding, ge o šoma le motho yo mongwe, le na le sebaka se sebotse sa go “agana.”—1 Bathesalonika 5:11.

E le gore re dule re fišega bodireding, re swanetše go kaonefatša thuto ya rena ya motho ka noši. “Mohlanka yo a botegago le wa temogo” o tšweletša ditaba tše dintši tšeo re ka ithutago tšona. (Mateo 24:45) Anke re ahlaahleng mohlala o tee wa tše dingwe tša ditaba tše di kgahlišago bakeng sa thuto ya motho ka noši: Ke ka baka la’ng modiro wa boboledi o le bohlokwa kudu? Lepokisi le le rego “ Ke ka Baka la Eng o Swanetše go Dula o Fišegela Bodiredi?” le nea mabaka a mangwe.

 Go hlahlobišiša dintlha tšeo di lokeleditšwego lepokising leo go ka go kgothaletša go tšwela pele o fišega bodireding. Iphe mošongwana wa go ngwala mabaka a mangwe a Mangwalo a gore o dire boboledi ka phišego. Ke moka o naganišiše ka mabaka ao. Ge o dira bjalo, o tla fišega kudu bodireding.

Ka mehla mokgatlo wa Jehofa o šišinya ditsela tša go re thuša go kaonefatša bodiredi bja rena. Ka mohlala, go tlaleletša modirong wa rena wa ntlo le ntlo, re ka leka go ngwala mangwalo, go nea bohlatse ka mogala, go dira boboledi seterateng goba mafelong a mangwe a batho bohle le go nea bohlatse bjo bo sa rulaganyetšwago goba go bolela le batho mafelong a bona a mošomo. Mohlomongwe re ka leka le go dira boboledi mafelong ao go nago le Dihlatse tše sego kae goba moo di sego gona.

Na o ikemišeditše go leka mekgwa e mefsa? Ba bantši bao ba lekilego ditšhišinyo tše ba atlegile. Ela hloko mehlala e latelago e meraro.

Kgaetšedi yo mongwe yo a bitšwago April o ile a leka go diriša e nngwe ya ditšhišinyo tše di tšwelelago ka go Tirelo ya Mmušo tša kamoo re ka thomago dithuto tša Beibele. O ile a kgopela batho ba bararo bao a šomago le bona go ba swarela thuto ya Beibele. April o ile a makala le go thaba kudu ge boraro bja bona ba dumela go ithuta e bile ba thoma go ba gona dibokeng.

Le gona re kgothaleditšwe go nyaka batho bao ba ka kgahlwago ke dihlogo tše itšego ka dimakasineng tša rena. Molebeledi yo mongwe wa tikologo kua United States o ile a nea baokamedi ba mabenkele a dithaere ba tikologong e itšego Phafoga! yeo e bego e na le sehlogo se se bolelago ka  dithaere. Le gona yena le mosadi wa gagwe ba ile ba iša makasine wa Phafoga! wo o bego o na le lelokelelo la dihlogo tše di rego “Understanding Your Doctor” diofising tša ka godimo ga tše 100 tša dingaka. O re maeto a a ile a thuša batho go tlwaelana le modiro wa rena wa boboledi le dikgatišo tša rena. Ka morago ga gore molebeledi yo wa tikologo le mosadi wa gagwe ba tsebe batho ba tšhemong yeo gakaone, ba ile ba kgona go dira maeto a go boela a mantši.

Kgaetšedi yo mongwe yo a bitšwago Judy o ile a ngwalela ntlongkgolo a leboga tšhišinyo ya gore re nee bohlatse ka mogala. O itše mmagwe, yo a bego a na le nywaga e 86 e bile a na le mathata a mantši a tša maphelo, gantši o be a nea bohlatse ka mogala. Ka baka leo, o ile a kgona go swarela mokgekolo yo a bego a na le nywaga e 92 thuto ya Beibele!

Ditšhišinyo tšeo di lego ka dikgatišong tša rena ruri di a šoma. Di leke! Di ka go thuša gore o dule o thabile le go fišegela bodiredi.

Ke’ng seo se dirago gore re atlege modirong wa boboledi? Ga se palo ya dikgatišo tšeo re di sepedišago, palo ya dithuto tša Beibele tšeo re di swarago, goba palo ya batho bao re ba thušago go ba Dihlatse tša Jehofa. Nagana ka Noa. Ke batho ba bakae bao Noa a ba thušitšego go ba barapedi ba Jehofa ka ntle le lapa la gagwe? Go sa šetšwe seo, Noa o ile a atlega modirong wa gagwe wa boboledi. Sa bohlokwa ke gore re hlankele Jehofa ka potego.—1 Bakorinthe 4:2.

Bagoeledi ba bantši ba lemogile gore e le gore ba thabele modiro wa boboledi, ba swanetše go ipeela dipakane tšeo ba ka di fihlelelago. Tše dingwe tša dipakane tšeo ke dife? Tše dingwe tša tšona di lokeleditšwe lepokising leo le rego, “ Ipeele Dipakane Tšeo o ka di Fihlelelago.”

Kgopela Jehofa gore a go thuše go thabela bodiredi le go atlega. Ge o fihlelela dipakane tša gago, o tla kgotsofatšwa ke go tseba gore o dira sohle seo o ka se kgonago go bolela ditaba tše dibotse.

Ke therešo gore go bolela ditaba tše dibotse e ka ba tlhohlo. Eupša go na le dilo tšeo o ka di dirago gore o fišege bodireding. Eba le dipoledišano tše di kgothatšago le motho yo o šomago le yena bodireding, eba le thuto ya motho ka noši ya ka mehla le yeo e holago, leka go diriša ditšhišinyo tša mohlanka yo a botegago le wa temogo, gomme o ipeele dipakane tšeo o ka di fihlelelago. Sa bohlokwa le go feta, gopola gore Jehofa Modimo o go neile tokelo ya go bolela ditaba tše dibotse o le yo mongwe wa Dihlatse tša gagwe. (Jesaya 43:10) Ee, o tla thaba kudu ge o dutše o fišegela bodiredi!